ដោយ ស៊ឺន ចែងចើន|VOKK
អង្គការក្រៅរដ្ឋាភិបាលមួយ ដែលប្រមូលផ្តុំទៅដោយព្រះសង្ឃខ្មែរក្រោម មានមូលដ្ឋាននៅប្រទេសកម្ពុជា នៅព្រឹកថ្ងៃអាទិត្យទី ១៩ សីហា បានរៀបចំពិធីចែកអាហារូបករណ៍ដល់ព្រះសង្ឃ និងនិស្សិតខ្មែរក្រោម ដែលមានជីវភាពខ្វះខាត ឲ្យមានលទ្ធភាពបន្តការសិក្សា នៅតាមមហាវិទ្យាល័យនានា ក្នុងប្រទេសកម្ពុជា និងនៅបរទេស ។
សមណនិស្សិត និងនិស្សិតខ្មែរក្រោម ដែលទទួលបានអាហារូបករណ៍សិក្សាបន្ត នៅក្នុងប្រទេសកម្ពុជា និងក្រៅប្រទេស ពីសម្ព័ន្ធសមណនិស្សិត-និស្សិតខ្មែរកម្ពុជាក្រោម នៅឆ្នាំ ២០១៨ នេះ មានចំនួន ២១ អង្គ និងរូប ។
ពិធីចែកអាហារូបករណ៍ប្រចាំឆ្នាំ ២០១៨ នេះ ធ្វើឡើង នៅទីស្នាក់ការកណ្ដាលរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម ឋិតក្នុងកុដិលេខ ១៧ វត្តបទុមវតី សង្កាត់ចតុមុខ ខណ្ឌដូនពេញ រាជធានីភ្នំពេញ ក្រោមអធិបតីភាពសម្តេចព្រះពុទ្ធជ័យមុនី ឃឹម សន ព្រះមេគណរាជធានីភ្នំពេញ និងជាព្រះគ្រូសូត្រស្តាំ វត្តបទុមវតីរាជវរារាម (អានត្រឹមតែ វត្តបទុម-វៈតី បានហើយ) និងដោយមានការនិមន្ត និងអញ្ជើញចូលរួមពីគណៈកម្មការ សមាជិក សមាជិកា សិស្ស-និស្សិតនៃសម្ព័ន្ធសមណនិស្សិត-និស្សិតខ្មែរកម្ពុជាក្រោម តំណាងអង្គការ សមាគមខ្មែរកម្ពុជាក្រោម និងសប្បុរសជន ព្រមទាំងកុមារា កុមារី ប្រមាណជាង ១០០ អង្គ/នាក់ ។
ថ្លែងបើកកម្មវិធី ប្រធានសម្ព័ន្ធសមណនិស្សិត-និស្សិតខ្មែរកម្ពុជាក្រោម ព្រះតេជព្រះគុណ សឺន សុផារិន្ទ មានពុទ្ធដីកា ដោយលើកឡើង ពីទស្សនវិស័យបេសកកម្ម និងគោលបំណងរបស់អង្គការសម្ព័ន្ធសមណនិស្សិត-និស្សិតខ្មែរកម្ពុជាក្រោម ថា ជាអង្គការដែលប្រមូលផ្តុំរវាងសមណនិស្សិត និងនិស្សិត មានដើមកំណើតខ្មែរក្រោម និងធ្វើសកម្មភាពជួយគ្នាទៅវិញទៅមក ក្នុងការសិក្សារៀនសូត្រ ការផ្សព្វផ្សាយព្រះពុទ្ធសាសនា វប្បធម៌ អក្សរសាស្ត្រ ទំនៀមទ្លាប់ និងប្រពៃណីរបស់ខ្មែរក្រោម ។ ជាពិសេស បណ្តុះបណ្តាលធនធានមនុស្ស ដើម្បីលើកស្ទួយវិស័យសិក្សាអប់រំឲ្យមានប្រសិទ្ធិភាពខ្ពស់ បង្កើតនូវធនធានមនុស្សខ្មែរក្រោមឲ្យបានច្រើន និងក្លាយជាធនធានមនុស្សសំខាន់ សម្រាប់ចូលរួមចំណែកអភិវឌ្ឍសង្គមជាតិកម្ពុជាក្រោម ឲ្យមានការរីកចម្រើនលូតលាស់ទៅមុខ ។
