កំណត់ហេតុមហាសន្និបាតសកលលើកទី ១០
នៃសហព័ន្ធខ្មែរកម្ពុជាក្រោម
ថ្ងៃទី ២៧ – ២៩ ឧសភា ឆ្នាំ ២០១៦
ទិវាបោះឆ្នោតជ្រើសរើសគណៈកម្មការនាយក នៃ
សហព័ន្ធខ្មែរកម្ពុជាក្រោម នីតិកាល ២០១៦ – ២០២០
ប្រារព្ធនៅទីក្រុងសាន់ហូស្សេ រដ្ឋកាលីហ្វ័រញ៉ា សហរដ្ឋអាមេរិក
នៅអគារមជ្ឈមណ្ឌល San Jose Masonic, San Jose, CA, U.S.A.
ថ្ងៃសៅរ៍ទី ២៨ ឧសភា ឆ្នាំ ២០១៦
ធ្វើកំណត់ហេតុដោយ ភិក្ខុ នាថសីលោ ត្រឹង ថាច់ យុង
របៀបវារៈ
វេលាម៉ោង ៩:00
ពិធីករ ថាច់ វឿង និងពិធីការិនី កៀង សាខន ឈរនៅលើវេទិកាលំឱនកាយឧទ្ទេសនាមខ្លួនចំពោះអង្គមហាសន្និបាត រួចហើយចាប់ផ្តើមប្រកាសមហាសន្និបាត ។
ជាបឋមលោកពិធីករ ថាច់ វឿង សូមអនុញ្ញាតអង្គមហាសន្និបាតប្រកាសនូវវិន័យអង្គប្រជុំ ។
ឧទ្ទេសនាមសមាសភាពគណៈកម្មការនាយក នៃសហព័ន្ធខ្មែរកម្ពុជា-ក្រោមទាំង ១៣ អង្គ និង រូប និមន្តនិងអញ្ជើញឡើងកាន់អាសនៈអធិបតី ។ ទន្ទឹមនឹងនោះគណៈកម្មការរៀបចំមហាសន្និបាតសកលលើកទី ១០ នៃសហព័ន្ធខ្មែរកម្ពុជាក្រោម បានអញ្ជើញនារីកិត្តិយសបំពាក់កម្រងផ្កាជូនគណៈកម្មការនាយក ។
អង្គមហាសន្និបាតគោរពទង់ជាតិ ។
លោកអធិបតី ថាច់ វៀន អុជទៀនធូប អង្គមហាសន្និបាតគោរពរំឭកគុណបុព្វវីរសមណៈ បុព្វវីរបុរស ។
អារាធនាព្រះសង្ឃសូត្រជយន្តោជាមង្គលកិច្ចជូនមហាសន្និបាត ។
ក្រុមរបាំប្រចាំវត្តខេមររង្សី រាំរបាំជូនពរ ប្រសិទ្ធពរមហាសន្និបាត ។
ព្រះតេជព្រះគុណ ត្រឹង គុយ សូត្រសុន្ទរកថាស្វាគមន៍មហាសន្និបាត ។
តំណាងចូលរួមមហាសន្និបាតរួមមាន
១. ប្រទេសបារាំង
២. អូស្ត្រាលី
៣. អីតាលី
៤. កាណាដា
៥. កម្ពុជា
៦. សហរដ្ឋអាមេរិក ដែលរួមមានរដ្ឋផែនស៊ីវែនញ៉ា ញ៉ូវចឺសី ច័រចា ផ្លរីដា តេចសាស អូខូឡូហាម៉ា វ៉ាស៊ិនតោនស្តេត ណតខូឡូឡាយណា ខូឡូរ៉ាដូ អីលីណយ វីជីញ៉ា ម៉ាសាឈូសែត កាលីហ្វ័រញ៉ាខាងត្បូង កាលីហ្វ័រញ៉ាខាងជើង អូហាយអូ ញ៉ូវអែមសើ ណីវវ៉ាដា ហាវ៉ាយ ជីហ្គាហ្គោ ។ ក្នុងនោះរួម មានព្រះ សង្ឃ ១៦ អង្គ គ្រហស្ថជាង ២០០ នាក់ ។
