ដោយ ស៊ឺន ចែងចើន
នៅពេលថ្មីៗ អាជ្ញាធរស្រុកម៉ីស្វៀង (Mỹ Xuyên) ដែលខ្មែរក្រោមហៅថា ស្រុកបាយឆៅ នៃខេត្តឃ្លាំង បានចុះទៅចែកជំនួយដល់គ្រួសារជនជាតិវៀតណាម ជួបការលំបាកក្នុងដំណាក់កាលកូវីដ-១៩ ។ ចំណែកពលរដ្ឋខ្មែរក្រោម ជាង ១០ គ្រួសារអះអាងថា ខ្លួនពិតជាគ្រួសារក្រីក្រ និងមានប័ណ្ណក្រីក្រ ប៉ុន្តែ បែរជាមិនបានទទួលជំនួយផ្សេងៗ ពីអាជ្ញាធរមូលដ្ឋានឡើយ ។ ប្រតិកម្មរបស់ប្រជាពលរដ្ឋខ្មែរក្រោមនេះ ធ្វើឡើងបន្ទាប់ពីពួកគាត់អត់មានឈ្មោះទៅទទួលជំនួយរបស់រដ្ឋ នៅក្នុងអំឡុងពេលនៃការចុះចែកអំណោយដល់ជនរងគ្រោះ ដោយសាររងផលប៉ះពាល់ដល់ការងារ និងមុខរបររបស់ខ្លួន ក្នុងដំណាក់កាលកើតមានវិបត្តិជំងឺកូវីដ-១៩ កាលពីពេលថ្មីៗ កន្លងទៅនេះ ។
ពលរដ្ឋ ១ គ្រួសារ តំណាងឲ្យប្រជាពលរដ្ឋខ្មែរក្រោមជាង ១០ បានធ្វើការផ្សាយផ្ទាល់ (Live) នៅលើគណនីហ្វេសប៊ុកផ្ទាល់ខ្លួន ដើម្បីសម្ដែងពីការកើតទុក្ខមិនសុខចិត្ត ចំពោះអាជ្ញាធរមូលដ្ឋាន ដែលមានភាពខ្វះចន្លោះ ក្នុងការចុះចែកអំណោយ និងមានការរើសអើងរវាងពលរដ្ឋខ្មែរក្រោម និងពលរដ្ឋវៀតណាម ដោយលោកអះអាងថា គ្រួសារលោកពិតជាមានជីវភាពក្រីក្រ និងប្រជាពលរដ្ឋខ្មែរក្រោមដទៃទៀត រស់នៅក្នុងភូមិរបស់លោក កំពុងតែជួបប្រទះទុក្ខលំបាកយ៉ាងខ្លាំង តែមិនទទួលបានអំណោយ ពីអាជ្ញាធរវៀតណាមឡើយ ។
ថ្លែងប្រាប់វិទ្យុសំឡេកម្ពុជាក្រោម ក្នុងកិច្ចសម្ភាសន៍តាមទូរស័ព្ទ ពីដែនដីកម្ពុជាក្រោម ប្រជាពលរដ្ឋរស់នៅភូមិស្រឡូង ឃុំជ្រោយទឹម ស្រុកបាយឆៅ នៃខេត្តឃ្លាំង លោក យ៉ាញ់ មិញក្វាង (Danh Minh Quang) មានប្រសាសន៍ថា មូលហេតុដែលលោកបង្ហោះវិដេអូ នៅលើបណ្តាញសង្គមហ្វេសប៊ុក គឺក្រុមប្រជាពលរដ្ឋនៅភូមិរបស់លោកចង់ឲ្យសំឡេងរបស់ពួកគាត់ បានឮដល់ថ្នាក់ដឹកនាំនៃប្រទេសវៀតណាម ហើយពិនិត្យមើលពីភាពមិនប្រក្រតីរបស់អាជ្ញាធរមូលដ្ឋាន ដែលធ្វើសកម្មភាពចុះស្រង់ឈ្មោះ និងការបែងចែកជំនួយផ្សេងៗ ដល់ប្រជាពលរដ្ឋក្រីក្រ ឬអ្នកដែលរងគ្រោះដោយសារជម្ងឺកូវីដពិតប្រាកដ គឺធ្វើឡើងដោយពុំមានតម្លាភាព និងត្រឹមត្រូវឡើយ ។ លោកថា ពួកអាជ្ញាធរចុះស្រង់ឈ្មោះពលរដ្ឋនោះ ស្រង់យកតែឈ្មោះជនជាតិវៀតណាមប៉ុណ្ណោះ ចំណែកពលរដ្ឋខ្មែរក្រោម ដែលមានជីវភាពក្រីក្រដែរ បែរជាមិនមានឈ្មោះក្នុងបញ្ជី ដើម្បីទទួលបានជំនួយនោះទេ ។
ជុំវិញបញ្ហានេះ ក្រុមគ្រួសារខ្មែរក្រោម ក៏បាននាំគ្នាទៅធ្វើការតវ៉ា នៅឯសាលាស្រុកម៉ីស្វៀងដែរ ។ ប៉ុន្តែ អាជ្ញាធរវៀតណាម បានឆ្លើយតបថា មូលហេតុ ដែលពលរដ្ឋខ្មែរក្រោមទាំងនោះ មិនទទួលបានជំនួយ ក៏ព្រោះតែពួកគេ បានរួចចាកផុតពីភាពក្រីក្រ ។ ចំណែកឯប័ណ្ណក្រីក្ររបស់ពួកគេ ដែលអាជ្ញាធរចេញឲ្យនោះ ក៏ត្រូវបានលុបចោលហើយដែរ ។
គួរជំរាបជូនថា រដ្ឋាភិបានៃប្រទេសវៀតណាម បានបញ្ចេញកញ្ចប់ថវិកា សម្រាប់ជួយពលរដ្ឋរងផលប៉ះពាល់ពីជំងឺកូវីដ-១៩ សម្រាប់រយៈពេល ៣ ខែ ខណៈរដ្ឋាភិបាលកំពុងដាក់ចេញវិធានការជាបន្តបន្ទាប់ ដើម្បីប្រយុទ្ធប្រឆាំង នឹងការរាតត្បាតរបស់មេរោគ ។ ក្រៅពីនេះ វៀតណាម ក៏បានផ្តល់ទុនមូលនិធិ សម្រាប់ជួយដល់អាជីវកម្ម និងពលរដ្ឋ ដែលមិនអាចសងបំណុលធនាគារ និងបន្តប្រតិបត្តិការអាជីវកម្មខ្លួនបាន ក្រោមឥទ្ធិពលមេរោគកូវីដ-១៩ ផង ៕
