ដោយ យាង សុធារិន្ទ
គណបក្សកុម្មុយនិស្តវៀតណាម កាលពីថ្ងៃទី ២៥ ខែមករា ឆ្នាំ ២០២១ បានបើកមហាសន្និបាត លើកទី ១៣ ដើម្បីជ្រើសរើសថ្នាក់ដឹកនាំកំពូលៗ ឬសសរស្តម្ភថ្នាក់ដឹកនាំចំនួន ៤ រូប គឺលេខាបក្ស ប្រធានាធិបតី នាយករដ្ឋមន្រ្តី និងប្រធានរដ្ឋសភា ដើម្បីបន្តដឹកនាំប្រទេស នៅក្នុងរយៈពេល ៥ ឆ្នាំទៅមុខទៀត ពីឆ្នាំ ២០២១ ដល់ ២០២៥ ។
តើអ្នកណាខ្លះត្រូវបានមហាសន្និបាតបក្សជ្រើសរើស ? តើពួកគេមានប្រវត្តិ និងផ្នត់គំនិត នយោបាយបែបណា ? ហេតុអ្វីបានជាពួកគេត្រូវបានមហាសន្និបាតជ្រើសរើស ? តើមានការ ប្រជែងអំណាចគ្នាយ៉ាងដូចម្តេចខ្លះនៅក្នុងបក្សកុម្មុយនិស្តវៀតណាម ? ។
គណបក្សកុម្មុយនិស្តវៀតណាមត្រូវបានបង្កើតឡើងនៅឆ្នាំ ១៩៣០ ដោយ ហូ ជី មិញ ។ នៅក្នុងមហាសន្និបាតលើកទី ១៣ ដែលមានរយៈពេល ៨ ថ្ងៃ និងធ្វើឡើងដោយបិទទ្វារ មានប្រតិភូចំនួន ១៥៨៧ នាក់ចូលរួម ដែលប្រតិភូទាំងនេះត្រូវបានជ្រើសរើសចេញបក្ខជន ទាំងជាង ៥ លាននាក់ មកពីខេត្ត-ក្រុងចំនួន ៦៣ នៃប្រទេសវៀតណាម ។ ប្រតិភូទាំង ១៥៨៧ នាក់នេះ ត្រូវបោះឆ្នោតជ្រើសរើសសមាជិកគណៈកម្មាធិការមជ្ឈិមបក្ស (Central Committee) ចំនួន ២០០ នាក់ ហើយសមាជិកគណៈកម្មាធិការមជ្ឈិមបក្សទាំង ២០០ នាក់នេះ ត្រូវបោះឆ្នោតមួយជំហានទៀត ដើម្បីជ្រើសរើសសមាជិកការិយាល័យនយោបាយ (members of politburo) ចំនួន ១៨ នាក់ ដើម្បីដឹកនាំប្រទេស ។
សមាជិកការិយាល័យនយោបាយទាំង ១៨ នាក់ នៃបក្សកុម្មុយនិស្តវៀតណាម មានរាប់ បញ្ចូលចាប់ពីលេខាបក្ស ប្រធានាធិបតី នាយករដ្ឋមន្រ្តី ប្រធានរដ្ឋសភា រដ្ឋមន្រ្តីនៃក្រសួងស្ថា ប័ននានា លេខាបក្សប្រចាំទីក្រុងធំៗ ។ល។
បើនិយាយពីសសរស្តម្ភថ្នាក់ដឹកនាំទាំង ៤ រូប គឺលេខាបក្ស ប្រធានាធិបតី នាយករដ្ឋមន្រ្តី និងប្រធានរដ្ឋសភា គេបានដឹងច្បាស់ហើយថា អ្នកដែលត្រូវបានមហាសន្និបាតបក្សជ្រើស រើសជាលេខាបក្ស គឺលោក ង្វៀន ភូ ត្រុង Nguyen Phu Trong ។ ចំណែកបុគ្គល ៣ រូបផ្សេង ទៀត