ដោយ ស៊ឺន ចែងចើន
អាជ្ញាធរវៀតណាម នៅខេត្តឃ្លាំង បន្តធ្វើទុក្ខបុកម្នេញ ដោយចាប់ខ្លួនពលរដ្ឋខ្មែរក្រោម ដែលជាជនជាតិដើមម្ចាស់ស្រុកម្នាក់ទៀត ទៅសំឡុតកុំឲ្យងើបឡើងតវ៉ា រឿងទាមទារសិទ្ធិជាជនជាតិដើម។ អាជ្ញាធរយួនក្នុងខេត្តនេះ កាលពីវេលាម៉ោង ១០ ព្រឹក ថ្ងៃទី ១៩ មិថុនា ម្សិលមិញ បានចុះមកចាប់ឃុំខ្លួនជនជាតិដើមខ្មែរក្រោមម្នាក់ ឈ្មោះ ឡឹម វង្ស ដោយគ្មានលលិខិតស្នាម ឬដីកាអ្វីទាំងអស់ ។ ការឃាត់ខ្លួននេះ ធ្វើឡើងបន្ទាប់ពី អាជ្ញាធរវៀតណាម ចោទប្រកាន់ជនជាតិដើមខ្មែរក្រោមផ្សេងទៀត ថា ពួកគេកំពុងធ្វើសកម្មភាពក្បត់ជាតិ ។
គិតត្រឹម៉ោងចេញផ្សាយអត្ថបទនេះ លោក ឡឹម វង្ស នៅមិនទាន់ត្រូវបានអាជ្ញាធរវៀតណាម ដោះលែងឲ្យមានសេរីភាពនៅឡើយ ក្រោយចាប់យកទៅសាកសួរអស់រយៈជាង ៣០ ម៉ោងមកហើយ។
ប្រពន្ធរបស់លោក ឡឹម វង្ស បញ្ជាក់ប្រាប់សំឡេងកម្ពុជាក្រោម (VOKK) និងសារព័ត៌មាន ព្រៃនគរ ថា អាជ្ញាធរវៀតណាម ចាប់ប្តីលោកស្រីទៅសួរចម្លើយនេះ ដោយសារតែកន្លងមក ប្តីលោកស្រី តែងបង្ហោះ និងចែករំលែកអត្ថបទ ដែលមានខ្លឹមសារទាក់ទងនឹងប្រវត្តិសាស្រ្តដែនដីកម្ពុជាក្រោម នៅតាមបណ្ដាញសង្គម ហើយនៅពេលថ្មីៗ នេះ លោកបានចែកចាយអាវយឺតមាននិមិត្តសញ្ញា ៧៤ ឆ្នាំកម្ពុជាក្រោម នៅក្រោមនឹមអាណានិគមយួន ។ លោកស្រីអះអាងថា ប្តីលោកស្រីតាំងពីថ្ងៃចាប់ខ្លួនម្សិលមិញរហូតមកដល់ល្ងាចថ្ងៃទី ២០ មិថុនា នេះ ប្តីលោកស្រីមិនព្រមទទួលទានអាហារ ដែលរៀបចំដោយអាជ្ញាធរយួនឡើយ ដោយបារម្ភពីភាពមិនប្រក្រតីណាមួយ កើតឡើងចំពោះរូបលោក។
សូមបញ្ជាក់ថា នៅវេលាម៉ោង ១ រសៀលថ្ងៃទី ២០ មិថុនា នគរបាលសង្កាត់លេខ ៣ នៃ ខេត្តឃ្លាំង បានចុះមកឆែកឆេរផ្ទះរបស់លោក ឡឹម វង្ស និងបញ្ជាឲ្យបិទកាមេរ៉ាសុវត្ថិភាពក្នុងផ្ទះរបស់លោក រួចរឹបអូសយកសៀវភៅជនជាតិដើមជាច្រើនក្បាល ។ បន្ថែមពីលើនេះ នគរបាលយួន ក៏បាននាំខ្លួនប្រពន្ធរបស់លោកទៅសួរនាំ និងស្ដីបន្ទោសពាក់ព័ន្ធនឹងការបង្ហោះវីដេអូ អំពាវនាវដល់សហព័ន្ធខ្មែរកម្ពុជាក្រោម ជួយអន្តរាគមន៍ករណីចាប់ខ្លួនប្តីរបស់អ្នកស្រី។
