អាជ្ញាធរថៃ បើកយុទ្ធនាការ បង្ក្រាបជនអន្តោប្រវេសន៍ខុសច្បាប់គ្រប់ជាតិសាសន៍

ដោយ ស៊ឺន ចែងចើន| VOKK

នៅប្រទេសថៃ កាលពីថ្ងៃទី ២៨ ខែសីហាកន្លងទៅនេះ ប៉ូលិសបានបើកប្រតិបត្តិការទ្រង់ទ្រាយធំ តាមចាប់ខ្លួនក្រុមជនអន្តោប្រវេសន៍ ដែលបានស្នាក់នៅ និងធ្វើការខុសច្បាប់ ក្រោមច្បាប់អន្តោប្រវេសន៍របស់ថៃ ។

ជនភៀសខ្លួន និងអ្នកសុំសិទ្ធិជ្រកកោន នៅការិយាល័យប៉ូលិសក្នុងស្រុកបាងយ៉ៃ (Bang Yai) ក្រោយអាជ្ញាធរថៃចាប់ខ្លួន ។ រូបថតៈ AP

យោងតាមប្រភពព័ត៌មានទទួលបាន ពីប្រធានក្រុមជនភៀសខ្លួនខ្មែរក្រោម លោក លីឈួន បានប្រាប់វិទ្យុសំឡេងកម្ពុជាក្រោម ឲ្យដឹងថា សមត្ថកិច្ចថៃបានចាប់ខ្លួនជនអន្តោប្រវេសន៍ចម្រុះជាតិសាសន៍រាប់រយនាក់ កាលពីថ្ងៃទី ២៨ ខែសីហា នៅក្នុងខេត្តនន្ទបុរី ក្បែរក្រុងបាងកក ប្រទេសថៃ ។ លោកបន្តថា យុទ្ធនាការបោសសម្អាត ជនអន្តោប្រវេសន៍ស្នាក់នៅខុសច្បាប់រយៈពេល ៣ ថ្ងៃកន្លងមកនេះ គឺភាគច្រើនជាជនជាតិដើមភាគតិចម៉ុងតាញ៉ា (Montagnard) និង ហឺម៉ុង ឬចារ៉ាយ (HMong) ប្រមាណជិត ២០០ នាក់ ។ ជនជាតិដើមភាគតិចទាំងនោះ បានគេចខ្លួនចេញពីប្រទេសវៀតណាម មកសុំសិទ្ធិជ្រកកោននយោបាយ នៅប្រទេសថៃ និងត្រូវឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន យូ.អិន.អេច្ឆ.ស៊ី.អ (UNHCR) ប្រចាំប្រទេសថៃបានទទួលឋានៈជាជនភៀសខ្លួនរួចទៅហើយដែរ ។

សំឡេង៖

ទាក់ទិន នឹងប្រតិបត្តិការចាប់ខ្លួនអ្នករស់នៅខុសច្បាប់ក្នុងប្រទេសថៃនេះដែរ លោក លី ឈួន បានបញ្ជាក់ថា មិនមានប៉ះពាល់ដល់ក្រុមជនភៀសខ្លួនខ្មែរក្រោម ឬត្រូវសមត្ថកិច្ចថៃចាប់ខ្លួនឡើយ ។ លោកថា ដោយមានការជូនដំណឹងជាមុន ពី យូ.អិន.អេច្ឆ.ស៊ី.អ ដល់ពលរដ្ឋខ្មែរក្រោម ដែលជាជនភៀសខ្លួន ឲ្យប្រុងប្រយ័ត្ន និងស្វែងរកទីជំរកសុវត្ថិភាព ដើម្បីគេចចេញពីការតាមចាប់របស់ប៉ូលីសថៃ ។

សំឡេង៖

យ៉ាងនេះក្តី ជនភៀសខ្លួនខ្មែរក្រោម នៅប្រទេសថៃ នៅតែសម្ដែងក្ដីបារម្ភខ្លាចអាជ្ញាធរថៃចាប់បញ្ជូនខ្លួនទៅឲ្យរដ្ឋាភិបាលខ្មែរ និងរដ្ឋាភិបាលវៀតណាមវិញ បើទោះជាបីជាពួកគេទទួលបានឋានៈជាជនភៀសខ្លួនក៏ដោយ ។ ការព្រួយបារម្ភពីសុវត្ថិភាពផ្ទាល់ខ្លួន ព្រោះបារម្ភខ្លាចអាជ្ញាធរថៃ អាច នឹងចាប់ខ្លួនពួកគេនៅថ្ងៃណាមួយ និងបញ្ជូនត្រឡប់ទៅស្រុកវិញ ខណៈដែលពួកគេ បានរត់គេចចេញពីការធ្វើទុក្ខបុកម្នេញ ពីសំណាក់រដ្ឋាភិបាលវៀតណាម នៅដែនដីកម្ពុជាក្រោម ។ ជនភៀសខ្លួនខ្មែរក្រោមទាំងនោះ លើកឡើងស្រដៀងគ្នាថា មូលហេតុដែលនាំឲ្យពួកគេភៀសខ្លួនចេញពីដែនដីកម្ពុជាក្រោម ក៏ព្រោះតែអាជ្ញាធរវៀតណាម តាមធ្វើទុក្ខបុកម្នេញលើពួកគេ ទាក់ទង នឹងរឿងទាមទារសេរីភាព និងរឿងនយោបាយ ជាដើម ។

ពាក់ព័ន្ធ នឹងការចាប់ខ្លួនជាជនជាតិដើមភាគតិចម៉ុងតាញ៉ា និងជនជាតិភាគតិចហឺម៉ុង ឬចារ៉ាយ នេះដែរ អង្គការសិទ្ធិមនុស្ស យូមែនរ៉ៃស៍ វ៉ច្ឆ (Human Rights Watch) ទាមទារឲ្យសមត្ថកិច្ចថៃដោះលែងក្រុមជនភៀសខ្លួនទាំងនោះជាបន្ទាន់ ។

នាយកអង្គការសិទ្ធិមនុស្ស យូមែនរ៉ៃស៍ វ៉ច្ឆ (Human Rights Watch) ប្រចាំតំបន់អាស៊ី លោក ប្រែដ អាដាម (Brad Adams) បានបញ្ជាក់នៅក្នុងសេចក្តីថ្លែងរបស់អង្គការនេះ កាលពីថ្ងៃទី ៣០ ខែសីហា ថា ជនជាតិដើមភាគតិចម៉ុងតាញ៉ាទាំងនោះ ភាគច្រើនបានទទួលឋានៈជាជនភៀសខ្លួនរបស់អង្គការសហប្រជាជាតិរួចទៅហើយ ប៉ុន្តែ ពួកគេត្រូវបានសមត្ថកិច្ចថៃបានចាប់ខ្លួន កាលពីថ្ងៃទី ២៨ ខែសីហាកន្លងទៅនេះ នៅក្នុងខេត្តនន្ទបុរី ក្បែរក្រុងបាងកក ប្រទេសថៃ ។

លោក Brad Adams ឲ្យដឹងថា ក្រុមម៉ុងតាញ៉ា និងជនជាតិភាគតិចចារ៉ាយទាំងនោះ នឹងត្រូវទទួលទោសធ្ងន់ធ្ងរ ប្រសិនបើអាជ្ញាធរថៃបញ្ជូនពួកគេត្រឡប់ទៅប្រទេសវៀតណាម និងប្រទេសកម្ពុជាវិញ ។

លោកបន្តថា អាជ្ញាធរថៃ មិនគួរបញ្ជូនពួកគេត្រឡប់ទៅប្រទេសកំណើតរបស់ពួកគេវិញនោះទេ ទោះស្ថិតក្នុងកាលៈទេសៈណាក៏ដោយ ។
ក្រុមជនជាតិដើមភាគតិចម៉ុងតាញ៉ា ទាំងនោះភាគច្រើនបានរត់គេចខ្លួនពីប្រទេសវៀតណាម ទៅកាន់ប្រទេសកម្ពុជា និងប្រទេសថៃ ដើម្បីគេចចេញពីការធ្វើទុក្ខបុកម្នេញខាងផ្នែកសាសនា និងនយោបាយនៅក្នុងប្រទេសវៀតណាម ៕