ដោយ យន់ សាមៀន | RFA
សហព័ន្ធខ្មែរកម្ពុជាក្រោម ព្រមានអាជ្ញាធរវៀតណាម ថា សហព័ន្ធ នឹងតវ៉ាទៅសហគមន៍អន្តរជាតិ ប្រសិនបើវៀតណាមហ៊ានឃាត់ខ្លួនយុវជនខ្មែរក្រោមពីររូប ករណីដែលពួកគេមិនបង់ប្រាក់ពិន័យទៅឲ្យអាជ្ញាធរវៀតណាម ។ ការព្រមាននេះ ដោយសារតែយុវជនខ្មែរក្រោមពីររូប កាលពីថ្ងៃទី ៣០ មិថុនា បានតវ៉ាប្រឆាំង នឹងអាជ្ញាធរវៀតណាម ក្រោយពេលវៀតណាម បានផាកប្រាក់ពួកគេក្នុងម្នាក់ៗ បីរយដុល្លារ ដោយចោទប្រកាន់ថា ពួកគេល្មើសច្បាប់សន្តិសុខអ៊ិនធឹណិតវៀតណាម ដោយសារតែពួកគេបង្ហោះព័ត៌មាន ពីប្រវត្តិសាស្ត្រកម្ពុជាក្រោម និងចែកចាយព័ត៌មានរបស់សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក ។
មន្រ្តីព័ត៌មាននៃសហព័ន្ធខ្មែរកម្ពុជាក្រោម ព្រះតេជព្រះគុណ ស៊ឺង យ៉ឹងរតនា មានថេរដីកាថា សហព័ន្ធខ្មែរកម្ពុជាក្រោម គាំទ្រសេចក្ដីសម្រេចចិត្តរបស់យុវជនខ្មែរក្រោមទាំងពីររូប ដែលហ៊ានតវ៉ារឿងអយុត្តិធម៌ មិនបង់ប្រាក់ពិន័យទៅឲ្យវៀតណាម ទោះបីពួកគេអាច នឹងត្រូវអាជ្ញាធរវៀតណាម ចាប់ដាក់ពន្ធនាគារក៏ដោយ ។
យុវជនខ្មែរក្រោម នៅខេត្តព្រះត្រពាំង ២ រូប គឺយុវជន ថាច់ កឿង និង យុវជន តោ ហ្វាងចឿង កាលពីថ្ងៃទី ៣០ មិថុនា បានឡើងទៅតវ៉ាដល់មុខមន្ត្រីស៊ើបអង្កេតនៃមន្ទីរព័ត៌មាន និងទូរគមនាគមន៍ខេត្តព្រះត្រពាំង ស្នើសុំមិនបង់ប្រាក់ពិន័យ ដោយសារតែពួកគេគិតថា ការផាកពិន័យជា ការអើសអើង នឹងខ្មែរក្រោម និងជាការរឹតត្បិតសិទ្ធិសេរីភាពខ្មែរក្រោម ។
ព្រះតេជព្រះគុណបន្តថា សហព័ន្ធខ្មែរកម្ពុជាក្រោម នឹងធ្វើយុទ្ធនាការតវ៉ាទៅសហគមន៍អន្តរជាតិ ប្រសិនបើវៀតណាម ហ៊ានឃាត់ខ្លួន យុវជនខ្មែរក្រោមទាំងពីររូបនោះមែន៖ «ប្រសិនបើអាជ្ញាធរវៀតណាម ដល់ដំណាក់កាលចាប់ខ្លួនពលរដ្ឋខ្មែរក្រោម ដែលរងការផាកពិន័យហ្នឹង ហើយយុវជនមិនព្រមបង់ដោយសារតែគ្មានលុយឲ្យ អ៊ីចឹងសហព័ន្ធខ្មែរក្រោមកម្ពុជាក្រោម សូមថ្កោលទោសអាជ្ញាធរវៀតណាម ដែលប្រើច្បាប់ ដើម្បីបំបិទសិទ្ធិរបស់ពលរដ្ឋខ្មែរក្រោម» ។
មូលហេតុបណ្តាលឲ្យវៀតណាម ចោទប្រកាន់យុវជនខ្មែរក្រោមទាំងពីរនាក់នោះ ដោយសារតែ យុវជន ថាច់ កឿង កាលពីថ្ងៃទី ២ ខែមិថុនា បានបង្ហោះវីដេអូតាមបណ្ដាញសង្គមហ្វេសប៊ុក ដោយចោទថា អាជ្ញាធរវៀតណាម ចែកអង្ករក្លែងក្លាយដល់ពលរដ្ឋខ្មែរក្រោម ។ ចំណែកយុវជន តោ ហ្វាងចឿង កាលពីថ្ងៃទី ១៦ ខែមិថុនា បានបង្ហោះលិខិតរបស់មេដឹកនាំវៀតណាម លោក ហូ ជីមិញ (Ho Chi Minh) ដែលមានខ្លឹមសារថា ដែនដីកម្ពុជាក្រោមស្ថិត នៅក្រោមការគ្រប់គ្រង និងជាកម្មសិទ្ធិរបស់ខ្មែរក្រោម និងការបង្ហោះរូបសញ្ញាកាន់ទុក្ខនៃការបាត់បង់ទឹកដីកម្ពុជាក្រោម នៅលើប្រូហ្វាល (Profile) ហ្វេសប៊ុករបស់លោក កាលពីថ្ងៃទី ៤ ខែមិថុនាកន្លងទៅ ។
