ដោយ យន់ សាមៀន I RFA
ស្របពេលដែលពលរដ្ឋខ្មែរនៅកម្ពុជា ត្រៀមប្រារព្ធពិធីបុណ្យចូលឆ្នាំថ្មីប្រពៃណីជាតិនៅសប្ដាហ៍នេះ ពលរដ្ឋខ្មែរកម្ពុជាក្រោមដែលកំពុងរស់នៅក្រោមការត្រួតត្រារបស់វៀតណាម ក៏ត្រៀមខ្លួនរួចជាស្រេច ដើម្បីទទួលទេវតាថ្មី និងចូលរួមពិធីបុណ្យចូលឆ្នាំថ្មីដែរ ។ ពលរដ្ឋខ្មែរក្រោមអះអាងថា ក្ដីប្រាថ្នារបស់ពួកគេសម្រាប់ឆ្នាំថ្មី គឺពួកគេចង់បានសិទ្ធិពេញលេញជាជនជាតិដើម នៅលើទឹកដីកម្ពុជាក្រោម ។
មិនខុសគ្នាទៅ នឹងពលរដ្ឋខ្មែរនៅកម្ពុជាទេ ថ្វីត្បិតតែពលរដ្ឋខ្មែរក្រោមកំពុងរងការគាបសង្កត់ផ្នែកសិទ្ធិមនុស្ស និងសាសនាពីសំណាក់រដ្ឋាភិបាលវៀតណាមក៏ដោយ ក៏ពលរដ្ឋខ្មែរក្រោមខំប្រឹងប្រែងថៃរក្សាវប្បធម៌ និងប្រពៃណីខ្មែរមិនឱ្យបាត់បង់នោះទេ ។ ខ្មែរកម្ពុជាក្រោមបានរៀបចំវត្ត ផ្ទះសម្បែង និងរៀបចំខ្លួន ដើម្បីទទួលទេវតាថ្មី និងចូលរួមពិធីបុណ្យចូលឆ្នាំថ្មីឆ្នាំកុរ ឆ្នាំ ២០១៩ ដែលនឹងចូលមកដល់ ចាប់ពីថ្ងៃអាទិត្យ ១០ កើត ដល់ថ្ងៃអង្គារ ១២ កើត ដែលត្រូវនឹងថ្ងៃទី ១៤ ដល់ថ្ងៃទី ១៦ មេសា ។
ព្រះតេជព្រះគុណ សឺង យ៉ឹងរតនា ជាព្រះចៅអធិការវត្តខេមររង្សីនៅទីក្រុងសាន់ហូស្សេ រដ្ឋកាលីហ្វ័រញ៉ា (California) និងជាមន្ត្រីជាន់ខ្ពស់នៃសហព័ន្ធខ្មែរកម្ពុជាក្រោមមានថេរដីកាថា ខ្មែរកម្ពុជាក្រោមប្រារព្ធពិធីចូលឆ្នាំថ្មី នៅលើកទឹកដីខ្មែរកម្ពុជាក្រោម ដូចទៅ នឹងពលរដ្ឋខ្មែរនៅកម្ពុជាដែរ ទោះបីពួកគេឋិតនៅក្រោមការតាមដានរបស់រដ្ឋាភិបាលវៀតណាមគ្រប់ជំហានក៏ដោយ ។
ពលរដ្ឋខ្មែរកម្ពុជាក្រោមមួយចំនួនបានប្រាប់អាស៊ីសេរីថា ក្ដីប្រាថ្នាសម្រាប់ឆ្នាំថ្មីរបស់ពួកគេ គឺសិទ្ធិសេរីភាព មិនមែនមាសប្រាក់លុយកាត់ឡើយ ។ ពួកគេថា ថ្មីត្បិតតែវៀតណាមមិនហាមឃាត់ខ្មែរក្រោមមិនឱ្យបារម្ភពិធីចូលឆ្នាំថ្មីក៏ដោយ ប៉ុន្តែរដ្ឋាភិបាលកុម្មុយនិស្តមួយនេះ ក៏មិនជួយសម្រួលដល់ខ្មែរកម្ពុជាក្រោម ដើម្បីឱ្យពួកគេមានឱកាសចូលពិធីបុណ្យចូលឆ្នាំថ្មីឱ្យបានពេលលេញដែរ ។ វៀតណាមមិនបានផ្ដល់ឱកាសឈប់សម្រាកដល់ពលរដ្ឋខ្មែរក្រោមក្នុងរយៈពេលបីថ្ងៃនៃថ្ងៃបុណ្យចូលឆ្នាំថ្មីទេ ។ ចំណែកឯសាលារៀនដែលមានកូនខ្មែរចូលរៀន ក៏មិនឈប់សម្រាកដែរ ។
