ដោយ ស៊ឺន ចែងចើន l សារព័ត៌មាន ព្រៃនគរ
លេខាធិការដ្ឋានអង្គការសមាគមខ្មែរកម្ពុជាក្រោម ប្រចាំព្រះរាជាណាចក្រកម្ពុជា នៅព្រឹកថ្ងៃអាទិត្យទី ៦ មីនា ម្សិលមិញនេះ បានប្រារព្វពិធីអបអរសាទរទិវានារីអន្តរជាតិ ៨ មីនា ដែលមានទីតាំង ស្ថិតនៅវត្តសាមគ្គីរង្សី ភូមិទ្រា ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដោយមានការចូលរួមពីព្រះសង្ឃ និងប្រជាពលរដ្ឋខ្មែរក្រោមប្រមាណជាង ១០០ នាក់ ។
ពិធីរំឭកខួបទី ១០៥ ឆ្នាំ នៃទិវានារីអន្តរជាតិ ដែលរៀបចំដោយលេខាធិការដ្ឋានអង្គការសមាគមខ្មែរកម្ពុជាក្រោម គឺផ្តោតសំខាន់ទៅលើការផ្សព្វផ្សាយដល់មនុស្សគ្រប់រូប ទាំងបុរស ទាំងស្ដ្រី ដើម្បីជួយឲ្យស្ដ្រីមានភាពយុត្តិធម៌ក្នុងការទទួលសិទ្ធិ និងការកាត់បន្ថយ ទប់ស្កាត់ លុបបំបាត់ចោលនូវបញ្ហាទាំងឡាយ ដែលកើតមានចំពោះស្ដ្រីភេទ ភាពស្មើគ្នារវាងបុរស និងស្ដ្រី ។ ជាពិសេសជំរុញឲ្យស្ត្រីខ្មែរក្រោម កំពុងរស់នៅឯដែនដីកម្ពុជាក្រោម យល់ដឹងកាន់តែច្បាស់ អំពីសិទ្ធិរបស់ខ្លួន ។
នៅក្នុងសុន្ទរកថា ដែលអានដោយ អ្នកស្រី គៀង ធីប៉ា តំណាងឲ្យអង្គការស្ត្រីខ្មែរកម្ពុជាក្រោម ប្រចាំប្រទេសកម្ពុជា បានលើកបង្ហាញនូវបញ្ហាប្រឈមមួយចំនួន ដែលកើតមានចំពោះស្ត្រីខ្មែរក្រោម កំពុងរស់នៅដែនដីកំណើតរបស់ខ្លួន តាំងពីអតីតៈរហូតដល់បច្ចុប្បន្នកាលនេះ ។
តាមរបាយការណ៍បង្ហាញថា ព្រឹត្តិការណ៍រំលោភសិទ្ធិស្ត្រីខ្មែក្រោមយ៉ាងធ្ងន់ធ្ងរ ពីសំណាក់អាជ្ញាធរវៀតណាម មានដូចជា ការចាប់ឃុំឃាំង ធ្វើទារុណកម្ម និងសម្លាប់ជាដើម ។
របាយការណ៍ដដែល បានលើកយកបង្ហាញនូវព្រឹត្តិការណ៍ថ្មីៗ មួយចំនួន ដែលកើតមានចំពោះស្ត្រីខ្មែរក្រោម ។ ដូចករណី កាលពីថ្ងៃទី ២៤ ខែកុម្ភៈ ឆ្នាំ ២០០៨ ស្ដ្រីខ្មែរក្រោម នៅស្រុកក្របៅ ខេត្តមាត់ជ្រូក ត្រូវបានរដ្ឋអំណាចកុម្មុយនីស្ដវៀតណាម វាយធ្វើបាបដោយប្រើដំបងឆក់ឲ្យរងរបួស ២៩ នាក់ យ៉ាងអាណោចអធ័ម ក្នុងនោះមានស្ត្រីខ្មែរក្រោមយ៉ាងតិចពីរនាក់ គឺអ្នកស្រី នាង យ៉េន និងអ្នកស្រី នាង យ៉ន ជាប់ពន្ធនាគារក្នុងឆ្នាំ ២០០៩ ដោយរងការចោទពីបទធ្វើឲ្យប៉ះពាល់សណ្តាប់ធ្នាប់សង្គម។
