ដោយ គឹម សាវតា
បើទោះជាពលរដ្ឋខ្មែរក្រោមរស់នៅតាមប្រទេសផ្សេងៗ គ្នា តំបន់ផ្សេងៗ គ្នា ប៉ុន្តែ នៅពេលដែលសម័យបច្ចេកវិទ្យាកាន់តែទំនើប បណ្ដាញសង្គមតាមប្រព័ន្ធអ៊ីនធឺណិត បានក្លាយជាឧបករណ៍ទំនាក់ទំនងមួយ ដែលធ្វើឱ្យពលរដ្ឋខ្មែរក្រោម ហាក់មិននៅឆ្ងាយពីគ្នាឡើយ និងអាចដឹងពីសុខទុក្ខគ្នាទៅវិញទៅមក ព្រមទាំងអាចជួយគ្នារយៈបណ្ដាញប្រព័ន្ធអ៊ីនធឺណិតមួយនេះ ។ ករណីនេះ យុវជនខ្មែរក្រោម ដែលរស់នៅកម្ពុជាប្តេជ្ញាប្រើប្រាស់បណ្ដាញសង្គម ដើម្បីជួយសង្គមវិញ ជាពិសេសគឺ សង្គមកម្ពុជាក្រោម ។
ក្នុងកម្មវិធីយុវជនមួយ កាលពីថ្ងៃទី ១២ សីហា សប្តាហ៍មុន លោក ថើស ចន្ទ្រា ប្រធានក្រុមប្រឹក្សាយុវជនខ្មែរកម្ពុជាក្រោម មានប្រសាសន៍ថា យុវជនគឺជាសសរទ្រូងនៃប្រទេសជាតិ ហើយការអភិវឌ្ឍសេដ្ឋកិច្ច សង្គមក្តី មិនអាចគេចផុត ពីយុវជនបានឡើយ ដូច្នេះ ការបង្កើតក្រុមប្រឹក្សាយុវជនខ្មែរកម្ពុជាក្រោមឡើង គឺដើម្បីជំរុញឱ្យយុវជនខ្មែរក្រោមរួបរួមគ្នាជួយការងារសង្គម ជាពិសេស គឺសង្គមកម្ពុជាក្រោមតែម្ដង។ លោកបន្តថា ក្រុមប្រឹក្សាយុវជន នឹងខិតខំធ្វើយ៉ាងណាឱ្យមានអ្នកស្គាល់ច្រើន និងដឹងពីកិច្ចការ ដែលក្រុមប្រឹក្សាយុវជនកំពុងធ្វើ ដើម្បីសង្គមមិនថា សង្គមខ្មែរទាំងមូល ឬសង្គមខ្មែរក្រោមឡើយ ។
ចំពោះការប្រើប្រាស់បណ្ដាញសង្គម ដើម្បីធ្វើជាទំនាក់ទំនង និងបម្រើការងារសង្គម លោក ថើស ចន្ទ្រាមានប្រសាសន៍ថា សព្វថ្ងៃមនុស្សភាគច្រើន បានចំណាយពេលវេលាជាច្រើនជាមួយបណ្ដាញសង្គម ហើយយុវជនខ្មែរក្រោម ក៏ប្រើនូវបណ្ដាញសង្គមទាំងនេះ ដើម្បីបានដឹងពីសុខទុក្ខរបស់ពលរដ្ឋខ្មែរក្រោម ជាពិសេសពលរដ្ឋខ្មែរក្រោម ដែលកំពុងរស់នៅដែនដីកម្ពុជាក្រោម ។ នៅពេលដែលទទួលបានព័ត៌មានពីដែនដីកម្ពុជាក្រោមហើយ គឺអាចយកព័ត៌មានទាំងនោះ ទៅបង្ហាញដល់អន្តរជាតិបានដឹងតាមរយៈបណ្ដាញសង្គមនេះ ។
ជាមួយគ្នានេះ លោក ថើស ចន្ទ្រា ក៏អំពាវនាវផងដែរដល់យុវជនខ្មែរក្រោម ចូលរួមឱ្យបានច្រើនក្នុងកិច្ចការសង្គមខ្មែរក្រោម ដើម្បីជាកម្លាំងចលករបម្រើដល់សង្គមកម្ពុជាក្រោម ។
