ដោយ ស៊ឺន ចែងចើន| VOKK
សហព័ន្ធខ្មែរកម្ពុជាក្រោម នឹងធ្វើពិធីខួប ៦៩ ឆ្នាំ នៃទិវាបាត់បង់ទឹកដីកម្ពុជាក្រោម ឬថ្ងៃកម្ពុជាក្រោម ឋិតនៅក្រោមនឹមអាណានិគមយួន ៤ មិថុនា ១៩៤៩ – ៤ មិថុនា ២០១៨ នៅប្រទេសបារាំង នាថ្ងៃអាទិត្យ ទី ៣ ខែមិថុនា ខាងមុខនេះ ។
ពិធីនេះ ធ្វើនៅវត្តពោធិវង្ស នាទីក្រុងប៉ារិស ដោយមានថ្នាក់ដឹកនាំសហព័ន្ធខ្មែរកម្ពុជាក្រោម ជាច្រើនរូបមកពីប្រទេសនានា ចូលរួមថ្លែងសាររំឭក ឡើងវិញនូវមេរៀនប្រវត្តិសាស្ត្រ នាំឲ្យបាត់បង់ទឹកដីកម្ពុជាក្រោម សោកនាដកម្មរបស់ពលរដ្ឋខ្មែរក្រោមនៅក្រោមនឹមអាណានិគមយួន និងស្វែងរកដំណោះស្រាយបញ្ហានានា ដែលពលរដ្ឋខ្មែរក្រោមម្ចាស់ ស្រុក កំពុងតែប្រឈម នឹងការរំលោភសិទ្ធិមនុស្សពីសំណាក់រដ្ឋការយួន ។
គណៈកម្មការនាយកទាំងអស់ ថ្នាក់ដឹកនាំតំបន់ និងសាខានៃសហព័ន្ធខ្មែរកម្ពុជាក្រោម នៅប្រទេស នានា នឹងចូលរួមប្រជុំនៅក្នុងពិធីនេះ បន្ទាប់ពីពួកគាត់បានចូលរួមធ្វើសន្និសីទអន្តរជាតិរបស់សហព័ន្ធ ខ្មែរកម្ពុជាក្រោម ស្ដីពីជនជាតិដើមខ្មែរក្រោម នៅទីក្នុងព្រឹទ្ធសភាបារាំង នាថ្ងៃទី ២ ខែមិថុនា ខាងមុខនេះ ។
នៅថ្ងៃទី ៤ ខែមិថុនា ឆ្នាំ ១៩៤៩ បារាំងចុះហត្ថលេខាផ្ទេរដែនដីកូស័ងស៊ីន ឬដែនដីកម្ពុជាក្រោម ដែលសព្វថ្ងៃ ជាភាគខាងត្បូងនៃប្រទេសវៀតណាម ឲ្យទៅជារដ្ឋចំណុះវៀតណាម ។ ចាប់តាំងពី ពេលនោះ មកជនជាតិដើមខ្មែរក្រោម ត្រូវឋិតនៅក្រោមនឹមអាណានិគមយួនរហូតមកដល់សព្វថ្ងៃ ។