ព្រឹត្តិការណ៍ដ៏ល្វីងជូរចត់មួយទៀត គឺការគម្រាមចាប់ចងដាក់គុកច្រវ៉ាក់ កើតមានឡើងកាលចុងឆ្នាំ ២០០៧ ទៅលើរូបអ្នកស្រី លី ធីហឿង ដោយមូលហេតុអ្នកស្រីតវ៉ាសុំយកមកវិញនូវដីស្រែ ដែលរដ្ឋអំណាចកុម្មុយនីស្ដវៀតណាម រឹបអូសយកឲ្យជនជាតិវៀតណាមគ្នាគេ ។ កាលពីថ្ងៃទី ២២ ខែមេសា ឆ្នាំ ២០១០ អ្នកស្រី ត្រឹង ធីចូវ នៅភូមិផ្នោលើ ឃុំដំបូកបី ស្រុកផ្នោដាច់ ខេត្តព្រះត្រពាំង ត្រូវបានអាជ្ញាធរវៀតណាមចាប់ដាក់ពន្ធនាគារ រហូតមកដល់ពេលនេះមិនទាន់បានដោះលែងនៅឡើយទេ ។ ពិសេសថ្មីៗ នេះ នៅថ្ងៃទី ២៥ ខែកញ្ញា ឆ្នាំ ២០១៣ ស្ដ្រីខ្មែរក្រោម ៣ នាក់ នៅខេត្តឃ្លាំង ត្រូវបានតុលាការវៀតណាមខេត្តឃ្លាំង កាត់ទោសឲ្យជាប់ពន្ធនាគារពី ១០ ខែទៅ ១ ឆ្នាំ ដោយចោទ ពីបទបង្ករអសន្តិសុខក្នុងសង្គម ដោយគ្រាន់តែស្ដ្រីទាំង ៣ នាក់នោះ ចូលរួមទូងស្គរក្នុងវត្តព្រៃជាប់ ក្នុងស្រុកជ្រោយញរ ខេត្តឃ្លាំង ដើម្បីប្រឆាំង នឹងអាជ្ញាធរវៀតណាម ចាប់ផ្សឹកព្រះតេជគុណ លី ចិន្តា ។ ស្ដ្រីខ្មែរក្រោមទាំង ៣ រូបនោះគឺ៖ ១. អ្នកស្រី លី ធីសាប៊ុត, ២. អ្នកស្រី លី ធីយ៉ុន, ៣. អ្នកស្រី ឡឹម ធីឡង។
តាមរបាយការណ៍ បានបញ្ជាក់ទៀតថា ស្ដ្រីខ្មែរនៅកម្ពុជាក្រោម គ្មានសាលារៀនជាភាសាខ្មែរទេ ដូច្នេះ ស្ដ្រីខ្មែរនៅកម្ពុជាក្រោម ៩៥% មិនចេះអក្សរខ្មែរឡើយ ការមិនចេះអក្សរនោះ ប្រៀបដូចជា មនុស្ស ពិការភ្នែកទាំងសង្ខាង ។
ចុងបញ្ចប់នៃសុន្ទរកថា នៅក្នុងឱកាសទិវានារីអន្តរជាតិ អ្នកស្រី គៀង ធីប៉ា បានធ្វើការអំពាវនាវ ដល់អង្គការសហប្រជាជាតិ និងអង្គការអន្តរជាតិ ព្រមទាំងអ្នកសារព័ត៌មាននានា ទូទាំងសកលលោក ជួយដល់ស្ដ្រីខ្មែរក្រោម ដែលកំពុងប្រឈមមុខ នឹងគ្រោះថ្នាក់ដ៏ធ្ងន់ធ្ងរនេះ ឲ្យមានសិទ្ធិសេរីភាព ដូចស្ដ្រីទាំងឡាយ នៅលើពិភពលោកនេះ ។
សូមបញ្ជាក់ថា ទិវានារីអន្តរជាតិ ឬទិវាអង្គការសហប្រជាជាតិ ដើម្បីសិទ្ធិស្ត្រី និងសន្តិភាពអន្តរជាតិ ត្រូវបានអង្គការសហប្រជាជាតិ ចាត់ទុកជាថ្ងៃផ្លូវការចាប់ពីឆ្នាំ ១៩៧៧ មក ។ ក្នុងមួយសតវត្សរ៍កន្លងមកនេះ ស្ត្រីបានទទួលនូវសមភាព នៅចំពោះមុខច្បាប់គ្រប់វិស័យនៅក្នុងពិភពលោក តែទោះជាយ៉ាងណាក៏ដោយ ក៏មានស្ត្រីជាច្រើននៅក្នុងប្រទេសនានា ជុំវិញពិភពលោក កំពុងតែប្រឈមនឹងការរំលោភសិទ្ធិមនុស្ស មានការរើសអើង និងរងនូវអំពើហិង្សា ហើយពួកគេកំពុងតែធ្វើការតស៊ូមិនឈប់ឈរ ដើម្បីសិទ្ធិសមភាពរបស់នារីឲ្យស្មើ នឹងបុរស ៕
ខាងក្រោមជារូបថតខ្លះៗ ក្នុងពិធីអបអរសាទរទិវានារីអន្តរជាតិ ៨ មីនា ២០១៦ ៖ រូបថតៈ ស៊ឺន ចែងចើន
