ដោយ ថាច់ ប្រីជា គឿន l សារព័ត៌មាន ព្រៃនគរ
ឧត្ដមទីប្រឹក្សាប្រព្រះមហាក្សត្រខ្មែរដែលមានដើមកំណើតជាខ្មែរក្រោម លោក សឺន សូបែតិ៍ បានអំពាវនាវឲ្យពលរដ្ឋខ្មែរក្រោម និងអង្គការខ្មែរក្រោមទាំងអស់ ត្រូវយកគោលដៅរបស់សហព័ន្ធខ្មែរកម្ពុជាក្រោម ធ្វើជាត្រីវិស័យដើម្បីអ្វី មួយដែលលោកហៅថា “ឈានទៅរកជោគជ័យធំៗដទៃទៀតសម្រាប់ប្រជាពលរដ្ឋ និង មាតុភូមិកម្ពុជាក្រោម” ។ សេចក្ដីអំពាវនាវនេះធ្វើឡើង នៅព្រឹក ថ្ងៃទី ១៥ ខែកក្កដា ស្របពេលដែលសាខាសហព័ន្ធខ្មែរកម្ពុជាក្រោម នៅប្រ ទេសកម្ពុជា បានប្រារព្ធខួប ១៣ ឆ្នាំ ថ្ងៃ សហព័ន្ធខ្មែរកម្ពុជាក្រោមបាន ចូលជាសមាជិកអង្គការប្រជា ជាតិគ្មានតំណាង ហៅកាត់ជាភាសាអង់គ្លេសថា UNPO ។ កម្មវិធីនេះ ប្រារព្ធនៅវត្តសាគមគ្គីរង្សី ក្នុងទីក្រុង ភ្នំពេញ ដោយមានការចូលរួមថ្លែងសារតាមរយៈ Internet Conference ពី លោក ថាច់ ង៉ុក ថាច់ ប្រធានសហព័ន្ធ ខ្មែរកម្ពុជាក្រោម អំពីផែនការរបស់សហព័ន្ធខ្មែរកម្ពុជាក្រោម និងការចាក់បញ្ចាំងវីដេអូ ស្ដីពីសកម្មភាពរបស់ សហព័ន្ធខ្មែរកម្ពុជាក្រោម ក្នុងឆាកអន្តរជាតិជាង ១០ ឆ្នាំ មកនេះ ។
យកគោលដៅរបស់សហព័ន្ធខ្មែរកម្ពុជាក្រោមជាត្រីវិស័យ៖
ថ្លែងទៅកាន់ព្រះសង្ឃ និងពលរដ្ឋខ្មែរក្រោម ដែលបានចូលរួមក្នុងកម្មវិធីមួយនេះ លោក សឺន សូបែតិ៍ ជាឧត្ដម ទីប្រឹក្សាព្រះ មហាក្សត្រ ព្រះបាទ នរោត្ដម សីហមុនី នៃប្រទេសកម្ពុជា បានអំពាវនាវឲ្យពលរដ្ឋខ្មែ រក្រោម ទាំងអស់ កុំធ្វើសកម្មភាពណា មួយឲ្យមានការបន្ទច់បង្អាក់ដល់ដំណើរការតស៊ូរបស់សហព័ន្ធខ្មែរកម្ពុជាក្រោមឡើយ និងថា បើពុំនោះទេ នឹងត្រូវទទួលកំហុស ចំពោះប្រវត្តិសាស្ត្រមិនខានឡើយ ។ ម្យ៉ាងទៀត លោកក៏បានអំពាវនាវ ឲ្យអង្គ ការសមាគមខ្មែរក្រោមទាំងអស់ ត្រូវយកគោល ដៅរបស់សហព័ន្ធខ្មែរកម្ពុជាក្រោម ធ្វើជាត្រីវិស័យ ដើម្បីធ្វើឲ្យ សម្រចប្រយោជន៍ដល់សង្គមជាតិខ្មែរក្រោម នៅកម្ពុជាក្រោម ។
លោក សឺន សូបែតិ៍ បានថ្លែងថា៖
