ដោយ ស៊ឺន ចែងចើន| VOKK
យុវជន ផេង វិសុដ្ឋារ៉ាមុនី មានស្រុកកំណើត នៅភូមិស្វាយជួរ ឃុំកោះខែល ស្រុកស្អាង ខេត្តកណ្តាល និងជាអតីតនិស្សិតបរិញ្ញាបត្រសង្គមវិទ្យានៃពុទ្ធិកសាកលវិទ្យាល័យ ព្រះសីហានុរាជ ។ បច្ចុប្បន្នលោក ជាអ្នកស្រាវជ្រាវឯករាជ្យ អ្នកនិពន្ធ និងអ្នករៀបរៀងចងក្រងឯកសារប្រវត្តិសាស្ត្រមួយចំនួន ។
នៅពេលថ្មីៗ លោកបានបោះពុម្ភផ្សាយកម្រងកំណាព្យប្រវត្តិសាស្ត្រ ដែលមានចំណងជើងថា «ទំនួញក្រាំងមាសសាវតារខ្មែរ» ។ ខ្លឹមសារក្នុងកម្រងអត្ថបទកំណាព្យប្រវត្តិសាស្ត្រ ដែលមាននូវក្នុងសៀវភៅនេះ លោកផ្តោតទៅលើប្រធានបទទាក់ទង កំណាព្យបែបជាតិនិយម និងបែបប្រវត្តិសាស្ត្រ មានជាអាទិ៍ ភូមិសាស្ត្រទូទៅ ឬភូមិសាស្ត្រខេត្តក្រុងរបស់ខ្មែរលើ ខ្មែរក្រោម រួមទាំងខ្មែរកណ្តាល និងផ្តោតទៅលើការតស៊ូររបស់វីរបុរស និងវីរយុទ្ធជនខ្មែរគ្រប់ជំនាន់ ដែលហ៊ានពលីកម្មជីវិតតស៊ូរំដោះជាតិ ដេញបរទេសឈ្លានពានត្រួតត្រាទឹកដី កាលពីអតីត ។ ជាពិសេស វណ្ណកម្មដំបូងរបស់លោក ដែលទើបចេញផ្សាយនេះ លោកបានតាក់តែងនិពន្ធអត្ថបទកំណាព្យជាច្រើនទាក់ទិន និងរឿងកម្ពុជាក្រោម ។ ក្នុងនោះ អត្ថបទកំណាព្យមួយយ៉ាងវែង ដែលលោកបានសរសេររៀបរាប់អំពីទិវាប្រជាជាតិខ្មែរក្រោម កាន់ទុក្ខ ដោយលោកដាក់ចំណងជើងអត្ថបទកំណាព្យនោះថា «៤ មិថុនា មហាទុក្ខនៃប្រជាជាតិខ្មែរ» ជាដើម ។
ផ្តើមចេញពីឆន្ទៈទឹកចិត្ត ដែលតែងតែមានទំនោរនឹកគិត អាឡោះអាល័យសែនស្តាយស្រណោះគ្រប់វិនាទីនៃដង្ហើមចេញចូលប្រចាំថ្ងៃរបស់លោក ។ ផ្គួបផ្សំជាមួយស្មារតីស្រលាញ់ពូជសាសន៍ខ្មែរ និងប្រជាពលរដ្ឋខ្មែររួមទាំងមានឧបនិស្ស័យចូលចិត្ត សិក្សាស្រាវជ្រាវស្វែងយល់ផងនោះ ។ យុវជន ផេង វិសុដ្ឋារ៉ាមុនី ក៏បានស្រាវជ្រាវ និងចងក្រងឯកសារប្រវត្តិសាស្ត្រមួយទៀត ដែលនិយាយពីដែនដីកម្ពុជាក្រោម ឬអតីតកូសាំងស៊ីន រៀបរៀងដោយរូបលោកផ្ទាល់ ។
ក្នុងនាម ជាយុវជនខ្មែរជំនាន់ក្រោយ ហើយលោកក៏ជាកូនអ្នកស្រុកខ្មែរកណ្តាលផងនោះ ។ តើអ្វីជាការជំរុញឲ្យទឹកចិត្តរបស់លោក មិនអាចនៅស្ងៀមបាន រហូតដល់លោក ធ្វើការសិក្សាស្រាវជ្រាវស្វែងយល់ និងចងក្រងកម្រងអត្ថបទកំណាព្យជាតិនិយម និងឯកសារប្រវត្តិសាស្ត្រ ដែលទាក់ទិនទៅ នឹងដែនដីកម្ពុជាក្រោម នេះឡើង? ។ តើយុវជន ផេង វិសុដ្ឋារ៉ាមុនី ជានរណា? លោក ស៊ឺន ចែងចើន នៃទូរទស្សន៍ «ព្រៃនគរ» បានសម្ភាសន៍លោក ផេង វិសុដ្ឋារ៉ាមុនី ជុំវិញរឿងនេះ ។
