ព័ត៌មានពីទឹកដីកម្ពុជាក្រោម ឲ្យដឹងថា សកម្មជនអ្នកទាមទារដីកម្មសិទ្ធិម្នាក់នៅភូមិទឹងហ៊ឹង ស្រុកអណ្តូងទឹក ខែត្រឃ្លាំង បានត្រូវព្រមានថា នឹងត្រូវចាប់ខ្លួន ប្រសិនបើលោកមិនព្រមឈប់តវ៉ាទាមទារដីកម្មសិទ្ធិ ដែលអាជ្ញាធរវៀតណាមបានយកធ្វើជាកន្លែងចិញ្ចឹមសត្វជាច្រើនឆ្នាំមកហើយនោះទេ។
លោក វិន បាវ បានប្រាប់វិទ្យុអាស៊ីសេរីពីម្សិលមិញថា លោកបានដឹងដែរ តែលោកក៏មិនដឹងជាត្រូវគេចទៅណាទេ ៖ «ខ្ញុំតវ៉ារឿងដីធ្លី ហើយនគរបាលចេះតែមកឃ្លាំមើល។ ឥឡូវថា ពីរបីថ្ងៃនេះ ពួកខ្ញុំជាប់គុកហើយ។ ខ្ញុំតាមរឿងដីធ្លីប៉ុន្មាន១៧-១៨ឆ្នាំហើយ គេមិនដោះស្រាយឲ្យហ្នឹង ហើយកនខ្ញុំចេះតែទាមទារមួយខែពីរខែ ខ្ញុំឡើងទៅក្រសួងជនជាតិនៅព្រៃឫស្សីហ្នឹង មួយខែពីរខែទៅមួយជើងហើយ ហើយគេចេះតែសន្មត់ហើយ មិនដោះស្រាយអីទាំងអស់។ ហើយដល់ខ្ញុំទៅហ្នឹង គេមានឲ្យខាងនគរបាល ខាងក្រសួងជនជាតិនៅខេត្តឃ្លាំងហ្នឹង គេឲ្យដំណឹងថា តែពីរបីថ្ងៃទៀត គេចាប់ទាំងខ្ញុំយកដាក់គុកហើយ ចាប់តែខ្ញុំមួយទេ អ្នកទាមទារដីធ្លី ខ្ញុំធ្វើប្រធាននៅខេត្តឃ្លាំងរឿងដីធ្លីហ្នឹង»។
សូមរំឭកថា កាលពីថ្ងៃទី៨ ខែមេសា ឆ្នាំកន្លងទៅ អាជ្ញាធរវៀតណាមបានព័ទ្ធចាប់សកម្មជនទាមទារដីធ្លីពីរនាក់នៅខែត្រមាត់ជ្រូក ដែលបច្ចុប្បន្នសកម្មជនទាំងពីរនាក់នោះ បានភៀសខ្លួនដោយក្តីភ័យខ្លាច ហើយកំពុងស្វះស្វែងសុំសិទ្ធិជ្រកកោនជាមួយអគ្គស្នងការសហប្រជាជាតិទទួលបន្ទុកជនភៀសខ្លួន ហៅកាត់ថា យូ.អិន.អេច្ឆ.ស៊ី.អ័រ ប្រចាំទីក្រុងបាងកកប្រទេសថៃ៕
អត្ថបទៈ វិទ្យុអាស៊ីសេរី.