“សូមអំពាវនាវដល់បងប្អូនខ្មែរកម្ពុជាក្រោមគ្រប់មជ្ឈដ្ឋាន សូមកុំបង្កនូវសកម្មភាពណាមួយដែលនាំដល់ការបន្ទច់ បង្អាក់រារាំងដល់ដំណើរ ការតស៊ូរបស់ “សហព័ន្ធខ្មែរកម្ពុជាក្រោម” ពិភពលោកឲ្យសោះ បើពុំនោះទេ នឹងត្រូវ ទទួល កំហុសចំពោះប្រវត្តិ សាស្ត្រមិនខានឡើយ និងសូមអំពាវនាវដល់ខ្មែរកម្ពុជាក្រោមគ្រប់អង្គការ សហគមន៍ ត្រូវធ្វើ សកម្មភាព ដោយយកគោលដៅ របស់សហព័ន្ធខ្មែរកម្ពុជាក្រោមជាត្រីវិស័យ ដើម្បីឈានទៅ រកជោគជ័យ ធំៗ ដទៃ ទៀតសម្រាប់ប្រជាពលរដ្ឋ និង មាតុភូមកម្ពុជា ក្រោមដ៏ជាទីស្រណោះរបស់យើង” ។
ដំណាក់កាលតស៊ូទាំង ៣ របស់សហព័ន្ធខ្មែរកម្ពុជាក្រោម៖
លោក ថាច់ ង៉ុក ថាច់ ប្រធានសហព័ន្ធខ្មែរកម្ពុជាក្រោម បានថ្លែងតាមរយៈ Skype ពីសហរដ្ឋអាមេរិក ទៅកាន់អ្នក ចូលរួមពិធីខួបមួយនេះថា ចាប់តាំងពីសហព័ន្ធខ្មែរកម្ពុជាក្រោម បានចូលជាសមាជិក UNPO ជាង ១០ ឆ្នាំ មកនេះ សហព័ន្ធខ្មែរកម្ពុជាក្រោមបានអនុវត្តនូវផែនការរបស់ខ្លួនទាំង ៣ ដំណាក់កាល គឺ ដំណាក់កាលទីមួយ បានធ្វើរួចហើយ គឺសហព័ន្ធខ្មែរកម្ពុជាក្រោមបានធ្វើឲ្យ ពិភពលោកស្គាល់ខ្មែរក្រោមជានរណា ។ ដំណាក់កាលទី ២ កំពុងធ្វើឲ្យពិភព លោកដឹងថា ខ្មែរក្រោមចង់បានអ្វី ដោយសហព័ន្ធខ្មែរកម្ពុជាក្រោមបានធ្វើសកម្មភាពការទូត ទាក់ទងទៅអង្គ ការអន្តរជាតិ និង មន្ត្រីក្រសួងការបរទេសប្រទេសនានាក្នុងពិភពលោក ដើម្បីជម្រាបអំពីបញ្ហា និងគោលបំណងរបស់សហព័ន្ធខ្មែរកម្ពុជាក្រោម ក្នុងគោលដៅ ដំណើរឆ្ពោះទៅកាន់មាតុភូមិ និង ដំណាក់កាលទី ៣ គឺធ្វើឲ្យពលរដ្ឋខ្មែរក្រោមទទួល សិទ្ធិសម្រេចវាសនា ខ្លួនដោយខ្លួនឯង នៅលើដែនដីកម្ពុជាក្រោមនាពេលអនាគត បន្ទាប់ពីដំណាក់កាលទីមួយ និងទីពីរបានជោគជ័យ ។
លោក ថាច់ ង៉ុក ថាច់ បានថ្លែងថា៖
