គណៈកម្មាធិការសភាអឺរ៉ុប ទទួលបន្ទុកពាណិជ្ជកម្មអន្តរជាតិ កាលពីថ្ងៃទី ២០ ខែមករា សប្តាហ៍កន្លងទៅនេះ បានបោះឆ្នោតអនុម័តលើកិច្ចព្រមព្រៀងពាណិជ្ជកម្មសេរីជាមួយប្រទេសវៀតណាម ។ មុនការបោះឆ្នោតនេះមួយថ្ងៃ សមាជិកសភាអឺរ៉ុបម្នាក់ បានលើកឡើងថា ស្ថានទូតវៀតណាម បានឲ្យសំណូកទិញទឹកចិត្តសមាជិកសភានៃសភាអឺរ៉ុប ដើម្បីបានសំឡេងគាំទ្រអនុម័តកិច្ចព្រមព្រៀងពាណិជ្ជកម្មសេរី ។
គណៈកម្មការនៃសភាអឺរ៉ុប (EP) ទើបតែបើកការស៊ើបអង្កេតបញ្ហាផ្ទៃក្នុងមួយ ក្រោយពីសមាជិកសភារបស់ខ្លួន ប្រកាសថា ខ្លួនបានទទួលនូវកាដូជាស្រាសំប៉ាញ ពីមន្ត្រីស្ថានទូតវៀតណាម មុនការបោះឆ្នោតអនុម័តកិច្ចព្រមព្រៀងពាណិជ្ជកម្មសេរីរវាងអឺរ៉ុបជាមួយ នឹងប្រទេសវៀតណាម ។ នេះបើយោងតាមកាសែត Express ចេញផ្សាយកាលពីថ្ងៃទី ២៣ ខែ មករា នេះ ។
យោងតាមកាសែតរបស់អង់គ្លេស សមាជិកសភាអឺរ៉ុបម្នាក់ៗ ត្រូវតែអនុវត្តតាមលក្ខន្តិកៈយ៉ាងតឹងរ៉ឹងក្នុងការប្រឆាំង នឹងអំពើពុករលួយ ។ ពួកគេមិនអាចទទួលនូវអំណោយពីខាង ក្រៅ ដែលមានតម្លៃត្រឹម ១៥០ អឺរ៉ូ (ប្រហែល ៣. ៨៥០.០០០ ដុង ឬ ប្រមាណ ១៦៥ ដុល្លារ សហរដ្ឋអាមេរិក) ។ សមាជិកសភាអឺរ៉ុបមានក្រមប្រតិបត្តិដោយមានបទបញ្ញត្តិយ៉ាងច្បាស់ស្ដីពី “ទំនាស់ផលប្រយោជន៍” ដើម្បីទប់ស្កាត់សមាជិករបស់ខ្លួនត្រូវគេទិញ ។
តាមកាសែត Express បានស្រង់សម្ដីរបស់អ្នកនាំពាក្យ នៃសភាអឺរ៉ុប បញ្ជាក់អំពីក្រមប្រតិបត្តិ ឬ លក្ខន្តិកៈរបស់សភាអឺរ៉ុបថា មិនអាចទទួលអំណោយ ដែលមានតម្លៃលើសពី ១៥០ អឺរ៉ូ បានឡើយ និងពួកគេត្រូវបានគេជម្រុញឲ្យសងអំណោយទាំងនោះ ទៅម្ចាស់ដើមវិញ ។
