សាខាសហព័ន្ធខ្មែរកម្ពុជាក្រោម នៅទីក្រុង Philadelphia រដ្ឋ Pennsylvania កាលពីថ្ងៃទី ២៥ មេសា ២០១៥ បានរៀបចំកម្មវិធីជួបជុំសមាជិក សមាជិកា នៃសហព័ន្ធខ្មែរកម្ពុជាក្រោម ប្រមាណជាង ១០០ នាក់ ដែលនិមន្ត និងអញ្ជើញមកពីបណ្តារដ្ឋនានា ក្នុងទឹកដីសហរដ្ឋអាមេរិក និងប្រទេសមួយចំនួនក្នុងពិភពលោក ។
ការរៀបចំកម្មវិធីជួបជុំបងប្អូនខ្មែរក្រោម ក្នុងគោលបំណងរំឮកពីសកម្មភាពរបស់សហព័ន្ធខ្មែរកម្ពុជាក្រោម ដែលធ្វើការតស៊ូមតិ នៅលើឆាកអន្តរជាតិកន្លងមក ។
សមាជិកតំណាងឲ្យរដ្ឋនិមួយៗ បានឡើងថ្លែងមតិម្នាក់ម្តងៗ ទៅកាន់មនុស្សចូលរួម នៅក្នុងកម្មវិធីជួបជុំនោះ ទាក់ទងទៅ នឹងសកម្មភាពការងាររបស់សហព័ន្ធខ្មែរកម្ពុជាក្រោម និងការផ្តោតទៅលើបញ្ហាកង្វះផ្នែកអប់រំខាងសិទ្ធិមនុស្សរបស់ព្រះសង្ឃ និងពលរដ្ឋខ្មែរក្រោម ដែលជាម្ចាស់ស្រុក នៅឯដែនដីកម្ពុជាក្រោម ។
បន្ទាប់ពីជួបសំណេះសំណាលគ្នារួចមក អ្នកចូលរួមទាំងអស់ បាននាំគ្នាបរិច្ចាកប្រាក់ផ្ទាល់ខ្លួន ដើម្បីជួយឧបត្ថម្ភដល់ក្រុមយុវជន ដែលចូលរូមវេទិកាអចិន្ត្រៃយ៍ ស្តីពីបញ្ហាជនជាតិដើម លើកទី ១៤ នៅទីស្នាក់ការកណ្តាលនៃអង្គការសហប្រជាជាតិ នាបូរីញូវយ៉ក់ សហរដ្ឋអាមេរិក ចាប់ពីថ្ងៃទី ២០ ខែមេសា ដល់ថ្ងៃទី ១ ខែឧសភា ឆ្នាំ ២០១៥ ។
គួររំឮកថា ចាប់ពីឆ្នាំ ២០០៤ មក រៀងរាល់ឆ្នាំ សហព័ន្ធខ្មែរកម្ពុជាក្រោម តែងតែងចូលថ្លែងការណ៍ ស្ដីអំពីបញ្ហាសិទ្ធិមនុស្សខ្មែរក្រោម នៅក្នុងវេទិកាអចិន្ត្រៃយ៍នៃអង្គការសហប្រជាជាតិ ស្ដីពីបញ្ហាជនជាតិដើម ដើម្បីជម្រាបដល់សហគមន៍អន្តរជាតិបានដឹងពីទុក្ខកង្វល់ផ្សេងៗ របស់ពលរដ្ឋខ្មែរក្រោម ដែលត្រូវបានរំលោភបំពានពីរដ្ឋាភិបាល វៀតណាម សព្វថ្ងៃ ។
សូមបញ្ជាក់ថា នៅថ្ងៃចន្ទទី ២៧ មេសា នេះ ជាសប្តាហ៍ទី ២ ហើយ ដែលតំណាងសហព័ន្ធខ្មែរកម្ពុជាក្រោម ព្រះសង្ឃ យុវជន និងយុវតីខ្មែរក្រោម បានចូលរួមស្តាប់ និងថ្លែងការណ៍នៅក្នុងវេទិកាអចិន្ត្រៃយ៍ នៃអង្គការសហប្រជាជាតិ ស្ដីពីបញ្ហាជនជាតិដើម នៅទីស្នាក់ការកណ្តាលនៃអង្គការសហប្រជាជាតិ នាបូរីញូវយ៉ក់ ។
ព័ត៌មានលម្អិតទាក់ទង នឹងសកម្មភាពរបស់សហព័ន្ធខ្មែរកម្ពុជាក្រោម ចូលរួមកិច្ចប្រជុំលើកទី ១៤ នៃវេទិកាអចិន្ត្រៃយ៍ស្ដីបញ្ហាជនជាតិដើម ។ សហការីនៃវិទ្យុសំឡេងកម្ពុជាក្រោម និងភ្នាក់ងារទូរទស្សន៍ព្រៃនគរ នឹងធ្វើសេចក្តីរាយការជាបន្តបន្ទាប់ ។ ដូច្នេះ សូមលោកអ្នករង់ចាំតាមដានព្រឹតិ្តការណ៍នេះ កុំបីខាន ៕ ខាងក្រោមនេះ ជារូបភាពខ្លះៗ ពីសកម្មភាពកម្មវិធីរៃអង្គាសប្រាក់ និងក្រុមយុវជនខ្មែរក្រោម ចូលរូមវេទិកាអចិន្ត្រៃយ៍ ស្តីពីបញ្ហាជនជាតិដើម នៅទីស្នាក់ការកណ្តាលនៃអង្គការសហប្រជាជាតិ នាបូរីញូវយ៉ក់ ។
