ដោយ គឹម សាវតា
ប្រធានអង្គការនារីខ្មែរកម្ពុជាក្រោម អះអាងថា ខណៈដែលសិទ្ធិនារី ត្រូវបានពិភពលោកឡើងដម្កើងជាង ១០០ ឆ្នាំមកហើយក្តី នារីខ្មែរក្រោម នៅតែរងគ្រោះដោយការរំលោភបំពានផ្សេងៗ ជាពិសេសនារី នៅដែនដីកម្ពុជាក្រោម ។
អ្នកស្រី តាំង កែវពីសី ប្រធានអង្គការនារីខ្មែរកម្ពុជាក្រោម បានថ្លែងដូចនេះ ក្នុងពិធីអបអរសាទរខួប ១១២ ឆ្នាំទិវានារីអន្តរជាតិក្រោមប្រធានបទ «យើងរួមគ្នាលុបបំបាត់វិសមភាពយ៉េនឌ័រ ចំពោះស្ត្រីគ្រប់រូប» ដែលប្រារព្ធធ្វើនៅបុរីព្រៃនគរក្នុងខណ្ឌសែនសុខ រាជធានីភ្នំពេញ ។
អ្នកស្រីបន្ថែម ថា នៅប្រទេសកម្ពុជាពិតមែនតែច្បាប់ជាតិ អន្តរជាតិ ដូចជាសេចក្តីប្រកាសជាសកលរបស់អង្គការសហប្រជាជាតិស្តី ពីសិទ្ធិមនុស្ស អនុសញ្ញាស្តីពីការលុបបំបាត់រាល់ទម្រង់ នៃ ការរើសអើងប្រឆាំងនឹងនារីភេទ និងរដ្ឋធម្មនុញ្ញ នៃ ព្រះរាជាណាចក្រកម្ពុជា ត្រង់ជំពូក ៣ ស្ដីពីសិទ្ធិនោះហើយក៏ដោយ ក៏វិសមភាពរវាងបុរស និងស្ត្រី ការរើសអើងប្រឆាំងនារីភេទ ការរំលោភសិទ្ធិស្ត្រី អំពើហិង្សាក្នុងគ្រួសា រដែលភរិយាតែងតែទទួលពីសំណាក់ស្វាមី នៅតែកើតមាននៅឡើយ ។
ដោយឡែកសម្រាប់ស្ត្រី នៅកម្ពុជាក្រោមវិញ អ្នកស្រី តាំង កែវពិសី លើកឡើងថា «ស្ត្រីខ្មែរកម្ពុជាក្រោម ជាជនជាតិដើម ដែលកំពុងរស់នៅក្នុងដែនដីកម្ពុជាក្រោម ដែនដីកំណើតរបស់ខ្លួន ក្រោមការគ្រប់គ្រងដោយវៀតណានោះវិញ រិតតែមានសភាពធ្ងន់ធ្ងរណាស់ទៅទៀត ដោយរដ្ឋាភិបាលវៀតណាម មិនត្រឹមតែមិនយកចិត្តទុកដាក់ដល់ការគោរពសិទ្ធិស្ត្រីខ្មែរកម្ពុជាក្រោម ដែលជាជនជាតិដើមប៉ុណ្ណោះទេ ថែមទាំងរំលោភយ៉ាងធ្ងន់ធ្ងរលើស្ត្រីខ្មែរកម្ពុជាក្រោម នូវសិទ្ធិជាមូលដ្ឋានដែលមនុស្សជាតិ ជាពិសេសស្ត្រីទូទៅត្រូវទទួលបានទៀតផង ដូចជាការបង្ក្រាបការតវ៉ាដោយប្រើដំបងឆក់ ។ ស្ត្រីខ្មែរក្រោ មដែលតវ៉ាសុំឱ្យរដ្ឋអំណាចសងមកវិញនូវដីធ្លី ដែលរដ្ឋអំណាចវៀតណាមបានរឹបអូស ត្រូវរដ្ឋអំណាចវៀតណាម ចាប់ដាក់ពន្ធនាគារជាដើម» ។
កញ្ញា អេន ម៉ាឡែន មន្ត្រីសម្របសម្រួល នៃ អង្គការនារី ដើម្បីសន្ដិភាព ក៏បានលើកឡើងក្នុងពិធីនោះដែរថា ទំរាំតែមានការមើលឃើញពីតម្លៃរបស់នារីនៅថ្ងៃទី ៨ មិនានេះ គឺនារីមានការតស៊ូយ៉ាងខ្លាំងខ្លាំជាក់ស្ដែងស្រីខ្មែរក្រោមតែម្ដង ។ កញ្ញាបន្ថែមថា «អ្វីដែលខ្ញុំបានឃើញដូចជាខ្ញុំបានសង្កេតសព្វថ្ងៃហ្នឹង ឃើញថាខាងខ្មែរក្រោមគឺនារីៗ គាត់ក្លាហាន គាត់ហ៊ានងើបឈរដើ ម្បីខ្លួនឯង មានន័យថាគាត់ហ៊ាននិយាយអ្វី ដែលជាការពិត ហើយហ៊ាននិយាយអ្វី ដែលគាត់គិតថាមិនស្មើរភាពគ្នា» ។
លោក សឺន យឿង ប្រធានលេខាធិការដ្ឋានអង្គការ សមាគមខ្មែរកម្ពុជាក្រោម មានប្រសាសន៍ថា ឆ្នាំនេះ គឺមានរយៈពេល ១១២ ដែលទិវានារីអន្តរជាតិបានកើតឡើង ហើយតម្លៃ និងសិទ្ធិស្ត្រីត្រូវបានគេមើលឃើញ ប៉ុន្តែ លោកសោកស្តាយ និងអាណិតដល់ស្ត្រីខ្មែរក្រោម ដែលរស់នៅដែនដីកំណើតដែលមិនទទួលបានអ្វីដែ លជាសិទ្ធិរបស់ខ្លួន ។ លោក សឺន យឿង «បើនៅកម្ពុជានេះ ក៏មានប្រារព្ធជារៀងរាល់ឆ្នាំផងដែរ ប៉ុន្តែ យើងសោកស្ដាយដល់បងប្អូនស្ត្រីខ្មែរក្រោម របស់យើង ដែលរស់នៅលើទឹកដីកំណើតរបស់ខ្លួន នៅកម្ពុជាក្រោម គឺពុំដែលបានស្គាល់ដឹងនូវអ្វីដែលហៅថា ៨ មិនានេះទេ» ។
