ដោយ ស៊ឺន ចែងចើន|VOKK
សម្ព័ន្ធសមណនិស្សិត-និស្សិតខ្មែរកម្ពុជាក្រោម នៅព្រឹកថ្ងៃទី ១៩ សីហា ខាងមុខនេះ នឹងរៀបចំពិធីប្រគល់អាហារូបករណ៍ដល់ព្រះសង្ឃ និងនិស្សិតខ្មែរក្រោម ដើម្បីបន្តការសិក្សានៅតាមមហាវិទ្យាល័យនានា ក្នុងប្រទេសកម្ពុជា និងនៅបរទេស ។
ថ្លែងប្រាប់វិទ្យុសំឡេងកម្ពុជាក្រោម ប្រធានសម្ព័ន្ធសមណនិស្សិត-និស្សិតខ្មែរកម្ពុជាក្រោម ព្រះតេជព្រះគុណ សឺន សុផារិន្ទ មានពុទ្ធដីកាថា សមណនិស្សិត និងនិស្សិតខ្មែរក្រោមដែលទទួលបានអាហារូបករណ៍សិក្សាបន្ត នៅក្នុងប្រទេសកម្ពុជា និងក្រៅប្រទេស ពីសម្ព័ន្ធសមណនិស្សិត-និស្សិតខ្មែរកម្ពុជាក្រោម នៅឆ្នាំ ២០១៨ នេះ មានចំនួន ២១ អង្គ និងរូប ។
ព្រះតេជព្រះគុណ សឺន សុផារិន្ទ មានពុទ្ធដីកាថា គោលបំណងនៃការផ្តល់អាហារូបករណ៍នេះ គឺដោយមើលឃើញពីកង្វះខាតថវិកាក្នុងការសិក្សារៀនសូត្ររបស់សមាជិក-សមាជិកា សិស្ស-និស្សិត ដែលជាសមាជិករបស់ខ្លួន កំពុងរៀននៅតាមបណ្តាមហាវិទ្យាល័យ ក្នុង និងក្រៅប្រទេស ។ ព្រះតេជព្រះគុណមានពុទ្ធដីកាបន្តថា ដើម្បីរួមចំណែកអភិវឌ្ឍធនធានមនុស្សខ្មែរក្រោម និងជាការផ្តល់ឱកាសឲ្យព្រះសង្ឃ និងនិស្សិតខ្មែរក្រោម មានឱកាសទទួលបាននូវការអប់រំខ្ពង់ខ្ពស់ និងស្របទៅតាមទស្សនវិស័យអភិវឌ្ឍន៍ធនធានមនុស្ស និងគោលបំណងរួមចំណែកកសាងសង្គមជាតិខ្មែរក្រោម របស់សម្ព័ន្ធសមណនិស្សិត-និស្សិតខ្មែរកម្ពុជាក្រោម ដែលមានពាក្យស្លោករបស់ខ្លួនថា «ធនធានមនុស្ស ជាមូលដ្ឋានគ្រឹះនៃការកសសាងសង្គម» ។
នៅក្នុងឆ្នាំ ២០១៨ នេះ សម្ព័ន្ធសមណនិស្សិត-និស្សិតខ្មែរកម្ពុជាក្រោម ប្រគល់អាហារូបករណ៍ដល់សមណនិស្សិត-និស្សិតខ្មែរក្រោម ចំនួន ២១ អង្គ/រូប ដោយក្នុង ១ អង្គៗ និងម្នាក់ៗ ទទួលបានថវិកាចំនួន ២៥០$ ក្នុងនោះ ថ្នាក់បរិញ្ញាបត្រជាន់ខ្ពស់ក្នុង ១ អង្គៗ និងម្នាក់ៗ ទទួលបានថវិកា ៤០០$ ។
សូមបញ្ជាក់ថា នៅដែនដីកម្ពុជាក្រោម ព្រះសង្ឃ និងពលរដ្ឋខ្មែរក្រោម មិនត្រូវបានរដ្ឋាភិបាលវៀតណាម អនុញ្ញាតឲ្យសិក្សាអក្សរសាស្ត្រជាតិរបស់ខ្លួនទូលំទូលាយឡើយ ។ ដើម្បីសិក្សាបានខ្ពង់ខ្ពស់ ព្រះសង្ឃខ្មែរក្រោមភាគច្រើន សម្រេចចិត្តនិមន្តឡើងមកប្រទេសកម្ពុជា ដើម្បបន្តស្វែងរកមធ្យោបាយសិក្សាខ្លួនឯង ។
ជាមួយគ្នានេះដែរ ប្រធានសម្ព័ន្ធសមណនិស្សិត-និស្សិតខ្មែរកម្ពុជាក្រោម ព្រះតេជព្រះគុណ សឺន សុផារិន្ទ បានអំពាវនាវទៅកាន់ម្ចាស់ជំនួយទាំងនៅក្នុងប្រទេស និងក្រៅប្រទេសឲ្យបន្តគាំទ្រសកម្មភាពរបស់សម្ព័ន្ធសមណនិស្សិត-និស្សិតខ្មែរកម្ពុជាក្រោម ដើម្បីជួយឧបត្ថម្ភថវិកា សម្រាប់បំពេញនូវតម្រូវការងារប្រចាំឆ្នាំ និងមានលទ្ធភាពអាចរៀបចំពិធីប្រគេន និងជូនអាហារូបករណ៍ដល់សមណនិស្សិត-និស្សិតក្រីក្រ ដែលកំពុងសិក្សានៅក្នុងប្រទេស និងការបញ្ជូនសមណនិស្សិតទៅបន្តការសិក្សានៅឯបរទេស នៅឆ្នាំបន្តបន្ទាប់ទៀត ដើម្បីបុព្វហេតុបណ្តុះបណ្តាលធនធានមនុស្ស និងការចូលរួមចំណែកក្នុងការកសាងសមង្គមជាតិ ។
គួរជម្រាបជូនថា សម្ព័ន្ធសមណនិស្សិត-និស្សិតខ្មែរកម្ពុជាក្រោម ត្រូវបានបង្កើតឡើងនៅឆ្នាំ ២០០២ ក្នុងគោលដៅរួមចំណែកកសាងសង្គមជាតិ តាមរយៈការបណ្តុះបណ្តាលធនធានមនុស្ស ។ ចាប់តាំងពីឆ្នាំ ២០០៧ រហូតមកដល់ឆ្នាំ ២០១៧ សម្ព័ន្ធសមណនិស្សិត-និស្សិតខ្មែរកម្ពុជាក្រោម បានបញ្ជូនសមណនិស្សិត-និស្សិតខ្មែរក្រោមទៅបន្តការសិក្សានៅក្រៅប្រទេស រួមមានប្រទេសថៃ និងប្រទេសឥណ្ឌា បានចំនួន ១១ លើក ហើយសរុបមានសមណនិស្សិតចំនួន ១១៣ អង្គ ។ ចំណែកការផ្តល់អាហារូបករណ៍ ៥០ ភាគរយ ដល់សមណនិស្សិត-និស្សិតក្រីក្រ នៅព្រះរាជាណាចក្រកម្ពុជាវិញ គិតចាប់តាំងឆ្នាំ ២០១០ រហូតមកដល់បច្ចុប្បន្ន សរុបមានចំនួន ១៤៧ អង្គ និងរូប ។
