ថ្ងៃទី ០៨ ខែក្កដា ឆ្នាំ ២០១២ | ដោយ សឺង សម្រេច
នៅក្នុងកិច្ចប្រជុំ នាថ្ងៃទី ៣០ ខែមិនា ឆ្នាំ ២០១២ គណកម្មការ សេដ្ឋកិច្ច និងសង្គមកិច្ចនៃ អង្គការសហប្រជាជាតិ បានឮអំពីសេចក្តីថ្លែងការណ៍របស់ តំណាងនៃ សាធារណរដ្ឋសង្គម និយមវៀតណាមដែល បាននិយាយក្នុងនាមជាអ្នកសង្កេតការណ៍ ។
អ្នកតំណាងរូបនោះបាន ទាមទារឲ្យ ចុះបញ្ជីជាផ្លូវការនូវការតវ៉ា របស់រដ្ឋាភិបាលវៀតណាម ជំទាស់ការទទួលយកនូវ តួនាទីរបស់សហព័ន្ធខ្មែរកម្ពុជាក្រោម ជាអង្គការ ពិគ្រោះ យោបល់ពិសេស សម្រាប់គណៈ កម្មការ សេដ្ឋកិច្ច និងសង្គមកិច្ច នៃអង្គការសហប្រជាជាតិ (United Nations Economic and Social Council) ។
ក្នុងការតវ៉ានេះ អ្នកតំណាងវៀតណាម បានសំអាង លើហេតុផល ដែលគ្មានន័យ និងគ្មានការ ពិតទាល់តែសោះ ដោយបានចោទប្រកាន់ ចំពោះសហព័ន្ធ ខ្មែរកម្ពុជាក្រោមមិនខុសពីការចោទ ប្រកាន់ ជាប្រពៃណី ដែលអាជ្ញាធរវៀតណាមតែង ប្រព្រឹត្តជាលេស ដើម្បីធ្វើទុក្ខបុកម្នេញ រំលោភ សិទ្ធិសេរីភាពចំពោះខ្មែរក្រោមជា ហូរហែមកហើយនោះដែរ ។
ការចោទប្រកាន់ដ៏ធ្ងន់ធ្ងរ ពីបទសកម្មភាពបំបែកដែនដី (Secession) ដែលវៀតណាមបាន លើកឡើងនោះ គឺជាការបំភាន់មតិសកលលោក ជាការមួលបង្កាច់យ៉ាងអយុត្តិធម៌ ដែលមិន អាចទទួលយកបានឡើយ ។
មកទល់នឹងពេលនេះ ប្រទេសនានា ក្នុងពិភពលោកបានតាម ដាន និងបានឃើញយ៉ាងច្បាស់ក្រឡែត ថាសហព័ន្ធខ្មែរកម្ពុជាក្រោមគ្រាន់តែជាអង្គការដែល ធ្វើ សកម្មភាពតវ៉ាដោយសន្តិភាពបំផុត ព្រោះហេតុមិនអាចទ្រាំទ្រឈរ បិទភ្នែក បិទត្រចៀក ចំពោះទង្វើរំលោភបំពានយ៉ាងសាហាវព្រៃផ្សៃ របស់រដ្ឋាភិបាលវៀតណាម ចំពោះ ជនរួមលោ ហិតខ្មែរកម្ពុជាក្រោមដ៏អភព្វជាជនរងគ្រោះតែប៉ុណ្ណោះ។
ភ័ស្តុតាងមានជាក់ស្តែងនៅក្នុងសេច ក្តីថ្លែងការណ៍ និងអនុសាសន៍នានានៃសហព័ន្ធខ្មែរកម្ពុជាក្រោម មិនដែលបាននិយាយបន្តិច ណាឡើយ អំពីអ្វីដែលអ្នកតំណាងវៀតណាមបានដាក់ឈ្មោះ ថាជាការទាមទារបំបែកដែន ដីនោះ។ ផ្ទុយទៅវិញ អង្គការយើង មានការយល់ដឹងយ៉ាងជ្រៅជ្រះ និងគោរពទាំងស្រុងចំពោះ គោលការណ៍នៃច្បាប់អន្តរជាតិជាធរមាន ។
