សន្និបាតប្រចាំឆ្នាំ ២០១៨ និង សន្និសីទសិទ្ធិមនុស្ស នៃ សហព័ន្ធខ្មែរកម្ពុជាក្រោម

ចាប់ពីថ្ងៃទី ៧ ដល់ ៩ ខែធ្នួ ឆ្នាំ ២០១៨ ចុងឆ្នាំនេះ សហព័ន្ធខ្មែរកម្ពុជាក្រោម នឹងធ្វើសន្និបាតប្រចាំឆ្នាំរបស់ខ្លួន នៅទីក្រុង San Jose រដ្ឋ California សហរដ្ឋអាមេរិក ។ សន្និបាតនេះ នឹងមានថ្នាក់ដឹកនាំ សមាជិក សមាជិកា នៃ សហព័ន្ធខ្មែរកម្ពុជាក្រោម និងវាគ្មិនបរទេសនានា មកពីប្រទេសនានាជុំវិញពិភពលោកចូល រួម ។

សន្និបាតនេះ ក្នុងគោលបំណងបូកសរុបការងារប្រចាំឆ្នាំ ២០១៨ និង ចេញផែនការសម្រាប់ឆ្នាំថ្មី ។ កម្មវិធី សន្និបាតរយៈពេល ៣ ថ្ងៃនេះ រួមមាន៖

ថ្ងៃទី ៧ ខែធ្នូ ឆ្នាំ ២០១៨ ប្រជុំគណៈកម្មការនាយក និង របាយការណ៍សកម្មភាពឆ្នាំចាស់ នៃស្ថាប័ន នីមួយៗរបស់សហព័ន្ធខ្មែរកម្ពុជាក្រោម ។
ថ្ងៃទី ៨ ខែធ្នូ ឆ្នាំ ២០១៨ សន្និសីទសិទ្ធិមនុស្ស ក្រោមប្រធានបទ “ខួប ៧០ ឆ្នាំ នៃសេចក្តីប្រកាសជាសាកលស្តីពីសិទ្ធិមនុស្ស, ការអបអរសាទរ, ការក្រោកឈរ និង ការទាមទារសិទ្ធិមូលដ្ឋានសម្រាប់ជនជាតិដើមខ្មែរនៅកម្ពុជាក្រោម និង នៅក្នុងប្រទេសវៀតណាម”
ថ្ងៃទី ៩ ខែធ្នូ ឆ្នាំ ២០១៨ ពិភាក្សាអំពីផែនការណ៍ឆ្នាំថ្មីរបស់ស្ថាប័ននានា, សាខា និង តំបន់នីមួយៗ នៃ សហព័ន្ធខ្មែរកម្ពុជាក្រោម

តទៅនេះ ជាសេចក្ដីជូនដំណឹងស្ដីពី សន្និសីទសិទ្ធិមនុស្ស ដែលរៀបចំ នៅក្នុងសន្និបាតដំណាច់ឆ្នាំ ២០១៨ នៃសហព័ន្ធខ្មែរកម្ពុជាក្រោម ដូចតទៅ៖

សេចក្ដីប្រកាសព័ត៌មាន

……………………

សន្និសីទសិទ្ធិមនុស្ស
ខួប ៧០ ឆ្នាំ នៃសេចក្តីប្រកាសជាសាកលស្តីពីសិទ្ធិមនុស្ស
ការអបអរសាទរ, ការក្រោកឈរ និង ការទាមទារសិទ្ធិមូលដ្ឋាន
សម្រាប់ជនជាតិដើមនៅក្នុងប្រទេសវៀតណាម និង កម្ពុជាក្រោម

