ដោយ លី ឈូន
ពលរដ្ឋខ្មែរក្រោម ដែលជាជនភៀសខ្លួន នៅប្រទេសថៃ ប្រមាណជា ១៥ នាក់ក្នុងចំណោមជនភៀសខ្លួនខ្មែរក្រោម ជាង ២០០ នាក់ កំពុងឆ្លងជំងឺកូវីដ-១៩ ។ ជនភៀសខ្លួនជាខ្មែរក្រោម មួយចំនួនត្រូវបានក្រុមគ្រួរពេទ្យយកទៅព្យាបាលរួចហើយ និងមួយចំនួនទៀត កំពុងរង់ចាំលទ្ធផល ពីការយកសំណាករកមេរោគ ។ អង្គការសង្គមស៊ីវិលខ្មែរក្រោម មើលឃើញថា ជនភៀសខ្លួនខ្មែរក្រោម កំពុងតែទទួលរងទុក្ខជាន់លើទុក្ខ ខណៈពួកគេរត់គេចចេញស្រុកកំណើត ដោយសារតែការធ្វើទុក្ខបុកម្នេញ ពីរដ្ឋាភិបាលវៀតណាម មកជ្រកកោនរស់នៅក្នុងប្រទេសថៃដោយខុសច្បាប់ និងការងារធ្វើគ្មាន ហើយពេលនេះ ស្រាប់តែមានទុក្ខមួយជាន់ទៀត ដោយឆ្លងជំងឺកូវីដ-១៩ ។ សហព័ន្ធខ្មែរកម្ពុជាក្រោម ដែលមានមូលដ្ឋាន នៅសហរដ្ឋអាមេរិក ថា នឹងខិតខំជួយដោះស្រាយ ដើម្បីសម្រាលនូវទុក្ខកង្វល់នេះ ជូនជនភៀសខ្លួនខ្មែរក្រោម ឲ្យបានទាន់ពេល ។
ស្ត្រីជនភៀសខ្លួនខ្មែរក្រោមម្នាក់ ឈ្មោះ លី ស៊ីណាត រស់នៅក្នុងនៅតំបន់មួយ នាជាយក្រុងបាងកក លោកស្រីប្រាប់វិទ្យុសំឡេងកម្ពុជាក្រោម និងសារព័ត៌មានព្រៃនគរ ថា ក្នុងគ្រួសារលោកស្រីមានគ្នា ៧ នាក់តែត្រូវឆ្លងជំងឺកូវិដ-១៩ អស់បីនាក់ទៅហើយ គឺរួមមានម្ដាយ ឪពុកលោកស្រី និងស្វាមីលោកស្រី ។ លោកស្រីស៊ីណាតបន្តទៀតថា ក្រោយពីអ្នកទាំង ៣ ពិនិត្យឃើញវិជ្ជមានភ្លាម លោកស្រី បានហៅទូរស័ព្ទសុំអន្តរាគមន៍ ពីឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ដែលហៅកាត់ថា UNHCR និងមជ្ឈមណ្ឌលជនភៀសខ្លួន នៅទីក្រុងបាងកក ដែលហៅកាត់ថា BRC ភ្លាម ។ លោកស្រីជនភៀសខ្លួនម្នាក់នេះ បញ្ជាក់បន្ថែមទៀតថា ការអន្តរាគមន៍របស់អង្គភាពទាំងពីរគឺ UNHCR និង BRC ជាមួយភ្នាក់ងារពេទ្យ ក្នុងតំបន់អ្នកស្រីរស់នៅហាក់ ដូចជាមិនសូវមានប្រសិទ្ធិភាពឡើយ រហូតដល់ឪពុក ម្ដាយ និងស្វាមីលោកស្រីដើរចូលមណ្ឌលចត្តាឡីស័ក ដោយខ្លួនឯង នៅថ្ងៃបន្ទាប់៖ «គេថាគេជួនបាយម្ហូបឱ្យយើងតែឥឡូវមិនទាន់ឃើញមានខាងណាទាក់ទងមកផង ចំណែក BRC គេថាមានឡានមកយកទៅពេទ្យរហូតដល់ឥឡូវក៏អត់ទៀត ដល់ពេលអីចឹងទៅយប់ឡើង យើងតេទៅនិយាយជាមួយគេ គេថាឱ្យចិត្តត្រជាក់ សិនទៅរឿងហ្នឹង ម៉ែ ឪអាយុទើបតែប៉ុណ្ណឹងមិនមិនប៉ះពាល់ដល់អាយុជីវិតទេ តែបើមានអាការៈធ្ងន់ធ្ងរជាងហ្នឹងសុំទងទៅគេទៀត ។ ហើយកន្លែងណា ក៏ដូចជាកន្លែងណាដែរ ទៅខ្លួនឯងអីចឹងហើយល្អ » ។
មិនខុសគ្នានឹងការលើកឡើងរបស់ស្ត្រីជនភៀសខ្លួនខាងដើមនេះប៉ុន្មានទេ ប្រធានក្រុមជនភៀសខ្លួនខ្មែរក្រោម អ្នកស្រី ឡឹម ធីថៃ បញ្ជាក់ថា មូលហេតុដែលជនភៀសខ្លួនខ្មែរក្រោម ឆ្លងជំងឺកូវីដឆាប់រហ័សដូច្នេះ ក៏ព្រោះតែជនភៀសខ្លួនខ្មែរក្រោមភាគច្រើនជួលបន្ទប់មួយ ៗ ស្នាក់នៅគ្នាច្រើន ។ អ្នកស្រីប្រធានក្រុមជនភៀសខ្លួនបន្ថែមថា ចំពោះការព្យាបាលវិញ ក៏គេមិនសូវយកចិត្តទុកដាក់ចំពោះជនភៀសខ្លួននោះទេ ៖ «និយាយរឿងថា ដូចតេទៅសុំឲ្យគេជួយផ្នែកស្បៀងអាហារអីហ្នឹង តែគេមិនឆ្លើយ UNHCR គេបានត្រឹមណែនាំឱ្យយើងនៅក្នុងផ្ទះទៅខំថែរក្សាសុខភាពទៅ តែបើឈឺខាងរដ្ឋាភិបាលគេមិនចោលទេ ខ្ញុំថារដ្ឋាភិបាលគេមិនចោលទេ តែអ្នកដែលឈឺហ្នឹង តាញុំដឹងដំណឹងថា អ្នកជំងឺហ្នឹង គេយកទៅដាក់មួយកន្លែងហ្នឹងហើយមិនសូវមានថែទាំអីទេ ។ គ្រាន់តែមានបាយហូប ហើយ និងថ្នាំ និងឲ្យលេបថ្នាំប៉ារ៉ាស៊ីតាម៉ុលមួយថ្ងៃបានតេម្ដងទេ ជួនកាលអ្នកដែលទើបទៅនឹងថ្នាំលេបហ្នឹងក៏មិនមានទៀត» ។
ការលើកឡើងមកនេះ បន្ទាប់ពីមានជនភៀសខ្លួនខ្មែរក្រោមប្រមាណ ១៥ នាក់កំពុងតែឆ្លងជំងឺ Covid-19 នៅទីផ្សារបន្លែដ៏ធំមួយនាជាយក្រុងបាងកក់ ដែលប្រជុំដោយជនភៀសខ្លួនរស់នៅច្រើន ។ ការដែលជនភៀសខ្លួនប្រមូលផ្ដុំគ្នានៅទីនេះច្រើន ក៏ព្រោះតែផ្សារនេះ មានពលករចម្រុះជាតិសាសន៍រាប់សែននាក់ធ្វើការនៅទីនេះ ជាមូលហេតុងាយស្រួលដល់ជនភៀសខ្លួនលបលួចធ្វើការចិញ្ចឹមជីវិតប្រចាំថ្ងៃ ។
