ដោយ ថាច់ ប្រីជា គឿន | សារព័ត៌មាន ព្រៃនគរ
សមាគមព្រះសង្ឃខ្មែរក្រោម នៅខេត្តព្រះត្រពាំង បានបញ្ជូនព្រះសង្ឃខ្មែរក្រោម ចំនួន ៦ អង្គ ទៅបន្តការសិក្សា ថ្នាក់ បរិញ្ញាប័ត្រ និងអនុបណ្ឌិត នៅប្រទេសថៃ ត្រូវបានក្រសួងសាសនាមជ្ឈិម នៃរដ្ឋាភិបាលបក្សកុម្មុយនិស្តវៀតណាម រារាំង ដោយការពន្យាពេលពីមួយថ្ងៃទៅមួយថ្ងៃ រហូតមកទល់ពេលសាលារៀនបានបានបើកកម្មវិធីសិក្សាហើយ តែព្រះសង្ឃនៅតែមិនទាន់និមន្តចេញទៅសិក្សា ។
សមណនិស្សិតខ្មែរក្រោមដែលកំពុងសិក្សានៅក្នុងប្រទេសថៃ ដែលដឹងព័ត៌មាននេះ បានប្រាប់វិទ្យុសំឡេងកម្ពុជា ក្រោម ថា ក្រសួងសាសនារបស់រដ្ឋាភិបាលបក្សកុម្មុនិស្តវៀតណាម បានពន្យាពេលជាច្រើនដង ដើម្បីរារាំងមិនឲ្យ ព្រះសង្ឃខ្មែរក្រោមចេញទៅបន្តការសិក្សានៅប្រទេសថៃបាន ។ សមណនិស្សិតដែលសុំមិនបញ្ចេញព្រះនាមអង្គនេះ បានប្រាប់ថា ព្រះសង្ឃដែលសមាគមសង្ឃនៅខេត្តព្រះត្រពាំងត្រៀមបញ្ជូនចេញទៅបន្តការសិក្សានេះ មានឯកសារ គ្រប់គ្រាន់អស់ហើយ នៅរងចាំតែការយល់ព្រមពីក្រសួងសាសនារបស់រដ្ឋាភិបាលតែប៉ុណ្ណោះ ។
សូមបញ្ជាក់ថា ជារៀងរាល់ឆ្នាំ សមាគមព្រះសង្ឃសាមគ្គីស្នេហាជាតិខេត្តត្រាវិញ ឬ ខេត្តព្រះត្រពាំង តែងតែបញ្ជូន ព្រះសង្ឃទៅបន្តការសិក្សានៅប្រទេសថៃ ក្នុងគោលបំណងដើម្បីបណ្ដុះបណ្ដាលធនធានមនុស្ស ។ បើយោងតាម ប្រភពពីសង្ឃខ្មែរក្រោមនៅថៃ បានបញ្ជាក់ថា គិតមកទល់ពេលនេះ មានសមណនិស្សិតខ្មែរក្រោមនៅថៃ ប្រមាណ ជិត ២០០ អង្គ ៕