ពលរដ្ឋខ្មែរកម្ពុជាក្រោមម្នាក់សុំមិនបញ្ចេញឈ្មោះ ដើម្បីសុវត្ថភាពប្រាប់អាស៊ីសេរីថា លោកបានត្រៀមខ្លួន និងបានជួយរៀបចំទីវត្តអារាម និងបង្កើតកម្មវិធីកម្សាន្តល្បែងប្រជាប្រិយ សិល្បៈច្រៀងកំដរដើម្បីទទួលទេវតាថ្មី ។ ក្រៅតែចូលរួមរៀបចំវត្ត លោកក៏បានសំអាតផ្ទះសម្បែងទទួលឆ្នាំថ្មីដែរ ។ ទោះបីជាយ៉ាងណាក្ដី លោកសោកស្ដាយដែលពលរដ្ឋខ្មែរក្រោមផ្សេងទៀត ដែលធ្វើការងារនៅទីឆ្ងាយមិនបានចូលរួមពិធីចូលឆ្នាំនឹងគេ៖ «អ្វីដែលមិនសប្បាយនោះ គឺយើងនឹកឃើញថា បងប្អូនដែលមិនបានមកស្រុកវិញ ដែលជាប់ធ្វើការងារនៅនៅក្រុមហ៊ុននៅព្រៃនគរមិនបានចូលរួមជាមួយយើង។ ហេតុអីគេមិនឱ្យយើងមកសម្រាកមួយថ្ងៃពីរថ្ងៃ ឬបីថ្ងៃ?» ។
លោកបន្តលោកសូមឧទ្ទិសកុសលផលបុណ្យ ដែលលោកបានកសាងទាំងប៉ុន្មានកន្លងមកឱ្យខ្មែរកម្ពុជាក្រោម ទទួលបានសិទ្ធិសេរីពេលទីជាជនជាតិដើមកំណើត៖ «ខ្លួនខ្ញុំគ្មានប្រាថ្នាអ្វីច្រើននោះទេមានតែសូមសេរីភាពឱ្យបងប្អូនយើងទាំងអស់» ។
ពលរដ្ឋខ្មែរកម្ពុជាក្រោមម្នាក់ទៀតរស់នៅខេត្តឃ្លាំង ប្រាប់អាស៊ីសេរីថា លោកបានរៀបចំកម្មវីធីសប្បាយៗ ជាច្រើន ដើម្បីលេងកម្សាន្តក្នុងឱកាសចូលឆ្នាំថ្មី ។ លោកបន្តថា សម្រាប់ខេត្តឃ្លាំង ខ្មែរកម្ពុជាក្រោមបានលេងល្បែងប្លែកពីនៅកម្ពុជា៖ «នៅក្នុងវត្តដើម្បីរៀបចំទទួលទេវតាឆ្នាំថ្មីចូលមកថែរក្សានៅឆ្នាំកុរហ្នឹង យើងនឹងមានកម្មវិធីពួនភ្នំខ្សាច់ ដើម្បីបានបុណ្យកុសលជូនឪពុកម្ដាយគេ» ។
លោកសង្ឃឹមថា ទេវតាឆ្នាំថ្មីដែលមកផ្លាស់ទេវតាឆ្នាំចាស់ នឹងនាំមកសេរីភាពជូនខ្មែរកម្ពុជាក្រោម ដែលកំពុងរស់នៅបែបវេទនា គ្មានសិទ្ធិសេរីភាពសម្រេចវាសនាខ្លួនឯង៖ «អ្វីដែលខ្ញុំចង់បានធំបំផុតនោះ គឺសូមប្រាថ្នាសូមលោកខ្មែរកម្ពុជាក្រោម ដែលរស់នៅក្រោមអាណានិគមរបស់យួន សូមឱ្យពួកគាត់មានសិទ្ធិសេរីភាព»។
