សហព័ន្ធខ្មែរកម្ពុជាក្រោមកំពុងជំរុញឲ្យសហគមន៍អន្តរជាតិផ្តោត ការយកចិត្តទុកដាក់អំពីបញ្ហាការរំលោភសិទ្ធិមនុស្សលើពលរដ្ឋខ្មែរ ក្រោមតាមរយៈការធ្វើមហាបាតុកម្មនៅមុខក្រុមប្រឹក្សាសិទ្ធិមនុស្ស នៃអង្គការសហប្រជាជាតិនៅថ្ងៃនេះនិងថ្ងៃស្អែក។
សហព័ន្ធខ្មែរកម្ពុជាក្រោមដឹកនាំបាតុកម្មនោះរយៈពេល២ថ្ងៃគឺនៅ ថ្ងៃទី៧ និងទី៨ ខែឧសភា ឆ្នាំ២០០៩នេះ នៅមុខក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុង ហ្សឺណែវ ប្រទេសស្វ៊ីស គឺធ្វើឡើងដំណាលពេលដែលក្រុមប្រឹក្សាសិទ្ធិមនុស្សអង្គការ សហប្រជាជាតិ កោះអញ្ជើញរដ្ឋាភិបាលនៃរបបសាធារណរដ្ឋសង្គមនិយមវៀតណាម ឲ្យទៅបង្ហាញអំពីបញ្ហាសិទ្ធិមនុស្សនៅក្នុងប្រទេសវៀតណាម គឺឲ្យវៀតណាមថ្លែងបំភ្លឺនៅក្នុងមហាសន្និបាតពិសេសមួយនៅថ្ងៃទី៨ ខែឧសភា ឆ្នាំ២០០៩នេះ។
ប្រធានសហព័ន្ធខ្មែរកម្ពុជាក្រោម លោក ថាច់ ង៉ុកថាច់ មានប្រសាសន៍ឲ្យវិទ្យុអាស៊ីសេរីដឹងកាលពីពេលថ្មីៗកន្លងមកនេះថា ថ្ងៃទី៨ ខែឧសភា ឆ្នាំ២០០៩ គឺជាថ្ងៃប្រវត្តិសាស្រ្តមួយសម្រាប់ពលរដ្ឋខ្មែរក្រោម។
លោក ថាច់ ង៉ុកថាច់ ថ្លែងយ៉ាងដូច្នេះ ៖ «ថ្ងៃទី៨ គឺជាថ្ងៃប្រវត្តិសាស្រ្ដមួយដែលរដ្ឋាភិបាលយួន ត្រូវក្រុមប្រឹក្សាសិទ្ធិមនុស្សនៃអង្គការសហប្រជាជាតិកោះហៅឡើងមក ដើម្បីបកស្រាយបំភ្លឺនូវសិទ្ធិមនុស្សនៅប្រទេសយួនហ្នឹង ហើយសហព័ន្ធខ្មែរកម្ពុជាក្រោមធ្វើមហាបាតុកម្មមួយយ៉ាងធំនៅមុខ ក្រុមប្រឹក្សាសិទ្ធិមនុស្សនៅទីក្រុងហ្សឺណែវ ប្រទេសស្វ៊ីស ហើយព្រមទាំងចូលរួមក្នុងការកោះហៅប្រជុំរបស់អង្គការសហប្រជាជាតិនោះ ផង»។
សហព័ន្ធខ្មែរកម្ពុជាក្រោមចាត់ទុកថា បាតុកម្មអហិង្សានេះដែលមានពលរដ្ឋខ្មែរក្រោមចូលរួមប្រមាណ ៤រយនាក់នោះ គឺជាវិធីមួយដើម្បីបង្ហាញនិងបញ្ចេញសំឡេងរបស់ពលរដ្ឋខ្មែរក្រោម ជម្រាបដល់សហគមន៍អន្តរជាតិឲ្យគេជួយដាក់គំនាបលើរដ្ឋាភិបាល កុម្មុយនីស្តក្រុងហាណូយឲ្យគោរពសិទ្ធិពលរដ្ឋខ្មែរក្រោម ស្របតាមច្បាប់ដែលមានចែង។
ខែមិថុនា ឆ្នាំ២០០៩នេះ គឺគម្រប់ខួប៦០ឆ្នាំហើយ ដែលពលរដ្ឋខ្មែរក្រោមនិងដែនដីកម្ពុជាក្រោម ត្រូវបានអាណានិគមបារាំងប្រគល់ឲ្យប្រទេសវៀតណាមក្តោបក្តាប់កាន់ កាប់ជាកម្មសិទ្ធិផ្តាច់មុខ តាំងពីឆ្នាំ១៩៤៩មក។ បច្ចុប្បន្ន ដែនដីកម្ពុជាក្រោមមានពលរដ្ឋខ្មែរក្រោមរស់នៅទាំងអស់ប្រមាណ ៨លាននាក់៕
អត្ថបទវិទ្យុអាស៊ីសេរី.
