ដោយ ស៊ឺន ចែងចើន
សម្ព័ន្ធសមណនិស្សិត-និស្សិតខ្មែរកម្ពុជាក្រោម ដែលមានមូលដ្ឋាននៅប្រទេសកម្ពុជា កាលពីថ្ងៃទី ២៧ ខែមករា បានចេញសេចក្តីជូនដំណឹងមួយ ស្តីពីការជ្រើសរើសសមណនិស្សិតខ្មែរ មានដើមកំណើតនៅកម្ពុជាក្រោម ទៅបន្តការសិក្សាថ្នាក់បរិញ្ញាបត្រ នៅប្រទេសថៃ សម្រាប់ឆ្នាំ ២០១៩ ចំនួន ១០ ព្រះអង្គ ។
យោងតាមសេចក្ដីជូនដំណឹង ដោយព្រះតេជព្រះគុណ សឺន សុផារិន្ទ ជាប្រធានសម្ព័ន្ធសមណនិស្សិត-និស្សិតខ្មែរកម្ពុជាក្រោម បានបញ្ជាក់ថា សមណនិស្សិត ដែលមានបំណងចង់និមន្តបន្តទៅសិក្សានៅប្រទេសថៃ សូមនិមន្តមកចុះឈ្មោះ នៅទីស្នាក់ការកណ្តាលនៃសម្ព័ន្ធសមណនិស្សិត-និស្សិតខ្មែរកម្ពុជាក្រោម ដែលមានអាសយដ្ឋាននៅកុដិលេខ ១៧ នៃវត្តបទុមវតី សង្កាត់ចតុមុខ ខណ្ឌដូនពេញ រាជធានីភ្នំពេញ ។
បើតាមលិខិតជូនដំណឹងដដែលបានបញ្ជាក់ អំពីលក្ខខណ្ឌនៃការជ្រើសរើសថា សមណនិស្សិតខ្មែរក្រោម ដែលនិមន្តមកពីដែនដីកម្ពុជាក្រោម ត្រូវមានសញ្ញាបត្រមធ្យមសិក្សាទុតិយាភូមិខ្មែរ ឬថ្នាក់ទី ១២ វៀតណាម (បាក់ឌុប) ព្រឹត្តិបត្រពន្ទុ និងឆាយា ឬសង្សដីកា ។ ចំណែកសមណនិស្សិតខ្មែរក្រោម នៅប្រទេសកម្ពុជា ត្រូវមានសញ្ញាបត្រ ឬសញ្ញាបត្របណ្តោះអាសន្នមធ្យមសិក្សាទុតិយាភូមិ (បាក់ឌុប) ព្រឹត្តិបត្រពន្ទុ និងឆាយា ឬសង្សដីកា ។
ព្រះតេជព្រះគុណ សឺន សុផារិន្ទ បានអំពាវនាវដល់សមណសិស្សខ្មែរក្រោម ដែលមានបំណងចង់ទៅបន្តការសិក្សា នៅប្រទេសថៃ ហើយមានលក្ខណសម្បត្តិស្របតាមលក្ខខណ្ឌរបស់អង្គការ សូមនិមន្តមកចុះឈ្មោះនៅការិយាល័យកណ្ដាលរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម ដែលមានមូលដ្ឋាននៅវត្តបទុមវតី ឋិតនៅក្នុងទីក្រុងភ្នំពេញ ។
