ពលរដ្ឋខ្មែរកម្ពុជាក្រោម ១៧នាក់ បានតវ៉ាជាថ្មីម្ដងទៀត សុំឲ្យអង្គការ UNHCR ទទួលយកពួកគាត់ជាជនភៀសខ្លួនស្របច្បាប់ ដើម្បីទៅរស់នៅប្រទេសទី៣ ប៉ុន្តែត្រូវបានបដិសេធ។
ពលរដ្ឋខ្មែរកម្ពុជាក្រោម ១៧នាក់ ស្មើនឹង ៦គ្រួសារ នៅថៃ្ងច័ន្ទនេះបានសំដែងការតវ៉ាជាថ្មីទៀតសុំឲ្យការិយាល័យឧត្ដម ស្នងការអង្គការសហប្រជាជាតិ (អ.ស.ប.) ទទួលបន្ទុកជនភៀសខ្លួន (UNHCR) ប្រចាំនៅកម្ពុជា ទទួលយកពួកគាត់ជាជនភៀសខ្លួនស្របច្បាប់ ដើម្បីទៅរស់នៅក្នុងប្រទេសទី៣ ក្រោយពីអាជ្ញាធរកម្ពុជាមិនព្រមចេញឯកសារ ឬអត្តសញ្ញាណប័ណ្ណនានាឲ្យពួកគាត់ ដើម្បីរស់នៅស្របច្បាប់ក្នុងប្រទេសកម្ពុជា។
គ្រួសារខ្មែរកម្ពុជាក្រោមទាំងនោះបានប្រកែកមិនព្រមវិលត្រឡប់ ទៅកាន់ស្រុកកំណើតនៅក្នុងទឹកដីខ្មែរកម្ពុជាក្រោមវិញទេ ដោយសំអាងថា ពួកគាត់នឹងប្រឈមមុខនឹងការចាប់ខ្លួន និងគ្រោះថ្នាក់ដល់អាយុជីវិត។
តំណាងគ្រួសារខ្មែរកម្ពុជាក្រោមចំនួន ១៧នាក់ ស្មើនឹង ៦គ្រួសារនោះ លោក ថាច់ ស៊ុង បានថ្លែងប្រាប់វិទ្យុអាស៊ីសេរីនៅថ្ងៃច័ន្ទនេះ ថា ការតវ៉ា និងសំណូមពរជាថ្មីមិនត្រូវបានទទួលយកដោយតំណាង UNHCR នោះ ៖ «ព្រោះអីថា គាត់ជាប់គាំង… រដ្ឋាភិបាលហ្នឹងមិនបានផ្ដល់សិទ្ធិឲ្យគាត់ទទួលយកជនភៀសខ្លួន»។
ស្ត្រីខ្មែរកម្ពុជាក្រោមម្នាក់នៅក្នុងចំណោម ៦គ្រួសារនោះ បានថ្លែងថា ៖ «ព្រោះ អីពីមុនមកសុំរដ្ឋាភិបាល ឲ្យរដ្ឋាភិបាលទទួលពួកខ្ញុំ សុំសិទ្ធិជ្រកកោនពីរដ្ឋាភិបាលខ្មែរ ហើយឥឡូវរដ្ឋាភិបាលខ្មែរបដិសេធពួកខ្ញុំហើយ។ ដល់ឥឡូវ ពួកខ្ញុំទៅសំណូមពរឲ្យ UNHCR ទទួលយកពួកខ្ញុំជាជនភៀសខ្លួនស្របច្បាប់វិញ»។
វិទ្យុអាស៊ីសេរីមិនទាន់អាចទាក់ទងដើម្បីសុំការពន្យល់ជា ពិស្ដារបានទេនៅថ្ងៃច័ន្ទនេះ ពីនាយកការិយាល័យរបស់អង្គការ UNHCR ប្រចាំនៅប្រទេសកម្ពុជា ជុំវិញការស្នើសុំរបស់គ្រួសារខ្មែរកម្ពុជាក្រោមខាងលើនេះ ដោយអ្នកប្រចាំការបានឆ្លើយថា នាយកកំពុងតែជាប់រវល់ប្រជុំពេញមួយថ្ងៃ។
