ដោយ ស៊ឺន ចែងចើន|VOKK
នៅពេលថ្មីៗ នេះ គណៈប្រតិភូមួយក្រុម ដឹកនាំដោយលោក ជា ចាន់តូ ទេសាភិបាលធនាគារជាតិនៃកម្ពុជា រួមទាំងមន្ត្រីសង្ឃជាន់ខ្ពស់ជាច្រើនអង្គ បានធ្វើដំណើរទស្សនកិច្ចទៅកាន់ខេត្តព្រះត្រពាំង កម្ពុជាក្រោម ។
វត្តមានដ៏កម្រនៃមន្ត្រីរដ្ឋាភិបាលកម្ពុជា ចុះទៅដែនដីកម្ពុជាក្រោម គឺក្នុងគោលបំណង បំពេញបុណ្យកុសល ដោយនាំយកទេយ្យទាន គ្រឿងបរិក្ខា និងគ្រឿងសក្ការៈបូជាមួយចំនួន យកមកថ្វាយប្រគេនព្រះសង្ឃ ដែលគង់ចាំវស្សាចំនួន ៣ វត្ត នៅខេត្តព្រះត្រពាំង មានជាអាទិ៍ វត្តបិដកត្យារាម (ក្នុងស្រុក) វត្តអង្គររាជបូរី (អង្គ) វត្តកំពង់ពោធិព្រឹក្ស (ហៅ វត្តបង្រៃចាស់) ។
ព្រះញាណវង្ស ឃឹម សន ព្រះមេគណរាជធានីភ្នំពេញ និងជាព្រះគ្រូសូត្រស្តាំ វត្តបទុមវតីរាជវរារាម មានថេរដីកាថា ព្រះអង្គ និងមន្ត្រីសង្ឃជាច្រើនអង្គ រួមទាំងគណៈប្រតិភូកម្ពុជា មានលោក ជា ចាន់តូ ទេសាភិបាលធនាគារជាតិនៃកម្ពុជា បានធ្វើដំណើរទៅកាន់ខេត្តព្រះត្រពាំង ទឹកដីកម្ពុជាក្រោម កាលពីថ្ងៃទី ៥ សីហា ២០១៦ ។
ថ្លែងផ្តល់ឱវាទក្នុងពិធីចែកអាហារូបករណ៍ដល់សមណនិស្សិត និងនិស្សិតក្រីក្រប្រចាំឆ្នាំ ២០១៦ នៅក្នុងកុដិលេខ ១៧ វត្តបទុមវតី សង្កាត់ចតុមុខ ខណ្ឌដូនពេញ រាជធានីភ្នំពេញ ដែលរៀបចំដោយសម្ព័ន្ធសមណនិស្សិត-និស្សិតខ្មែរកម្ពុជាក្រោម កាលពីថ្ងៃទី ២១ សីហា កន្លងទៅនេះ ។ ព្រះតេជព្រះគុណ ឃឹម សន បានមានថេរដីកា ដោយចាប់អារម្មណ៍ទៅ នឹងដំណើរទស្សនកិច្ចលើកទីមួយរបស់ព្រះអង្គ នៅដែនដីកម្ពុជាក្រោម ។ តើព្រះមេគណរាជធានីភ្នំពេញ និងជាព្រះគ្រូសូត្រស្តាំនៃវត្តបទុមវតី ចាប់អារម្មណ៍អ្វីខ្លះ ទៅលើពលរដ្ឋខ្មែរក្រោម ដែលជាជនជាតិដើមម្ចាស់ស្រុក នៅលើដែនដីកម្ពុជាក្រោម ដែលខិតខំថែរក្សាសាសនា វប្បធម៌ ប្រពៃណី ទំនៀមទម្លាប់ គង់វង្សរហូតមកដល់ សព្វថ្ងៃនេះ ។ សូមស្តាប់ថេរដីការរបស់ព្រះអង្គ ដែលមានខ្លឹមសារ ដូចតទៅ៖
