ដោយ លី ឈូន
ពលរដ្ឋខ្មែរក្រោម រងគ្រោះដីធ្លី ដោយសារអំពើរំលោភបំពាន ពីអ្នកមានលុយ មានអំណាចវៀតណាម ដង្ហោយហៅតាមគណនីហ្វេសប៊ុករបស់ខ្លួន សុំឲ្យព្រះមហាក្សត្រ និងលោកនាយករដ្ឋមន្រ្តី ហ៊ុន សែន ឲ្យជួយអន្តរាគមន៍ វិបត្តិដីធ្លីនេះផង ។ តែអ្នកច្បាប់លើកឡើងថា ស្ថាប័នព្រះមហាក្សត្រ និងរដ្ឋាភិបាលខ្មែរមិនមានដែនអានុភាពគ្របដណ្ដប់លើពលរដ្ឋ និងដែនដីកម្ពុជាក្រោមឡើយ បើទោះជាមាន ក៏រដ្ឋអំណាចវៀតណាម មិនគោរពនោះដែរ ។ សមត្ថកិច្ចវៀតណាម បានបិទគណនីហ្វេសប៊ុករបស់ស្ត្រីរងគ្រោះដីធ្លីនេះ បន្ទាប់ស្ត្រីនេះ បង្ហោះសារសុំអន្តរាគមន៍ពីព្រះមហាក្សត្រខ្មែរ និងរដ្ឋាភិបាលខ្មែរ តែទោះជាយ៉ាងណាក៏ដោយ សហព័ន្ធខ្មែរកម្ពុជាក្រោម កំពុងតែស្វែងរកមធ្យោបាយជួយដល់ ស្ត្រីរងគ្រោះដីធ្លីនេះ ។
ស្ត្រីខ្មែរក្រោម ម្នាក់ឈ្មោះ ធី ហ្វាន់ (Thi Oanh) អាយុ ៤៦ ឆ្នាំរស់នៅទីរួមខេត្តក្រមួនស ដែលវៀតណាមដាក់ឈ្មោះថ្មីថា ទីក្រុងរ៉ាច់យ៉ា (Rach Gia) ខេត្តគៀងយ៉ាង (Kien Giang) បានបង្ហោះសារអំពាវនាវ នៅលើគណនីហ្វេសប៊ុករបស់ខ្លួន សុំព្រះមហាក្សត្រខ្មែរ និងលោកនាយករដ្ឋមន្រ្តីខ្មែរ ហ៊ុន សែន ឲ្យជួយស្វែងរកយុត្តិធម៌ដល់លោកស្រីផង ។ ដោយលោកស្រី បានចាញ់កល់នឹងជនជាតិវៀតណាមម្នាក់ ដែលកាឡៃឯកសារ ពីការចងការប្រាក់ទៅជាឯកសារវិនិយោគទុន និងថា លោកស្រីបានផ្ដល់កម្មសិទ្ធិដីធ្លី ផ្ទះសម្បែងឲ្យទៅស្ត្រីវៀតណាមនោះ គ្រប់គ្រងទៅវិញ ។
អ្នកស្រី ធី ហ្វាន់ «ឥឡូវហ្នឹងមិនទាន់បានដោះស្រាយដាច់ស្រេចនោះទេ សុំឱ្យសម្ដេចឪសីហមុនី និងសម្ដេច ហ៊ុន សែន ជួយសង្គ្រោះដល់គ្រួសារកូនផង ជួយធ្វើម៉េចឱ្យខាងវៀតណាមយួនហ្នឹងសងដីធ្លី ផ្ទះសម្បែងឲ្យខ្មែរក្រោមយើងវិញ ឲ្យបានដូចសេចក្ដីប្រាថ្នា ។ ឥឡូវហ្នឹងសុំជួយកូនផង បងប្អូននរណាបានដឹងបានឮ សុំជួយជូនពាក្យខ្ញុំទៅដល់សម្ដេចហ៊ុន សែន ដល់ស្ដេចកម្ពុជាយើងផង សូមអរគុណច្រើន ចា៎» ។
