ដោយ ស៊ឺន ចែងចើន| VOKK
នៅវេលាម៉ោង ១០ យប់ ម៉ោងនៅរដ្ឋ California សហរដ្ឋអាមេរិក ថ្ងៃទី ១៨ ខែឧសភា ត្រូវនឹងម៉ោង ១២ ថ្ងៃត្រង់ ម៉ោងនៅដែនដីកម្ពុជាក្រោម ថ្ងៃទី ១៩ ខែឧសភា នេះ គណៈកម្មការនាយក នៃសហព័ន្ធខ្មែរកម្ពុជាក្រោម រួមមាន លោក ចៅ សេរី ជាអនុប្រធានប្រតិបត្តិ ព្រះតេជព្រះគុណ សឺង យ៉ឹង រតនា ជាប្រធាននាយកដ្ឋានព័ត៌មាន និង បណ្ឌិត Cooper ជាទីប្រឹក្សា បានធ្វើដំណើរចេញពីសហរដ្ឋអាមេរិក ទៅប្រទេសអូស្ត្រាលី ដើម្បីជួបមន្ត្រីក្រសួងការបរទេសអូស្ត្រាលី នៅទីក្រុង កង់ប៊ើរ៉ា ដើម្បីជម្រាបអំពីបញ្ហាសិទ្ធិមនុស្សនៅដែនដីកម្ពុជាក្រោម ។
មុនពេលឡើងយន្តហោះនៅព្រលានយន្តហោះអន្តរជាតិ San Francisco លោក ចៅ សេរី ជាអនុប្រធានប្រតិបត្តិ នៃសហព័ន្ធខ្មែរកម្ពុជាក្រោម បានផ្ដល់បទសម្ភាសប្រាប់អំពីមូលហេតុនៃដំណើរនេះថា សហព័ន្ធខ្មែរកម្ពុជាក្រោមនឹងយកឯកសារប្រវត្តិសិទ្ធិ មនុស្សខ្មែរក្រោមទៅជម្រាបដល់មន្ត្រីប្រទេសអូស្ត្រាលី មុនពេលរដ្ឋាភិបាលអូស្ត្រាលីធ្វើសវនាការអំពីបញ្ហាសិទ្ធិមនុស្សជាមួយនឹងរដ្ឋាភិបាលវៀតណាម នៅពេលឆាប់ៗខាងមុខនេះ ។ ប្រទេសវៀតណាមបានទទួលជំនួយពីប្រទេសអូស្ត្រាលីយ៉ាងច្រើនដោយបានសន្យាថា នឹងធ្វើឲ្យប្រសើរឡើងនូវប្រវត្តិសិទ្ធិមនុស្សរបស់ខ្លួន ។
លោក ចៅ សេរី បានមានប្រសាសន៍ថា៖
(សំឡេង)
ព្រះតេជព្រះគុណ សឺង យ៉ឹង រតនា ជាប្រធាននាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម បានមានថេរដីកាប្រាប់អំពីឯកសារបញ្ហាសិទ្ធិមនុស្សខ្មែរក្រោមដែលសហព័ន្ធខ្មែរកម្ពុជាក្រោម យកទៅជម្រាបមន្ត្រីអូស្ត្រាលីនោះ រួមមានបញ្ហា រដ្ឋាភិបាលយួនមិនព្រមទទួលស្គាល់ខ្មែរក្រោមថា ជាជនជាតិដើម ហើយនៅតែចាត់ទុកខ្មែរក្រោមថា ជាជនជាតិភាគតិច បញ្ហាសាលាអន្តេវាសិកដ្ឋានសម្រាប់ជនជាតិខ្មែរ រៀនតែភាសាយួនដោយកូនសិស្សខ្មែររៀនភាសាខ្មែរបានតែ ៣ ម៉ោងក្នុងមួយសប្ដាហ៍ បញ្ហាយួនកម្ទេចខ្លោងទ្វារដែលមានរចនាបទ្មខ្មែរចូលទីរួមខេត្តព្រះត្រពាំង បញ្ហារដ្ឋាភិបាលយួនចាប់ព្រះតេជព្រះគុណ ថាច់ ធឿន និង លីវ នី នៃវត្តសិរីតាសេក ផ្សឹកនិងដាក់គុក បញ្ហាយួនយកដីវត្តមុនីរង្សីមេពាំង បញ្ហាខ្មែរក្រោមនៅខេត្តឃ្លាំង និង ពលលាវ កើតជំងឺខ្វាក់ភ្នែករាប់ម៉ឺននាក់ដោយមិនមានមូលហេតុ បញ្ហារដ្ឋាភិបាលយួនរើសអើងលើពលរដ្ឋខ្មែរក្រោមដោយមិនបានផ្ដល់ឱកាសឲ្យនិស្សិតខ្មែរក្រោមបានចេញទៅបន្តការសិក្សានៅក្រៅប្រទេស ខណៈដែលនិស្សិតជនជាតិយួនរាប់ម៉ឺននាក់កំពុងតែសិក្សានៅក្រៅប្រទេស និងបញ្ហាគាបសង្កត់លើ ព្រះសង្ឃខ្មែរក្រោមដែលមានបំណងចង់បង្កើតសមាគមក្រៅរដ្ឋាភិបាលជាដើម ។
ព្រះតេជព្រះគុណ សឺង យ៉ឹង រតនា បានមានពុទ្ធដីកាថា៖
(សំឡេង)