“ចែកចេញជា៣ដំណាក់កាល គឺដំណាក់កាលទី ១ ស្គាល់ថាខ្មែរក្រោមជានរណា ហើយនៅក្នុងរយៈពេល ជាង ១០ ឆ្នាំមកនេះ សហព័ន្ធខ្មែរកម្ពុជាក្រោមបានធ្វើឲ្យអន្តរជាតិស្គាលថា ខ្មែរក្រោមជានរណា? ដូចដែលព្រះករុណាគ្រប់ព្រះអង្គ បងប្អូនខ្មែរ ខ្មែរក្រោមជ្រាបស្រាប់ ។ ឥឡូវនេះមកដល់ដំណាក់ កាលទី ២ យើងត្រូវធ្វើយ៉ាងណា ដើម្បីឲ្យអន្តរជាតិដឹងថាតើខ្មែរក្រោមហ្នឹងចង់បានអ្វី? ដូច្នេះការដែលយើងចង់ឲ្យគេ ជួយថា យើងចង់បានអ្វី គឺអាស្រ័យទៅលើព្រះសង្ឃ បងប្អូនខ្មែរក្រោមនៅក្នុងស្រុក អាស្រ័យទៅលើ ព្រះសង្ឃខ្មែរក្រោមនិងបងប្អូនខ្មែរទាំងយុវជនយុវតីនៅប្រទេសកម្ពុជាហ្នឹងជួយជ្រោមជ្រែង រួមទាំងបងប្អូន ខ្មែរក្រោម និងនៅក្រៅប្រទេស ។ យើងខ្ញុំជឿជាក់ថាក្នុងដំណាក់កាលទីពីរ ថាតើខ្មែរក្រោមត្រូវការអ្វី នេះយើងមិនចំណាយពេលដល់ទៅមួយទស្សវត្សរ៍ទៀតទេ ។ ដូចដែលព្រះករុណាគ្រប់ព្រះអង្គនិងបងប្អូន យើងជ្រាបស្រាប់តំណាងអង្គការសហប្រជាជាតិ បានចុះទៅជាបន្តបន្ទាប់ ហើយនៅក្នុងលើវេទិកាអន្តរជាតិ ដូចដែលបានឃើញកន្លងមកហើយក្នុងរយៈពេល ១០ ឆ្នាំនេះសម្លេងខ្មែរក្រោមបានចូលរួមក្នុងវេទិកា ជនជាតិដើមនៅបុរីញឺវយ៉ក យើងបានចូលរួមនៅក្នុងវេទិកាអន្តរជាតិនៅទីក្រុងហ្សឺណែវ ជាមួយនឹងសភា អឺរ៉ុបដែលយើងបានធ្វើបន្តបន្ទាប់មក ។ ក្រៅពីនោះទៀតជាមួយរដ្ឋាភិបាលអាមេរិកកាំង រដ្ឋាភិបាល កាណាដា រដ្ឋាភិបាលអូស្ត្រាលីនិងរដ្ឋាភិបាលនានាទៀតនៅអឺរ៉ុប ។ ដូចកាលពីឆ្នាំ២០១១ ប្រមុខរដ្ឋាភិ បាល នៃប្រទេសកាណាដាបានទៅដល់ទឹកដីកម្ពុជាក្រោម ដូច្នេះយើងឃើញថាអ្វីដែលយើងបានរៀបចំមក គឺមានដំណើរការល្អ ។ ដូច្នេះ ថ្ងៃនេះខ្ញុំព្រហករុណាខ្ញុំបាទសូមអំពាវនាវដល់ព្រះតេជព្រះគុណគ្រប់ព្រះអង្គ យុវជនយុវតីបងប្អូនខ្មែរយើងទាំងអស់ សូមមេត្តាជួយបន្តដំណាក់កាលទីពីរនេះ អ្វីដែលសហព័ន្ធ កម្ពុជាក្រោមចង់ឃើញចង់បានគឺសូមអំពាវនាវព្រះសង្ឃនិងបងប្អូនខ្មែរយើងនៅប្រទេសកម្ពុជារួមទាំងយុវជនយុវតីផង ត្រូវនាំគ្នាចូលរួមនៅក្នុងដំណើរការទៅកាន់មាតុភូមិរបស់សហព័ន្ធខ្មែរកម្ពុជាក្រោម មួយដោយ សារមូលហេតុយើងនាំគ្នាធ្វើបុណ្យធ្វើទាន ដូចជាធ្វើបុណ្យទៀនព្រះវស្សា