នេះជាលើកទី ៩ ហើយ ដែលសម្ព័ន្ធសមណនិស្សិត-និស្សិតខ្មែរកម្ពុជាក្រោម បានផ្តល់អាហារូបករណ៍ ៥០ ភាគរយសម្រាប់ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ។ នៅក្នុងឆ្នាំ ២០១៨ នេះ អង្គការសម្ព័ន្ធចែកអាហារូបករណ៍ដល់សមណនិស្សិត-និស្សិតខ្មែរក្រោម ចំនួន ២៦ អង្គ/រូប ដោយក្នុងនោះ ថ្នាក់បរិញ្ញាបត្រ មានចំនួន ២១ អង្គ និងនាក់ ទទួលបានថវិកា ក្នុង ១ អង្គៗ និងម្នាក់ៗ ចំនួន ២៥០$ និងថ្នាក់បរិញ្ញាបត្រជាន់ខ្ពស់ចំនួន ៥ អង្គ ក្នុង ១ អង្គៗ និងម្នាក់ៗ ទទួលបានថវិកា ៤០០$ ។
យោងតាមរបាយការណ៍ប្រចាំឆ្នាំរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម បង្ហាញថា គិតចាប់តាំងពីឆ្នាំ ២០០៧ រហូតមកដល់ឆ្នាំ ២០១៨ សម្ព័ន្ធសមណនិស្សិត-និស្សិតខ្មែរកម្ពុជាក្រោម បានបញ្ជូនសមណនិស្សិត-និស្សិតខ្មែរក្រោមទៅបន្តការសិក្សានៅក្រៅប្រទេស រួមមានប្រទេសថៃ និងប្រទេសឥណ្ឌា បានចំនួន ១២ លើក និងសរុបសមណនិស្សិតមានចំនួន ១១៦ អង្គ ។
នៅឆ្នាំ ២០១៨ អង្គការមួយនេះ ក៏បានបញ្ជូនសមណនិស្សិតទៅបន្តការសិក្សាថ្នាក់បរិញ្ញាបត្រ នៅប្រទេសថៃ មានចំនួន ៣ អង្គដែរ ។ ចំណែកការផ្តល់អាហារូបករណ៍ ៥០ ភាគរយ ដល់សមណនិស្សិត-និស្សិតក្រីក្រ នៅព្រះរាជាណាចក្រកម្ពុជាវិញ សរុបមានចំនួន ១៤៧ អង្គ និងរូប នេះបើគិតចាប់តាំងឆ្នាំ ២០១០ រហូតមកដល់បច្ចុប្បន្ន ។ ក្រៅពីនេះ សិស្សានុសិស្សប្រមាណជាង ៦០ នាក់ ក៏ទទួលបានសិក្ខូបករណ៍ និងថវិកាខ្លះ ពីសម្ព័ន្ធសមណនិស្សិត-និស្សិតខ្មែរកម្ពុជាក្រោម ផង ។
តំណាងសមណនិស្សិត និងនិស្សិត ដែលទទួលបានអាហារូបករណ៍នៅឆ្នាំនេះ ព្រះតេជព្រះគុណ ត្រឿង សាង ជានិស្សិតកំពុងរៀនថ្នាក់អនុបណ្ឌិតឆ្នាំទី ២ នៅសាកលវិទ្យាល័យវេស្ទើន បានឡើងចំណាប់អារម្មណ៍ ថា ការទទួលអាហារូបករណ៍ ពីសម្ព័ន្ធសមណនិស្សិត-និស្សិតខ្មែរកម្ពុជាក្រោម គឺជាការផ្តល់ក្តីសង្ឃឹមដល់ការសិក្សាបន្ត សម្រាប់ព្រះអង្គ និងសមណនិស្សិត និងនិស្សិតគ្រប់រូប ដែលខ្វះលទ្ធភាព ក្នុងការចំណាយលើការសិក្សា