UPDATE: អាជ្ញាធរវៀតណាម នៅខេត្តឃ្លាំង បានដោះលែងជនជាតិដើមខ្មែរក្រោមម្នាក់មកវិញហើយ នៅវេលាម៉ោង ៧ យប់ ថ្ងៃទី ២០ ខែមិថុនា បន្ទាប់ពីចាប់ឃុំខ្លួនអស់រយៈពេលប្រមាណជាង ៣០ ម៉ោង ។
លោក ឡឹម វង្ស ត្រូវបានអាជ្ញាធរវៀតណាម ចាប់ខ្លួន នៅព្រឹកថ្ងៃទី ១៩ ខែមិថុនា ដោយចោទប្រកាន់ ថា ធ្វើសកម្មភាពប្រឆាំងរដ្ឋាភិបាលបក្សកុម្មុនិស្តវៀតណាម ដោយសារតែលោកចែកចាយឯកសាររឿងប្រវត្តិសាស្រ្តទឹកដីកម្ពុជាក្រោម នៅតាមបណ្តាញសង្គម។
UPDATE: ពលរដ្ឋជាជនជាតិដើមខ្មែរក្រោមម្នាក់ ស្នើសហព័ន្ធខ្មែរកម្ពុជាក្រោម សហគមន៍អន្តរជាតិ និងអង្គការសហប្រជាជាតិ ជួយអន្តរាគមន៍ និងរកយុត្តិធម៌ជូនលោក ករណីវៀតណាមរំលោភសិទ្ធិជនជាតិដើម នៅលើទឹកដីកម្ពុជាក្រោម។ ការអំពាវនាវនេះ ធ្វើឡើងដោយសារតែជនជាតិដើមខ្មែរក្រោមរូបនោះ រងការធ្វើទុក្ខបុកម្នេញពីសំណាក់អាជ្ញាធរវៀតណាម ជុំវិញការបញ្ចេញមតិទាក់ទងនឹងប្រវត្តិសាស្រ្តទឹកដីកម្ពុជាក្រោម។
លោក ឡឹម វង្ស ជាជនជាតិដើមម្ចាស់ស្រុក នៅខេត្តឃ្លាំង ត្រូវបានអាជ្ញាធរវៀតណាម ចាប់ខ្លួន នៅព្រឹកថ្ងៃទី ១៩ ខែមិថុនា ដោយចោទប្រកាន់ ថា ធ្វើសកម្មភាពប្រឆាំងរដ្ឋាភិបាលបក្សកុម្មុនិស្តវៀតណាម ដោយសារតែលោកចែកចាយឯកសាររឿងប្រវត្តិសាស្រ្តទឹកដីកម្ពុជាក្រោម នៅតាមបណ្តាញសង្គម។ អាជ្ញាធរយួន ដោះលែងលោកមកវិញ បន្ទាប់ពីចាប់ឃុំខ្លួនសួរចម្លើយអស់រយៈពេលមួយយប់ពីរថ្ងៃ។
ក្រោយត្រូវបានដោះលែងឲ្យត្រឡប់មកផ្ទះវិញ លោក ឡឹម វង្ស បានផ្សាយវីដេអូផ្ទាល់ (LIVE) នៅលើគណនីហ្វេសប៊ុករបស់លោក ដោយចោទអាជ្ញាធរយួន ថា បានប្រើអំពើហិង្សាក្នុងពេលសួរចម្លើយ។ លើសពីនេះ ពួកគេក៏បានគំរាមមិនឲ្យលោកទាក់ទងសហព័ន្ធខ្មែរកម្ពុជាក្រោម រាយការណ៍ពីករណីចាប់ខ្លួនសួរចម្លើយលោក។ អាជ្ញាធរយួន ក៏បានព្រមានជនជាតិដើមខ្មែរក្រោមរូបនោះ ថា នឹងចាប់ខ្លួនលោកដោយគ្មានដីកាពីតុលាការគ្រប់ពេល បើលោកនៅតែមិនព្រមធ្វើតាមអ្វី ដែលអាជ្ញាធរយួនបង្ខំឲ្យចុះហត្ថលេខាទទួលស្គាល់កំហុស នៅក្នុងកំណត់ហេតុ ដើម្បីជាថ្នូរនឹងការដោះលែងឲ្យមកផ្ទះវិញនោះ។