ទាក់ទិននឹងរឿងនេះ ស្ត្រីខ្មែរក្រោមម្នាក់ជាអ្នកភូមិផងរបងជាមួយ និងជាអ្នកជិតស្និទ្ធជាមួយនឹងស្ត្រីរងគ្រោះឈ្មោះ ធី ង៉ុក ប្រាប់វិទ្យុសំឡេងកម្ពុជាក្រោម និងសារព័ត៌មាន ព្រៃនគរ ថា ដោយសារតែខឹងចិត្តចាញ់កល់ជនជាតិវៀតណាម និងថែមទាំងជនជាតិវៀតណាមនោះ បាដេញប្ដីប្រពន្ធលោកស្រី ធី ហ្វាន់ ចេញពីផ្ទះរបស់ខ្លួនផង ជាហេតុធ្វើឱ្យប្ដីលោកស្រីហ្វាន់ ឈ្មោះ យ៉ាញ់ ធី លោតទឹកសម្លាប់ខ្លួនទៅ៖ «ប្ដីគាត់ពិបាកចិត្តពេក បានជាគាត់ទារធ្វើអត្តឃាត មុនដំបូងហ្នឹងចងកម្ដងរួចហើយតែមិនមិនស្លាប់ ។ ដោយឮសូរស្ត្រីជនជាតិវៀតណាមម្នាក់នោះ រឹបអូសយកផ្ទះសម្បែងរបស់គាត់តែ ពីមុនមកគឺថាជាការបញ្ចាំទេ តែឥឡូវនេះ ស្ត្រីជនជាតិវៀតណាមម្នាក់នោះ បានប្លន់យកផ្ទះសម្បែងរបស់គាត់»។
ចំណែកមេធាវីខ្មែរក្រោម មួយរូបរស់នៅខេត្តពលលាវ ដែលវៀតណាមដាក់ឈ្មោះថ្មី ថាបាក់លីវ (Bac Lieu) លើកឡើងថា ព្រះមហាក្សត្រក្ដី រដ្ឋាភិបាលខ្មែរក្ដី មិនអាចជ្រៀតជ្រែកទៅហ្នឹងអធិបតេយ្យជាតិមួយដទៃទៀត បានឡើយ៖ ហើយស្ដេចខ្មែរលោកគ្មានអានុភាពអី ឬមានអំណាចអីមកដោះស្រាយបញ្ហា ដែលកើតឡើងនៅប្រទេសវៀតណាម បានទេ ។ និយាយថា លោកគ្មានសិទ្ធិទៅច្រឡូកច្រឡំអីចឹងតែម្ដង» ។
រឿងរ៉ាវនេះ បានកក្រើកឡើង បន្ទាប់ពីលោកស្រី ធី ហ្វាន់ បង្ហោះសារអំពាវនាវតាមបណ្ដាញព័ត៌មានសង្គមហ្វេសប៊ុករបស់ខ្លួន សុំព្រះមហាក្សត្រខ្មែរ និងនាយករដ្ឋមន្ត្រីខ្មែរ លោក ហ៊ុន សែន ឲ្យជួយរកយុត្តិធម៌ក្នុងរឿងក្ដីនេះ ។
យោងតាមដីកាបង្គាប់របស់តុលាការកំពូលទីក្រុងព្រៃនគរ ដែលវៀតណាម ដាក់ឈ្មោះថ្មីថា ទីក្រុងហូជីមិញ (Ho Chi Minh) លេខ ២៩១ ចុះថ្ងៃទី ៣០ ខែសីហាឆ្នាំ ២០១៨ ឲ្យដឹងថា ដើមចោទក្នុងករណីចោទប្រកាន់រឿងរ៉ាវវិនិយោគ មានការប្រើប្រាស់ចលនទ្រព្យ និងអចលនទ្រព្យ ការជួលផ្ទះ និងការចងការប្រាក់នេះ ជាស្ត្រីជនជាតិវៀតណាមឈ្មោះ ង្វៀង ធី តឿង វី ជាកូនរបស់ចៅហ្វាយក្រុងក្រុងក្រមួនស រីឯចុងចោទជាខ្មែរក្រោម ឈ្មោះ យ៉ាញ់ ធី ជាប្ដី និងប្រពន្ធឈ្មោះ ធី ហ្វាន់ ។
