សារប្រសិទ្ធពរឆ្នាំថ្មី ឆ្នាំសកល ២០២៣
របស់
នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម
សូមថ្វាយបង្គំចំពោះព្រះសង្ឃគ្រប់អង្គជាទីគោរពដ៏ខ្ពង់ខ្ពស់ ។
សូមចម្រើនពរថ្នាក់ដឹកនាំ សមាជិក សមាជិកា និងអ្នកគាំទ្រ សហព័ន្ធខ្មែរកម្ពុជាក្រោម និងញាតិ ញោម ទាំងអស់ជាទីមេត្រី ។
សូមចម្រើនពរសហការី នៃ ក្រុមការងារ សំឡេងកម្ពុជាក្រោម (VOKK) នៅជុំវិញពិភពទាំងអស់ ជាទីស្និទ្ធស្នាល ។
នៅក្នុងឱកាសបុណ្យចូលឆ្នាំថ្មី ឆ្នាំសកល ២០២៣ នេះ តាងនាម នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម និង ខ្ញុំព្រះករុណា អាត្មាភាពផ្ទាល់ សូមប្រសិទ្ធពរជ័យសិរីមង្គលបវរមហាប្រសើរ កើត មានដល់ ព្រះសង្ឃគ្រប់អង្គ និងបងប្អូនជនរួមជាតិនៅជុំវិញពិភពលោក ជាពិសេសសហការី នៃ សំឡេងកម្ពុជាក្រោម (VOKK) ព្រមទាំងប្រិយមិត្តអ្នកគាំទ្រការផ្សាយរបស់យើងទាំងអស់ សូមបានប្រកបតែសេច ក្តីសុខ សេចក្តីចម្រើន និងវឌ្ឍនភាព សេរីភាព គ្រប់ពេលវេលា ។
ឆ្លៀតនៅក្នុងសារប្រសិទ្ធពរឆ្នាំថ្មីនេះដែរ ខ្ញុំព្រះករុណា អាត្មាភាព សូមធ្វើសេចក្ដីរាយការណ៍ខ្លះៗ ទាក់ទងនឹងសកម្មភាពរបស់ នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម ដែលបាន និងកំពុងតែបំពេញ បេសកកម្មក្នុងការផ្សព្វផ្សាយព័ត៌មាន ដើម្បីបម្រើដល់ពលរដ្ឋខ្មែរក្រោមនៅដែនដីកម្ពុជាក្រោម និងជនជាតិ ខ្មែរនៅជុំវិញពិភពលោក ដូចតទៅ៖
នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម ជាស្ថាប័នមួយរបស់ សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក បង្កើតឡើងក្នុងគោលបំណងធ្វើការស្រាវជ្រាវ រៀបរៀង និង ចងក្រងឯកសារស្ដីពីកម្ពុជាក្រោម និងផលិតជាព័ត៌មានទាន់ហេតុការណ៍ស្ដីពីព្រឹត្តិការណ៍នៅកម្ពុជាក្រោម និងសកម្មភាពថ្មីៗរបស់សហព័ន្ធខ្មែរកម្ពុជាក្រោម ដែលកំពុងតែធ្វើចលនាតស៊ូដោយសន្តិវិធី និងអហិង្សា នៅលើឆាកអន្តរជាតិ ដើម្បីឲ្យពលរដ្ឋនៅកម្ពុជាក្រោមចេះប្រើនូវសិទ្ធិរបស់ខ្លួនដែលមានចែងនៅក្នុងច្បាប់ អន្តរជាតិ ក្នុងនោះមាន «សិទ្ធិសម្រេចវាសនាខ្លួនដោយខ្លួនឯង» ជាដើម និងឲ្យពលរដ្ឋខ្មែរនៅក្នុងប្រទេស កម្ពុជា និងអន្តរជាតិបានស្គាល់ខ្មែរក្រោមនរណា និងទឹកដីកម្ពុជាក្រោមនៅកន្លែងណា ។