ដែលគេរំពឹងថានឹងឡើងកាន់តួនាទីកំពូលៗនៅវៀតណាម រួមមាន លោក ង្វៀន សិន ហ្វុក (Nguyen Xuan Phuc) បច្ចុប្បន្នជានាយករដ្ឋមន្រ្តី នឹងឡើងទៅកាន់តំណែងជា ប្រធានាធិបតី ។ លោក ហ្វាម មិន ជិន (Pham Minh Chinh) បច្ចុប្បន្នមានតួនាទីជាសមាជិក ការិយាល័យនយោបាយ នៃបក្សកុម្មុយនិស្តវៀតណាម រំពឹងថានឹងឡើងទៅកាន់តំណែងជា នាយករដ្ឋមន្រ្តី ជំនួស លោក ង្វៀន សិន ហ្វុក ។ ចុងក្រោយគឺ លោក វឿង ឌិញ វ៉េ (Vuong Dinh Hue) ដែលគេរំពឹងថានឹងឡើងទៅធ្វើជាប្រធានរដ្ឋសភា ជំនួសតំណែងអ្នកស្រី ង្វៀន ធី គឹម ងឹន (Nguyen Thi Kim Ngan) ដែលជាប្រធានរដ្ឋសភាសព្វថ្ងៃ ។
ប៉ុន្តែ តំណែងនៃថ្នាក់ដឹកនាំទាំង ៣ រូបចុងក្រោយនេះ ត្រូវឆ្លងកាត់ការបោះឆ្នោតផ្តល់សេចក្តី ទុកចិត្តពីសមាជិករដ្ឋសភាជាមុនសិន ដែលគេគ្រោងធ្វើនៅក្នុងខែមីនាខាងមុខនេះ ។
តើលោក ង្វៀន ភូ ត្រុង ដែលត្រូវបានមហាសន្និបាតជ្រើសរើសជាលេខាបក្សជាមនុស្ស បែបណា ?
កើតនៅឃុំ ដុង ហូយ (Dong Hoi) ស្រុក ដុង អាន់ (Dong Anh) ទីក្រុង ហាណូយ (Hanoi) លោក ង្វៀន ភូ ត្រុង បានចូលរួមជាមួយបក្សកុម្មុយនិស្តវៀតណាមនៅឆ្នាំ ១៩៦៧ ។ លោកបានសិក្សាផ្នែកទស្សនវិជ្ជា សេដ្ឋកិច្ច-នយោបាយ និងជាអ្នកកុម្មុយនិស្តនិយមឆ្អិនឆ្អៅ ។
លោកបានកាន់តំណែងកំពូលៗ ជាច្រើននៅក្នុងប្រទេសវៀតណាម ។ លោកបានធ្វើជាលេខា បក្សកុម្មុយនិស្តវៀតណាម ២ អាណត្តិជាប់គ្នារួចហើយ មុននឹងត្រូវបានជ្រើសរើសឱ្យធ្វើជា លេខាបក្សជាថ្មី សម្រាប់អាណត្តិទី ៣ ពីឆ្នាំ ២០២១ ដល់ ២០២៥ ។ លោកធ្លាប់ធ្វើជា ប្រធានាធិបតី ធ្វើជាប្រធានរដ្ឋសភា និងជាសមាជិក នៃការិយាល័យនយោបាយបក្សកុម្មុយ និស្តវៀតណាម ចំនួន ៦ អាណត្តិជាប់ៗ គ្នា ។
ប៉ុន្តែ ប្រការដែលគួរឱ្យចំលែកនៅត្រង់ថា បើទោះជាបច្ចុប្បន្នលោក ង្វៀន ភូ ត្រុង មានអាយុ ៧៧ ឆ្នាំ និងត្រូវបានគេដឹងថាមានសុខភាពមិនសូវល្អប៉ុន្មានក្តី ហេតុអ្វីបានជាមហា សន្និបាតនៅតែជ្រើសរើសលោកឱ្យកាន់តួនាទីជាលេខាបក្ស ៣ អាណត្តិជាប់ៗគ្នាទៀត ? ។
