ដោយ ស៊ឺន ចែងចើន | VOKK
ប្រជាពលរដ្ឋ និងព្រះសង្ឃខ្មែរក្រោម ប្រមាណ ១០០ នាក់ បានលើកគ្នាទៅកាន់វត្តសិរីមង្គល ហៅវត្តតាធាយ តាំងព្រឹកថ្ងៃអង្គារ ទី ៥ ខែមេសា ឆ្នាំ ២០២៣ ដើម្បីចូលរួមកិច្ចប្រជុំរកដោះស្រាយជុំវិញរឿង ដែលអាជ្ញាធរយួន នៅខេត្តលង់ហោរ សាងសង់ឈាបនដ្ឋាន ឬទីប៉ាឆាខុសនឹងកិច្ចព្រមព្រៀងរបស់វត្ត ។
ការលើកគ្នាទៅកាន់វត្តសិរីមង្គល ហៅវត្តតាធាយ ស្ថិតនៅភូមិព្រែកនិស្ស័យ ឃុំតឹងម៉ី ស្រុកតាឱន ខេត្តលង់ហោរនេះ ធ្វើឡើងបន្ទាប់ពីអាជ្ញាធរយួនក្នុងខេត្តនេះ បានបញ្ជូនមន្រ្តីរបស់ខ្លួនមកចូលរួមកិច្ចប្រជុំស្វែងរកដំណោះស្រាយជាមួយព្រះសង្ឃ ។ ប៉ុន្តែ កិច្ចជួបពិភាក្សានោះ មិនបានលទ្ធផលអ្វីទេ ដោយសារពួកអាជ្ញាធរយួនដើរចេញពីកិច្ចប្រជុំភ្លាមៗ នៅពេលដែលព្រះសង្ឃ និងពលរដ្ឋខ្មែរក្រោម ក្រោកឡើងព្រមគ្នាតវ៉ាទាមទារឲ្យពួកគេរុះរើសម្ភារៈសំណង់ចេញពីវត្ត ។
ព្រះសង្ឃ និងពលរដ្ឋខ្មែរក្រោម សំដែងការមិនសុខចិត្ត ចំពោះអាជ្ញាធយួន ដែលកេងបន្លំ និងរំលោភលើសេចក្តីទុកចិត្ត ដែលលួចធ្វើប្លង់កម្មសិទ្ធិរំលោភយកដីរបស់វត្តប្រមាណជាង ១ ហិកតា ។
ពុទ្ធបរិស័ទចំណុះជើងវត្តសិរីមង្គលតាធាយមួយរូប ដែលចូលររួមក្នុងការតវ៉ានោះ សុំមិនបញ្ចេញឈ្មោះមានប្រសាសន៍ឲ្យសំឡេងកម្ពុជាក្រោម (VOKK) និងសារព័ត៌មាន ព្រៃនគរ ដឹងថា កាលពីអំឡុងឆ្នាំ ២០២១ នៅពេលប្រទេសវៀតណាម មានករណីរីករាលដាលជំងឺកូវីដ-១៩ ដោយអ្នកស្លាប់ច្រើនលើសលុបនោះ ពួកអាជ្ញាធរយួន បានដើរបញ្ចុះបញ្ចូលនៅតាមវត្តអារាមនានា ទូទាំងខេត្តលង់ហោរ ដើម្បីស្នើសុំកសាងឈាបនដ្ឋាន ឬទីប៉ាឆា ។ អ្នកចូលរួមតវ៉ារូបនេះ ឲ្យដឹងទៀតថា ក្នុងចំណោមវត្តចំនួន ១៣ វត្ត នៅខេត្តលង់ហោរ មានតែវត្តមួយប៉ុណ្ណោះ គឺ វត្តសិរីមង្គល (វត្តតាធាយ) បានទទួលយកសំណើររបស់អាជ្ញាធរវៀតណាម អនុញ្ញាតឲ្យសាងសង់ទីប៉ាឆា ដោយយល់ឃើញថា ដើម្បីជាប្រយោជន៍រួមដល់សាធារណៈ ដែលមានទីបូជាសពសមរម្យ សម្រាប់រំលាយសពដល់អ្នកភូមិ នៅតំបន់នោះ ។
ពលរដ្ឋខ្មែរក្រោម ដែលចូលរួមតវ៉ារូបនេះ អះអាងទៀតថា ដំបូងឡើយ ព្រះចៅអធិការវត្តអនុញ្ញាតឲ្យសាងសង់ទីប៉ាឆា នៅលើផ្ទៃដីត្រឹមតែ ២ ពាន់ម៉ែត្រការ៉េ ឬស្មើនឹង ២ កុងដីប៉ុណ្ណោះ ។ ប៉ុន្តែ ពួកអាជ្ញាធរយួន បានសាងសង់លើសពីចំនួនបានកំណត់របស់វត្តរហូតដល់ទៅជាង ១.១ ហិកតា (១១ កុង) ។ ការណ៍នេះ ទើបធ្វើឲ្យព្រះសង្ឃ និងពុទ្ធបរិស័ទ ចេញមុខមកជំទាស់ និងស្នើឱ្យអាជ្ញាធរវៀតណាម បញ្ឈប់ការសាងសង់បន្តទៀត ។
សូមបញ្ជាក់ថា ក្រោយពីការតវ៉ាប្រឆាំងរបស់ព្រះសង្ឃ និងពលរដ្ឋខ្មែរក្រោម អាជ្ញាធរយួន ក៏បានផ្អាកការសាងនោះដែរ ប៉ុន្តែ ពួកគេមិនព្រមរុះរើសម្ភារៈសំណង់ទាំងនោះចេញពីវត្តនៅឡើយទេ ។ ដោយពួកអាជ្ញាធរយួន នៅតែព្យាយាមអូសបន្លាយពេលវេលា ដើម្បីរកវិធីទទួលបានសិទ្ធិកាន់កាប់ដីធ្លីរបស់វត្ត ។
ចំណែកព្រះសង្ឃ ក៏បានចេញមុខដឹកនាំពលរដ្ឋខ្មែរក្រោម តវ៉ាជាហូរហែ ខណៈអាជ្ញាធរយួន នៅតែបំភ្លេចការសន្យារបស់ខ្លួនម្តងហើយម្តងទៀត ថា នឹងរុះរើសម្ភារៈសាងសង់ និងបរិក្ខារសំណង់ចេញពីវត្ត ៕