ធ្វើដំណើទៅទេសចរណ៍នៅ កម្ពុជាក្រោម ទៅវត្តខ្មែរក្រោម ទៅជួបបងប្អូនខ្មែរក្រោមនិងហើយដើម្បីយើងអនុវត្តថា ខ្មែរក្រោមខ្មែរលើ ខ្មែរ កណ្ដាលតែមួយ ដូច្នេះក្នុងថ្ងៃនេះខ្ញុំព្រះករុណាខ្ញុំបាទសូមអំពាវនាវដល់បងប្អូនជនរួមឈាមខ្មែរយើងទាំង អស់សូមនាំគ្នាចូលរួមក្នុងដំណាក់កាលទីពីរនេះគឺដំណើរទៅកាន់មាតុភូមិហើយ ។ ខ្ញុំជឿថាក្រោយ ដំណាក់ កាលទីពីរនេះយើងនឹឈានចូលដំណាក់កាលទី ៣ នៅកម្ពុជាក្រោម មានសិទ្ធិគ្រប់គ្រាន់ ក្នុងការ វិនិច្ឆ័យក្នុងការពិចារណាសម្រេចវាសនាខ្លួនដោយខ្លួនឯង ខ្ញុំជឿថាដំណាក់កាលទី ៣ នោះនឹងមកដល់ បន្តបន្ទាប់ពីដំណាក់កាលទីពីរ” ។
ខ្មែរក្រោមមានសំឡេងក្នុងឆាកអន្តរជាតិ៖
ចំណែក លោក យន្ត ថារ៉ូ ប្រធានមជ្ឈមណ្ឌលវប្បធម៌ខ្មែរកម្ពុជាក្រោមដែលមានមូលដ្ឋាននៅក្នុងប្រទេសកម្ពុជា និង ជាតំណាង រាស្រ នៃគណបក្សសង្គ្រោះជាតិ បានថ្លែងថា វត្តមានរបស់សហព័ន្ធខ្មែរកម្ពុជាក្រោម នៅក្នុងឆាក អន្តរជាតិ បានធ្វើឲ្យរបបគ្រប់ គ្រងរបស់វៀតណាម មិនអាចធ្វើទុក្ខបុកម្នេញលើពលរដ្ឋខ្មែរ ក្រោមតាមទំនើងចិត្ត ដូចកាលពីសម័យមុនបានទៀតទេ ព្រោះពេលនេះខ្មែរក្រោមមានសំឡេងក្នុងឆាកអន្តរជាតិហើយ ។
លោក យន្ត ថារ៉ូ ថ្លែងថា៖
“នៅកម្ពុជាក្រោម យើងមើលឃើញថា តាំងពីអតីកាលមកដល់បច្ចុប្បន្ន យួនមិនដែលបានបន្ធូរបន្ថយម្ដងណាទេ វៃលុកយើង រហូត ។ ខ្មែរក្រោមយើងរងទុក្ខវេទនាសព្វបែបសព្វយ៉ាង ។ នៅវេលានេះ ម៉ោងនេះ យើងមាន សហព័ន្ធខ្មែរ កម្ពុជាក្រោមពិភពលោក… ដូច្នេះ បានធ្វើឲ្យខ្មែរកម្ពុជាក្រោមយើងមានសំឡេងនៅលើឆាកអន្តរជាតិ” ។
សូមបញ្ជាក់ថា សហព័ន្ធខ្មែរកម្ពុជាក្រោម បានចូលជាសមាជិកអង្គការប្រជាជាតិគ្មានតំណាង កាលពីថ្ងៃទី ១៥ ខែកក្កដា ឆ្នាំ ២០០១ ។ តាមរយៈអង្គការ UNPO នេះ សហព័ន្ធខ្មែរកម្ពុជាក្រោម បានឈានទៅចូលជាចូល សមាជិកអង្គការអន្តរជាតិ ក្នុងពិភពលោកជាច្រើនទៀត ក្នុងនោះ មានចូលជាសមាជិកវេទិការអន្ត្រៃយ៍នៃអង្គការ សហប្រជាជាតិស្ដីពីបញ្ហាជនជាតិដើម (UNPFII) កាលពីឆ្នាំ ២០០៤ ដែលបានធ្វើឲ្យវត្តមានរបស់ខ្មែរក្រោម បានលេចធ្លោនៅ ក្នុងឆាកអន្តរជាតិមិនធ្លាប់មានតាំង ពីមុនមក ។
