ដោយ ស៊ឺន ចែងចើន| VOKK
សមាជិកសភាសហរដ្ឋអាមេរិក ទើបតែបានផ្ដល់ប័ណ្ណកិត្តិយស ចំពោះប្រធានសហព័ន្ធខ្មែរកម្ពុជាក្រោម និងអង្គការសហព័ន្ធខ្មែរកម្ពុជាក្រោម នូវប័ណ្ណទទួលស្គាល់នូវកិត្តិយស ដែលសហព័ន្ធបានចូលរួម ចំណែកដ៏ឆ្នើម ក្នុងការផ្ដល់នូវសមធម៌ និងការប្ដេជ្ញាចិត្តជួយឲ្យមានការរួបរួមក្នុងសង្គមខ្មែរ នៅក្នុងទីក្រុង Long Beach ។
ការផ្ដល់ប័ណ្ណទទួលស្គាល់នេះ បានធ្វើឡើងនៅក្នុងកិច្ចជួបជុំមួយរបស់ពលរដ្ឋខ្មែរអាមេរិកកាំង ដែល ជាអ្នកតំណាងអង្គការក្រៅរដ្ឋាភិបាលខ្មែរមួយចំនួន ដែលមានមូលដ្ឋាននៅទីក្រុង Long Beach រដ្ឋ California នាថ្ងៃអាទិត្យ ទី ១៨ ខែមីនា នេះ ដោយមានលោក អាឡាន់ ឡូវ៉ិនថល (Alan Lowenthal) ជាសមាជិកសភាអាមេរិកកាំង មកពីគណបក្សប្រជាធិបតេយ្យ ប្រចាំទីក្រុង Long Beach ចូលរួមជាអធិបតី ។
លោក ប្រាក់ សេរីវុឌ្ឍ ជាប្រធាន នៃសហព័ន្ធខ្មែរកម្ពុជាក្រោម និងអង្គការសហព័ន្ធខ្មែរកម្ពុជាក្រោម ត្រូវបានសមាជិកសភាអាមេរិក លោក Alan Lowenthal ផ្ដល់ប័ណ្ណទទួលស្គាល់កិត្តិយសថា “បាន ចូលរួមចំណែកដ៏ឆ្នើមក្នុងការផ្ដល់នូវសមធម៌ និងការប្ដេជ្ញាចិត្តជួយឲ្យមានការរួបរួមក្នុងសង្គមខ្មែរ អាមេរិកកាំង នៅក្នុងទីក្រុង Long Beach” ។
លោក ប្រាក់ សេរីវុឌ្ឍ ជាប្រធានប្រតិបត្តិ នៃសហព័ន្ធខ្មែរកម្ពុជាក្រោម បានមានប្រសាសន៍ប្រាប់វិទ្យុ សំឡេងកម្ពុជាក្រោម អំពីមូលហេតុដែលនាំឲ្យសមាជិកសភាអាមេរិក ផ្ដល់ប័ណ្ណទទួលស្គាល់នោះ ដោយសាររូបលោកផ្ទាល់ និងសហព័ន្ធខ្មែរកម្ពុជាក្រោម តែងតែចូលរួមធ្វើសកម្មភាពជួយដល់ កិច្ចការរបស់សង្គមខ្មែរ និងកិច្ចការរបស់សាលាក្រុង Long Beach ជាបន្តបន្ទាប់ ។
ក្រៅពីនេះ សមាជិកសភាអាមេរិកកាំង ក៏បានផ្ដល់ប័ណ្ណទទួលស្គាល់ដល់តំណាងអង្គការក្រៅរដ្ឋា ភិបាលខ្មែរមួយចំនួន ដែលមានមូលដ្ឋាននៅអាមេរិក ផងដែរ ។
នៅក្នុងកិច្ចប្រជុំនេះ សហព័ន្ធខ្មែរកម្ពុជាក្រោម បានរួមគ្នាជាមួយ នឹងអង្គការរបស់ខ្មែរមួយចំនួន ចុះហេត្ថលេខាលើញត្តិមួយផ្ញើទៅចៅហ្វាយក្រុង និងក្រុមប្រឹក្សាសាលាក្រុង Long Beach សុំឲ្យ គូសផែនទីសហគមន៍ខ្មែរសាជាថ្មីដោយសមធម៌ ។ ក្នុងញត្តិនោះបានលើកឡើងថា បច្ចុប្បន្ននេះ ក្រុងខ្មែរ និងសហគមន៍ខ្មែរ នៅទីក្រុង Long Beach ត្រូវរដ្ឋបាលក្រុងបែងចែកចេញជា ៤ សង្កាត់ បានធ្វើឲ្យប្រជាពលរដ្ឋខ្មែរនៅក្នុងសហគមន៍បាត់បង់នូវសំឡេងឆ្នោតយ៉ាងខ្លាំង ។ អាស្រ័យ ហេតុនេះ ទើបសហគមន៍ខ្មែរបានមូលមតិគ្នាចុះហត្ថលេខា ដើម្បីស្នើទៅរដ្ឋបាលក្រុងឲ្យគូសផែនទីឡើងវិញ ទៅជាសង្កាត់តែមួយ ឲ្យទាន់ពេលបោះឆ្នោត នាឆ្នាំ ២០២០ ខាងមុខនេះ ។
យោងតាមស្ថិតិឆ្នាំ ២០១០ របស់រដ្ឋាភិបាលអាមេរិក បានបង្ហាញថា មានពលរដ្ឋខ្មែររស់នៅសហរដ្ឋ អាមេរិកសរុបចំនួន ២៧៦.៦៦៧ នាក់ ។ ពលរដ្ឋខ្មែរទាំងនោះ ភាគច្រើនពួកគេនៅរដ្ឋ California និង Massachusetts ៕