រឿងក្ដីក្ដាំនេះ បានកើតឡើងតាំងពីចុងឆ្នាំ ២០១៦ មកម្លេះ ហើយប្លង់ដី ២ ប្លង់ របស់ចុងចោទ ជាជនរងគ្រោះ គឺលោកស្រី ធី ហ្វាន់ និងលោក យ៉ាន់ ធី មានទំហំជាង ២ ពាន់ម៉ែត្រការ៉េ រួម និងអចលនទ្រព្យផង គិតជាទឹកប្រាក់មានប្រមាណជាង ១០០ កោដិដុងស្មើនឹងប្រមាណជាង ៧ ម៉ឺនដុល្លារអាមេរិក តែដើមចោទបានវាយតម្លៃទ្រព្យសម្បត្តិទាំងនេះ បានតែប្រមាណជាជាង ២៥ កោដិដុង ស្មើនឹងប្រមាណជាង ១ ម៉ឺន ២ ពាន់ដុល្លារអាមេរិកតែប៉ុណ្ណោះ ។
ដីកាបង្គាប់របស់តុលាការកំពូលលេខ ២៩១ នេះបានបង្គាប់ឲ្យសាលាឧទ្ធរណ៍ជម្រះក្ដីនេះឡើងវិញ ព្រោះថាការកាត់ក្ដីរបស់តុលាការ ខេត្ត ក្រុង មានភាពអយុត្តិធម៌ និងធ្វើឲ្យខាតបង់ផលប្រយោជន៍ ចំពោះចុងចោទគឺលោកស្រី ធី ហ្វាន់ ច្រើនណាស់ ។ តែរហូតមកដល់ពេលនេះ សាលាឧទ្ធរណ៍មិនបានជម្រះក្ដីឡើងវិញ តាមដីកាបង្គាប់របស់តុលាការកំពូលឡើយ ដោយផ្អាប់ទុកចោលនូវក្ដីក្ដាំនេះ ។
ទាក់ទិននឹងក្ដីក្ដាំនេះ ប្រធានសាខាសហព័ន្ធខ្មែរកម្ពុជាក្រោមប្រចាំកម្ពុជា លោក តាំង សារៈប្រាប់ថា សហព័ន្ធខ្មែរកម្ពុជាក្រោម កំពុងតាមដានករណីនេះ ហើយមិនថាតែ រឿងរបស់លោកស្រី ធី ហ្វាន់ប៉ុណ្ណោះទេ គឺរាល់រឿងរ៉ាវទាំងឡាយណា ដែលកើតឡើង ចំពោះជនរួមជាតិខ្មែរក្រោម ដោយអយុត្តិធម៌ សហព័ន្ធខ្មែរក្រោម តែងតែអន្តរាគមន៍ការពារជានិច្ច ៖ «ប្រសិនបើរឿងនោះ ពិតជាអយុត្តិធម៌មែន សហព័ន្ធខ្មែរកម្ពុជាក្រោម ក៏មិនទុកឲ្យស្ត្រីមួយរូប ដែលជាមេគ្រួសារ ហើយប្ដីត្រូវស្លាប់ទៀតទុកឲ្យតុលាការបំពានសិទ្ធិរបស់គាត់ដូច្នេះទេ ។ សហព័ន្ធ និងរាយការណ៍ទៅដល់ស្ថាប័នទទួលបន្ទុកយុត្តិធម៌ ហើយ និងសិទ្ធិមនុស្សអន្តរជាតិ ដើម្បីជួយអន្តរាគមន៍រឿងនេះ» ។
ជារឿយ ៗ រដ្ឋាភិបាលកម្ពុជាតែងតែបដិសេធសេចក្ដីសុំអង្វរករ របស់អង្គការសមាគមខ្មែរកម្ពុជាក្រោម ឲ្យជួយដល់ពលរដ្ឋខ្មែរក្រោម នៅដែនដីកម្ពុជាក្រោម ដែលរងការបំពានសិទ្ធិសេរីភាព ពីរដ្ឋាភិបាលវៀតណាម ដោយរដ្ឋាភិបាលកម្ពុជាលើកឡើងថា ខ្មែរក្រោម ជាពលរដ្ឋវៀតណាម ដូច្នេះ កម្ពុជាមិនអាចជ្រៀតជ្រែកទៅនឹងអធិបតេយ្យភាពរបស់វៀតណាម បានឡើយ ៕
