អាជ្ញាធរវៀតណាម នៅខេត្តឃ្លាំង នៅថ្ងៃទី ៧ ខែមិថុនា មកកោះហៅសកម្មជនខ្មែរក្រោមម្នាក់ដល់មុខផ្ទះរបស់ខ្លួន ក្នុងបំណងគំរាមកំហែងមិនឲ្យធ្វើសកម្មភាពចែកចាយព័ត៌មានពាក់ព័ន្ធនឹងសិទ្ធិសេរីភាពរបស់ខ្មែរក្រោម តាមបណ្ដាញសង្គមតទៅទៀត។ ទោះបីជាបែបនេះក្ដី យុវជនខ្មែរក្រោម ឈ្មោះ យ័ញ ម៉ិញក្វាង បដិសេធមិនទទួលយកលិខិតកោះហៅពីនគរយួននោះទេ ដោយអះអាងថា ថា មិនបញ្ជាក់អំពីមូលហេតុច្បាស់លាស់ ។
សកម្មជនខ្មែរក្រោមរូបនោះ លើកឡើង ថា អាជ្ញាធរវៀតណាម តែងមកហៅលោកទៅគំរាមជាច្រើនលើកច្រើនសា ដោយហាមមិនឱ្យលោកផ្សព្វផ្សាយពីរឿងរ៉ាវ នៃទឺកដីកម្ពុជាក្រោម លើបណ្ដាញសង្គមទៀត។
ករណីនេះ សកម្មជនទាមទារសិទ្ធិជនជាតិដើមរបស់ខ្មែរក្រោម ចាត់ទុកថា ជាទង្វើរំលោភសិទ្ធិមនុស្សធ្ងន់ធ្ងរ ផ្ទុយនឹងច្បាប់អន្តរជាតិ ជាពិសេសរដ្ឋាភិបាលកុម្មុយនិស្តវៀតណាម បានចុះសន្ធិសញ្ញាទទួលស្គាល់ និងអនុវត្តសេចក្ដីប្រកាស ស្តីពីសិទ្ធិជនជាតិដើម កាលពីឆ្នាំ២០០៧ ប៉ុន្តែ មិនបានគោរពសេចក្ដីប្រកាសនេះទេ ហើយថែមទាំងបានរំលោភសិទ្ធិជនជាតិដើមខ្មែរក្រោមបន្ថែមទៀតផង ៕