លោក គឹម ស៊ីសំណា អនុប្រធានទី១ ក្រុមប្រឹក្សាយុវជនកម្ពុជា មានប្រសាសន៍ថា បញបច្ចុប្បន្នយុវជនខ្មែរ នៅដែនដីកម្ពុជាក្រោម យល់ដឹងពីសិទ្ធិបានច្រើន តាមរយៈការស្រាវជ្រាវ ជាពិសេស គឺតាមរយៈបណ្ដាញសង្គម ។ យ៉ាងនេះក្តី លោកបន្តថា បណ្ដាញសង្គម គឺជាអាវុធមុខ២ ដែលទាមទារឱ្យយុវជនខ្មែរក្រោម មុននឹងប្រើប្រាស់បណ្ដាញសង្គម ត្រូវមានការប្រុងប្រយ័ត្ន ព្រោះថា បើប្រើប្រាស់ត្រូវនឹងផ្ដល់ប្រយោជន៍ដល់សង្គមខ្មែរក្រោម ប៉ុន្តែ បើប្រើប្រាស់មិនបានត្រឹមត្រូវ មិនត្រឹមតែបង្កគ្រោះថ្នាក់ដល់ខ្លួនឯងនោះទេ គឺអាចនឹងផ្ដល់គ្រោះថ្នាក់ដល់សង្គមខ្មែរក្រោមទាំងមូលទៀតផង ។
លោក សឺន យឿង ប្រធានប្រតិបត្តិសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ មានប្រសាសន៍សាទរ ចំពោះសកម្មភាពរបស់យុវជនខ្មែរក្រោមជំនាន់ក្រោយៗ ពោលគឺធ្វើការងារបានរហ័ស ។ លោកបន្តថា យុវជនមានសមត្ថភាព មានលទ្ធភាពក្នុងការបំពេញកិច្ចការផ្សេងៗ បានច្រើន ។ ក្នុងនាមលោកជាអ្នកធ្វើការងារសង្គមខ្មែរក្រោម ជំនាន់មុន សង្ឃឹមថា យុវជនខ្មែរក្រោមជំនាន់ក្រោយ នឹងបន្តធ្វើកាងារសង្គមជួយដល់ខ្មែរក្រោម ហើយ កាន់តែមានប្រសិទ្ធិភាព។
សម្រាប់លោកបណ្ឌិត សឺន ជុំ ជួន អគ្គលេខាធិការសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លើកឡើងថា ដើម្បីឱ្យការងាររបស់យុវជនខ្មែរក្រោម កាន់តែប្រសិទ្ធិភាព គឺទាមទារឱ្យមានការបង្កើតជាវគ្គបណ្ដុះបណ្ដាល ការចែករំលែកចំណេះដឹង ឱ្យយុវជនខ្មែរក្រោម បានដឹងតាមរយៈការរៀបចំវេទិកាផ្សេងៗ តាមលទ្ធភាព ឬក៏ធ្វើពីចម្ងាយតាមរយៈបណ្ដាញសង្គមនេះ ។
អ្វីដែលគួរឱ្យកត់សម្គាល់ គឺបន្ទាប់ពីបណ្ដាញសង្គមបានរីកដុះដាល អ្វីដែលជាការរំលោភបំពានពីសំណាក់អាជ្ញាធរវៀតណាម មកលើពលរដ្ឋខ្មែរក្រោម នៅដែនដីកម្ពុជាក្រោម គឺបានដឹងឮដល់ស្ថាប័នអន្តរជាតិ បានឆាប់រហ័សជាងមុនឆ្ងាយ ជាក់ស្ដែងដូចជាការចាប់ខ្លួនពលរដ្ឋខ្មែរក្រោម នៅចុងខែកក្កដា និងដើមខែសីហាថ្មីៗ នេះ៕
