ដោយ ថាច់ ប្រីជា គឿន
អគ្គលេខាធិការ នៃ អង្គការសហប្រជាជាតិ លោក Antonio Guterres បានអំពាវនាវ ” នៅក្នុងឱកាសរំឭកដល់ថ្ងៃដែលព្រះពុទ្ធ ទ្រង់ប្រសូត, បានត្រាស់ និង បរិនិព្វាន សូមឲ្យមនុស្សគ្រប់រូប មិនថា អ្នកកាន់ព្រះពុទ្ធសាសនា ឬ អ្នកដែលមិនកាន់ព្រះពុទ្ធសាសនា នោះទេ ក៏អាចឈ្វេងយល់ និងទទួលបាននូវការបំផុសគំនិតពីពាក្យប្រៀនប្រដៅរបស់ព្រះអង្គបានដែរ” ។
អគ្គលេខាធិការ នៃ អង្គការសហប្រជាជាតិ ក៏បានផ្ញើសារប្រគេន និង ជូនពរដល់អ្នកដែលប្រារព្ធពិធីបុណ្យវិសាខបូជានៅជុំវិញពិភពលោកថា៖ “ក្នុងពេលដែលពិភពលោកកាន់តែពោរពេញដោយការមិនចេះអត់ធ្មត់ និង វិសមភាព សាររបស់ព្រះពុទ្ធទាក់ទងនឹងអំពើអហិង្សា និងការធ្វើបដិសណ្ឋារកិច្ចចំពោះអ្នកដទៃ គឺមានសារៈសំខាន់ជាងអ្វីទាំងអស់” ។
លោកបានបន្ថែមទៀតថា៖ “នៅក្នុងឱកាសបុណ្យវិសាខបូជានេះ សូមឱ្យយើងទាំងអស់គ្នារំឭកឡើងវិញ ការប្តេជ្ញាចិត្តរបស់យើងក្នុងការកសាងពិភពលោក នៃ សន្តិភាព និង សេចក្តីថ្លៃថ្នូរសម្រាប់មនុស្សទាំងអស់គ្នា” ។
ការផ្ញើសាររបស់អគ្គលេខាធិការអង្គការសហប្រជាជាតិនេះ ធ្វើឡើងស្របពេលដែល អង្គការសហប្រជាជាតិ បានប្រារព្ធពិធីបុណ្យវិសាខបូជា (UN Day of Vesak) លើកទី ១៦ នៅក្នុងការិយាល័យកណ្ដាល របស់អង្គការសហប្រជាជាតិ នាទី ក្រុងញ៉ូវយ៉ក (New York) សហរដ្ឋអាមេរិក នៅ រសៀលថ្ងៃទី ១៧ ខែឧសភា ឆ្នាំ ២០១៩ សប្ដាហ៍ នេះ ។
ពិធីបុណ្យវិសាខបូជានៅក្នុងអង្គការសហប្រជាជាតិនេះ លើកនេះ មានព្រះសង្ឃ និង ពុទ្ធបរិស័ទនៅជុំវិញពិភពលោក ចូលរួមយ៉ាងកុះករ ដើម្បីគោរព និង រំឭកដល់ថ្ងៃ ដែល ព្រះពុទ្ធសមណគោតម ទ្រង់បានប្រសូត, បានត្រាស់ និង បរិនិព្វាន ចំថ្ងៃ ១៥ កើតពេញបូណ៌មី ខែពិសាខ ។
កាលពីថ្ងៃទី ១៥ ខែធ្នូ ឆ្នាំ ១៩៩៩ អង្គការសហប្រជាជាតិបានទទួលស្គាល់បុណ្យវិសាខបូជា (Vesak Day) ថាជាបុណ្យអន្តរជាតិ និងអនុញ្ញាតឱ្យមានការប្រារព្ធពិធីបុណ្យនេះ នៅគ្រប់ការិយាល័យរបស់អង្គការសហប្រជាជាតិ នៅទូទាំងពិភពលោក ។ ការបញ្ចូលបុណ្យវិសាខបូជាជា បុណ្យអន្តរជាតិនេះ គឺដើម្បីជាការទទួលស្គាល់ការការចូលរួមចំណែករបស់ព្រះពុទ្ធសាសនា ក្នុងការអប់រំស្មារតីពលរដ្ឋនៅក្នុងពិភពលោក ៕