លោក ថាច់ វៀន ជាអធិបតី ប្រកាសបើកសន្និបាត និងធ្វើរបាយការណ៍សង្ខេប ។
លោក ថាច់ ង៉ុក ថាច់ ជាប្រធានប្រតិបត្តិថ្លែងសុន្ទរកថា ក្នុងសុន្ទរកថារបស់លោក លោកបានរំឭកអំពីការឈឺចាប់ ព្រមទាំងវីរភាពតស៊ូប្តូរផ្តាច់របស់បុព្វបុរសខ្មែរក្រោមគ្រប់ជំនាន់ និងការតស៊ូមតិរបស់សហព័ន្ធខ្មែរកម្ពុជាក្រោម លើឆាកអន្តរជាតិយ៉ាងស្វិតស្វាញតាមមាគ៌ាអហិង្សា របស់អង្គការសហប្រជាជាតិ និងអង្គការអន្តជាតិផ្សេង ៗ ទៀតមានអង្គការ UNPO ជាដើម តាំងពីដើមទីមកទល់នឹងបច្ចុប្បន្នកាល ។ លោកបានធ្វើការបញ្ជាក់ដោយការសង្កត់ធ្ងន់ថា “អស់លោក-អ្នកជាម្ចាស់សន្លឹកឆ្នោត ហេតុដូច្នេះអស់លោក-អ្នកត្រូវស្គាល់វត្ថុបំណងជាចម្បងរបស់ខ្លួន និងត្រូវតែរក្សាគោលដៅរបស់ខ្លួនថាតើអស់លោក-អ្នកចង់បានអ្វី មានគោលដៅអ្វី ? ខ្ញុំជឿជាក់ថាគោលបំណងរួមរបស់យើងគឺជាតិ មិនមែនបុគ្គលទេ ! ទោះបីបុគ្គលណាដឹកនាំក៏ដោយ ឲ្យតែដឹកនាំដើរទៅដល់ជាតិ” ។
សុន្ទរកថារបស់ លោក បណ្ឌិត ខូហ្វើ (Dr. Joshua Cooper) ជាឧត្តម ទីប្រឹក្សាសហព័ន្ធខ្មែរកម្ពុជាក្រោម លោកបានថ្លែងអំពីសកម្មភាពអន្តរជាតិ របស់ហព័ន្ធខ្មែរកម្ពុជាក្រោម ក្នុងនោះក៏មានសកម្មភាពរបស់គណៈកម្មាធិការយុវជនសហព័ន្ធខ្មែរកម្ពុជាក្រោម ដែលបានចូលរួមកិច្ចប្រជុំលើកទី ១៥ នៃ វេទិកាអចិន្ត្រៃយ៍របស់អង្គការសហប្រជាជាតិ ស្តីពីបញ្ហាជនជាតិដើមដែលសរ សេរកាត់ជាភាសាអង់គ្លេសថា UNPFII នាទីក្រុងញ៉ូវយ៉ក ក្នុងកាលកន្លង ហើយថ្មី ៗ នេះ គឺតាំងពីថ្ងៃទី ០៩-២០ ឧសភា ២០១៦ ។ លើសជាងនេះ ទៅទៀតនៅពេលល្ងាចនេះ ខ្លួនលោក Dr. Joshua Cooper ក្នុងនាមជាឧត្តមទីប្រឹក្សា និង លោក ម៉ៅ មុនី ជាអនុប្រធានទី ២ នៃសហព័ន្ធខ្មែរកម្ពុជាក្រោម