សព្វថ្ងៃ នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម មានសហការីជាអ្នកស្ម័គ្រចិត្តធ្វើការ ជាអ្នកយកព័ត៌មាននៅជុំវិញពិភពលោក ក្នុងនោះ មាន សហរដ្ឋអាមេរិក កាណាដា អូស្ត្រាលី បាំរាំង ហុល្លង់ ថៃ ប្រទេសកម្ពុជា និងដែនដីកម្ពុជាក្រោម ។ ក្រុមការងារទាំងអស់ធ្វើការយ៉ាងមមាញឹក ក្នុងការប្រមូលយកព័ត៌មាន ហើយសរសេរអត្ថបទ ផលិតកម្មវិធីផ្សាយជាទូរទស្សន៍ វិទ្យុ បោះពុម្ពជាកាសែត ព្រឹត្តិបត្រ និងសៀវភៅ ព្រមទាំងនិពន្ធ និងផលិតជាបទចម្រៀងជាតិនិយមជាដើម ផ្សព្វផ្សាយទៅដល់ពលរដ្ឋនៅដែនដី កម្ពុជាក្រោម បានទស្សនា អាន និងស្ដាប់ ដើម្បីឲ្យពួកគាត់ស្គាល់ និងចេះប្រើនូវសិទ្ធិជាមូលដ្ឋានរបស់ខ្លួន ។
មធ្យោបាយផ្សព្វផ្សាយរបស់នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម នាពេលបច្ចុប្បន្ន ផ្ដោតការផ្សព្វផ្សាយលើប្រព័ន្ធអិនធើណែតជាចម្បង ដោយសារសម័យនេះ ពលរដ្ឋខ្មែរក្រោមគ្រប់រូប នៅដែនដីកម្ពុជាក្រោម មានលទ្ធភាពគ្រប់គ្រាន់ក្នុងការប្រើប្រាស់ទូរស័ព្ទគ្រប់ដៃ និងទូរទស្សន៍ដែលអាច ភ្ជាប់អិនធើណែត ហើយអាចបើកមើលកម្មវិធីផ្សាយរបស់យើងបានគ្រប់ពេលវេលា ។
កម្មវិធីផ្សាយជាផ្លូវការរបស់ នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម សព្វថ្ងៃ រួមមាន៖
ទីមួយ៖ ផ្នែកគេហទំព័រ នៃ សំឡេងកម្ពុជាក្រោម (VOKK) ដែលមានអាសយដ្ឋាន www.vokk.net មាន ៣ ភាសា (ខ្មែរ អង់គ្លេស យួន) និង សារព័ត៌មាន ព្រៃនគរ ដែលមានអាសយដ្ឋាន www.preynokornews.info ឬ www.preynokornews.blogspot.com ។ នៅលើគេហទំព័រទាំង ២ នេះ យើងមានចុះ ផ្សាយអត្ថបទប្រចាំថ្ងៃជាច្រើនប្រភេទទាក់ទងនឹងរឿងរ៉ាវនៃដែនដីកម្ពុជាក្រោម ដូចជា ព័ត៌មានទាន់ហេតុ ការណ៍ ប្រវត្តិសាស្ត្រ ភូមិសាស្ត្រ វប្បធម៌ សិទ្ធិមនុស្ស ប្រពៃណី វត្តអារាម សាសនា បទវិភាគ បទ វិចារណកថា ប្រវត្តិបុគ្គលសំខាន់ៗ និងសកម្មភាពថ្មីៗរបស់ សហព័ន្ធខ្មែរកម្ពុជាក្រោម ព្រមទាំងមានផ្ទុក ឯកសារ PDF ដូចជា ព្រឹត្តិបត្រប្រចាំខែ កាសែត និងសៀវភៅ ដែលបានបោះពុម្ពដោយ សហព័ន្ធខ្មែរ កម្ពុជាក្រោម ជាដើម ។
