ដោយ ស៊ឺន ចែងចើន
យុវជនខ្មែរក្រោមម្នាក់ ប្រឈម នឹងការគំរាមកំហែងចាប់ខ្លួន ពីអាជ្ញាធរវៀតណាម បើនៅតែបង្ហោះវីដេអូរិះគន់រដ្ឋាភិបាលវៀតណាម តាមរយៈបណ្ដាញសង្គម និងផ្តល់ព័ត៌មានទៅខ្មែរក្រោម នៅក្រៅស្រុក ពីភាពមិនប្រក្រតីរបស់អាជ្ញាធរមូលដ្ឋាន ដែលបានដើរស្រង់ស្ថិតិពលរដ្ឋរងគ្រោះដោយសារជម្ងឺកូវីដ-១៩ ឲ្យទទួលអំណោយពីរដ្ឋាភិបាល ប៉ុន្តែ មានតែឈ្មោះពលរដ្ឋជាសាច់ញាតិរបស់ជនជាតិវៀតណាម ។ ការគំរាមចាប់ខ្លួននេះ ធ្វើឡើងបន្ទាប់ពីយុវជនខ្មែរក្រោម ឈ្មោះ យ៉ាញ់ មិញក្វាង នៅខេត្តឃ្លាំង បានចូលខ្លួនទៅបំភ្លឺជាលើកទីពីរ កាលពីថ្ងៃទី ៣ ខែកក្កដា ម្សិលមិញនេះ ។
ថ្លែងប្រាប់វិទ្យុសំឡេងកម្ពុជាក្រោម ទាំងអារម្មណ៍ភិតភ័យ យុវជន យ៉ាញ់ មិញក្វាង ដែលមានស្រុកកំណើត នៅភូមិស្រឡូង ឃុំជ្រោយទឹម ស្រុកបាយឆៅ នៃខេត្តឃ្លាំង ឲ្យដឹងថា លោកត្រូវបានឃុំខ្លួនជាង ៣ ម៉ោង នៅក្នុងការិយាល័យនគរបាលឃុំជ្រោយទឹម ដោយសារតែលោកមិនព្រមចុះហត្ថលលេខា នៅលើលិខិតកំណត់ហេតុមួយច្បាប់ ដែលបានសរសេររួចជាស្រេច ។ លោកថា ខ្លឹមសារនៅក្នុងកំណត់ហេតុនោះ នរគបាលបានបញ្ជាក់ប្រាប់លោកថា ឲ្យបញ្ឈប់ថតវីដេអូចោទប្រកាន់អាជ្ញាធរមូលដ្ឋានវៀតណាម ពីការរើសអើងជាតិសាសន៍ ពាក់ព័ន្ធ នឹងការចែកជំនួយ នៅក្នុងរដូវកាលនៃវិបត្តិកូវីដ-១៩ និងហាមមិនឲ្យទាក់ទងផ្តល់ព័ត៌មានពីបញ្ហានេះ ទៅខ្មែរក្រោម នៅក្រៅប្រទេស បើពុំនោះទេ លោក នឹងត្រូវចាប់ខ្លួន ។ បន្ថែមពីលើនេះ លោកថា អាជ្ញាធរវៀតណាម បានធ្វើការដកហូតទូរស័ព្ទរបស់លោក ហើយបានលុបនូវរាល់ការបង្ហោះរូបភាព និងវីដេអូរ ចេញពីគណនីហ្វេសប៊ុកផ្ទាល់ខ្លួនលោកទៀតផង ។
ទោះជាយ៉ាងនេះក្តី យុវជនខ្មែរក្រោមរូបនេះ ឲ្យដឹងទៀតថា ចំពោះសំណើរសុំឲ្យជួយដោះស្រាយជូនពលរដ្ឋខ្មែរក្រោមក្រីក្រ នឹងទទួលបានប្រាក់ឧបត្ថម្ភពីរដ្ឋាភិបាល ដោយស្មើភាពគ្នានោះទេ អាជ្ញាធរបានសន្យាថា នឹងពិនិត្យដោះស្រាយជូននៅពេលខាងមុខ ។
គួរជម្រាបជូនថា កាលពីពេលកន្លងទៅថ្មីៗ នេះ យុវជន យ៉ាញ់ មិញក្វាង បានបង្ហោះវីដេអូតាមហ្វេសប៊ុក ដោយសម្តែងការតវ៉ាទាមទារឲ្យអាជ្ញាធរផ្ដល់អំណោយ ឬប្រាក់ឧបត្ថម្ភដល់ប្រជាពលរដ្ឋក្រីក្រឲ្យមានតម្លាភាព និងដោយគ្មានការរើសអើងជាតិសាសន៍ ។ លោកអះអាងនៅក្នុងវីដេអូនោះថា អាជ្ញាធរមូលដ្ឋានជ្រើសរើសអ្នកក្រីក្រ ដោយប្រកាន់ខ្មែរក្រោម និងជនជាតិវៀតណាម និងមិនបានជ្រើសរើសអ្នកក្រពិតប្រាកដ ដែលលក្នុងនោះ ក៏មានគ្រួសារលោក និងគ្រួសារខ្មែរក្រោមផ្សេងទៀត