ដោយ គឹម សាវតា
អាជ្ញាធរវៀតណាមក្នុងខេត្តឃ្លាំង នៅថ្ងៃទី ១៣ ខែកញ្ញា បាននាំខ្លួនយុវជនខ្មែរក្រោមមួយរូបទៅសួរនាំ អំពីគម្រោងរៀបចំអបអរសាទរ ខួប ១៦ ឆ្នាំ ថ្ងៃអង្គការសហប្រជាជាតិ អនុម័តសេចក្ដីប្រកាសស្ដីពីសិទ្ធិជនជាតិដើម (UNDRIP) (១៣ កញ្ញា ២០០៧ – ១៣ កញ្ញា ២០២៣) ។
លោក យ័ញ សេត ដែលត្រូវបានអាជ្ញាធរវៀតណាម នាំខ្លួនទៅសួរនាំ ប្រាប់សារព័ត៌មានព្រៃនគរ និងសំឡេងកម្ពុជាក្រោម (VOKK) បន្ទាប់ពីអាជ្ញាធរចូលខ្លួនទៅបំភ្លឺអស់ជាច្រើនម៉ោង ថា នៅវេលាម៉ោងប្រមាណ ១០ ព្រឹក ថ្ងៃទី ១៣ កញ្ញា អាជ្ញាធរវៀតណាមថ្នាក់មូលដ្ឋាន និងថ្នាក់ខេត្តឃ្លាំងជិត ១០ នាក់ បានសម្រុកចូលក្នុងផ្ទះរបស់ រួចនាំខ្លួនលោក ទៅការិយាល័យនគរបាលស្រុកជ្រោយញ ដើម្បីសួរនាំទាក់ទងនឹងគម្រោងរៀបចំអបអរទិវាសិទ្ធិជនជាតិដើម ដែលត្រូវបានប្រកាសដោយអង្គការសហប្រជាជាតិ ។ ការសួរនាំនេះ មានរយៈពេលជាង ៥ ម៉ោង ទើបអាជ្ញាធរឱ្យលោក យ័ញ សេត ត្រឡប់មកផ្ទះវិញ។
ក្រៅពីលោក យ័ញ សេត ពលរដ្ឋខ្មែរក្រោមមួយរូបទៀត គឺលោក ចៅ អ៊ិនតាំ រស់នៅក្នុងខេត្តព្រះត្រពាំង ឱ្យដឹងថា នៅថ្ងៃទី ១៤ ខែកញ្ញាស្អែកនេះ អាជ្ញាធរវៀតណាមក្នុងខេត្តមួយនេះ ក៏បានចេញលិខិតកោះហៅលោកទៅសួរនាំ ពាក់ព័ន្ធនឹងបញ្ហាមួយចំនួន ដែលលោកអះអាងថា អាជ្ញាធរវៀតណាមមិនបានបញ្ជាក់ពីមូលហេតុច្បាស់លាស់នៅឡើយ។
អាជ្ញាធរវៀតណាម តែងកោះហៅពលរដ្ឋខ្មែរក្រោម ទៅសួរចម្លើយ និងគំរាមកំហែង ខណៈដែលពួកគាត់នាំគ្នាធ្វើពិធីអបអរសាទរទិវាសិទ្ធិជនជាតិដើម។
សេចក្តីប្រកាសរបស់អង្គការសហប្រជាជាតិ ស្តីពីសិទ្ធិជនជាតិដើម មានប្រទេសចំនួន ១៤៤ បានអនុម័តយល់ព្រម ក្នុងនោះមានប្រទេស ៤ ជំទាស់ និង ១១ ប្រទេសផ្សេងទៀតជាអនុបវាទ ហើយវៀតណាម ក៏ជាប្រទេសដែលចុះហត្ថលេខាទទួលយកខ្លឹមសារនៃសេចក្តីប្រកាសនេះផង។ តែទោះជាយ៉ាងណារហូតមកដល់ពេលនេះ មានប្រទេសចំនួន ១៤៨ ហើយ ដែលបានអនុម័តយល់ព្រម៕