ការចោទប្រកាន់ មួលបង្កាច់យ៉ាងទទឹងទិសរបស់ រដ្ឋាភិបាលវៀតណាម គឺមានលក្ខណៈមិនខុស អំពីការយកលេសចោទប្រកាន់ របស់សត្វចចក ដ៏កំណាច ចំពោះកូនចៀមដ៏ស្លូតបូត ដែលចុះផឹកទឹកជ្រលងអូរ មានមកជាធម្មជាតិ ថាបានធ្វើ ឲ្យល្អក់ទឹក ក្នុងរឿងព្រេងនិទានបារាំង La Fable de la Fontaine នោះឡើយ ។
រីឯគំនិតដ៏ខ្មៅ ក្រខ្វក់នៃការចោទប្រកាន់ គឺ គ្រាន់តែរកលេសដើម្បីខាំហែកស៊ីសាច់ កូនចៀម តែប៉ុណ្ណោះ ។ វាជាការចោទប្រកាន់មួយដ៏ហួសសម័យកាល និងគួរឲ្យអស់សំណើច ដែលគ្រាន់តែបានបង្ហាញ ឲ្យឃើញកាន់តែច្បាស់ អំពីផ្នត់គំនិតមិនល្អរបស់វៀតណាមជាមេដើមចោទដែលអាងអំណាច ខ្លួនជា អ្នក ខ្លាំង ត្រួតត្រាលើខ្មែរក្រោមតែប៉ុណ្ណោះ។
នៅក្នុងទឡ្ហីករណ៍នៃការប្រឆាំងជំទាស់ របស់អ្នកតំណាងវៀតណាមដដែល បាននិយាយអំពី ថា រដ្ឋាភិបាលនេះ បានយកចិត្តទុកដាក់គាំពារចំពោះជនភាគតិចខ្មែរ មិនខុសពីជនភាគតិច ទាំង ៥៤ ក្នុងប្រទេសវៀតណាម ។
ចំណុចនេះមានការមិនពិតទាំងស្រុង ។ ទី ១ ព្រោះខ្មែរ ក្រោមជាជនជាតិដើមដែលបានរស់នៅ លើទឹកដីសណ្តនៃទន្លេមេគង្គ ឬ កម្ពុជាក្រោម នោះរាប់ ពាន់ឆ្នាំមកហើយ ។ យើងជាជនជាតិខ្មែរខ្លួនឯង ព្រម ទាំងប្រវត្តិវិទូរក្នុងសកលលោក បានដឹង បានឮនិងទទួលស្គាល់ច្បាស់លាស់ណាស់ទោះជាវៀតណាមខំកែ ក្រឡាយប្រវត្តិសាស្ត្រថ្មីឲ្យ ខុសពីការពិតយ៉ាងណាក៏មិនអាចទៅរួចដែរ ។ ទី ២ ការដែលវៀតណាមអាស់អាងអំពីការយក ចិត្តទុកដាក់ចំពោះខ្មែរក្រោមនោះ ជាការមិនពិតទេ។ ពួកយើងកំពុងតែបាត់បង់សិទ្ធិសេរីភាពជា មូលដ្ឋានសព្វបែបយ៉ាង ក្នុងនោះមានសិទ្ធិប្រតិបត្តិព្រះពុទ្ធសាសនាថេរវាទ ការថែរក្សាវប្បធម៌ ទំនៀមទម្លាប់ប្រពៃណីការទទួលព័ត៌មានសិទ្ធិរួមប្រជុំ ការរើសអើងពូជសាសន៍ការបាត់បង់ដីធ្លី ។ល។
ក្នុងនាមយើងជាជនជាតិដើម នៅលើដែនដីសណ្តនៃទន្លេមេគង្គនេះ យើងមានសិទ្ធិជា ពិសេសក្នុង ៤៦ មាត្រា ដែល ប្រកាសដោយអង្គការសហប្រជាជាតិ ហើយដែលប្រទេសវៀត ណាមខ្លួនឯងបានធ្វើសច្ចាប័នទទួលស្គាល់ នាឆ្នាំ ២០០៧ ។
