ដោយ ស៊ឺន ចែងចើន l VOKK
នៅក្នុងឱកាសកាន់បិណ្ឌនិងភ្ជុំបិណ្ឌ នៅព្រឹកថ្ងៃទី ១០ ខែ កញ្ញា ឆ្នាំ ២០១៧ នា វត្តសិរិនថនទេពរតនារាម ឃុំអមយ៉ៃ ស្រុកសាមប្រាន ខេត្តនគរបឋម ប្រទេសថៃ បានដាក់តាំងព្រះឆាយាលក្ខណ៍ ឧកញ៉ា សឺង គុយ វីរបុរសជាតិខ្មែរនៅដែនដីកម្ពុជាក្រោម និងឆាយាលក្ខណ៍ អតីតព្រះមហាវីរក្សត្រ នរោត្ដម សីហនុ (ព្រះបរមរតនកោដ្ឋ) និងព្រះបរមរូប សម្តេចសង្ឃរាជ ជួន ណាត ផងដែរ ព្រះទាំងព្រះមហាក្សត្រខ្មែរ និង ថៃ ដែលកំពុងគ្រងរាជ្យបច្ចុប្បន្ន ផងដែរ ។
នេះបើយោងតាម Royal du Cambodge ដែលបង្ហាញសកម្មភាព សម្តេចរាជបុត្រី ព្រះអនុជ នរោត្តម អរុណរស្មី ជាឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា សព្វព្រះទ័យយាងជាព្រះអធិបតី ក្នុងព្រះពិធីបុណ្យ ភ្ជុំបិណ្ឌ នេះផងដែរ ។
ពិធីបុណ្យកាន់បិណ្ឌនេះ បានកើតឡើងក្រោមការដឹកនាំរបស់ សមាគមខេមរសង្គហធម៌ ដែលមានមូលដ្ឋាននៅប្រទេសថៃ សហការជាមួយ មហាវិទ្យាល័យមហាម្កុដរាជវិទ្យាល័យ សាខាសិរិនថននិងចៅអធិការវត្ត ក្រោមការឧបត្ថម្ភរបស់ពុទ្ធបរិស័ទមានព្រះសង្ឃនិស្សិតពលករ ដែលចំណាក់ស្រុកមកធ្វើការនៅប្រទេសថៃ និងមន្ត្រីស្ថានទូតរបស់យើងក៏បានចូលរួម ផងដែរ ។
ឧកញ៉ា សឺង គុយ ជាអតីតចៅហ្វាយខេត្តព្រះត្រពាំង និងជាវីរបុរសជាតិខ្មែរនៅដែនដីកម្ពុជាក្រោម ត្រូវយួនកាត់ក្បាល នៅឆ្នាំ ១៨៤១ ជាថ្នូរឲ្យពលរដ្ឋខ្មែរក្រោម រក្សានូវពុទ្ធសាសនា និងវប្បធម៌ នៅដែនដីកម្ពុជាក្រោម ។
ពិធីបុណ្យកាន់បិណ្ឌ និងភ្ជុំបុណ្យ ជាពិធីបុណ្យប្រពៃណីជាតិខ្មែរ ឆ្នាំនេះ ប្រារព្ធចាប់ថ្ងៃទី ៦ ដល់ ២០ ខែកញ្ញា ៕
សូមទស្សនា ទិដ្ឋភាពរូបថត នៃពិធីបុណ្យកាន់បិណ្ឌ នេះ ។
