ដោយ ស៊ឺន ចែងចើន| VOKK
នៅថ្ងៃអាទិត្យ ទី ៤ ខែមិថុនា ឆ្នាំ ២០១៧ ខាងមុខនេះ សហព័ន្ធខ្មែរកម្ពុជាក្រោម នៅជុំវិញពិភព លោក នឹងប្រារព្ធខួប ៦៨ ឆ្នាំ ថ្ងៃដែលបារាំងបានកាត់ដែនដីកម្ពុជាក្រោមឲ្យទៅវៀតណាមធ្វើអាណា និគមបន្តលើប្រជាជាតិខ្មែរក្រោម ។
ខាងក្រោមនេះ ជាដំណឹងនៃពិធីបុណ្យបាត់បង់ទឹកដីកម្ពុជាក្រោម ដែលនឹងប្រារព្ធដោយសាខា សហព័ន្ធខ្មែរកម្ពុជាក្រោម នៅជុំវិញពិភពលោក ដែលការិយាល័យវិទ្យុសំឡេងកម្ពុជាក្រោមទទួល
បាន នៅថ្ងៃទី ១៧ ខែឧសភា នេះ ។
នៅទីក្រុងប៉ារិស ប្រទេសបារាំង ប្រារព្ធនៅថ្ងៃទី ៤ ខែមិថុនា ឆ្នាំ ២០១៧ នៅវត្តពោធិវង្ស ក្រោមអធិបតីភាព លោក ថាច់ វៀន ជាអធិបតីសហព័ន្ធខ្មែរកម្ពុជាក្រោម, លោក ប្រាក់ សេរីវុឌ្ឍ ជាប្រធានប្រតិបត្តិសហព័ន្ធខ្មែរកម្ពុជាក្រោម និង លោក សឺង សម្រេច ជាទីប្រឹក្សា សហព័ន្ធខ្មែរកម្ពុជាក្រោម ព្រមទាំងសមាជិក សមាជិក សមាជិកា នៃសហព័ន្ធខ្មែរកម្ពុជាក្រោម មកពីប្រទេសនានាក្នុងទ្វីបអឺរ៉ុប ។
លោក ថាច់ វៀន បានមានប្រសាសន៍អំពីពិធីបុណ្យនេះយ៉ាងនេះថា៖
(សំឡេង)
ទោះបីដែនដីកម្ពុជាក្រោម ត្រូវបារាំងកាត់ទៅឲ្យវៀតណាមធ្វើអាណានិគមអស់រយៈពេល ៦៨ ហើយ ក៏ដោយ តែ លោក ថាច់ វៀន បានអំពាវនាវឲ្យសមាជិក នៃសហព័ន្ធខ្មែរកម្ពុជាក្រោម និងពលរដ្ឋខ្មែរ ក្រោមទូទាំងពិភពលោកកុំអស់សង្ឃឹម និងបន្តធ្វើការតស៊ូដោយសន្តិវិធី និងអហិង្សាតទៅមុខទៀត ដើម្បីនាំមកនូវសិទ្ធិសេរីភាព និងសិទ្ធិសម្រចវាសនាខ្លួនដោយខ្លួនឯង ជូនពលរដ្ឋខ្មែរក្រោមនៅដែនដីកម្ពុជាក្រោម សព្វថ្ងៃ ។
លោក ថាច់ វៀន មានប្រសាសន៍ថា៖
(សំឡេង)
នៅប្រទេសហូឡង់ ប្រារព្ធនៅថ្ងៃទី ២៦ ខែឧសភា ឆ្នាំ ២០១៧ នៅគេហដ្ឋានរបស់ លោក សឺន សាវ៉ាង អតីតប្រធានមិត្តសមាគមខ្មែរកម្ពុជាក្រោម ប្រចាំខេត្តតាកែវ ប្រទេសកម្ពុជា ។ ពិធីនេះរៀបចំដោយសាខាសហព័ន្ធខ្មែរកម្ពុជាក្រោម ប្រចាំប្រទេសហូឡង់ ដឹកនាំដោយ លោក ត្រឹង ច័ន្ទ សា រ៉ាត ។ ព័ត៌មានបន្ថែមសូមទាក់ទង លោក សឺន សាវ៉ាង តាមរយៈទូរស័ព្ទលេខ 31-611-643-253 ។
នៅប្រទេសអ៊ីតាលី ប្រារព្ធនៅថ្ងៃទី ១១ ខែមិថុនា ឆ្នាំ ២០១៧ នៅវត្តរស្មីខេមរារាម (វត្តខ្មែរអ៊ីតាលី) ។ ពិធីនេះរៀបចំដោយក្រុមយុវជនខ្មែរក្រោមប្រចាំប្រទេសអ៊ីតាលី ក្រោមអធិបតីភាព លោក ត្រឹង សារុង ជាប្រធានសាខាសហព័ន្ធខ្មែរកម្ពុជាក្រោម ប្រចាំទ្វីបអឺរ៉ុប លោក ប្រាក់ សេរីវុឌ្ឍ ជាប្រធានប្រតិបត្តិនៃសហព័ន្ធខ្មែរកម្ពុជាក្រោម និង លោក សឺង សម្រេច ជាទីប្រឹក្សានៃសហព័ន្ធខ្មែរកម្ពុជាក្រោម ។ ព័ត៌មានបន្ថែមសូមទាក់ទង លោក ត្រឹង សារុង តាមរយៈទូរស័ព្ទលេខ 39-342-550-2284 ។
