ដោយ ស៊ឺន ចែងចើន l VOKK
កាលពីថ្ងៃទី ២២ ខែ មករា កន្លងទៅថ្មីៗ នេះ លោក ប្រាក់ សេរីវុឌ្ឍ ជាប្រធានប្រតិបត្តិ នៃសហព័ន្ធខ្មែរកម្ពុជាក្រោម បានដឹកនាំគណៈប្រតិភូសហព័ន្ធខ្មែរកម្ពុជាក្រោម ចូលជួបមន្ត្រីក្រសួង ការបរទេសសហរដ្ឋអាមេរិក និងមន្ត្រីគណៈកម្មការសាសនាអន្តរជាតិ នៃសហរដ្ឋអាមេរិក នៅរដ្ឋធានីវាស៊ីនតោន ឌីស៊ី សហរដ្ឋអាមេរិក ដើម្បីជំរាបអំពីស្ថានភាពសិទ្ធិមនុស្ស នៅកម្ពុជាក្រោម ។ នៅក្នុងកិច្ចប្រជុំនេះ សហព័ន្ធខ្មែរកម្ពុជាក្រោម បានជម្រាបជូននូវរបាយការណ៍សំខាន់ៗ ដែលទាក់ទិន នឹងរដ្ឋាភិបាលយួនកំពុងធ្វើទុក្ខបុកម្នេញ និងរំលោភយកដីវត្ត នៅខេត្តមាត់ជ្រូកជាដើម ជូនដល់មន្ត្រីក្រសួងការបរទេស សហរដ្ឋអាមេរិក ឱ្យជួយធ្វើអន្តរាគមន៍ និងដាក់គំនាបទៅ រដ្ឋាភិបាលយួន ឱ្យគោរពសិទ្ធិមនុស្សខ្មែរក្រោម និងសេរីភាពជំនឿសាសនា របស់ប្រជាពលរដ្ឋខ្មែរក្រោម ដែលជាម្ចាស់ស្រុកជនជាតិដើម ។
គណៈប្រតិភូសហព័ន្ធខ្មែរកម្ពុជាក្រោម រួមមាន លោក ប្រាក់ សេរីវុឌ្ឍ ជាប្រធានប្រតិបត្តិសហព័ន្ធខ្មែរកម្ពុជាក្រោម បណ្ឌិត ចូស្សួ ខូបភឺ (Joshua Cooper) ជានាយកវិទ្យាស្ថានសិទ្ធិមនុស្ស រដ្ឋហាវ៉ៃ និង ជាទីប្រឹក្សាសហព័ន្ធខ្មែរកម្ពុជាក្រោម ព្រះតេជព្រះគុណ ធីធី ធម្មោ ប្រធានគណៈកម្មការសាសនា អន្តរជាតិ នៃសហព័ន្ធខ្មែរកម្ពុជាក្រោម និង លោក វ៉ាង យឿង មន្ត្រី ទំនាក់ទំនងសាធារណៈ នៃសហព័ន្ធខ្មែរកម្ពុជាក្រោម ។
បន្ទាប់ពីការជួបធ្វើសវនាការជាមួយ នឹងមន្ត្រីក្រសួងការបរទេសរួចមក ។ គណៈប្រតិភូសហព័ន្ធខ្មែរកម្ពុជាក្រោម ក៏បានអញ្ជើញទៅជួបមន្ត្រីនាយកដ្ឋានរដ្ឋាបាលនៃសហរដ្ឋអាមេរិកមួយចំនួនទៀត មានគណៈកម្មាធិការសិទ្ធិមនុស្សជាដើម និងនៅថ្ងៃជាបន្តបន្ទាប់ គណៈប្រតិភូសហព័ន្ធខ្មែរកម្ពុជាក្រោម ក៏ នឹងចូលទៅការិយាល័យវិទ្យុអាស៊ីសេរី (RFA) និងការិយាល័យវិទ្យុសំឡេងសហរដ្ឋអាមេរិក (VOA) ដើម្បីរាយការណ៍អំពីលទ្ធផលនៃការជួបមន្ត្រីសិទ្ធិមនុស្សអន្តរជាតិ និងផ្សព្វផ្សាយទិសដៅផែនការរបស់សហព័ន្ធខ្មែរកម្ពុជាក្រោមផងដែរ ។
សូមជំរាបថា សហព័ន្ធខ្មែរកម្ពុជាក្រោម បានចូលរួមប្រជុំវេទិកាអចិន្ត្រៃយ៍អង្គការសហប្រជាជាតិ ផ្នែកជនជាតិដើម នៅបូរីញូវយ៉ក ជារៀងរាល់ឆ្នាំ និងជាសមាជិកពេញសិទ្ធិរបស់អង្គការ UNPO និងជាសមាជិកអង្គការសហប្រជាជាតិផ្នែកព័ត៌មានសាធារណៈ (UNPDI) ព្រមទាំងសមាជិក គណបក្សចម្រុះជាតិសាសន៍ (TRP) នៅទ្វីបអឺរ៉ុបជាដើម ។ សហព័ន្ធខ្មែរកម្ពុជាក្រោម ធ្វើចលនា តស៊ូដោយផ្អែកលើគោលការណ៍អហិង្សា ដើម្បីទាមទារឲ្យរដ្ឋាភិបាលបក្សកុម្មុយនិស្តវៀតណាម គោរពសិទ្ធិពលរដ្ឋខ្មែរក្រោមជាជនជាតិដើម នៃដែនដីកម្ពុជាក្រោម ៕