ត្រង់ចំណុចនេះ ប្រធានផែនការ នៃសហព័ន្ធខ្មែរកម្ពុជាក្រោម លោក ត្រឹង ម៉ាន់រិន្ទ បញ្ចេញ ទស្សនៈថា លោក ង្វៀន ភូ ត្រុង គឺជាមនុស្សល្មោភអំណាច និងហ៊ានធ្វើអ្វីៗ គ្រប់យ៉ាងដើម្បី ការពារអំណាចរបស់ខ្លួន បើទោះជាខុសទៅនឹងច្បាប់របស់វៀតណាមក្តី ។
លោក ត្រឹង ម៉ាន់រិន្ទ បញ្ជាក់ថា លោក ង្វៀន ភូ ត្រុង ត្រូវតែក្រាញននៀលអំណាចនៅក្នុងបក្ស ដោយសារតែលោកមិនទុកចិត្តអ្នកផ្សេង ខ្លាចពេលឡើងគ្រប់គ្រងបក្ស មិនស្មោះត្រង់នឹងបក្ស ហើយអាចធ្វើឱ្យបក្សកុម្មុយនិស្តរលំរលាយ ។ មិនមែនថានៅវៀតណាមគ្មានអ្នកមាន សមត្ថភាពធ្វើជាលេខាបក្សដូចលោក ង្វៀន ភូ ត្រុង នោះទេ ។
ចំណុចគួរឱ្យកត់សម្គាល់ដែរនោះ ថ្នាក់ដឹកនាំទាំង ៤ សម្រាប់អាណត្តិថ្មីនេះ គឺសុទ្ធសឹងតែជា មនុស្សមកពីភូមិភាគខាងជើងនៃប្រទេសវៀតណាម ។ លោក ត្រឹង ម៉ាន់រិន្ទ ថាប្រការនេះ ជាការបង្ហាញឱ្យឃើញនូវភាពមិនចុះសម្រុងគ្នារវាងអ្នកនយោបាយនៃភូមិភាគខាងជើង និងភូមិភាគខាងត្បូងរបស់វៀតណាម ។ ទោះជាបែបនេះក្តី លោកសន្និដ្ឋានថា នៅពេលអស់ពីលោក ង្វៀន ភូ ត្រុង ទៅ បក្សកុម្មុយនិស្តវៀតណាមនឹងជួបការបែកបាក់ធ្ងន់ធ្ងរ ។
ការងារធំបំផុតមួយដែលលោក ង្វៀន ភូ ត្រុង ប្តេជ្ញាចិត្តបន្តធ្វើគឺកំចាត់អំពើពុករលួយនៅក្នុង ប្រទេសដែលនៅសេសសល់ ។ លោក ភូ ត្រុង ក៏ដឹងខ្លួនឯងដែរថា អំពើពុករលួយកំពុងធ្វើឱ្យ ពលរដ្ឋវៀតណាមខឹងសម្បារ ហើយដែលវានឹងធ្វើឱ្យពលរដ្ឋបាត់បង់ការគោរពដល់ បក្សកុម្មុយនិស្តវៀតណាម ។
ទោះជាបែបនេះក្តី លោក ត្រឹង ម៉ាន់រិន្ទ យល់ថា អ្នកនយោបាយវៀតណាមតែងប៉ែងជើងគ្នា ទៅវិញទៅមក ។ ពេលមួយឡើងកាន់អំណាចប៉ែងមួយទៀតដែលអស់អំណាច ហើយការ ប៉ែងជើងគ្នានេះ គឺដើម្បីការពារបក្ខពួក ឬក្រុមរបស់ខ្លួន ។ លោក ត្រឹង ម៉ាន់រិន្ទ ថា ដូច្នេះហើយ រូបភាពនៃការប្រជែងអំណាចគ្នាត្រូវបានគេមើលឃើញកើតឡើងរវាងលោក ង្វៀន ភូ ត្រុង និងលោក ង្វៀន សិន ហ្វុក ដែលជានាយករដ្ឋមន្រ្តីមិនទាន់ផុតអាណត្តិ ។
តើលោក ង្វៀន សិន ហ្វុក ជានរណា ?