និងដើម្បីមានឱកាសបន្តការសិក្សាថ្នាក់ឧត្តមសិក្សា នៅថ្នាក់មហាវិទ្យាល័យ ។ ព្រះអង្គបន្តថា សមណនិស្សិត និងនិស្សិតជាច្រើន ដែលខ្វះខាត និងមិនមានលទ្ធភាពគ្រប់គ្រាន់ ក្នុងការចំណាយទៅលើការសិក្សា នៅតាមគ្រឹះស្ថានអប់រំឧត្តមសិក្សា ដោយតម្លៃថ្លៃសិក្សាខ្ពស់ និងការចំណាយប្រចាំថ្ងៃផង ។ ដូច្នេះ ចំពោះការផ្តល់អាហារូបករណ៍ ពីអង្គការសម្ព័ន្ធ គឺបានជួយសម្រាលបន្ទុកនៃការចំណាយរបស់គ្រួសារមណនិស្សិត និងនិស្សិត និងធ្វើពួកគាត់ឈប់បារម្ភ និងខ្វាល់ខ្វល់រឿងថវិកា ធ្វើឲ្យព្រះអង្គ និងមណនិស្សិត និងនិស្សិតគ្រប់រូប មានចិត្តខិតខំរៀនសូត្រឲ្យពូកែ ដើម្បីក្លាយជាធនធានមនុស្សរបស់ខ្មែរក្រោម ។
ឆ្លើយតប ចំពោះការផ្តល់អាហារូបករណ៍ សម្រាប់ការចូលរួមចំណែកអភិវឌ្ឍវិស័យអប់រំរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម តំណាងសមណនិស្សិត និងនិស្សិត ព្រះតេជព្រះគុណ ត្រឿង សាង បង្ហាញពីការប្តេជ្ញាចិត្ត ក្នុងការខិតខំប្រឹងប្រែងសិក្សារៀនសូត្រ ដើម្បីក្លាយជាសរសរទ្រូង នៃសង្គមជាតិកម្ពុជាក្រោម នៅថ្ងៃអនាគត ។ សមណនិស្សិតអង្គនេះ បានសម្តែងនូវការដឹងគុណ និងថ្លែងអំណរគុណ ដល់ម្ចាស់ជំនួយ និងសប្បុរសជន នៅក្នុងប្រទេស និងក្រៅប្រទេស ដែលជួយឧបត្ថម្ភថវិកា ដើម្បីសម្ព័ន្ធសមណនិស្សិត-និស្សិតខ្មែរកម្ពុជាក្រោម មានលទ្ធភាពរៀបចំពិធីប្រគេន និងជូនអាហារូបករណ៍ដល់សមណនិស្សិត-និស្សិតក្រីក្រ ។
ស្រដៀងគ្នានេះដែរ ព្រះតេជព្រះគុណ ហេង ស៊ីគឿន ជាសមណនិស្សិតឆ្នាំ ២ ផ្នែកច្បាប់នៃសាកលវិទ្យាល័យភ្នំពេញអន្តរជាតិ យល់ឃើញថា ការផ្តល់អាហារូបករណ៍ ពិតជាមានសារៈសំខាន់ណាស់ សម្រាប់អ្នខ្វះខាត់ ដូចរូបព្រះអង្គផ្ទាល់ និងសមណនិស្សិត និងនិស្សិតក្រីក្រដទៃដែរ ។ នេះជាកាយវិការប្រកបដោយសប្បុរសធម៌មួយ ក្នុងការចូលរួមចំណែកកសាងធនធានមនុស្សក្នុងសង្គមរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម ។ ព្រះអង្គមើលឃើញទៀតថា ការរៀនសូត្រមានសារៈសំខាន់ ចំពោះបុគ្គលម្នាក់ៗ និងមានសារៈសំខាន់ សម្រាប់សង្គមជាតិ ។ ព្រោះបើសង្គមណាខ្វះធនធានមនុស្ស សង្គមនោះ ពិតជាមិនរីកចម្រើនឡើយ ។