បារាំងបានកាត់ទឹកដីខ្មែរកម្ពុជាក្រោមទៅឱ្យប្រទេសវៀតណាមគ្រប់គ្រងទាំងខុសច្បាប់ និងគ្មានការយល់ព្រមពីពលរដ្ឋខ្មែរកម្ពុជាក្រោមកាលពីទី៤ ខែមិថុនា ឆ្នាំ១៩៤៩។ គិតត្រឹមខែមិថុនា ឆ្នាំ២០១៩ ខាងមុខនេះ មានរយៈពេល ៧០ឆ្នាំហើយ។ នាយករដ្ឋមន្ត្រីវៀតណាម លោក (Nguyen Xuan Phuc) កាលពីថ្ងៃពីដើមខែមេសា បានចេញលិខិតមួយជូនពរថ្មីដល់ពលរដ្ឋខ្មែរក្រោម ប៉ុន្តែលោកមិនបានទទួលស្គាល់ខ្មែរកម្ពុជាក្រោមជាជនជាតិដើមកំណើតនោះ។ លោកចាត់ទុកខ្មែរកម្ពុជាក្រោមជាជនជាតិភាគតិចរស់នៅលើទឹកដីវៀតណាមទៅវិញ។ ក្នុងលិខិតដដែលនោះ លោក ហ្វៀង ស៊ិនផុក (Nguyen Xuan Phuc) បានស្នើឱ្យខ្មែរកម្ពុជាក្រោមចូលរួមអនុវត្តបំណងរបស់អតីតមេដឹកនាំវៀតណាមលោក ហូ ជីមិញ (HoChi Minh) ដើម្បីឱ្យវៀតណាមរីកចម្រើនទៅមុខ ប៉ុន្តែលោកមិនបានអនុញ្ញាតឱ្យខ្មែរកម្ពុជាក្រោមបានឈប់សម្រាកនោះទេ។
ព្រះតេជព្រះគុណ សឺង យ៉ឹង រតនា ជាព្រះចៅអធិការវត្តខេមររង្សីមានសង្ឃដីកាថាលិខិតរបស់នាយករដ្ឋមន្ត្រីវៀតណាមមិនបានផ្ដល់ផលប្រយោជន៍ឱ្យខ្មែរកម្ពុជាក្រោមនោះប៉ុន្តែលិខិតគ្រាន់ការលួងលោមចិត្តខ្មែរកម្ពុជាក្រោមតែប៉ុណ្ណោះ៖ «យើងចង់បានក្នុងឱកាសបុណ្យប្រពៃណីជាតិរបស់ខ្លួនយើងបានឈប់សម្រាកដើម្បីបានកម្មករ ឬអ្នកទៅធ្វើការងារនៅទីក្រុងមកស្រុកជួបជុំគ្នាទៅវត្ត ឬជួបជុំឪពុកម្ដាយ។ អាត្មាភាពនៅតែទទូច ចង់បានថានៅក្នុងឱកាសបុណ្យចូលឆ្នាំថ្មីរដ្ឋអំណាចយួន ត្រូវតែឱ្យពលរដ្ឋខ្មែរក្រោមឈប់សម្រាក»។
ព្រះអង្គបន្តថាសហព័ន្ធនៅតែបន្តទទូចឱ្យរដ្ឋាភិបាលវៀតណាមអនុញ្ញាតឱ្យខ្មែរកម្ពុជាក្រោមបានឈប់សម្រាកក្នុងពិធីចូលឆ្នាំថ្មីដើម្បីជួបជុំបងប្អូន។ ព្រះតេជព្រះគុណ សឺង យ៉ឹង រតនា ឱ្យដឹងទៀតថា តាមស្ថិតិរបស់សហព័ន្ធនៅកម្ពុជាក្រោមមានវត្ត ៤៦១ វត្ត មានព្រះសង្ឃជាងប្រាំបួនពាន់អង្គ និងពលរដ្ឋខ្មែរកម្ពុជាប្រមាណជាង ៧ លាននាក់ ។ បច្ចុប្បន្នសហព័ន្ធខ្មែរកម្ពុជាក្រោមកំពុងធ្វើចលនានៅលើឆាកអន្តរជាតិ ដើម្បីទាមទារឱ្យរដ្ឋាភិបាលវៀតណាមទទួលខ្មែរកម្ពុជាក្រោមជាជនជាតិដើម និងមានសិទ្ធិស្វ័យសម្រេចចិត្តខ្លួនឯងទៅថ្ងៃអនាគត ។ សហព័ន្ធខ្មែរកម្ពុជាក្រោមគ្រោងនឹងប្រារព្ធទិវាប្រវត្តិសាស្ត្រថ្ងៃបាត់បង់ទឹកខ្មែរកម្ពុជាក្រោមរយៈពេលឆ្នាំ ៧០ ឆ្នាំនៅក្នុងអគារតុលាការព្រហ្មទណ្ឌអន្តរជាតិនៅទីក្រុងឡាអេ (La Hague) ប្រទេស ហូឡង់ នៅថ្ងៃសៅរ៍ទី ១ មិថុនាខាងមុខនេះ ៕