ឆ្លើយតបនឹងការលើកឡើងនេះ ប្រធានសាខាសហព័ន្ធខ្មែរកម្ពុជាក្រោម ប្រចាំនៅព្រះរាជាណាចក្រកម្ពុជាលោក តាំង សារៈ លើកឡើងថា បើប្រៀបធៀបនឹងពលរដ្ឋខ្មែរក្រោម ដែលរងការរាតត្បាតពីជំងឺ Covid-19 នៅព្រះរាជាណាចក្រកម្ពុជា និងនៅប្រទេសថៃ ឃើញថាជនភៀសខ្លួនខ្មែរក្រោម មានទម្ងន់ទុក្ខធ្ងន់ជាង ព្រោះជនភៀសខ្លនខ្មែរក្រោម នៅប្រទេសថៃ រស់នៅដោយភ័យខ្លាចតម្រួតចាប់បញ្ជូនទៅស្រុកវិញផង គ្មានផ្ទះសម្បែងផង គ្មានការងារធ្វើស្របច្បាប់ផង ៖ «ខ្មែរកម្ពុជាក្រោមនៅកម្ពុជាក៏ឃើញថា ទុក្ខនឹងមានតែពីរជាន់ទេ ចំណែកបងប្អូនជនភៀសខ្លួនខ្មែរក្រោម នៅប្រទេសថៃ ពេលមានការឆ្លងរោគ Covid-19 ហ្នឹងឃើញថា ទុក្ខហ្នឹងឡើងរហូតទៅដល់ ៤ ជាន់ ទីមួយគឺទុកព្រាត់ប្រាសពីគ្រួសារ ទី ២ គឺការរស់នៅដោយមិនមានផ្ទះសម្បែងជួលផ្ទះគេនៅ ទី ៣ កំពុងតែរស់នៅក្នុងភាពមិនស្របច្បាប់ក្នុងស្រុកគេ និង ទី ៤ កំពុងតែរស់នៅក្នុងការខ្វះខាតស្រាប់ ហើយឥឡូវវាគួបផ្សំនឹងមានជំងឺ Covid នឹងទៀត ដូច្នេះហើយការខ្វះខាតវារឹតតែខ្វះខាតមែនទែន» ។
សព្វថ្ងៃមានជនភៀសខ្លួនខ្មែរក្រោម កំពុងសុំសិទ្ធិជ្រកកោនជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ដែលហៅកាត់ថា UNHCR ក្នុងប្រទេសថៃមានប្រមាណជាង ៦០ គ្រួសារ និងមានមនុស្សប្រមាណជាង ២០០ នាក់ ។
ប្រធានសាខាសហព័ន្ធខ្មែរកម្ពុជាក្រោមប្រចាំកម្ពុជាបញ្ជាក់ថា ទន្ទឹមនឹងការខំស្វះស្វែងរកការគាំពារសិទ្ធិជ្រកកោនដល់ជនភៀសខ្លួនខ្មែរក្រោមនោះ សហព័ន្ធខ្មែរកម្ពុជាក្រោម ក៏កំពុងតែស្វែងរកស្បៀងឧបត្ថម្ភដល់ជនភៀសខ្លួនខ្មែរក្រោម នៅប្រទេសថៃ ទោះបីជាមិនបានច្រើនក្ដី ក៏គ្រាន់បានរំដោះទុក្ខក្នុងគ្រាលំបាកនេះដែរ ៕
ខាងក្រោមនេះ ជារូបភាពខ្លៗ បង្ហាញពីកម្មភាពលោកប្រធានផែនការណ៍នៃសហព័ន្ធខ្មែរកម្ពុជាក្រោម ត្រឹង ម៉ាន់ រិន្ទរ៍ មកសួរសុខទុក្ខជនភៀសខ្លួនខ្មែរក្រម កាលពីដើមខវិច្ឆិកាឆ្នាំ ២០១៩ ៖