ថ្លែងផ្តល់ឱវាទក្នុងពិធីចែកអាហារូបករណ៍នេះ ព្រះតេជព្រះគុណ ឃឹម សន បានជំរុញ និងលើកទឹកចិត្តដល់សមណនិស្សិត និងនិស្សិត ដែលទទួលបានអាហារូបករណ៍នៅឆ្នាំនេះ ត្រូវតាំងចិត្ត តាំងស្មារតីខិតខំរៀនសូត្រ ដើម្បីជាការឆ្លើយតបទៅ នឹងកិច្ចប្រឹងប្រែងយកចិត្តទុកដាក់ និងឧបត្ថម្ភ ពីសម្ព័ន្ធសមណនិស្សិត-និស្សិតខ្មែរកម្ពុជាក្រោម ។ បន្ថែមពីលើនេះ ព្រះតេជព្រះគុណ ឃឹម សន អាច នឹងស្នើសុំអាហារូបករណ៍ នៅតាមគ្រឹះស្ថានឧត្ដមសិក្សាមួយចំនួន នៅទីក្រុងភ្នំពេញ សម្រាប់សមណនិស្សិត និងនិស្សិតក្រីក្រ ដែលគ្មានលទ្ធភាពបង់ថ្លៃសាលា ។
សូមបញ្ជាក់ថា នៅដែនដីកម្ពុជាក្រោម ព្រះសង្ឃ និងពលរដ្ឋខ្មែរក្រោម មិនត្រូវបានរដ្ឋាភិបាលវៀតណាម អនុញ្ញាតឲ្យសិក្សាអក្សរសាស្ត្រជាតិរបស់ខ្លួនទូលំទូលាយឡើយ ។ ដើម្បីសិក្សាបានខ្ពង់ខ្ពស់ ព្រះសង្ឃខ្មែរក្រោមភាគច្រើន សម្រេចចិត្តនិមន្តឡើងមកប្រទេសកម្ពុជា ដើម្បីបន្តស្វែងរកមធ្យោបាយសិក្សាខ្លួនឯង ។
គួរជម្រាបជូនថា អង្គការសម្ព័ន្ធសមណនិស្សិត-និស្សិតខ្មែរកម្ពុជាក្រោម ជាអង្គការមួយ ដែលទទួលស្គាល់ជាផ្លូវការ កាលពីថ្ងៃទី ២១ ខែមិថុនា ឆ្នាំ ២០០២ ដោយក្រសួងមហាផ្ទៃ និងក្រសួងធម្មការ និងសាសនា ។ អង្គការមួយនេះ តែងតែធ្វើសកម្មភាពប្រមូលផ្តុំរវាងសមណនិស្សិត និងនិស្សិតមានដើមកំណើតមកពីដែនដីកម្ពុជាក្រោម ឲ្យមានការសាមគ្គីគ្នាជាធ្លុងមួយ ។ បច្ចុប្បន្ន អង្គការសម្ព័ន្ធសមណនិស្សិត-និស្សិតខ្មែរកម្ពុជាក្រោម ផ្តោតទៅលើការអភិវឌ្ឍន៍នូវធនធានមនុស្សជាចម្បង ដូចជា បើកម្មវិធីអប់រំ ចំណេះដឹងផ្សេងៗ និងការជួយរកមធ្យោបាយសិក្សា ជូនសមាជិក សមាជិការបស់ខ្លួន ដែលស្របទៅតាមទស្សនវិស័យបេសកកម្ម អភិវឌ្ឍន៍ធនធានមនុស្ស និងគោលបំណងរួមចំណែកកសាងសង្គមជាតិខ្មែរក្រោម តាមពាក្យស្លោកជាត្រីវិស័យរបស់អង្គការខ្លួនថា «ធនធានមនុស្ស ជាមូលដ្ឋានគ្រឹះនៃការកសសាងសង្គម» ៕
ខាងក្រោមនេះ ជារូបភាពខ្លះៗ ពីសកម្មភាពរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម ក្នុងថ្ងៃចែកអាហារូបករណ៍ដល់សមណនិស្សិត និងនិស្សិតក្រីក្រ នៅថ្ងៃទី ១៩ សីហា ២០១៨ ។ រូបថតៈ ស៊ឺន ចែងចើន