ទាក់ទិន នឹងការបញ្ជូនសមណនិស្សិតខ្មែរក្រោមទៅសិក្សា នៅក្រៅប្រទេសនេះដែរ នៅថ្ងៃទី ២៤ មីនា ខាងមុខនេះ សម្ព័ន្ធសមណនិស្សិត-និស្សិតខ្មែរកម្ពុជាក្រោម នឹងប្រារព្ធពិធីបុណ្យផ្កាសាមគ្គី ដើម្បីរៃអង្គាសថវិកា សម្រាប់រៀបចំឯកសារ និងដោះស្រាយមធ្យោបាយផ្សេងៗ ក្នុងការបញ្ជូនសមណនិស្សិតចំនួន ១០ អង្គទៅបន្តការសិក្សា នៅប្រទេសថៃ និងផ្ដល់ជាអាហារូបករណ៍ដល់សមណនិស្សិតក្រីក្រ ដែលកំពុងសិក្សាមហាវិទ្យាល័យនានា នៅក្នុងប្រទេសកម្ពុជា ។
គួរជម្រាបជូនថា សម្ព័ន្ធសមណនិស្សិត-និស្សិតខ្មែរកម្ពុជាក្រោម បានលើកគម្រោងថវិកា សម្រាប់ចំណាយប្រចាំឆ្នាំ ២០១៩ នេះ សរុបជាទឹកប្រាក់ $២៥,១០០ (ពីរម៉ឺនប្រាំពាន់មួយរយ) ដុល្លារអាមេរិក ។ ដោយក្នុងនោះ គម្រោងថាវិកា សម្រាប់ចំណាយទៅលើផ្នែកអំប់រំ មានរហូតដល់ ១៧,៧៥០ ដុល្លារ ។ ចំណែកផ្នែកផ្សេងៗ ទៀត មានដូចជា ផ្នែកស្រាវជ្រាវវប្បធម៌ និងផ្សព្វផ្សាយ ផ្នែកសង្គមកិច្ច ផ្នែករដ្ឋបាល និងផ្នែកកិច្ចប្រជុំប្រចាំខែ និងដំណាច់ឆ្នាំ ។
ព្រះតេជព្រះគុណ សឺន សុផារិន្ទ បញ្ជាក់ថា សម្ព័ន្ធសមណនិស្សិត-និស្សិតខ្មែរកម្ពុជាក្រោម មិនមានកញ្ចប់ថវិកា សម្រាប់ធ្វើសកម្មភាពបណ្តុះបណ្តាលធនធានមនុស្សឡើយ ។ ព្រះអង្គថា ប្រភពថវិកា គឺបានមកពីការចូលរួមឧបត្ថម្ភរបស់សប្បុរសជនទាំងក្នុង និងក្រៅប្រទេស ។ ក្រៅពីនេះ ជារៀងរាល់ឆ្នាំ សម្ព័ន្ធសមណនិស្សិត-និស្សិតខ្មែរកម្ពុជាក្រោម តែងរៀបចំកម្មវិធីចំនួន ២ លើក គឺកម្មវិធី «បុណ្យផ្ការស្មីសាមគ្គី» និងកម្មវិធី «ជំនួបនិស្សិត បញ្ញាវន្តខ្មែរកម្ពុជាក្រោម និងសប្បុរសជន» ក្នុងគោលបំណងស្វែងរកការឧបត្ថម្ភជាថវិកា ដើម្បីផ្គត់ផ្គង់ការសិក្សា ដល់សមជិករបស់ខ្លួន ដែលកំពុងបន្តការសិក្សា ទាំងនៅក្នុងប្រទេសកម្ពុជា និងនៅក្រៅប្រទេស ។
សម្ព័ន្ធសមណនិស្សិត-និស្សិតខ្មែរកម្ពុជាក្រោម ជាអង្គការក្រៅរដ្ឋាភិបាលមួយ ដែលបានបង្កើតឡើង កាលពីឆ្នាំ ២០០២ ដោយព្រះសង្ឃខ្មែរក្រោមជាសមណនិស្សិត ដែលកំពុងតែសិក្សានៅក្នុងប្រទេសកម្ពុជា ។ អង្គការរមួយនេះ ផ្ដោតការយកចិត្តទុកដាក់លើវិស័យសិក្សាអប់រំ និងបណ្ដុះបណ្ដាលធនធានមនុស្សជាចម្បង ៕