លោក ង្វៀន សិន ហ្វុក (Nguyen Xuan Phuc) បច្ចុប្បន្នមានតំណែងជានាយករដ្ឋមន្រ្តី និងត្រូវ គេរំពឹងថានឹងក្លាយជាប្រធានាធិបតី សម្រាប់អាណត្តិថ្មី ។
បច្ចុប្បន្នមានអាយុ ៦៧ ឆ្នាំ លោក ង្វៀន សិន ហ្វុក មានស្រុកកំណើតមកពីខេត្ត ក្វាង ណាម (Quang Nam) ដែលឋិតនៅភូមិភាគកណ្តាល នៃប្រទេសវៀតណាម ដែលជាអតីតទឹកដី នៃនគរចំប៉ា ។ លោកធ្លាប់កាន់តួនាទីជាអនុប្រធានរដ្ឋសភា ជាសមាជិកគណៈកម្មាធិការ មជ្ឈិមបក្ស និងជាសមាជិក នៃការិយាល័យនយោបាយ បក្សកុម្មុយនិស្តវៀតណាម ។
បើទោះជាលោក វៀន សិន ហ្វុក មានដើមកំណើតនៅភូមិភាគកណ្តាលក្តី លោកត្រូវបាន ពួកកុម្មុយនិស្តយកទៅបណ្តុះបណ្តាល បំពាក់បំប៉ន មនោគមវិជ្ជាកុម្មុយនិស្ត នៅភូមិភាគខាង ជើងតាំងពីលោកមានអាយុប្រហែល ១២ ឆ្នាំ ក្រោយពេលលោកបានទៅកាន់មូលដ្ឋាន បដិវត្តន៍របស់ពួកកុម្មុយនិស្តនៅឆ្នំា ១៩៦៦ ។ ក្រោយមក លោកបានធ្វើជាលេខាធិការ នៃសហភាពយុវជនកុម្មុយនិស្ត ហូ ជី មិញ នៅពេលលោកមានអាយុ ១៤ ឆ្នាំ ។ លោកមាន ជំនាញផ្នែកគ្រប់គ្រងសេដ្ឋកិច្ច និងគ្រប់គ្រងរដ្ឋបាល ។
នៅវៀតណាម បើទោះជាលោក ង្វៀន សិន ហ្វុក នឹងឡើងកាន់តំណែងជាប្រធានាធិបតី ដែលខ្ពស់ជាងនាយករដ្ឋមន្រ្តីក្តី ប៉ុន្តែវាគ្រាន់តែជាតំណែងនិម្មិតរូបប៉ុណ្ណោះ រីឯតំណែងដែល មានអំណាចពិតប្រាកដ គឺនាយករដ្ឋមន្រ្តីទៅវិញទេ ។ លោក ត្រឹង ម៉ាន់រិន្ទ យល់ថាលោក ង្វៀន សិន ហ្វុក មិនចង់ធ្វើជាប្រធានាធិបតីនោះទេ គឺលោកចង់ធ្វើជាលេខាបក្ស ឬនាយក រដ្ឋមន្រ្តី ដែលជាតំណែងមានអំណាចពិតប្រាកដ ប៉ុន្តែមិនអាចទៅរួចដោយសារតែលោក ង្វៀន សិន ហ្វុក មានខ្សែចាញ់ក្រុមលោក ង្វៀន ភូ ត្រុង ។
លោក ត្រឹង ម៉ាន់រិន្ទ បញ្ជាក់ថា ព្រោះតែកត្តានេះហើយ ទើបលោក ង្វៀន ភូ ត្រុង ចង់ជំរុញ រដ្ឋសភាប្រជុំនៅក្នុងខែមីនា ដោយមិនរង់ចាំរហូតទាល់តែរដ្ឋសភាចប់អាណត្តិនៅក្នុងខែ ឧសភា ឆ្នាំ ២០២១ នោះទេ ព្រោះខ្លាចទុកយូរពេក សមាជិករដ្ឋសភាអាចផ្លាស់ប្តូរចិត្ត រួចបោះឆ្នោតឱ្យលោក ង្វៀន សិន ហ្វុក ធ្វើជានាយករដ្ឋមន្រ្តីដដែលវិញ ។
ចំណែកលោក ទៀ ថេន ទីប្រឹក្សាសហព័ន្ធខ្មែរកម្ពុជាក្រោម ពន្យល់ថា នៅក្នុងប្រទេសវៀត ណាម តួអង្គដែលមានអំណាចខ្លាំងបំផុតគឺលេខាបក្ស និងនាយករដ្ឋមន្រ្តី ។ ចំណែកប្រធានា ធិបតី ឬប្រធានរដ្ឋគ្មានអំណាចពិតប្រាកដឡើយ ។ ដូច្នេះហើយទើបលោកយល់ថា លោក ង្វៀន ភូ ត្រុង ត្រូវជំរុញរដ្ឋសភាបោះឆ្នោតឱ្យបានឆាប់ដើម្បីជ្រើសរើសសសរស្តម្ភ ៣ ផ្សេង ទៀត និងដើម្បីឱ្យប្រាកដថា លោក ង្វៀន សិន ហ្វុក នឹងមិនកាន់តួនាទីជានាយករដ្ឋមន្រ្តីដែល ជាតំណែងកំពូលមានអំណាចបំផុតមួយនៅវៀតណាម ។