នឹងធ្វើដំណើរទៅចូលរួមប្រជុំ ជាមួយនឹងនាយកដ្ឋានព័ត៌មានសាធារណៈ នៃអង្គការសហប្រជាជាតិ ជាភាសាអង់គ្លេស ថា UN Department of Public Information ហៅកាត់ថា DPI ចំនួន ២ ថ្ងៃ គឺថ្ងៃ ទី ៣០-៣១ ឧសភា ២០១៦ នៅទីក្រុងសេអ៊ូល ប្រទេសកូរេខាងត្បូង ។ បន្ទាប់ពីនោះមកគណៈប្រតិភូសហព័ន្ធខ្មែរកម្ពុជាក្រោមយើងនឹងបន្តដំណើរទៅកាន់ទីក្រុងបាងកក ប្រទេសថៃ ដើម្បីចូលរួមប្រជុំវេទិកា UN Sustainable Development in ASEAN នៅសកលវិទ្យាល័យធម្មសាស្ត្រចំនួន ២ ថ្ងៃទៀត គឺនៅថ្ងៃទី ២ ទី ៣ មិថុនា ឆ្នាំ ២០១៦ ខាងមុខនេះ ។ នេះជាសកម្ម ភាពអន្តរជាតិរបស់សហព័ន្ធខ្មែរកម្ពុជាក្រោម ជាមួយអង្គការសហប្រជាជាតិ ទាក់ទងនឹងបញ្ហាសិទ្ធិមនុស្ស សិទ្ធិជនជាតិដើម សិទ្ធិបញ្ចេញមតិ សិទ្ធិផ្តល់ និងទទួលបានព័ត៌មានដោយសេរី នៅតំបន់អាស៊ានដែលឈានសន្សឹម ៗ កៀកកិតជិតមាតុភូមិកម្ពុជាក្រោម ។
លោក តោ គឹម ថុង ជាអតីតអធិបតី និងជាប្រធានក្រុមឧត្តមទីប្រឹក្សានៃសហព័ន្ធខ្មែរកម្ពុជាក្រោម ថ្លែងអំពីអត្ថន័យនៃមហាសន្និបាត ។ លោកបានរំឭកឡើងថា កំណើតនៃសហព័ន្ធខ្មែរកម្ពុជាក្រោមមានប្រភពចេញពីគណៈកម្មការប្រតិបត្តិនៃមហាសន្និបាត ដែលត្រូវបានបង្កើតឡើងដោយវរជនខ្មែរក្រោមរៀមច្បងនៅថ្ងៃទី ២៨ សីហា ឆ្នាំ ១៩៨៥ ដែលមានការកំណត់មហាសន្និបាត ២ ឆ្នាំម្តង ។ ក្រោយមកនៅឆ្នាំ ១៩៩២ គណៈកម្មការនេះបានឯកច្ឆន្ទប្តូរឈ្មោះទៅជាសភាខ្មែរកម្ពុជាក្រោម ហើយមានការកំណត់ឲ្យមានមហាសន្និបាត ៤ ឆ្នាំម្តង ។ លុះដល់ឆ្នាំ ១៩៩៦ សភាខ្មែរកម្ពុជាក្រោមក៏បានធ្វើសេចក្តីសម្រេចជាឯកភាពប្តូរឈ្មោះទៅជាសហព័ន្ធខ្មែរកម្ពុជាក្រោម ដោយកំណត់មហាសន្និបាត ៤ ឆ្នាំ ម្តង ជាប់ជារៀងរហូតមកដល់ពេលនេះ មហាសន្និបាតគម្រប់ ១០ លើក ។ លោកបានបញ្ជាក់ថា មហាសន្និបាតគឺជាឱកាសផ្លាស់ប្តូរមេដឹកនាំឬក្បាលម៉ាស៊ីន