ដោយ ថាច់ ប្រីជា គឿន l សារព័ត៌មាន ព្រៃនគរ
លោក សឺន ហាយ អតីតព្រះសង្ឃខ្មែរក្រោម នៅប្រទេសកម្ពុជា ដែលតែងតែធ្វើសកម្មភាព សង្គមជាច្រើន ដូចជា ការធ្វើបាតុកម្មនៅមុខស្ថានទូតវៀតណាម នាទីក្រុងភ្នំពេញ ដើម្បីប្រ ឆាំងនឹងការបំភ្លៃប្រវត្តិសាស្ត្រដែនដីកម្ពុជាក្រោម ការចូលរួមបាតុកម្មរកដំណោះស្រាយ បញ្ហាដីធ្លីជូនពលរដ្ឋខ្មែរ ដែលអ្នកមានអំណាចរឹបយក និងបញ្ហាជាច្រើនទៀត ហើយធ្លាប់ ត្រូវរដ្ឋាភិបាល លោក ហ៊ុន សែន ចាប់ផ្សឹក និងដាក់គុកនោះ បានអគ្គស្នងការ អង្គការ សហប្រជាជាតិទទួលបន្ទុកជនភៀសខ្លួន (UNHCR) ប្រចាំទីក្រុងបាងកក ប្រទេស ថៃ បញ្ជូនឲ្យទៅតាំងទីលំនៅ នាប្រទេសស៊ុយអែត ក្នុងឋានៈជាជនភៀសខ្លួន នយោបាយ ហើយ កាលពីរាត្រី ថ្ងៃ ពុធទី ១០ ខែកុម្ភៈ ម្សិលមិញនេះ ។
មុនពេលចេញដំណើរពីប្រទេសថៃទៅកាន់ប្រទេសស៊ុយអែត នៅព្រលានយន្តហោះ សុវណ្ណភូមិ នាទីក្រុងបាង កក លោក សឺន ហាយ បានផ្ដល់បទសម្ភាសខ្លីមួយដល់លោក សឺន ថាយ ធន នៃវិទ្យុសំឡេងកម្ពុជាក្រោម យ៉ាងនេះថា លោកត្រូវបានអង្គការ UNHCR បញ្ជូនទៅតាំងទីលំនៅនាប្រទេសស៊ុយអែត ។
សូមបញ្ជាក់ថា លោក សឺន ហាយ អាយុ ២៩ ឆ្នាំ ជាអតីតព្រះសង្ឃមួយអង្គ មានស្រុក កំណើត នៅខេត្តព្រះត្រពាំង ដែនដីកម្ពុជាក្រោម ហើយបានមករស់នៅក្នុងប្រទេស កម្ពុជាចាប់តាំងពី ឆ្នាំ ២០០៧ មក ។
កាលពីថ្ងៃទី ១១ ខែវិច្ឆិកា ឆ្នាំ ២០១៤ លោក សឺន ហាយ ត្រូវរដ្ឋាភិបាល លោក ហ៊ុន សែន ចាប់ព្រះកាយខណៈដែលលោកនៅជាសង្ឃនៅមុខសាលាដំបូងរាជធានី ពេលដែលលោក ចូលរួមតវ៉ាឲ្យដោះលែងសកម្ម ជនដីធ្លីស្ត្រីបឹងកក់ ៧ នាក់ ដែលបានចាប់ខ្លួនមួយថ្ងៃ មុន ការចាប់ខ្លួនរូបលោក ។ លោកត្រូវអាជ្ញាធរខ្មែរផ្សឹកទាំងបង្ខំ និងត្រូវតុលាការផ្តន្ទា ទោសឲ្យ ជាប់ពន្ធនាគារ ១ ឆ្នាំ ពីបទប្រឆាំងអ្នករាជការសាធារណៈ ។ លោកក៏បានរង នូវបទ ចោទផ្សេងៗទៀតដូចជា ប្រើប្រាស់ឆាយាក្លែងក្លាយ និងគ្មានសិទ្ធិគ្របដណ្តប់ស្បង់ចីវរ ផងដែរ ។
ខណៈសមត្ថកិច្ចខ្មែរកំពុងតែគ្រៀកលោកបញ្ចូលរថយន្តដើម្បីបញ្ជូនទៅដាក់គុកព្រៃសនោះ លោក សឺន ហាយ ព្យាយាមស្រែករិះគន់រដ្ឋាភិបាល ហ៊ុន សែន ថា បានធ្វើទុក្ខបុកម្នេញ ដល់ព្រះសង្ឃខ្មែរក្រោម ដែលលោកចាត់ទុកថា«រាល់ខ្មែរកម្ពុជាក្រោម គឺជាខ្មែរ រដ្ឋាភិបាល ខ្មែរកំពុងរើសអើងពូជសាសន៍ចំពោះខ្មែរកម្ពុជាក្រោម…» ។
លោក សឺន ហាយ បានចេញពីពន្ធនាគារវិញ នៅថ្ងៃទី ១៣ ខែមេសា ២០១៥ ហើយបាន ភៀសខ្លួនទៅសុំ សិទ្ធិជ្រកកោនជាជនភៀសខ្លួននយោបាយ នៅការិយាល័យឧត្ដមស្នង ការអង្គការសហប្រជាជាតិទទួលបន្ទុក ជនភៀសខ្លួន (UNHCR) ប្រចាំទីក្រុងបាងកក ប្រ ទេសថៃ ។
សព្វថ្ងៃ មានជនភៀសខ្លួនខ្មែរក្រោមជាច្រើន បានភៀសខ្លួនចេញពីដែនដីកម្ពុជាក្រោម ដើម្បីគេចពីការធ្វើ ទុក្ខបុកម្នេញពីរដ្ឋាភិបាលបក្សកុម្មុយនិស្តវៀតណាម កំពុងតែសុំសិទ្ធិ ជ្រក កោនជាជនភៀសខ្លួននយោបាយ នៅការិយាល័យឧត្ដមស្នង ការអង្គការ សហប្រជា ជាតិទទួលបន្ទុកជនភៀសខ្លួន (UNHCR) ប្រចាំទីក្រុងបាង កក ដើម្បីបានទៅតាំងទីលំនៅ នាប្រទេសទី ៣ ៕