យោងតាមគេហទំព័រផ្លូវការរបស់អង្គការប្រជាជាតិគ្មានតំណាង (UNPO) បានបញ្ជាក់ថា អង្គការប្រជាជាតិគ្មាន តំណាង គឺជាអង្គការអន្តរជាតិមួយធ្វើចលនាដោយសន្តិវិធី និង ប្រជាធិបតេយ្យ ។ សមាជិករបស់ខ្លួន គឺជាជនជាតិ ដើម, ជនជាតិ ភាគតិច និងទឹកដីដែលមិនមានការទទួលស្គាល់ពីអន្តរជាតិ ឬ កំពុងតែត្រូវធ្វើអាណានិគមដោយ ប្រទេសដទៃ ។ សមាជិក ទាំងនេះ បានរួមគ្នាចូលបម្រើការងារជាមួយគ្នាក្នុងអង្គការនេះ ដើម្បីការពារលើកកម្ពស់ សិទ្ធិមនុស្ស វប្បធម៌ អភិរក្សបរិស្ថាន របស់ពួកគេ និងដើម្បីស្វែងរកដំណោះស្រាយដោយសន្តិវិធីនៅក្នុងជម្លោះដែល ប៉ះពាល់ដល់ពួកគេ ។ អង្គការ UNPO បានបង្កើតឡើងនៅនៅក្នុងឆ្នាំ ១៩៩១ នាទីក្រុងឡាអេ ប្រទេសហូឡង់ ហើយទីស្នាក់ការកណ្ដាលរបស់អង្គការ មួយនេះ សព្វថ្ងៃក៏នៅប្រទេសហូឡង់ ផងដែរ ។
យោងតាមគេហទំព័រ UNPO ដដែលបានបញ្ជាក់ថា សព្វថ្ងៃអង្គការនេះ មានសមាជិកទាំងអស់ចំនួន ៤៣ តំណាង ឲ្យប្រជាជាតិ ប្រជាជន និងដែនដីនានាក្នុងពិភពលោក ដែលមិនមានតំណាងរបស់ខ្លួននៅក្នុងអង្គការសហប្រជា ជាតិ ក្នុងនោះ មានសហព័ន្ធខ្មែរកម្ពុជាក្រោម តំណាងឲ្យពលរដ្ឋខ្មែរក្រោម នៅដែនដីកម្ពុជាក្រោម ផងដែរ ។
យោងតាមប្រភពដដែល បានបញ្ជាក់ថា ពលរដ្ឋខ្មែរក្រោម ជាក្រុមជនជាតិដើមនៅកម្ពុជាក្រោម មានប្រមាណ ៨ លាននាក់ ជាអ្នកកាន់ព្រះពុទ្ធសាសនាថេរវាទ និងនិយាយភាសាខ្មែរ ដែលជាភាសាជាតិរបស់ខ្លួនខុសពីជនជាតិ យួនជាអាណានិគមជន និយាយភាសាយួន ។