ប្រៀបដូចជារថយន្ត បើប្រើប្រាស់យូរឆ្នាំពេកក៏គង់តែគេចមិនផុតអំពីសភាពចាស់គ្រាំគ្រាជាពុំខាន ដោយហេតុនោះអ្នកបើកបររថយន្តត្រូវតែមានគ្រឿងបន្លាស់សម្រាប់ផ្លាស់ប្តូរ ហើយត្រូវតែត្រួតពិនិត្យមើលម៉ាស៊ីនឲ្យបានរឿយ ៗ កុំទុកបណ្តោយឲ្យខូចកណ្តាលផ្លូវនាំឲ្យមានគ្រោះថ្នាក់ និងយឺតយូរដំណើរ ។ ម្យ៉ាងទៀតយើងត្រូវរួមដៃគ្នាជាភាតរភាព និងប្រាកដនិយម ។
អ្នកស្រី កៀង សុធី ជាប្រធានគណៈកម្មាធិការយុវជននៃសហព័ន្ធខ្មែរកម្ពុជាក្រោម ធ្វើរបាយការណ៍ និងរំឭកអំពីប្រវត្តិសាស្ត្រខ្មែរក្រោម ដ៏ឈឺចាប់ ដែលជាហេតុនាំអ្នកស្រីប្តេជ្ញាឈានជើងចូលសហព័ន្ធខ្មែរកម្ពុជាក្រោម ដើម្បីរួមចំណែកតស៊ូមតិលើឆាកអន្តរជាតិ ស្វែងរកសិទ្ធិសម្រេចវាសនាខ្លួនដោយខ្លួនឯង ជូនជាតិមាតុភូមិកម្ពុជាក្រោម ។
លោកអធិបតី ថាច់ វៀន ប្រកាសបញ្ចប់អាណត្តិកាល ២០១២-២០១៦ ។
លោកយស សារុន ប្រធានគណៈកម្មការរៀបចំការបោះឆ្នោត ចាប់ផ្តើមរៀបចំកម្មវិធីរបស់ខ្លួនរួមមាន
សេចក្តីប្រកាសច្បាប់បោះឆ្នោត
វិធីសាស្រ្តបោះឆ្នោត
នាទីសាកច្ឆាជុំវិញបរិបទនីតិវិធីក្នុងការបោះឆ្នោត
បេក្ខជនឈរឈ្មោះក្នុងការបោះឆ្នោត ជ្រើសរើសគណៈកម្មការនាយកសហព័ន្ធខ្មែរកម្ពុជាក្រោម អាណត្តិកាល ២០១៦-២០២០ ទាំង ១៣ រូប ប្រ កាសបេក្ខភាព សមត្ថភាព អត្ថិភាព វីរភាព វីរិយភាព និងជីវប្រវត្តិសង្ខេបរបស់ខ្លួន ។ ឯបេក្ខជនទាំង ១៣ នាក់នោះរួមមាន៖
១ លោក ថាច់ សេ
២ លោក ចៅ រៀប
៣ លោក ប្រាក់ សិរីវុឌ្ឍិ៍
៤ លោក ត្រឹង ម៉ាន់រិន្ទ
៥ លោក ថាច់ ង៉ុក ថាច់
៦ លោក ចៅ សេរី ហៅម៉ៅ មុនី
៧ លោក ត្រឹង សារុង
៨ លោក ឃួន ណាកា
៩ អ្នកស្រី ឆោមឆាយ លក្ខណា
១០ លោក សឺង ហួ
១១ លោក ត្រឹង យ៉ាប
១២ លោក ថាច់ វៀន
១៣ លោក សឺង សម្រេច ។
ការបោះឆ្នោតបានចាប់ផ្តើមនៅវេលាម៉ោង ២ និង ៥០ នាទីក្រោមអធិបតីនៃគណៈកម្មការរៀបចំការបោះឆ្នោត ។
