ដោយ ស៊ឺន ចែងចើន
អាជ្ញាខេត្តឃ្លាំង នៃរដ្ឋាភិបាលវៀតណាម បានកោះហៅពលរដ្ឋក្រោមម្នាក់ ទៅសាកសួរ ជុំវិញការប្រើប្រាស់បណ្ដាញសង្គម និងពាក់អាវយឺតមានទង់ជាតិកម្ពុជាក្រោម ដោយអាជ្ញាធរវៀតណាម ចាត់ទុកថា ជាករណីខុសច្បាប់ ។
នៅថ្ងៃទី ៦ ខែមករា សប្តាហ៍នេះ នគរបាលខេត្តឃ្លាំង បានកោះហៅ យុវជន យឿង ខាយ (Dương Khải) នៅភូមិដាយតាប៉ាយ ឃុំឡាកហ្វា (Lạc Hòa) ស្រុកជ្រោយ ញ ខេត្តឃ្លាំង ទៅសួរចម្លើយ បន្ទាប់ពីយុវជនរូបនោះ ប្រើសិទ្ធិសេរីភាពរបស់ខ្លួន ដើម្បីធ្វើការបញ្ចេញមតិទាក់ទង នឹងប្រវត្តិសាស្រ្តនៃទឹកដីកម្ពុជាក្រោម និងចែកចាយព័ត៌មាន ពីសកម្មភាពរបស់សហព័ន្ធខ្មែរកម្ពុជាក្រោម ដែលមានមូលដ្ឋាន នៅក្រៅប្រទេស ។
យោងតាមលិខិតប្រគល់ និងទទួលសម្ភារៈវត្ថុតាងមួយច្បាប់ ដែលការិយាល័យនគរបាលយួន នៃខេត្តឃ្លាំង សរសេររៀបរាប់នៅក្នុងកំណត់ហេតុថា លោក ង្វៀង វ៉ាំងត្វឹង ប្រធាននាយកដ្ឋានសន្តិសុខផ្ទៃក្នុង នៃស្នងការនគរបាល ខេត្តសុកត្រាំង (ខេត្តឃ្លាំង) បានធ្វើការដកហូតវត្ថុតាងជាសម្ភារៈអេឡិចត្រូនិចមួយចំនួន ពីលោក យឿង ខាយ រួមមាន ទូរសព្ទដៃម៉ាក Samsung Galaxy A8 ១ គ្រឿង និងលេខស៊ីមកាត ១ ។ នៅក្នុងកំណត់ហេតុដដែលនេះ បានបញ្ជាក់ទៀតថា ការដកហូតនូវវត្ថុតាងពាក់ព័ន្ធ ដែលប្រើសម្រាប់ទទួលព័ត៌មាន ចែករំលែក បង្ហោះ និងរក្សាទុកខ្លឹមសារទាក់ទង នឹងសហព័ន្ធខ្មែរកម្ពុជាក្រោម គឺជាការស្ម័គ្រចិត្តប្រគល់ជូនដល់សមត្ថកិច្ចនគរបាល ពីលោក យឿង ខាយ ។
វិទ្យុសំឡេងកម្ពុជាក្រោម បានព្យាយាមទាក់ទងយុវជន យឿង ខាយ ដើម្បីចង់ដឹងព័ត៌មានម្អិត ជុំវិញនៃការសាកសួរពីអាជ្ញាធរយួននេះដែរ ។ ប៉ុន្តែ នៅមិនទាន់ទទួលបានការឆ្លើយតប នៅឡើយទេ ។
យ៉ាងនេះក្តី បើយោងតាមសារអេឡិចត្រូនិក ដែលយុវជន យឿង ខាយ ផ្ញើទៅកាន់សាច់ញាតិរបស់លោក នៅពេលថ្មីៗ នេះ ថា នគរបាលខេត្តឃ្លាំង នឹងធ្វើការស៊ើបសួរលោកបន្ថែមទៀត ហើយបង្គាប់ឲ្យលោកទៅជួបមន្រ្តីនគរបាលសន្តិសុខឈ្មោះ ឡឹង នៅវេលាម៉ោង ៨ នាទីព្រឹក ថ្ងៃទី ៣០ មករា ២០២០ នៅការិយាល័យនគរបាលខេត្តឃ្លាំង ។
គួរជម្រាបជូនថា ករណីដូចគ្នានេះដែរ កាលពីថ្ងៃទី ១៥ ខែតុលា និងថ្ងៃទី ៣១ តុលា ២០១៩ អាជ្ញាធរវៀតណាម ក៏បានកោះហៅ ស្ត្រីខ្មែរក្រោមម្នាក់ទៅសួរចម្លើយ និងចោទប្រកាន់នាង ពីបទចែកចាយព័ត៌មាន ស្តីពីសកម្មភាពរបស់សហព័ន្ធខ្មែរកម្ពុជាក្រោម នៅក្រៅប្រទេស ។ អាជ្ញាធរវៀតណាម ក៏បានរឹបអូសយកទូរស័ព្ធ និងព្រមានស្ត្រីខ្មែរក្រោមរូបនោះ មិនឲ្យផ្សព្វផ្សាយព័ត៌មានក្រៅស្រុកបន្តទៀត ។ ជាមួយគ្នានេះ នៅក្នុងកំលុងខែមិថុនា ឆ្នាំ ២០១៩ យុវជនខ្មែរក្រោមមួយចំនួន ក៏ត្រូវបានអាជ្ញាធរវៀតណាម កោះហៅទៅព្រមានកុំឲ្យពាក់អាវយឺតខ្មែរក្រោម ដែលមានដាក់អក្សរ «៧០ ឆ្នាំ កម្ពុជាក្រោម នៅក្រោមនឹមអាណានិគមយួន» និងមិនឲ្យផ្សព្វផ្សាយ ឬចែករំលែកព័ត៌មាន ស្ដីពីការប្រារព្ធធ្វើខួប ៧០ នៃការបាត់បង់ទឹកដីខ្មែរកម្ពុជាក្រោមដែរ ។ កន្លងមក រដ្ឋាភិបាលវៀតណាម ក៏បានចាប់ព្រះសង្ឃខ្មែរក្រោមជាច្រើនអង្គ ដាក់ពន្ធនាគារ ដោយសារតែព្រះអង្គបានផ្ដល់ព័ត៌មាន ពីស្ថានភាពខ្មែរក្រោម ទៅឲ្យសហព័ន្ធខ្មែរកម្ពុជាក្រោម ។
ជារឿយៗ ព្រះសង្ឃ និងពលរដ្ឋខ្មែរក្រោម តែងតែត្រូវអាជ្ញាធរនៃអាណានិគមយួន កោះហៅទៅសួរចម្លើយជាបន្តបន្ទាប់ ចោទពីបទ ប្រឆាំង នឹងរដ្ឋភិបាល ឬមានទំនាក់ទំនង នឹងសហព័ន្ធខ្មែរកម្ពុជាក្រោម ដែលមានមូលដ្ឋាន នៅក្រៅប្រទេស ។
ក្នុងរយៈពេល ប៉ុន្មានឆ្នាំចុងក្រោយនេះ រដ្ឋាភិបាលវៀតណាម ត្រូវបានគេមើលឃើញថា បានធ្វើការរឹតត្បិតយ៉ាងខ្លាំង ទៅលើសេរីភាពនៃការបញ្ចេញមតិ ការធ្វើទុក្ខបុកម្នេញ និងការគំរាមកំហែងចាប់ខ្លួនដាក់ពន្ធនាគារ ចំពោះពលរដ្ឋខ្មែរក្រោម រូបណាដែលហ៊ានបញ្ចេញមតិពាកព័ន្ធ នឹងរឿងខ្មែរក្រោម នៅតាមបណ្ដាញសង្គមហ្វេសប៊ុក ។ វិធានការរបស់រដ្ឋាភិបាលយួន បានធ្វើឲ្យប៉ះពាល់យ៉ាងខ្លាំងទៅដល់សិទ្ធិទទួលបានព័ត៌មានរបស់ប្រជាពលរដ្ឋខ្មែរក្រោម ។ ជាពិសេស ការទទួលព័ត៌មាន ពីវិទ្យុ “សំឡេងកម្ពុជាក្រោម” និងទូរទស្សន៍ ព្រៃនគរ មានមូលដ្ឋាន នៅសហរដ្ឋអាមេរិក ដែលជាវិទ្យុ និងសារព័ត៌មាន ដើរតួនាទីសំខាន់ ក្នុងការពាំនាំដំណឹងជូនដល់ប្រជាជាតិខ្មែរក្រោមម្ចាស់ស្រុក នៃដែនដីកម្ពុជាក្រោម ដែលពួកគេមិនមានស្ថានប័នព័ត៌មានឯករាជ្យរបស់ខ្លួន និងមិនដែលបានទទួលព័ត៌មានពិតគ្រប់ជ្រុងជ្រោយឡើយ ។ ព្រោះប្រជាជាតិខ្មែរក្រោម សព្វថ្ងៃ កំពុងរស់នៅក្រោមការត្រួតត្រាបែបអាណានិគមពីរដ្ឋាភិបាលបក្សកុម្មុយនិស្តវៀតណាម ។ សព្វថ្ងៃ វៀតណាមជាប្រទេសប្រកាន់យករបបកុម្មុយនិស្ត រាល់ប្រព័ន្ធផ្សព្វផ្សាយជារបស់រដ្ឋ ហើយមិនមានស្ថាប័នព័ត៌មានឯកជនផ្សាយព័ត៌មានឯករាជ្យឡើយ ។ ការរឹត្បិតបែបនេះ ដោយសារតែរដ្ឋាភិបាលយួនព្រួយបារម្ភខ្លាចពលរដ្ឋខ្មែរ នៅកម្ពុជាក្រោម ដឹងពីការពិតថា កម្ពុជាក្រោម ជាទឹកដីរបស់ខ្មែរ ហើយត្រូវរដ្ឋាភិបាលអាណានិគមយួនយកទៅគ្រប់គ្រង កាលពីថ្ងៃទី ៤ ខែមិថុនា ឆ្នាំ ១៩៤៩ ៕