កំពុងតែជួបប្រទះទុក្ខលំបាកយ៉ាងខ្លាំង តែមិនទទួលបានជំនួយ ពីអាជ្ញាធរវៀតណាមឡើយ ។ លោកថា អ្នកនៅក្នុងភូមិរបស់លោកជាច្រើនគ្រួសារ បាត់បង់ចំណូលដោយសារវិបត្តិជំងឺកូវីដ-១៩ ប៉ុន្តែ ពេលអាជ្ញាធរចុះចែកអំណោយ បែរជាមិនរដាក់បញ្ចូលឈ្មោះរបស់ពួកគាត់ ចូលទៅបញ្ជីអ្នកក្រីក្រ ដើម្បីទទួលបានប្រាក់ឧបត្ថម្ភនោះទេ ។ លោកចោទពួកអាជ្ញាធរមូលដ្ឋាន ថា បានឃុបឃិតគ្នាប្រព្រឹត្តអំពើពុករលួយ និងរើសអើងជាតិសាសន៍ខ្មែរក្រោម ដោយចុះស្រង់យកតែឈ្មោះជនជាតិវៀតណាមប៉ុណ្ណោះ ។
សូមបញ្ជាក់ផងដែរថា រដ្ឋាភិបានៃប្រទេសវៀតណាម បានបញ្ចេញកញ្ចប់ថវិកាជំនួយក្នុងគ្រាមានជំងឺរាតត្បាត មានទឹកប្រាក់ប្រមាណ ២,៧៣ ពាន់លានដុល្លា សម្រាប់ជួយពលរដ្ឋរងផលប៉ះពាល់ពីជំងឺកូវីដ-១៩ សម្រាប់រយៈពេល ៣ ខែ ខណៈរដ្ឋាភិបាលកំពុងដាក់ចេញវិធានការជាបន្តបន្ទាប់ ដើម្បីប្រយុទ្ធប្រឆាំង នឹងការរាតត្បាតរបស់មេរោគ ។ ក្រៅពីនេះ វៀតណាម ក៏បានផ្តល់ទុនមូលនិធិ សម្រាប់ជួយដល់អាជីវកម្ម និងពលរដ្ឋ ដែលមិនអាចសងបំណុលធនាគារ និងបន្តប្រតិបត្តិការអាជីវកម្មខ្លួនបាន ក្រោមឥទ្ធិពលមេរោគកូវីដ-១៩ ផង ។
គិតមកដល់ពេលនេះ យុវជនខ្មែរក្រោម ៤ នាក់ហើយ ត្រូវអាជ្ញាធរវៀតណាម ខេត្តព្រះត្រពាំង និងខេត្តឃ្លាំង បានកោះហៅទៅសម្លុតបំភ័យ និងពិន័យជាប្រាក់យ៉ាងធ្ងន់ធ្ងរ និងព្រមានចាប់ខ្លួន បើយុវជនទាំងនោះ នៅតែប្រើប្រាស់បណ្ដាញសង្គមហ្វេសប៊ុក និយាយពីប្រវត្តិទឹកដីកម្ពុជាក្រោម និងហ៊ានបញេ្ចញមតិ ទាមទារឲ្យរដ្ឋាភិបាលវៀតណាម គោរពសិទ្ធិរបស់ខ្លួន ក្នុងនាមជាជនជាតិដើមម្ចាស់ស្រុក នៅដែនដីកម្ពុជាក្រោម ។ អាជ្ញាវៀតណាម បានយកមាត្រាមួយនៃច្បាប់សន្តិសុខលើប្រព័ន្ធអ៊ីនធឺណិត ដែលអាជ្ញាធរចាត់ទុកថា ក្រុមយុវជនខ្មែរក្រោមទាំងនោះ បានប្រព្រឹត្តល្មើសទៅ នឹងច្បាប់អ៊ីនធឺណិតរបស់ប្រទេសវៀតណាម ដោយប្រើប្រាស់បណ្តាញសង្គម ចែករំលែក និងផ្សព្វផ្សាយព័ត៌មានមិនពិត តាមប្រព័ន្ធអ៊ីនធឺណិត ធ្វើឲ្យប៉ះពាល់ដល់ស្ថាប័នរដ្ឋអំណាចវៀតណាម ។ យោងតាម កថាខណ្ឌ ១ នៃមាត្រា ១០១ នៃក្រិត្យលេខ 15/2020/NĐ-CP របស់រដ្ឋាភិបាល ចុះថ្ងៃទី ៣ ខែកុម្ភះឆ្នាំ ២០២០ បានចែងអំពីការដាក់ទណ្ឌកម្ម ប្រឆាំង នឹងការរំលោភផ្នែករដ្ឋបាល ក្នុងវិស័យប្រៃសណីយ៍ ទូរគមនាគមន៍ ព័ត៌មានវិទ្យា ប្រេកង់វិទ្យុ បច្ចេកវិទ្យាព័ត៌មាន និងប្រតិបត្តិការអេឡិចត្រូនិច ដែលត្រូវពិន័យជាប្រាក់ ចំនួន ៧.៥០០.០០០ ដុង ឬស្មើ នឹង ៣២០ ដុល្លារ ៕