ការរាប់សន្លឹកឆ្នោតសម្រេចជាស្ថាពរនៅវេលាម៉ោង ៤:២៧ នាទី ។
សរុបសន្លឹកឆ្នោតទាំងអស់រួមមាន ៧៧ សន្លឹក ក្នុងនោះមាន ២ សន្លឹក ជាមោឃៈ ៧៥ បានការ ។
ព្រះតេជព្រះគុណ ត្រឹង គុយ ជាអគ្គលេខាធិការនៃគណៈកម្មការរៀបចំការបោះឆ្នោត ប្រកាសលទ្ធផលនៃការបោះឆ្នោត ដូចតទៅ ៖
ទី ១ លោក ថាច់ ង៉ុក ថាច់ មាន ៦០ សំឡេង
ទី ២ លោក ចៅ រៀប មាន ៥៤ សំឡេង
ទី ៣ លោក ប្រាក់ សិរីវុឌ្ឍិ៍ មាន ៥៤ សំឡេង
ទី ៤ លោក ចៅ សិរី ហៅ ម៉ៅ មុនី មាន ៥២ សំឡេង
ទី ៥ លោក ថាច់ សេ មាន ៤៩ សំឡេង
ទី ៦ លោក ត្រឹង យ៉ាប មាន ៤៣ សំឡេង
ទី ៧ លោក ត្រឹងម៉ាន់ រិន្ទ មាន ៤១ សំឡេង
ទី ៨ លោក ថាច់ វៀន មាន ៣៩ សំឡេង
ទី ៩ លោក សឺង ហួ មាន ៣៨ សំឡេង
ទី ១០ លោក ត្រឹង សារុង មាន ២៥ សំឡេង
ទី ១១ លោក សឺង សម្រេច មាន ២០ សំឡេង ។
ទី ១២លោក ឃួន ណាកា មាន ១៤ សំឡេង
ទី ១៣ អ្នកស្រី ឆោមឆាយ លក្ខណា មាន ១០ សំឡេង ។
លោកយស សារុន ជាប្រធានគណៈកម្មការរៀបចំការបោះឆ្នោតធ្វើរបាយការណ៍ និង ប្រកាសសមាសភាពរបស់គណៈកម្មការរៀបចំការបោះឆ្នោត ដូចតទៅ ៖
១. លោក យស សារុន ជាប្រធាន
២. លោក ហាង វឿង ជាអនុប្រធាន
៣. លោក ត្រឹង ជី ជាអនុប្រធាន
៤. លោក ថាច់ ស៊ីចន្ទ ជាអគ្គពិនិត្យ
៥. លោក ថាច់ គារ ជាអគ្គពិនិត្យ
៦. ព្រះតេជព្រះគុណ ត្រឹង គុយ ជាអគ្គលេខាធិការ
៧. លោក សុខ នីម ជាអគ្គលេខាធិការ
៨. លោក ឡឹម ខៃ ជាឃោសនិក ។
បណ្តាបេក្ខជនទាំង ១៣ រូប ដែលឈរឈ្មោះបោះឆ្នោតជាគណៈកម្មការនាយកនោះ ត្រូវបានគណៈកម្មការរៀបចំការបោះឆ្នោត អនុម័តិជ្រើសរើសបេក្ខជនជាប់ឆ្នោតជាគណៈកម្មការនាយក នៃសហព័ន្ធខ្មែរកម្ពុជាក្រោម អាណត្តិកាល ២០១៦-២០២០ គឺ
ទី ១ លោក ថាច់ ង៉ុក ថាច់ មាន ៦០ សំឡេង
ទី ២ លោក ចៅ រៀប មាន ៥៤ សំឡេង
ទី ៣ លោក ប្រាក់ សិរីវុឌ្ឍិ៍ មាន ៥៤ សំឡេង
ទី ៤ លោក ចៅ សិរី ហៅ ម៉ៅ មុនី មាន ៥២ សំឡេង
ទី ៥ លោក ថាច់ សេ មាន ៤៩ សំឡេង
