ដោយ ស៊ឺន ចែងចើន | VOKK
បញ្ហាបង្កជាជម្លោះដីធ្លី រវាងវត្តពោធិភិរម្យរង្សី នៅស្រុកកំពង់ស្ពាន ខេត្តព្រះត្រពាំង នៃដែនសីកម្ពុជាក្រោម ជាមួយ នឹងអាជ្ញាធរយួន បានឈានដល់ប៉ះទង្គិចសម្តីដាក់គ្នា ក្នុងខណៈអាជ្ញាធរយួនអះអាងថា ជាដីកម្មសិទ្ធិរបស់រដ្ឋ ចំណែកព្រះសង្ឃបញ្ជាក់ថា ជាម្ចាស់កម្មសិទ្ធិលើដីធ្លីកំពុងមានជម្លោះនោះ ។
ហេតុការណ៍ ដែលបង្កឲ្យមានទំនាស់ពាក្យសម្តីដាក់គ្នា បានកើតឡើងនៅថ្ងៃទី ២៨ វិច្ឆិកា ២០១៧ ក្នុងពេលដែលព្រះសង្ឃវត្តពោធិភិរម្យរង្សី បាននាំគ្នាទៅបោះបង្គោលព្រំដែនដី ដែលព្រះសង្ឃចាត់ទុកថា ជាដីរបស់វត្ត តាំងពីយូរយារណាស់មកហើយនោះ ។
ព្រះសង្ឃខ្មែរក្រោមមួយអង្គ ស្ថិតក្នុងហេតុការណ៍នោះ បានមានសង្ឃដីកា ប្រាប់វិទ្យុសំឡេងកម្ពុជាក្រោម ក្នុងលក្ខខណ្ឌសុំមិនបញ្ចេញព្រះនាមថា ដីវត្តពោធិភិរម្យរង្សីចាស់ (ឈ្មោះដើមថា វត្តកោះកៀនស្វាយ) ដែលមានផ្ទៃដីទំហំសរុបចំនួនជាង ៦ កុង (ជាង ៥០០ ម៉ែត្រក្រឡា) ។ ក្រោយមក វត្តកោះកៀនស្វាយ បានប្តូរទៅកសាងនៅទីកន្លែងផ្សេង ហើយប្រសិទ្ធិនាមថ្មីថា «វត្តពោធិភិរម្យរង្សី» ដែលបច្ចុប្បន្ន ស្ថិតនៅស្រុកកំពង់ស្ពាន ខេត្តព្រះត្រពាំង ។
ព្រះសង្ឃខ្មែរក្រោមដដែលអង្គនេះ បានរៀបរាប់ប្រាប់វិទ្យុសំឡេងកម្ពុជាក្រោម អំពីដំណើរដើមទងប្រវត្តិរបស់ដីវត្តពោធិភិរម្យរង្សី ដែលកំពុងមានជម្លោះជាមួយអាជ្ញាធរយួន យ៉ាងដូច្នេះ ៖
ព្រះអង្គ បានបញ្ជាក់ថា នៅថ្ងៃទី ២៨ វិច្ឆិកា ម្សិលមិញនេះ ព្រះសង្ឃ និងពុទ្ធបរិស័ទ បានប្រមូលផ្តុំគ្នា ក្នុងគោលបំណងទៅបោះបង្គោលការពារព្រំដែនដីវត្ត ប៉ុន្តែ ត្រូវបានអាជ្ញាធរប្រមាណជាង ៥០ នាក់មករារាំង មិនអនុញ្ញាតឲ្យបោះបង្គោលឡើយ ។
ក្រោយការរារាំងមិនឲ្យព្រះសង្ឃ និងពុទ្ធបរិស័ទបោះបង្គោល ជម្លោះពាក្យសម្តី ក៏បានផ្ទុះឡើង ប៉ុន្តែ មិនឈានដល់ការផ្ទុះអំពើហិង្សាដាក់គ្នាឡើយ ។ បន្ទាប់ពីតឹងសសៃកដាក់គ្នាមួយប្រាវស្ថានការណ៍ក៏ស្ងប់ស្ងាត់ទៅវិញ ក្រោយអាជ្ញាធរយួនសន្យាថា នឹងចុះមកវាស់វែងបែងចែកដីជូនវត្តវិញ ។
គួររំឭកថា ជម្លោះបញ្ហាដីធ្លីនៅតាមវត្តអារាម នៅកម្ពុជាក្រោម តែងកើតមានឡើងជារឿយៗ ដោយពលរដ្ឋជាជនជាតិយួន តែងតែទៅរំលោភរឹបអូសយកដីវត្ត ដោយឃុបឃិតជាមួយអាជ្ញាធរយួន លួចធ្វើបញ្ជីកម្មសិទ្ធិដីធ្លី ។ ជាក់ស្តែង ដូចករណីជម្លោះបញ្ហាដីធ្លី នៅវត្តមុនីរង្សី (មេពាំង) ជាមួយ នឹងជនជាតិយួនបានអូសបន្លាយរ៉ាំរ៉ៃជាយូរមកហើយ ។ ប៉ុន្តែ រហូតរមកដល់ពេលនេះ ដ្ឋាភិបាលយួននៅតែធ្វើព្រងើយ ដោយមិនព្រមដោះស្រាយឲ្យបានដាច់ស្រេចនៅឡើយ ៕