ដោយយោងទៅលើរបាយការណ៍ ជាច្រើនរាប់ទាំងព្រឹត្តិការណ៍ជាក់ស្តែង ដែលកំពុងកើត មាននៅលើទឹកដីកម្ពុជាក្រោមសព្វថ្ងៃ របាយការណ៍របស់ អង្គការ UNPO , UPR របាយការណ៍របស់អង្គការសិទ្ធិមនុស្សអន្តរជាតិនៃរដ្ឋា ភិបាលសហរដ្ឋអាមេរិក និងរបាយការណ៍របស់ប្រទេសនានាក្នុងសកលលោក ដែលធ្វើការកត់ សំគាល់និងផ្តល់ជាអនុសាសន៍ដល់ប្រទេសវៀតណាម បានបញ្ជាក់ច្បាស់ថា វៀតណាមនៅ តែ បន្តការគាបសង្កត់ និងបំបិទសិទ្ធិសេរីភាពមនុស្សយ៉ាងធ្ងន់ធ្ងរ ។ យោងលើស្ថានភាពនេះ និង ឈរលើច្បាប់សិទ្ធិមនុស្សជាសកល យើងជាខ្មែរក្រោមមានសិទ្ធិធ្វើការតវ៉ាចំពោះរាល់ទង្វើរំលោភ បំពានរបស់រដ្ឋាភិបាល ដែលគ្រប់គ្រងជារដ្ឋអំណាចហើយទង្វើដ៏ស្របច្បាប់អន្តរជាតិរបស់យើង នេះវៀតណាមមិនអាចមួលបង្កាច់ ថាជានយោបាយបំផុសបំផុល បង្ខូចបង្កាច់ញុះញង់ ឬ ធ្វើឲ្យ អន្តរាយន័ដល់សាមគ្គីភាពរបស់វៀតណាម បានឡើយ (politically motivated acts, such as slandering, inciting, and undermining the national unity of the State of Viet Nam) ។
ចំពោះរឿងដែលវៀតណាមបានអាស់អាង ថាសហព័ន្ធខ្មែរកម្ពុជាក្រោមជាជនរស់ក្រៅស្រុក មិនអាច ជាតំណាងឲ្យប្រជាពលរដ្ឋខ្មែរកម្ពុជាក្រោមបាននោះ វាកាន់តែគួរឲ្យ អស់សំណើច ណាស់ទៅទៀត ព្រោះថា ប្រសិនបើពួកយើង ជាសមាជិកនៃអង្គការសហព័ន្ធមិនគេចខ្លួនចេញ ក្រៅទេនៅក្នុងដង្គាបដែកបែបផ្តាច់ការ នោះ ពួកយើងប្រាកដជាគ្មានមធ្យោបាយស្រែករាយ ការណ៍ឲ្យពិភពលោកបានដឹងឮ អំពីការរំលោភជិះជាន់ របស់រដ្ឋាភិបាលវៀតណាមដែរ ហើយ យើងខ្ញុំប្រាកដជាត្រូវរស់ដោយលំបាកវេទនាក្នុងភពងងិតអន្ធការ មិនខុស ពីបុព្វការីជនរបស់ យើងជាច្រើនជំនាន់មកហើយនោះដែរ ។
វៀតណាមអាចកូរទឹកឲ្យល្អក់ បង្វែងស្ថានភាពទុក្ខវេទនាខ្មែរក្រោមរងគ្រោះ មិនឲ្យពិភពលោក មើលឃើញបានតែម្តងមួយគ្រាទេ ។ ទីបំផុតទឹកនឹងប្រែជាថ្លា ហើយគេក៏អាចមើលឃើញដល់ បាតដី ។ សហព័ន្ធខ្មែរ កម្ពុជាក្រោម គ្រាន់តែឈរលើសច្ចធម៌ គតិយុត្តិធម៌ មេត្តាធម៌ និងសេចក្តី គោរពស្នេហាចំពោះសេចក្តីថ្លៃថ្នូ នៃមនុស្សជាតិ ជាអ្នកឃាត់ឃាំងកុំឲ្យវៀតណាមកកូរទឹកឲ្យល្អក់ តែប៉ុណ្ណោះទុកឧកាសឲ្យពិភពលោក បានជួយជនជាតិដើម ខ្មែរក្រោមផងចុះ ៕