ទី ៦ លោក ត្រឹង យ៉ាប មាន ៤៣ សំឡេង
ទី ៧ លោក ត្រឹងម៉ាន់ រិន្ទ មាន ៤១ សំឡេង
ទី ៨ លោក ថាច់ វៀន មាន ៣៩ សំឡេង
ទី ៩ លោក សឺង ហួ មាន ៣៨ សំឡេង
គណៈកម្មការនាយកថ្មីធ្វើពិធីសច្ចាប្រណិធាន ប្តេជ្ញាសាមគ្គីប្រឹងប្រែងតស៊ូបម្រើជាតិ ដោយស្ម័គ្រស្មោះអស់ពីចិត្តមិនងាករេ ។
បន្ទាប់មក លោក ថាច់ ង៉ុក ថាច់ តំណាងគណៈកម្មកានាយកថ្មីលើកបង្ហាញអំពីផែនការជាតិ និងអន្តរជាតិនៅអាណត្តិកាលថ្មី ។
លោក ថាច់ ចួន តំណាងគណៈកម្មការ រៀបចំមហាសន្និបាតសកលលើកទី ១០ ថ្លែងសុន្ទរកថាអបអរសាទរគណៈកម្មការនាយកថ្មី ព្រមទាំងធ្វើនូវអភយកថាចំពោះអង្គមហាសន្និបាត ។
ព្រះសង្ឃទាំង ១៦ ព្រះអង្គស្វាធ្យាយជយន្តោប្រសិទ្ធពរជ័យជូនគណៈកម្មការនាយកថ្មី ។
ចប់មហាន្និបាតថ្ងៃទី ២៨ ឧសភា ឆ្នាំ ២០១៦ នៅវេលាម៉ោង ៥:០០ ដោយបរិបូណ៌ ។
សេចក្តីបញ្ជាក់
ការរៀបចំជ្រើសតាំងរចនាសម្ព័ន្ធថ្នាក់ដឹកនាំក្នុងជួរគណៈកម្មការនាយកអាណត្តិកាល ២០១៦-២០២០ នេះនឹងត្រូវអនុម័តិឡើងដោយស្វ័យភាព នៃ គណៈកម្មការនាយកថ្មីនេះដោយខ្លួនឯង ហើយធ្វើការជ្រើសតាំងព្រះសង្ឃ ២ អង្គ ស្ត្រី ២ រូបបន្ថែមទៀត ត្រូវជាគណៈកម្មការនាយកចំនួន ១៣ អង្គ និង រូប តាមលក្ខន្តិកៈ សម្រេចហើយទើបប្រកាសសមាសភាពនៃគណៈកម្មការនាយក ទាំង ១៣ អង្គនិងរូបនោះ នៅថ្ងៃ ទី ២៩ ឧសភាស្អែកនេះ ភ្ជាប់ដោយសម្បថនៅចំពោះព្រះភក្រ្តព្រះជីវ៍វត្តខេមររង្សី ក្រុងសាន់ហូស្សេនិងព្រះសង្ឃនូវបណ្តាសមាជិក សមាជិកា ព្រមទាំងប្រជាពលរដ្ឋខ្មែរក្រោមទាំងអស់ មុននឹងចូលកាន់តំណែងបម្រើជាតិ មាតុភូមិ ក្នុងអាណត្តិកាលថ្មីរបស់ខ្លួននាថ្ងៃបញ្ចប់មហាសន្និបាតសកលលើកទី ១០ នៅទីក្រុងសាន់ហូស្សេ រដ្ឋកាលីហ្វ័រញ៉ា សហរដ្ឋ អាមេរិក ៕
ហត្ថលេខា ហត្ថលេខា
ថាច់ វៀន ភិក្ខុ នាថសីលោ ត្រឹង ថាច់ យុង
អធិបតីមហាសន្និបាត លេខាធិការមហាសន្និបាត