ដោយ សឺង ថាយធន | VOKK
នៅល្ងាចថ្ងៃសុក្រទី៣០តុលាឆ្នាំ២០១៥ម្សិលមិញនេះ ព្រះសង្ឃជាសមណនិស្សិតខ្មែរក្រោមដែលកំពុងសិក្សានៅក្នុងប្រទេសថៃបានបើកអង្គប្រជុំធ្វើពិធីបោះឆ្នោតជ្រើសរើសប្រធានថ្មីអាណត្តិទី៥នាសកលវិទ្យាល័យមហាចុឡាឡុងករណ៍រាជវិទ្យាល័យ នៅក្នុងខេត្តអយុធ្យា។
ចូលរួមប្រជុំក្នុងពិធីបោះឆ្នោតនោះមានព្រះសង្ឃជាសមណនិស្សិត និមន្តមកពីបណ្ដាសកលវិទ្យាល័យនានាក្រោមអធិបតីភាពព្រះតេជព្រះគុណអនុបណ្ឌិតសឺនទីជាទីប្រឹក្សារបស់សម្ព័ន្ធសមណនិស្សិតនិស្សិតខ្មែរក្រោមដែលមានមូលដ្ឋាននៅក្នុងប្រទេសថៃជាប្រធានគណះកម្មការរៀបចំការបោះឆ្នោត ដោយព្រះអង្គបានពន្យល់ពីការរៀបចំការបោះឆ្នោតបង្អែកទៅតាមគោលការណ៍របស់លក្ខន្តិកនៃអង្គការនេះដែលបានចែងស្រាប់ជាធរមាន។
បេក្ខជនដែលឈរឈ្មោះបោះឆ្នោតដើម្បីដឹកនាំអង្គការមួយនេះរួមមាន៦អង្គជាសមណនិស្សិតដោយជ្រើសរើសយកប្រធាន១អង្គអនុប្រធាន២អង្គរយះពេល២ឆ្នាំក្នុងមួយអាណត្តិកាល។
ក្រោយពេលបោះឆ្នោតរួចព្រះតេជព្រះគុណ ថាច់ ខេមរា ត្រូវបានជាប់ជាប្រធានថ្មីដោយសម្លេងគាំទ្រ ២៥ លើ ៣២ សម្លេង។
ព្រះអង្គមានថេរដីកាប្ដេជ្ញាចិត្តតាមបណ្ដាញសង្គមហ្វេសប៊ុកផ្ទាល់ខ្លួនរបស់ព្រះអង្គដូច្នេះថា៖
ខ្ញុំក្នាសូមថ្លែងអំណរអរព្រះគុណព្រះករុណាគុណម្ចាស់គ្រប់ព្រះអង្គ ចំពោះការជឿជាក់ទុកចិត្ត ហើយបានផ្ដល់សម្លេងឆ្នោតដល់ខ្ញុំក្នាជាប្រធានសម្ព័ន្ធសមណនិស្សិត-និស្សិតខ្មែរកម្ពុជាក្រោមនៅប្រទេសថៃអាណត្តិទី៥ ខ្ញុំក្នានឹងប្រឹងប្រែងព្យាយាមអស់ពីសមត្ថភាពដើម្បីបម្រើសង្គម ក៏ដូចជាសងគុណជូនសង្គមជាតិដែលបានបញ្ជូនខ្ញុំក្នាមករៀនទើបខ្ញុំក្នាមានថ្ងៃនេះ ឥឡូវនេះគឺដល់ពេលដែលខ្ញុំក្នាតបស្នងគឺយកចំណេះដឹងតិចតួចនេះមកបម្រើសង្គមវិញ (គ្មានយើងម្នាក់នៅតែមានសង្គម តែបើគ្មានសង្គមគឺគ្មានយើង ចូរកុំធ្វើខ្លួនជាបញ្ញើក្អែក) ។
បន្ទាប់ពីការតែងតាំងគណះកម្មការនាយកដោយប្រធានថ្មីនៃអង្គការមួយនេះ អតីតប្រធានព្រះតេជព្រះគុណ សឺន សុវណ្ណខេមរា បានប្រគល់ជូនត្រានិងសម្ភារះដែលជាសម្បត្តិរបស់អង្គការសម្ព័ន្ធសមណនិស្សិត និស្សិតខ្មែរក្រោម ដល់គណះកម្មការថ្មី។
សូមបញ្ជាក់ផងដែរថាសម្ព័ន្ធសមណនិស្សិត- និស្សិតខ្មែរក្រោមនៅក្នុងប្រទេសថៃនេះ ជាក្រុមនិស្សិតខ្មែរក្រោមដែលបាននិមន្តមកពីដែនដីកម្ពុជាក្រោម កាន់លិខិតឆ្លងដែនរបស់ប្រទេសកម្ពុជាដោយផ្ដោតលើការងារបណ្ដុះបណ្ដាលធនធានមនុស្សរហូតមកដល់អាណត្តិទី៥មានព្រះសង្ឃជានិស្សិតសរុបចំនួន ១១៣ អង្គដែលបាននិងកំពុងសិក្សា ហើយបញ្ចប់ ថ្នាក់បរិញ្ញាប័ត្រ បរិញ្ញាប័ត្រជាន់ខ្ពស់អនុបណ្ឌិត ១៨ អង្គនិងបណ្ឌិត២អង្គ ។
ព័ត៌មានបន្ថែមពីគោលនយោបាយនិងការដឹកនាំរបស់ប្រធានថ្មីនៃសម្ព័ន្ធសមណនិស្សិត - និស្សិតខ្មែរក្រោមនៅក្នុងប្រទេសថៃពិស្ដារវីទ្យុសម្លេងកម្ពុជាក្រោមនឹងធ្វើកិច្ចសម្ភាសជាមួយព្រះអង្គ ថាច់ខេមរានៅពេលក្រោយ សូមអស់លោក អ្នក អ្នកសា្ដប់ រង់ចាំស្ដាប់ កុំបីខាន ៕
ខាងក្រោមជារូបថត ការបោះឆ្នោតអាណត្តិកាលទី ៥ នៃសម្ព័ន្ធសមណនិស្សិត-និស្សិតខ្មែរកម្ពុជាក្រោម នៅប្រទេសថៃ ថ្ងៃទី ៣០ ខែតុលា ឆ្នាំ ២០១៥ ។ រូបថតៈ សឺង ថាយធន