សហព័ន្ធខ្មែរកម្ពុជាក្រោម (KKF) នឹងរៀបចំសន្និសីទសិទ្ធិមនុស្សមួយ ក្រោមប្រធានបទ “ខួប ៧០ ឆ្នាំ នៃសេចក្តីប្រកាសជាសកលស្តីអំពីសិទ្ធិមនុស្ស, ការអបអរសាទរ, ការក្រោកឈរ និងការទាមទារសិទ្ធិ៍ជាមូលដ្ឋានសម្រាប់ជនជាតិដើមនៅក្នុងប្រទេសវៀតណាម និង កម្ពុជាក្រោម” ។ សន្និសីទនេះ នឹងធ្វើនៅទីក្រុង San Jose រដ្ឋ California សហរដ្ឋ អាមេរិក នៅថ្ងៃសៅរ៍ ទី ៨ ខែធ្នូ ឆ្នាំ ២០១៨ ចាប់ពីម៉ោង ៩ ព្រឹកដល់ម៉ោង ៤ រសៀល ដើម្បីអបអរសាទរ ខួប ៧០ ឆ្នាំ នៃសេចក្ដីប្រកាសជាសកលស្ដីពីសិទ្ធិមនុស្ស (UNHR) និង បន្តលើកកម្ពស់ការយល់ដឹងអំពីការរំលោភសិទ្ធិមនុស្ស នាពេលបច្ចុប្បន្ន របស់រដ្ឋាភិបាលវៀតណាម ប្រឆាំងនឹងខ្មែរក្រោមដែលជាជនជាតិដើម នៃដែនដីកម្ពុជាក្រោម និងជនជាតិដើម នានា នៅក្នុងប្រទេសវៀតណាម ។

ជារៀងរាល់ឆ្នាំ នៅថ្ងៃទី ១០ ខែធ្នូ ប្រជាពលរដ្ឋនៅជុំវិញពិភពលោក ប្រារព្ធទិវាសិទ្ធិមនុស្ស ជាថ្ងៃដែលមហាសន្និបាតរបស់អង្គការសហប្រជាជាតិ បានអនុម័តសេចក្ដីប្រកាសជាសកលស្តីពីសិទ្ធិមនុស្សនៅឆ្នាំ ១៩៤៨ ។ ជាអកុសល ជនជាតិដើមខ្មែរនៅកម្ពុជាក្រោម និងជនជាតិដើមនានានៅក្នុងប្រទេសវៀតណាម នៅមិនទាន់បានទទួលនូវសិទ្ធិជាមូលដ្ឋានដែលបានចែងនៅក្នុងសេចក្ដីប្រកាសជាសកលស្ដីពីសិទ្ធិមនុស្សនៅឡើយ ជាពិសេសសិទ្ធិដើម្បី អបអរសាទរទិវាសិទិ្ធមនុស្សដោយសេរី ។

ក្នុងឋានៈជារដ្ឋសមាជិកនៃអង្គការសហប្រជាជាតិ វៀតណាមបានចុះហត្ថលេខាលើសន្ធិសញ្ញាចំនួន ៧ ក្នុងចំណោម ៩ នៃសន្ធិសញ្ញាជាមួយអង្គការសហប្រជាជាតិ និងបានចុះ ហត្ថលេខាអនុម័តសេចក្តីប្រកាសរបស់អង្គការសហប្រជាជាតិស្តីពីសិទ្ធិជនជាតិដើម ។ រដ្ឋាភិបាលវៀតណាមបានបដិសេធមិនទទួលស្គាល់ជនជាតិដើមនៅវៀតណាម និង បានកំណត់នូវអត្ដសញ្ញាណរបស់ពួកគេថាជា ជនជាតិភាគតិច ។ ដោយខ្វះការទទួលស្គាល់នេះហើយ ជនជាតិដើមនៅក្នុងប្រទេសវៀតណាម រាប់បញ្ចូលទាំងខ្មែរក្រោមនៅដែនដីកម្ពុជាក្រោម ផង បានប្រឈមមុខនឹងការរំលោភបំពានសិទ្ធិមនុស្ស និងការធ្វើឧបនេយ្យកម្មឲ្យទៅជាយួន ដែលជាបញ្ហាគួរឲ្យព្រួយបារម្ភយ៉ាងខ្លាំង ។

