ប្រធានគណៈប្រតិភូសង្ឃនៃសហព័ន្ធខ្មែរកម្ពុជាក្រោមដែលបានចូលរួម សន្និសីទនិងពិធីបុណ្យវិសាខបូជាអន្តរជាតិដែលនឹងចាប់ផ្តើមប្រព្រឹត្ត ទៅនៅក្នុងប្រទេសថៃចាប់ពីថ្ងៃច័ន្ទនេះបានឲ្យដឹងថា ព្រះអង្គនិងសមាជិកគណៈប្រតិភូ៤អង្គទៀតបានទទួលកិច្ចសន្យាពី ព្រះសង្ឃជាមហាថេរក្នុងប្រទេសថៃ ថានឹងជួយបំពេញឧបសម្បទាជាភិក្ខុភាវៈ គឺបំបួសភិក្ខុប្រគេនអតីតចៅអធិការវត្តភ្នំដិនខាងជើងនៅក្រោយ ថ្ងៃពិសាខបូជានេះ។
ព្រះភិក្ខុបញ្ញាបជោតោ ថាច់ បេរ៉ុង ព្រះសង្ឃនាយករងនៃគណៈសង្ឃក្នុងសហព័ន្ធខ្មែរកម្ពុជាក្រោមដែលដឹក គណៈប្រតិភូផ្លូវការព្រះពុទ្ធសាសនាផ្នែកថេរវាទ បានឲ្យដឹងថា ក្នុងកិច្ចជួបពិភាក្សាជាមួយព្រះមហាថេរថៃដែលជាសមាជិកជាន់ខ្ពស់ មួយអង្គនៃពុទ្ធិកមហាវិទ្យាល័យ ជុឡាឡុងកននោះ ព្រះអង្គមានរំពឹងមុតមាំថានឹងសម្រេចបានតាមបំណងរបស់អតីតព្រះគ្រូ ចៅអធិការ ទឹម សាខន។
ព្រះភិក្ខុបញ្ញាបជោតោ ថាច់ បេរ៉ុង បានមានថេរដីកាថា ៖ «ក្នុង កិច្ចពិភាក្សាជាមួយព្រះគ្រូសាស្រ្តាចារ្យបណ្ឌិតមហាជោដែលជា ព្រះសង្ឃខ្មែរសុរិន្ទ។ លោកមានព្រះទ័យទុកដាក់ថា បងប្អូនខ្មែរកម្ពុជាគឺឈាមជ័រតែមួយ ហើយលោកនឹងយកចិត្តទុកដាក់ដើម្បីពិភាក្សាជាមួយនឹងគណៈកម្មការទទួល បន្ទុកខាងអន្តរសាសនានៃប្រទេសថៃផ្ទាល់ដែលបានដឹងឮអំពីរឿងរ៉ាវ ទាំងអស់ហ្នឹង បន្ទាប់ពីបុណ្យពិសាខបូជាហើយនេះ លោកនឹងរៀបចំចាប់ផ្ដើមដំណើរការធ្វើការបំបួសដល់អតីតព្រះគ្រូចៅ អធិការ ទឹម សាខន»។
សាមណេរ ទឹម សាខន ដែលគង់លាក់ខ្លួនក្រោមការការពាររបស់អគ្គស្នងការអង្គការសហប្រជាជាតិ ទទួលបន្ទុកជនភៀសខ្លួន UNHCR ហើយដែលពុំទាន់បានជួបព្រះភិក្ខុបញ្ញាបជោតោ ថាច់ បេរ៉ុង នៅឡើយនោះ បានសម្តែងសេចក្តីរីករាយចំពោះដំណឹងនេះ ៖ «ឮដំណឹងថាបួសវិញនេះ ជាការត្រេកអរជាទីបំផុតរបស់អាត្មារកអីប្រៀបផ្ទឹមពុំបានទេ ព្រោះកាលពីថ្ងៃទី៣០ ខែ៦ ឆ្នាំ២០០៧នោះ បានត្រូវអាជ្ញាធរខ្មែរ ហើយសម្ដេចសង្ឃ ទេព វង្ស លោក នន់ ង៉ែត, សាវ ចាន់ថុល និង ជេស ឱប បញ្ឆោតឲ្យមកវត្តសីហៈ ហើយមិនបានសឹកត្រឹមត្រូវទេ យកខោអាវមកចាប់ដាក់ឲ្យស្លៀកពាក់ ហើយចាប់បញ្ជូនដាក់ឡានយកទៅប្រគល់ឲ្យវៀតណាមនៅខេត្តអាងយ៉ាងហ្នឹង ដាក់គុកទាំងលោកសង្ឃតែម្ដង»។
សូមជម្រាបថា ក្នុងឱកាសជាមួយគ្នានេះសម្តេចព្រះសង្ឃរាជ ទេព វង្ស ដែលព្រះតេជគុណ ទឹម សាខន ចៅអធិការវត្តភ្នំដិនខាងជើង ស្រុកគិរីវង់ ខេត្តតាកែវ បានចោទថាជាអ្នកបញ្ជាឲ្យចាប់ព្រះអង្គផ្សឹកហើយបញ្ជូនទៅឲ្យ យៀកណាមដាក់គុកនោះក៏មានវត្តមាននៅក្នុងទីក្រុងបាងកកប្រទេសថៃ ផងដែរ។
អ្នកយកព័ត៌មានវិទ្យុអាស៊ីសេរីបានព្យាយាមទាក់ទងព្រះអង្គខណៈគង់ នៅជាន់ទី៩នៃសណ្ឋាគារ Royal City ក្បែរវាលព្រះមេរុ ឬសាណាមលួង របស់ថៃ ដើម្បីសុំអត្ថាធិប្បាយអំពីករណីសាមណេរ ទឹម សាខន នឹងបានទទួលការបំបួសភិក្ខុពីមហាថេរថៃនេះ ក៏ប៉ុន្តែសម្តេចព្រះសង្ឃរាជកម្ពុជាបានដាក់ទូរស័ព្ទចុះបដិសេធមិន ឆ្លើយនឹងសំណួរ៕
អត្ថបទគេហទំព័រវិទ្យុអាស៊ីសេរី.