មន្ត្រីមួយរូបនៃអង្គការ UNHCR សុំមិនឲ្យបញ្ចេញឈ្មោះបានបង្ហើបឲ្យដឹងថា អង្គការ UNHCR ប្រកាន់ជំហរដដែល គឺមិនទទួលស្គាល់គ្រួសារខ្មែរកម្ពុជាក្រោមទាំងនោះ ថាជាជនភៀសខ្លួនទេ ដោយសារតែមានលិខិតពីរដ្ឋាភិបាលមួយច្បាប់បញ្ជាក់ថា គ្រួសារទាំងនោះត្រូវបានចាត់ទុកថាជាពលរដ្ឋកម្ពុជាផងដែរ។
កន្លងមក ទាំងមន្ត្រីក្រសួងមហាផ្ទៃ និងមន្ត្រីក្រសួងការបរទេសកម្ពុជា បានបញ្ជាក់ដូចគ្នានេះផងដែរ។
ទាក់ទងនឹងរឿងស្មុគស្មាញខាងលើនេះ មន្ត្រីស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាល ហៅកាត់ថា លីកាដូ លោក អំ សំអាត ដែលបានតាមដានស្ថានការណ៍គ្រួសារខ្មែរកម្ពុជាក្រោមនោះកន្លងមក បានមានប្រសាសន៍ថា ៖ «បញ្ហាមួយទេ ដែលពួកគាត់បានទាមទារហើយទាមទារទៀតទៅអាជ្ញាធរ គាត់ថា បានអត្តសញ្ញាណប័ណ្ណ គឺប័ណ្ណគ្រួសារហ្នឹងទៅ ងាយក្នុងការប្រកបមុខរបរ ហើយក៏ជាទីលំនឹង សុវត្ថិភាព ដែលបញ្ជាក់ថា គាត់មិនត្រូវបានគេបញ្ជូនទៅប្រទេសវៀតណាមវិញនោះ»។
ការស្នើសុំ និងការទាមទាររបស់គ្រួសារខ្មែរកម្ពុជាក្រោមចំនួន ៦គ្រួសារជាច្រើនលើកកន្លងមក ត្រូវបានតំណាងរបស់អង្គការ UNHCR បដិសេធ។
កាលពីថ្ងៃទី២៣ ខែកុម្ភៈកន្លងទៅនេះ អាជ្ញាធរនគរបាលរដ្ឋបាលបឹងទំពុន ក្រុងភ្នំពេញ បានបដិសេធមិនចេញសៀវភៅគ្រួសារអត្តសញ្ញាណប័ណ្ណសញ្ជាតិខ្មែរ និងសំបុត្រកំណើត តាមការទាមទាររបស់គ្រួសារទាំងនោះទេ ដោយមូលហេតុថា គ្រួសារទាំងនោះគ្មានទីលំនៅជាកម្មសិទ្ធិផ្ទាល់ខ្លួននៅក្នុង ប្រទេសកម្ពុជា។
គ្រួសារខែ្មរកម្ពុជាក្រោមបានត្អូញត្អែរថា បើពួកគាត់គ្មានឯកសារទាំងនោះទេ ពួកគាត់ពិបាករកការងារធ្វើចិញ្ចឹមជីវិតដោយខ្លួនឯង។
អាជ្ញាធរថៃបានចាប់បញ្ជូនគ្រួសារខ្មែរកម្ពុជាក្រោមខាងលើនេះមក ប្រទេសកម្ពុជា កាលពីថ្ងៃទី៥ ខែធ្នូ ឆ្នាំ២០០៩កន្លងទៅ នៅគ្រាដែលគ្រួសារទាំងនោះបានសុំសិទ្ធិជ្រកកោនពីអង្គការ UNHCR នៅក្នុងទីក្រុងបាងកក ប្រទេសថៃ។
មនុស្សសរុបចំនួន ២៤នាក់បានរត់ទៅលាក់ខ្លួននៅក្នុងប្រទេសថៃពីទឹកដីខែ្មរ កម្ពុជាក្រោម កាលពីឆ្នាំ២០០៤ ឆ្នាំ២០០៧ និងឆ្នាំ២០០៨ ពីការតាមចាប់ខ្លួនដោយអាជ្ញាធរវៀតណាម ដោយសារកន្លងមកពួកគាត់បានងើបតវ៉ាទាមទារដីធ្លី ជំនឿសាសនា វប្បធម៌ និងប្រពៃណី នេះបើតាមការអះអាងរបស់គាត់៕
ប្រភពពីវិទ្យុអាស៊ីសេរី.