ទោះជាយ៉ាងណាក៏ដោយ លោក ទៀ ថេន ថា លោក ង្វៀន ភូ ត្រុង ក៏មិនសប្បាយចិត្តប៉ុន្មាន នោះទេ ចំពោះលោក ហ្វាម មិន ជិន ដែលគេរំពឹងថានឹងក្លាយជានាយករដ្ឋមន្រ្តីនៅក្នុង អាណត្តិថ្មី ដោយសារតែលោក ហ្វាម មិន ជិន នេះឯង គឺជាមនុស្សជំនិតរបស់អតីតនាយក រដ្ឋមន្រ្តី ង្វៀន តាន់ យុង ដែលធ្លាប់ជាគូប្រជែងអំណាចស្វិតស្វាញរបស់លោក ង្វៀន ភូ ត្រុង ។
គួរបញ្ជាក់ថា លោក ង្វៀន តាន់ យុង (Nguyen Tan Dung) គឺអតីតនាយករដ្ឋមន្រ្តីវៀតណាម ចំនួន ២ អាណត្តិជាប់គ្នា ពីឆ្នាំ ២០០៦ ដល់ឆ្នាំ ២០១៦ ។ លោកមានស្រុកកំណើតនៅខេត្ត ទឹកខ្មៅ ដែនដីកម្ពុជាក្រោម ។ លោកត្រូវបានគេចាត់បញ្ចូលជាក្រុមមនុស្សកំណែទម្រង់នៅ ក្នុងបក្សកុម្មុសនិស្តដែលមានទស្សនៈផ្ទុយពីក្រុមអភិរក្សនិយមរបស់លោក ង្វៀន ភូ ត្រុង ។
គេនៅចាំបានថា កាលពីពេលមហាសន្និបាតលើកទី ១២ នៃបក្សកុម្មុយនិស្តវៀតណាមក្នុងឆ្នាំ ២០១៦ លោក ង្វៀន ភូ ត្រុង ក៏ជាគូប្រជែងតំណែងលេខាបក្សជាមួយលោក ង្វៀន តាន់ យុង ដែលចប់អាណត្តិជានាយករដ្ឋមន្រ្តីរបស់ខ្លួនផងដែរ ។ ប៉ុន្តែមហាសន្និបាតបក្សនៅពេលនោះ បានជ្រើសរើសលោក ង្វៀន ភូ ត្រុង ឱ្យធ្វើជាលេខាបក្សសម្រាប់អាណត្តិទី ២ ។ ក្រោយមក ក្រុមបក្ខពួករបស់លោក ង្វៀន តាន់ យុង ដែលជាអ្នកចាញ់ ក៏ត្រូវបានដៃជើងរបស់លោក ង្វៀន ភូ ត្រុង សើរើរឿងពុករលួយ ។
តើលោក ហ្វាម មិន ជិន ដែលលោក ទៀ ថេន ថាជាដៃជើងរបស់អតីតគូប្រជែងអំណាចរបស់ លោក ង្វៀន ភូ ត្រុង ជានរណា ?
លោក ហ្វាម មិន ជិន (Pham Minh Chinh) បច្ចុប្បន្នមានតួនាទីជាសមាជិកការិយាល័យ នយោបាយបក្សកុម្មុយនិស្តវៀតណាម ។ លោកត្រូវបានរំពឹងថានឹងឡើងទៅកាន់តំណែងជា នាយករដ្ឋមន្រ្តីជំនួសតំណែងលោក ង្វៀន សិន ហ្វុក បច្ចប្បន្ន ។ លោកមានអាយុ ៦៣ ឆ្នាំ កើតនៅខេត្ត ថាន់ ហ្វា (Thanh Hoa) ដែលឋិតនៅភូមិភាគខាងជើងប្រទេសវៀតណាម ។ លោកមិនធ្លាប់បានកាន់តួនាទីកំពូលៗនៅក្នុងជួររដ្ឋាភិបាលកុម្មុយនិស្តវៀតណាមនោះឡើយ ក្រៅតែពីធ្លាប់ធ្វើជាអនុប្រធានរដ្ឋសភា និងជាសមាជិក និងលេខាធិការ នៃគណៈកម្មាធិការ មជ្ឈិមបក្សកុម្មុយនិស្តវៀតណាម ។
នៅឆ្នាំ ១៩៨៤ លោកបានធ្វើជាអ្នកស្រាវជ្រាវវិទ្យាសាស្រ្តនៅ នាយកដ្ឋានស្រាវជ្រាវវិទ្យាសាស្រ្ត សេដ្ឋកិច្ច បច្ចេកវិទ្យា នៅក្រសួងកិច្ចការលំនៅឋានវៀត ណាម ។ ក្រោយមកលោកបានក្លាយជាលេខាទី១ នៃស្ថានទូតវៀតណាមប្រចាំនៅប្រទេស រ៉ូម៉ានី (Romania) និងធ្វើការនៅក្រសួងសន្តិសុខសាធារណៈវៀតណាមនៅឆ្នាំ ១៩៩៦ ។ លោក ហ្វាម មិន ជិន មានជំនាញផ្នែកច្បាប់ ប៉ុន្តែបទពិសោធន៍ការងាររបស់លោកភាគច្រើន គឺពាក់ព័ន្ធផ្នែកសន្តិសុខសាធារណៈ ហើយលោកក៏ត្រូវបានរដ្ឋាភិបាលតំឡើងឋានន្តរស័ក្ត ជាឧត្តមសេនីយ៍ទោផងដែរ ។
តើថ្នាក់ដឹកនាំកំពូលៗ របស់វៀតណាមទាំងនេះ អាចនឹងបង្កឧបសគ្គបែបណាដល់ការទាមទារ សិទ្ធិសេរីភាពរបស់ខ្មែរក្រោម ?