ទីពីរ៖ បណ្ដាញសង្គម Facebook និង YouTube នៃ សំឡេងកម្ពុជាក្រោម (VOKK) ដែលមាន អាយដ្ឋាន www.facebook.com/vokk.net មានអ្នកចូលចិត្ត ឬ Like ជាង ១ សែននាក់ និងអ្នកតាមដាន ឬ Follower ជិត ២ សែននាក់ ចំណែក www.youtube.com/@VoiceofKampucheaKrom មានអ្នកតាម ដាន ឬ Subscribers ជិត ៦ ម៉ឺននាក់ ។ រីឯបណ្ដាញសង្គម នៃ សារព័ត៌មាន ព្រៃនគរ ដែលមាន អាសយដ្ឋាន www.facebook.com/preynokornews មានអ្នកតាមដានជាងមួយសែននាក់ និង www.youtube.com/ @preynokornews មានអ្នកតាមដាន ឬ Subscribers ជិត ១ សែននាក់ និងបានបង្ហោះវីដេអូជិត ២ ពាន់ឃ្លីប ។ នៅក្នុងឆ្នាំថ្មីនេះ សូមប្រិយមិត្តជួយចុចនៅលើពាក្យ Like, Follow ឬ Subscribe នៅលើ បណ្ដាញសង្គមទាំងនេះផង ដើម្បីបានទទួលព័ត៌មានទាន់ហេតុការណ៍ពីការផ្សាយរបស់យើងខ្ញុំ ។
ទីបី៖ នៅក្នុងឆ្នាំ ២០២៣ នេះ យើងនឹងបន្តស្រាវជ្រាវ រៀបរៀង ចងក្រង និងបោះពុម្ពជា ព្រឹត្តិបត្តិ កម្ពុជាក្រោម (ប្រចាំខែ) សៀវភៅ ប្រវត្តិវត្តនៅដែនដីកម្ពុជាក្រោម (ភាគ ២) និងសៀវភៅប្រវត្តិមហា សន្និបាតពិភពលោក ទាំង ១១ លើក នៃ សហព័ន្ធខ្មែរកម្ពុជាក្រោម ដើម្បីផ្សព្វផ្សាយ និងទុកជាឯកសារប្រវត្តិ សាស្ត្រ ។
ទីបួន៖ នាំយកបទចម្រៀងជាតិនិយមខ្មែរក្រោម (ភាគ ៨) ដែលយើងបានថតរួចហើយ មកផលិត ជាវីដេអូ ហើយផ្សព្វផ្សាយតាមបណ្ដាញសង្គម Facebook និង YouTube ដើម្បីប្រិយមិត្តទូទាំងពិភពលោក បានស្ដាប់ និងទស្សនាកម្សាន្ត ។
ទីប្រាំ៖ កម្មវិធីផ្សាយទូរទស្សន៍ Online នៃ សំឡេងកម្ពុជាក្រោម (VOKK) រួមមាន នាទី «អរុណ សួស្ដី កម្ពុជាក្រោម» បទសម្ភាសន៍ថ្នាក់ដឹកនាំ សមាជិក និងអ្នកគាំទ្រ សហព័ន្ធខ្មែរកម្ពុជាក្រោម នៅជុំវិញ ពិភពលោក និងពលរដ្ឋខ្មែរក្រោមនៅដែនដីកម្ពុជាក្រោម ទាក់ទងនឹងសកម្មភាពតស៊ូមតិរបស់ពួកគាត់ ដើម្បី «សិទ្ធិសម្រេចវាសនាខ្លួនដោយខ្លួនឯង» របស់ប្រជាជាតិខ្មែរក្រោម ។
