ដោយ ស៊ឺន ចែងចើន | VOKK
មិត្តសមាគមខ្មែរកម្ពុជាក្រោម ប្រចាំប្រទេសកម្ពុជា នៅថ្ងៃអាទិត្យទី ២១ ខែមករា ២០១៨ ខាងមុខនេះ នឹងរៀបចំមហាសន្និបាតវិសាមញ្ញរបស់ខ្លួនដើម្បី «ពង្រឹងការងារ និងបង្ហាញសកម្មភាពសមាគម» ។
អង្គមហាសន្និបាតវិសាមញ្ញលើកទី ៣ នឹងរៀបចំឡើងនៅទីស្នាក់ការកណ្ដាលរបស់មិត្តសមាគមខ្មែរកម្ពុជាក្រោម ដែលមានទីតាំងស្ថិតនៅក្នុងវត្តសាមគ្គីរង្សី ភូមិទ្រា ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដោយមានការអញ្ចើញចូលរួមពីថ្នាក់ដឹកនាំ និងតំណាងឲ្យអង្គការសមាគមខ្មែរកម្ពុជាក្រោម សមាជិក សមាជិកានៃមិត្តសមាគមខ្មែរកម្ពុជាក្រោម ដែលអញ្ជើញមកពីខេត្តនានា ក្នុងព្រះរាជាណាចក្រកម្ពុជា ។
ប្រធានមិត្តសមាគមខ្មែរកម្ពុជាក្រោម លោក ប៊ុន មុនី ហៅ ថាច់ ឡែន បានឲ្យវិទ្យុសំឡេងកម្ពុជាក្រោមដឹងថា គោលបំណងនៃការធ្វើមហាសន្និបាតវិសាមញ្ញ គឺដើម្បីរៀបចំនូវរចនាសម្ព័ន្ធ និងធ្វើបច្ចុប្បន្នភាពរបស់មិត្តសមាគមឡើងវិញ ដើម្បីឲ្យស្របទៅតាមការកំណត់ដោយច្បាប់របស់ក្រសួងមហាផ្ទៃ ។
បើតាមលោក ប៊ុន មុនី រយៈពេល ១ ឆ្នាំកន្លងទៅ ពោល គឺនៅក្នុងឆ្នាំ ២០១៧ មិត្តសមាគមខ្មែរកម្ពុជាក្រោម បានធ្វើសកម្មភាពជាច្រើន ដោយក្នុងនោះសម្រេចបាននូវសមិទ្ធិផលមានជាអាទិ៍ បញ្ជាក់ជូននូវលិខិតបទដ្ឋានផ្សេងៗ ដល់ពលរដ្ឋខ្មែរក្រោម ដែលកំពុងរស់នៅក្នុងព្រះរាជាណាចក្រកម្ពុជា ដើម្បីយកទៅប្រើប្រាស់តាមសេចក្តីតម្រូវការរបស់ខ្លួន ។ ការធ្វើសកម្មភាពមនុស្សធម៌ ដោយដោះស្រាយនូវរាល់កង្វះខាត់ ដែលពលរដ្ឋខ្មែរក្រោម បានជួបប្រឈមខ្លាំង ។ ជាពិសេស រាល់សកម្មភាពរបស់មិត្តសមាគមខ្មែរកម្ពុជាក្រោម គឺបានឆ្លើយតបទៅ នឹងតម្រូវការរបស់ប្រជាពលរដ្ឋខ្មែរក្រោមទាន់ពេលវេលា ។ ក្រៅពីនេះ មិត្តសមាគមខ្មែរកម្ពុជាក្រោម ក៏បានសហការជាមួយអង្គការជាដៃគូ ដើម្បីរិះរកគ្រប់មធ្យោបាយ ជួយសម្រួលនូវគ្រប់បញ្ហា ដែលពលរដ្ឋខ្មែរក្រោម កំពុងតែជួបប្រឈម ។
សម្រាប់គម្រោងផែនការណ៍ និងទិសដៅ នៅក្នុងឆ្នាំ ២០១៨ នេះ មិត្តសមាគមខ្មែរកម្ពុជាក្រោម បានដាក់ចេញនូវគោលការណ៍សំខាន់ៗ ៥ ចំណុច ដើម្បីអនុវត្ត មានដូចជា៖
- សិទ្ធិរស់នៅដោយស្របច្បាប់របស់ពលរដ្ឋខ្មែរក្រោម ទាំងនៅក្នុងស្រុក និងក្រៅស្រុក ។
- បន្តផែនការណ៍រៀបចំធ្វើប័ណ្ណសមាជិក និងលិខិតបញ្ជាក់បទដ្ឋានផ្សេងៗ ។
- រៀបចំផែនការណ៍អប់រំ ជួយទ្រទ្រង់សមាជិក សមាជិកា ដែលពុំមានមានលទ្ធភាពគ្រប់គ្រាន់ ឲ្យកូនចៅបន្តការសិក្សា ។
- ចលនាវប្បធម៌ និងប្រពៃណី ។
- រៀបចំសកម្មភាពមនុស្សធម៌ ពិនិត្យជម្ងឺ ដល់សមាជិក សមាជិកា ក្នុងពេលសមស្របណាមួយ ។
គួរជម្រាបជូនថា មិត្តសមាគមខ្មែរកម្ពុជាក្រោម បង្កើតឡើងមុនដំបូងបង្អស់ នៅឆ្នាំ ១៩៣៧ ក្រោមការផ្តួចផ្តើមរបស់លោកឧកញ៉ា ឡឹម ឯម និងសហការីរបស់លោក នៅឯដែនដីកម្ពុជាក្រោម ។ ការបង្កើតមិត្តសមាគមខ្មែរកម្ពុជាក្រោម នេះឡើង គឺដើម្បីបំពេញនូវអត្ថប្រយោជន៍ដល់ជនរួមឈាមខ្មែរក្រោម ក្នុងគោលបំណងផ្សារភ្ជាប់ជាមួយព្រះរាជាណាចក្រកម្ពុជា ។ សមាគមនេះ ធ្វើសកម្មភាពរហូតដល់ឆ្នាំ ១៩៧៥ ហើយក៏ត្រូវផ្អាកមកវិញ ក្នុងចន្លោះរបបប្រល័យពូជសាសន៍ ប៉ុល ពត និងសម័យរដ្ឋកម្ពុជា ។
លុះក្រោយថ្ងៃកិច្ចព្រមព្រៀងសន្តិភាពទីក្រុងប៉ារីសរបស់ព្រះរាជាណាចក្រកម្ពុជា មិត្តសមាគមខ្មែរកម្ពុជាក្រោម បានរៀបចំបង្កើតឡើងវិញ ក្រោមគំនិតជួយផ្តួចផ្តើមរបស់លោក សឺន យិន លោក គឹម ភៀន លោក ច័ន្ទ សុខា លោក ថាច់ សាង លោក គៀង សាំងឈើន លោក គឺម ញ៉ លោក អ៊ុយ សុភ័ក្ត្រ លោក ថាច់ សឿន លោក ហែម ឫទ្ធី អ្នកស្រី ហែម សោភា លោក ថាច់ ឡាង ព្រមទាំងឥស្សរជនខ្មែរក្រោមមួយចំនួនទៀត ។ល។ បានធ្វើឲ្យសមាគមនេះ ប្រសូតឡើងពេញលក្ខណៈច្បាប់សាជាថ្មី នៅថ្ងៃទី ២១ ខែកញ្ញា ឆ្នាំ ១៩៩៣ ៕