យោងតាមសៀវភៅមគ្គុទ្ទេស “ផ្លូវទៅយកសិទ្ធិសម្រេចវសនាខ្លួនដោយខ្លួនឯង”ដែលបានរៀបរៀង និងបោះពុម្ព ដោយ សហព័ន្ធ ខ្មែរ កម្ពុជាក្រោម បានបញ្ជាក់ថា អំពីប្រវត្តិនៃការកកើតសហព័ន្ធខ្មែរកម្ពុជាក្រោម ថា សហព័ន្ធខ្មែរ កម្ពុជាក្រោម បានកើតឡើង “នៅថ្ងៃទី ៤ ខែសីហា ឆ្នាំ ១៩៩៦ ក្នុងមហាសន្និបាតលើកទី ៥ នៃខ្មែរកម្ពុជាក្រោម ពិភពលោក ដែលប្រព្រឹត្តទៅនៅទីក្រុង តូរនតូ ប្រទេសកាណាដា បានឯកភាពគ្នាបង្កើត សហព័ន្ធខ្មែរកម្ពុជាក្រោម ប៉ុន្តែប្រវត្តិរបស់សហព័ន្ធខ្មែរកម្ពុជាក្រោម បានចាប់ ផ្តើមតាំងពី ឆ្នាំ ១៩៨៥ មកម្ល៉េះ ក្នុងគោលបំណងដើម្បីបំរើផលប្រយោជន៍ជាតិ និងសង្គមខ្មែរក្រោម” ។
ចំពោះយុទ្ធសាស្ត្រ និងយុទ្ធវិធីរបស់សហព័ន្ធខ្មែរកម្ពុជាក្រោមវិញ សៀវភៅដដែលបានបញ្ជាក់ថា សហព័ន្ធ ខ្មែរកម្ពុជាក្រោម ធ្វើការតស៊ូដោយសន្តិវិធី និងអហិង្សា “ដើម្បីទាមទាមឱ្យរដ្ឋាភិបាលយួនគោរពសិទ្ធិមនុស្ស សិទ្ធិរស់នៅដោយសុវត្ថិភាព សិទ្ធិរក្សាសាសនា វប្បធម៌ ទំនៀមទម្លាប់ ប្រពៃណី និងសិទ្ធិសម្រេចវាសនាខ្លួនដោយខ្លួនឯង របស់ខ្មែរក្រោម ដែលជាជនជាតិដើមនៃដែនដីកម្ពុជាក្រោម” ស្របតាមសេចក្ដីប្រ កាសជាសកល របស់អង្គការសហប្រជាជាតិស្ដីពីសិទ្ធិជន ជាតិដើមដែលបានចែង ថា “ជនជាតិ ដើមមានសិទ្ធិស្វ័យសម្រេចវាសនា ខ្លួនដោយខ្លួនឯង” ។
ក្នុងទិសដៅដែលសហព័ន្ធខ្មែរកម្ពុជាក្រោមចង់បាន “សិទ្ធិសម្រេចវាសនាខ្លួនដោយខ្លួនឯង” នេះ ពួកគេ បាន ឯកភាពគ្នាបង្កើត ទៅជាទង់ជាតិតំណាងឲ្យប្រជាជាតិរបស់ខ្លួនមួយ ដែលមានបីព័ណ៌ ខៀវ លឿង និង ក្រហម ។
អំពីទង់ជាតិកម្ពុជាក្រោម វិញ សៀវភៅមគ្គុទ្ទេស “ផ្លូវទៅយកសិទ្ធិសម្រេចវសនាខ្លួនដោយខ្លួនឯង” បានបញ្ជាក់ថា៖ “ទង់ជាតិកម្ពុជាក្រោម មានបីឆ្នូត ដែលមានទំហំស្មើគ្នា និងមានពណ៌ផ្សេងគ្នា ហើយមានខ្នាតទទឹងពីរភាគបី បណ្តោយបីភាគបី ។ ឆ្នូតពណ៌ខៀវនៅខាងលើ ជានិមិត្តរូបនៃសិទ្ធិសេរីភាពនិងប្រជាធិបតេយ្យដែល ជាសិទ្ធិខ្ពស់ជាងគេបំផុត ។ ឆ្នូតពណ៌លឿងនៅចំកណ្តាល ជានិមិត្តរូបនៃជាតិសាសន៍របស់ខ្មែរក្រោម ដែល ស្រឡាញ់សន្តិភាពនិងយុត្តិធម៌ ។ ពណ៌ក្រហមនៅខាងក្រោម ជានិមិត្តរូប នៃវីរភាព អង់អាចក្លាហានរបស់វីរជនខ្មែរក្រោម ដែលហ៊ានបូជាជីវិតខ្លួនដើម្បីជាតិរស់” ៕