នៅទីក្រុង San Jose រដ្ឋ California សហរដ្ឋអាមេរិក ប្រារព្ធនៅថ្ងៃទី ៤ ខែមិថុនា ឆ្នាំ ២០១៧ នៅវត្តខេមររង្សី ។ ពិធីនេះរៀបចំដោយគណៈកម្មការវត្តខេមររង្សី និងវត្តពុទ្ធឃោសាចារ្យ ព្រមទាំងសាខាសហព័ន្ធខ្មែរកម្ពុជាក្រោម ប្រចាំទីក្រុង San Jose ។ លោក ចៅ សេរី ជាអនុប្រធានប្រតិបត្តិ នៃសហព័ន្ធខ្មែរកម្ពុជាក្រោម នឹងចូលនៅក្នុងពិធីនេះ ដើម្បីជម្រាបអំពីលទ្ធផលនៃសកម្មភាពការងាររបស់ សហព័ន្ធខ្មែរកម្ពុជាក្រោម ដែលទើបតែបានបំពេញបេសកកម្មថ្មីនៅលើឆាកអន្តរជាតិ ដើម្បីទាមទារ សិទ្ធិជូនពលរដ្ឋខ្មែរក្រោមនៅដែនដីកម្ពុជាក្រោម និង ថាច់ តង ប្រធានសាខាសហព័ន្ធខ្មែរកម្ពុជា ក្រោម ប្រចាំភាគខាងលិចសហរដ្ឋអាមេរិក ព្រមទាំងសមាជិកសហព័ន្ធខ្មែរកម្ពុជាក្រោម មកពី ទីក្រុងផ្សេងៗក្នុងរដ្ឋ California ។
ព័ត៌មានបន្ថែមសូមទាក់ទង
លោក លី ឃោន ទូរស័ព្ទលេខ (669) 251-6381
លោក ថាច់ តង ទូរស័ព្ទលេខ (408) 314-6929
លោក ថាច់ វឿង ទូរស័ព្ទលេខ (209) 221-5175
លោក ថាច់ ជូន ទូរស័ព្ទលេខ (408) 613- 6196
លោក ឡឹម សាវេត ទូរស័ព្ទលេខ (408) 712-1253
លោក ថាច់ វិន ទូរស័ព្ទលេខ (408) 775-0779
សូមបញ្ជាក់ថា រៀងរាល់ឆ្នាំ ឲ្យតែដល់ថ្ងៃទី ៤ ខែមិថុនា សាខាសហព័ន្ធខ្មែរកម្ពុជាក្រោម និងពលរដ្ឋខ្មែរក្រោម ទូទាំងពិភពលោក ដូចជា ប្រទេសកម្ពុជា ថៃ សហរដ្ឋអាមេរិក កាណាដា អូស្តាលី New Zealand និង ប្រទេសមួយចំនួននៅអឺរុប ដូចជា បារាំង ស្វិស អ៊ីតាលី ហូឡង់ ជាដើម តែងតែប្រារព្ធទិវា ៤ មិថុនា ដើម្បីរំឭកដល់ថ្ងៃដែលបារាំងបានកាត់ដែនដីកម្ពុជាក្រោម ជាអតីតទឹកដីមួយភាគធំរបស់ប្រទេសកម្ពុជា ឲ្យទៅយួនបន្តធ្វើអាណានិគមលើខ្មែរក្រោម ។
កាលពី ថ្ងៃទី ០៤ ខែមិថុនា ឆ្នាំ ១៩៤៩ ប្រធានាធិបតីបារាំងឈ្មោះ វ៉ែនសង់ អូរិយោល (Vincent Auriol) បានប្រកាសច្បាប់ លេខ ៤៩-៧៣៣ ក្នុងការប្រគល់ដែនដីកូស័ងស៊ីន ឲ្យទៅជារដ្ឋចំណុះ វៀតណាមដែលពលរដ្ឋខ្មែរចាត់ទុកថា ជាសន្ធិសញ្ញាខុសច្បាប់ ។
ដែនដីកូស័ងស៊ីន ឬ កម្ពុជាក្រោម មានទំហំ ៦៧.៧០០ គីឡូម៉ែត្រក្រឡា នៅតំបន់ដីសណ្តទន្លេមេគង្គ ឬ ភាគខាងត្បូងនៃប្រទេសវៀតណាម សព្វថ្ងៃ ។ ក្រោយពីបារាំងបានកាត់ដែនដីកម្ពុជាក្រោមទៅឲ្យវៀតណាម មក ពលរដ្ឋខ្មែរក្រោមវាល់លាននាក់ជាម្ចាស់ស្រុកនៃដែនដីកម្ពុជាក្រោម បានបន្តរស់នៅក្រោមនឹមអាណា និគមយួនរហូតមកដល់ សព្វថ្ងៃ ។
សព្វថ្ងៃ ពលរដ្ឋខ្មែរក្រោម នៅដែនដីកម្ពុជាក្រោម មិនមានសិទ្ធិប្រារព្ធខួប ទិវា ៤ មិថុនា ដើម្បីរំឭកដល់ថ្ងៃ ប្រវត្តិសាស្ត្រជាតិរបស់ខ្លួន ដែលអាណានិគមនិយមបារាំងបានកាត់ដែនដីកម្ពុជាក្រោម និងវាសនារបស់ខ្លួន ផ្ទេរឲ្យទៅនៅក្រោមនឹមអាណានិគមថ្មីរបស់យួននោះឡើយ ។ ទិវានេះ ប្រារព្ធបានតែពលរដ្ឋខ្មែរក្រោមនៅក្រៅ ប្រទេសតែប៉ណ្ណោះ ៕