អ្នកតស៊ូមតិដើម្បីសិទ្ធិមនុស្ស, មន្ត្រីរដ្ឋាភិបាល, អ្នកសិក្សា, សមាជិកនៃសង្គមស៊ីវិល និងតំណាងជនជាតិដើមនៅក្នុងប្រទេសវៀតណាម រួមមាន ជនជាតិតៃ ហ្មុង និង ម៉ុងតៃញ៉ា នឹងត្រូវបានអញ្ជើញឱ្យថ្លែងសុន្ទរកថានៅក្នុងសន្និសីទនេះ ដើម្បី “លើកកម្ពស់, ការចូលរួម និង ឆ្លុះបញ្ចាំង” លើសេចក្ដីប្រកាសជាសកលរបស់អង្គការសហប្រជាជាតិស្ដីពីសិទ្ធិមនុស្ស និងផ្តោតលើកិច្ចពិភាក្សាពីរបៀបប្រើប្រព័ន្ធសិទ្ធិមនុស្សអន្តរជាតិ ដើម្បីការពារ និង លើកកម្ពស់សិទ្ធិ៍ជាមូលដ្ឋានរបស់ជនជាតិដើមនៅក្នុងប្រទេសវៀតណាម និង កម្ពុជាក្រោម ។

របៀបវារៈ នៃ សន្និសីទ៖

ផ្នែកទី ១៖ ការលើកកម្ពស់សិទ្ធិមនុស្សដែលបានចែងនៅក្នុងសេចក្ដីប្រកាសជាសកលរបស់អង្គការសហប្រជាជាតិស្ដីពីសិទ្ធិមនុស្ស (UDHR) ដើម្បីលើកកម្ពស់ និង ការពារសិទ្ធិជាមូលដ្ឋានរបស់ជនជាតិដើមនៅប្រទេសវៀតណាម និង កម្ពុជាក្រោម ។

វាគ្មិន៖

បណ្ឌិត Joshua Cooper ជានាយកប្រតិបត្តិ នៃវិទ្យាស្ថានសិទ្ធិមនុស្សហាវ៉ៃ
ក្រុមតំណាងជនជាតិដើម នៅវៀតណាមរួមមាន៖
លោក តោ គិម ថុង ជាទីប្រឹក្សាជាន់ខ្ពស់ និង អតីតអធិបតី នៃសហព័ន្ធខ្មែរកម្ពុជាក្រោម
អ្នកស្រី Siang Bacthi ជានាយកប្រតិបត្តិ នៃ មជ្ឈមណ្ឌលសិក្សាជនជាតិតៃ
លោក James Her ជាអធិបតី និង សមាជិកសភាពិភពលោក នៃជនជាតិហ្មុង
លោក Kok Ksor ជាប្រធាន នៃមូលនិធីម៉ុងតៃញ៉ា

ផ្នែកទី ២៖ សិទ្ធិសម្រេចវាសនាខ្លួនដោយខ្លួនឯងនៅក្នុងច្បាប់អន្តរជាតិ

លោក Paul Strauss ជាសមាជិកព្រឹទ្ធសភាសហរដ្ឋអាមេរិក មកពី DC នៃសហរដ្ឋ អាមេរិក
អ្នកស្រី Julie Duval ជាមន្ត្រីកម្មវិធី នៃ អង្គការប្រជាជាតិ និង ប្រជាជនគ្មានតំណាង (UNPO)

ផ្នែកទី ៣៖ សិទ្ធិសេរីភាព និង ជំនឿសាសនា

អ្នកស្រី Tina L. Mufford ជាមន្ត្រីជាន់ខ្ពស់ផ្នែកវិភាគនយោបាយរបស់គណៈកម្មការសហរដ្ឋអាមេរិកទទួលផ្នែកសេរីភាពសាសនាអន្តរជាតិ
ព្រះតេជព្រះគុណ TT Dhammo ជាប្រធានគណៈកម្មការសាសនាអន្តរជាតិ នៃ សហព័ន្ធខ្មែរកម្ពុជាក្រោម

ផ្នែកទី ៤៖ សិទ្ធិក្នុងការទទួលបានព័ត៌មាន និងសេរីភាពក្នុងការបញ្ចេញមតិ