មកដល់ត្រង់នេះ លោក ទៀ ថេន ទីប្រឹក្សា នៃសហព័ន្ធខ្មែរកម្ពុជាក្រោម ហាក់ពុំសូវ មានសុទិដ្ឋិនិយមឡើយថារដ្ឋបាលថ្មីនៃរដ្ឋាភិបាលកុម្មុយនិស្តវៀតណាមនឹងបន្ធូរដៃដល់ខ្មែរ ក្រោម ដោយហេតុថា លោក ហ្វាម មិន ជិន ដែលនឹងកាន់តួនាទីជានាយករដ្ឋមន្រ្តី គឺមាន ជំនាញផ្នែកសន្តិសុខ និងចារកម្មឆ្អិនឆ្អៅមួយរូប ។
ដើម្បីទប់ទល់នឹងកណ្តាប់ដៃដែករបស់លោក ហ្វាម មិន ជិន តើខ្មែរក្រោមគួរមានយុទ្ធសាស្រ្ត បែបណាដើម្បីបន្តតស៊ូការពារ និងទាមទារសិទ្ធិសេរីភាពរបស់ខ្លួន ?
ត្រង់ចំណុចនេះ លោក ទៀ ថេន ផ្តល់ទស្សនៈដល់ខ្មែរក្រោមថា ៖
បច្ចុប្បន្ននៅកម្ពុជាក្រោម មានសមាជិករដ្ឋសភាជាខ្មែរក្រោមចំនួន ៦ រូបគឺ ព្រះតេជគុណ លី បណ្ឌិត ចៅអធិការវត្តសំរោង នៅខេត្តឃ្លាំង លោក ចៅ ចាក់ នៅខេត្តមាត់ជ្រូក អ្នកស្រី ត្រឹង ធី វ៉ារី នៅខេត្តពលលាវ លោក ចៅ វិនយ៉ាវ នៅខេត្តក្រមួនស លោក ហឿ យ៉ាងងា នៅ ខេត្តព្រះត្រពាំង និងលោក ថាច់ ភឿកបិន នៅខេត្តព្រះត្រពាំង ។
សម្រាប់លោក ត្រឹង ម៉ាន់រិន្ទ យល់ថា តំណាងរាស្រ្តខ្មែរក្រោមទាំង ៦ រូបនៅវៀតណាម ប្រហែលជាមិនសូវហ៊ានតវ៉ាការពារសិទ្ធិរបស់ពលរដ្ឋខ្មែរក្រោមខ្លាំងក្លានោះទេ ដោយសារតែ ខ្លាចគេចោទថាមិនមែនជាកុម្មុយនិស្តច្បាស់លាស់ ឬមិនស្មោះត្រង់នឹងបក្សជាដើម ។ ប៉ុន្តែ លោក ម៉ាន់រិន្ទ អះអាងថា តំណាងរាស្រ្តខ្មែរក្រោមទាំង ៦ រូបនោះ ត្រូវចេះប្រើឱកាសរបស់ ខ្លួនដើម្បីតស៊ូមតិការពារសិទ្ធិខ្មែរក្រោមដូចគ្នា ។
ចំណែកលោក ទៀ ថេន បានផ្តាំផ្ញើដល់ពលរដ្ឋ ជាពិសេសតំណាងរាស្រ្តខ្មែរក្រោមទាំង ៦ រូប យ៉ាងដូច្នេះថា ៖