ទោះបីយ៉ាងណាក៏ដោយ កម្មវិធីផ្សាយរបស់យើង នៅតែមានចំណុចខ្វះខាត ដែលត្រូវនឹងធ្វើការ កែលម្អឲ្យបានប្រសើរឡើង ព្រមទាំងពង្រឹង និងពង្រីកប្រព័ន្ធផ្សព្វផ្សាយឲ្យកាន់ទាន់សភាពការណ៍ និងបាន ទំលំទូលាយជាងមុនថែមទៀត ដើម្បីបម្រើដល់ប្រិយមិត្តនៅជុំវិញពិភពលោក ជាពិសេស ធ្វើជាពន្លឺមួយ សម្រាប់ច្រាលបំភ្លឺទៅលើទឹកដីកម្ពុជាក្រោម ទីដែលរបបអាណានិគមយួនកំពុងតែឃុំឃាំងពលរដ្ឋខ្មែរ ក្រោមរាប់លាននាក់ឲ្យជាប់នៅក្នុងគុកងងឹតឥតជញ្ជាំង មិនឲ្យពួកគាត់បានស្គាល់សេរីភាព និងពន្លឺសិទ្ធិ សម្រេចវាសនាខ្លួនដោយខ្លួនឯង ឡើយ ។
ឆ្លៀតក្នុងឱកាសនេះដែរ ខ្ញុំព្រះករុណា អាត្មាភាព សូមថ្លែងអំណរគុណយ៉ាងជ្រាលជ្រៅចំពោះ សហការី នៃ សំឡេងកម្ពុជាក្រោម (VOKK ) នៅជុំវិញពិភពលោក ដែលបានលះបង់ពេលវេលា ទ្រព្យ សម្បត្តិ និងប្រាជ្ញាស្មារតីដ៏មានតម្លៃ សម្រាប់បម្រើដល់បេសកកម្ម នៃស្ថាប័នព័ត៌មានរបស់យើង តាំងពី កកើតនៅឆ្នាំ ២០០១ រហូតមកដល់ឆ្នាំ ២០២៣ នេះ មានរយៈពេល ២២ ឆ្នាំហើយ ឲ្យមានដំណើរការ លូតលាស់រីកចម្រើនរហូតមកដល់សព្វថ្ងៃ ។
ម្យ៉ាងទៀត ខ្ញុំព្រះករុណា អាត្មាភាព សូមថ្លែងអំណរព្រះគុណ ចំពោះ ព្រះតេជព្រះគុណ គ្រប់អង្គ និងអរគុណយ៉ាងជ្រាលជ្រៅចំពោះអ្នកគាំទ្រនៅវិញពិភពលោក ដែលបានបរិច្ចាគថវិកាជួយឧបត្ថម្ភដល់ នាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម និងសូមអរគុណចំពោះប្រិយមិត្តនៅគ្រប់ទិសទី ដែល និយមចូលចិត្តស្ដាប់ និងទស្សនា ហើយគាំទ្រកម្មវិធីផ្សាយ សំឡេងកម្ពុជាក្រោម (VOKK) តាំងពីដើម រៀងមក ។
ឆ្នាំថ្មី ឆ្នាំកលល ២០២៣ សូមពុទ្ធពរទាំងឡាយ ៤ ប្រការគឺ អាយុ វណ្ណៈ សុខៈ ពលៈ កើតមានដល់ព្រះថេរានុថេរៈគ្រប់ព្រះអង្គ និងបងប្អូនជនរួមជាតិនៅគ្រប់ទិសទីកុំបីឃ្លៀងឃ្លាតឡើយ ។ ជាពិសេស ដោយ អំណាចនៃការផ្សព្វផ្សាយព័ត៌មាននេះ សូមឲ្យបានជាពន្លឺពុទ្ធិមួយសម្រាប់បំភ្លឺឲ្យពលរដ្ឋខ្មែរក្រោមនៅដែនដី កម្ពុជាក្រោមរាប់លាននាក់ មើលឃើញផ្លូវនៃការប្រើប្រាស់សិទ្ធិជាមូលដ្ឋានបស់ខ្លួន ហើយនាំគ្នាធ្វើដំណើរ នៅលើមាគ៌ា «សម្រេចវាសនាខ្លួនដោយខ្លួនឯង» តាមច្បាប់អន្តរជាតិ នៅលើទឹកដីកំណើតរបស់ខ្លួនក្នុង នាមជាជនជាតិដើម កុំបីអាក់ខានឡើយ ៕
សួស្តី ឆ្នាំថ្មី ឆ្នាំ ២០២៣ !
សហរដ្ឋអាមេរិក ថ្ងៃទី ០១ ខែមករា ឆ្នាំ ២០២៣
ពីខ្ញុំព្រះករុណា អាត្មាភាព
ភិក្ខុ សឺង យ៉ឹង រតនា
ប្រធាននាយកដ្ឋានព័ត៌មាន នៃ សហព័ន្ធខ្មែរកម្ពុជាក្រោម
ចុចទាញយក ឬអាននៅលើ PDF
