ដោយ ថាច់ ប្រីជា គឿន
យុវជនខ្មែរក្រោមមួយរូបដែលចូលបម្រើនៅក្នុងកងជួរទាហាន នៃរបបកុម្មុយនិស្តយួន ត្រូវស្លាប់ដោយមិនដឹងពីមូលហេតុនៅក្នុងបន្ទាយទាហាន ;ហើយត្រូវក្រុមទាហានយួនយកសាកសពទៅវះជាច្រើនកន្លែង ដោយមិនបានផ្ដល់ដំណឹងជាមុនដល់ក្រុមគ្រួសារសពឡើយ ។ ក្រុមគ្រួសារសព និងអ្នកប្រើបណ្ដាញសង្គម Facebook បានថ្កោលទោសចំពោះទង្វើរបស់ក្រុមទាហានយួន និងទាមទារឲ្យមានការស៊ើបអង្កេត និងបកស្រាយឲ្យបានច្បាស់នូវករណីស្លាប់ដ៏អាថ៌កំបាំងនេះ ។ សាកសពដែលស្លាប់នោះ មានស្នាមជាំនៅលើខ្លួន ដែលក្រុមអ្នកប្រើបណ្ដាញសង្គម Facebook សង្ស័យថា យុវជនរូបនេះ អាចត្រូវគេធ្វើទារុណកម្មរហូតដល់ស្លាប់ ។
លោក វិន ជុង (Huynh Chung) ជាយុវជនខ្មែរក្រោមនៅ ឃុំកំពង់ទូក ស្រុកកំពង់ធំ ខេត្តព្រះត្រពាំង ឬភាសាយួនហៅថា ភូមិ Huong Phu C ឃុំ Da Loc ស្រុក Chau Thanh ខេត្ត Tra Vinh ត្រូវស្លាប់ដោយមិនដឹងពីមូលហេតុនៅថ្ងៃទី ២៩ ខែវិច្ឆិកា ឆ្នាំ ២០១៩ ម្សិលមិញនេះ ។ ក្រោយពេលស្លាប់ និង បន្ទាប់ពីបានវះរួច សាកសពយុវជនខ្មែរក្រោមរូបនេះបានបញ្ជូនសងមកគ្រួសារវិញនៅថ្ងៃដដែល ដោយមានក្រុមទាហាន និង នគរបាលយួនជាច្រើនមកដល់ផ្ទះដើម្បីបំភ្លឺករណីស្លាប់ដោយចម្រូងចម្រាសនេះ ។
យោងតាមវីដេអូមួយឃ្លីបដែលអ្នកស្រុកបានបង្ហោះតាមបណ្ដាញសង្គម Facebook នៅថ្ងៃទី ២៩ ខែវិច្ឆិកា បានបង្ហាញពីក្រុមគ្រួសារសពចោទសួរទៅតំណាងក្រុមនគរបាលយួនថា ហេតុអ្វីសមត្ថកិច្ចហ៊ានយកជនរងគ្រោះទៅវះដោយគ្មានការចុះហត្ថលេខាយល់ព្រមពីម្ដាយឱពុកសព និងថា ហេតុអ្វីសមត្ថកិច្ចមិនផ្ដល់ដំណឹងអំពីការស្លាប់មកដល់ក្រុមគ្រួសារសព ជាដើម ។ តំណាងនគរបាលយួនបានឆ្លើយតបនឹងក្រុមគ្រួសារសពថា គេមិនហ៊ានផ្ដល់ដំណឹងករណីស្លាប់នេះភ្លាមៗដល់ក្រុមគ្រួសារសពទេ ព្រោះខ្លាចនឹងមានការតត់ស្លុត ; ទើបគេផ្ដល់ដំណឹងជាដំបូងថា យុវជន វិញ ជុង ឈឺទៅវិញ ។ តំណាងនគរបាលយួនក៏បានថ្លែងថា គេនឹងពិនិត្យមើលនូវលក្ខខណ្ឌផ្សេងៗក្នុងការផ្ដល់ជាសំណងដល់គ្រួសារសពទៅតាមច្បាប់នៃប្រទេសវៀតណាម ។
ករណីស្លាប់ដ៏អាថ៌កំបាំងរបស់ យុវជនខ្មែរក្រោម វិញ ជុង នេះ ត្រូវបានអ្នកប្រើបណ្ដាញសង្គម Facebook ចែករំលែក (Share) ពីម្នាក់ទៅម្នាក់ និងបានសម្ដែងការមិនពេញចិត្តចំពោះទង្វើរបស់ក្រុមទាហានយួន និងបានថ្ដោលទោសថា នេះជាទង្វើមួយដ៏អយុត្តិធម៌សម្រាប់ខ្មែរក្រោម ។