ពាក់ព័ន្ធ នឹងរឿងមិនបង់ប្រាក់ឲ្យវៀតណាមនេះ យុវជន តោ ហ្វាងចឿង បង្ហោះសារក្នុងទំព័រ (Facebook) របស់លោក កាលពីថ្ងៃទី ៣០ មិថុនាថា លោកបានសម្រេចចិត្តមិនបង់លុយឲ្យវៀតណាម ដោយសារតែការផាកពិន័យនេះ ជាករណីបំបិទសិទ្ធិរបស់ខ្មែរក្រោម ហើយលោកមិនបានល្មើសច្បាប់ណាមួយទេ៖ «បំណងរបស់គេធ្វើឲ្យខ្មែរក្រោម បាត់បង់សិទ្ធិសេរីភាព ឲ្យខ្មែរក្រោមយើងបាក់ស្បាត» ។
យុវជន តោ ហ្វាងចឿង អំពាវនាវឲ្យយុវជនខ្មែរក្រោម កុំខ្លាចការគាបសង្កត់របស់វៀតណាម និងទាមទារសិទ្ធិជាជនជាតិដើមកំណើតពីវៀតណាមមកវិញ ។ យ៉ាងហោចណាស់ ក៏មានយុវជនខ្មែរក្រោម ៤ នាក់ហើយ ត្រូវអាជ្ញាធរវៀតណាម ខេត្តព្រះត្រពាំង និងខេត្ត ឃ្លាំង បានកោះហៅទៅសម្លុតបំភ័យ និងពិន័យជាប្រាក់យ៉ាងធ្ងន់ធ្ងរធ្វើការពិន័យជាប្រាក់ និងព្រមានចាប់ខ្លួន បើយុវជនទាំងនោះ នៅតែប្រើប្រាស់បណ្ដាញសង្គមហ្វេសប៊ុក និយាយពីប្រវត្តិទឹកដីកម្ពុជាក្រោម និងហ៊ានបញ្ចេញមតិ ទាមទារឲ្យរដ្ឋាភិបាលវៀតណាម គោរពសិទ្ធិ ។ វៀតណាម កាលពីពេលថ្មីៗ នេះ ក៏បានចាប់ខ្លួនពលរដ្ឋខ្មែរក្រោមម្នាក់ ក្រោយពីវៀតណាម បានប្រើប្រាស់អំពើហិង្សារឹបអូសដីធ្លីស្រែចម្ការរបស់ពួកគេទាំងមិនទាន់មានដំណោះស្រាយ ។ ពលរដ្ឋខ្មែររូបនោះ ត្រូវបានវៀតណាមឃុំខ្លួន មិនឲ្យជួបក្រុមគ្រួសារនោះទេមកទល់ពេលនេះ ។ ទាក់ទង នឹងករណីរឹតត្បិតសម្លុតបំភ័យខ្មែរក្រោមនេះ សមាគមខ្មែរកម្ពុជាក្រោម ដែលមានមូលដ្ឋាននៅកម្ពុជា កាលពីថ្ងៃទី ២៩ មិថុនា ក៏បានដាក់ញាតិទៅក្រសួងការបរទេសកម្ពុជា និងស្ថានទូតវៀតណាម ប្រចាំនៅកម្ពុជាឲ្យអន្តរាគមន៍ទៅរដ្ឋាភិបាលវៀតណាម ឲ្យឈប់ធ្វើទុក្ខបុកម្នេញពលរដ្ឋខ្មែរក្រោមជាបន្តទៀត ។ ស្ថានទូត វៀតណាម មិនទាន់ទទួលញាតិរបស់ខ្មែរក្រោមនោះទេ ប៉ុន្តែក្រសួងការបរទេសបានទទួលយក ។ សមាគមខ្មែរក្រោមនៅកម្ពុជា ក៏បានព្រមានថា ប្រសិនបើវៀតណាមធ្វើព្រងើយមិនដោះលែង និងទម្លាក់ចោលការចោទ ប្រកាន់លើពលរដ្ឋខ្មែរក្រោម ពួកគេនឹងដឹកនាំធ្វើបាតុកម្មអហិង្សា នៅស្ថានទូតវៀតណាម នៅកម្ពុជា ដើម្បីដាក់សម្ពោធបន្ថែមទៅលើរដ្ឋាភិបាលវៀតណាម ៕