នៅថ្ងៃទី ២០ ខែមករា សមាជិកសភាអឺរ៉ុប អ្នកស្រី Ellie Chowns បានផ្សាយនៅលើទំព័រTwitter ផ្ទាល់ខ្លួននូវរូបថតដបស្រាសំប៉ាញ ភ្ជាប់ជាមួយសាររបស់ស្ថានទូតវៀតណាម ផ្ដាំថា៖ “ ថ្ងៃស្អែក គណៈកម្មាធិការសភាអឺរ៉ុបទទួលបន្ទុកពាណិជ្ជកម្មអន្តរជាតិ នឹងបោះឆ្នោតលើកិច្ចព្រមព្រៀងពាណិជ្ជកម្មសេរីរវាងអឺរ៉ុប និង វៀតណាម (EVFTA)” ។ អ្នកស្រីបន្តទៀតថា៖“ ថ្ងៃនេះ ខ្ញុំបានទទួលរបស់ទាំងនេះ នៅក្នុងការិយាល័យរបស់ខ្ញុំ គឺ ស្រាសំប៉ាញ ពីស្ថានទូតវៀតណាម ។ វាជាទង្វើមួយមិនសម និង ឥតអៀនខ្មាស់ទាល់តែសោះ ។ ខ្ញុំ នឹង សងទៅពួកគេវិញ និងពន្យល់ឲ្យពួកគេដឹងថា ការដោះលែងអ្នកទោសនយោបាយ វាមានឥទ្ធិពលមកលើខ្ញុំ ច្រើនជាង” ។
ប្រភពព័ត៌មាន បានឲ្យដឹងទៀតថា ក្រៅពីអ្នកស្រី Chowns សមាជិកសភាអឺរ៉ុបដ៏ទៃទៀត ក៏បានទទួលអំណោយជាកាដូ ដូចគ្នានេះដែរ ពីស្ថានទូតវៀតណាម ។
យោងតាមសេចក្តីប្រកាសព័ត៌មានចុះផ្សាយលើ គេហទំព័រសភាអឺរ៉ុប នៅថ្ងៃទី ២១ ខែមករា នេះថា គណៈកម្មាធិការសភាអឺរ៉ុបទទួលបន្ទុកពាណិជ្ជកម្មអន្តរជាតិ បានបោះឆ្នោតនៅថ្ងៃទី ២០ ខែមករា គាំទ្រឱ្យវៀតណាមចុះកិច្ចព្រមព្រៀងពាណិជ្ជកម្មសេរី ហៅកាត់ FTA ជាមួយសហភាពអឺរ៉ុប ក្រោមសំឡេងយល់ព្រម ២៩ សំឡេង ជំទាស់ ៦ និង អនុប្បវាទ ៥ ។
យ៉ាងណាក៏ដោយ ដើម្បីទទួល និង រក្សាកិច្ចព្រមព្រៀងនេះបាន វៀតណាមត្រូវគោរពលក្ខខណ្ឌជាច្រើន ដាក់ចេញដោយសហភាពអឺរ៉ុប រាប់ទាំងការគោរពសិទ្ធិមនុស្ស សិទ្ធិការ ងារ និងការការពារបរិស្ថាន ។
តាមប្រភពដដែល នៅពេលកិច្ចព្រមព្រៀងនេះ ដាក់ឱ្យដំណើរការ វៀតណាមអាចនាំទំនិញដោយរួចកាតព្វកិច្ចពន្ធគយទៅសហភាពអឺរ៉ុប ចំនួន ៧១ ភាគរយនៃទំនិញសរុប ដែលខ្លួននាំទៅតំបន់នេះ ដូចគ្នាដែរ សហភាពអឺរ៉ុប ទទួលបានមកការលើកលែងចំនួន ៦១ ភាគរយនៃទំនិញសរុបដែលខ្លួននាំទៅកាន់វៀតណាមវិញ ។
ប្រភពដដែលឱ្យដឹងបន្ថែមទៀតថា ទំនិញវៀតណាមនាំទៅសហភាពអឺរ៉ុបក្រោមកិច្ចព្រមព្រៀងនេះ គឺមានរាប់បញ្ចូលផលិតផលកសិកម្មដូចជា អង្ករ ខ្ទឹមស និងស៊ុត ឯទំនិញសហភាពអឺរ៉ុប នាំទៅវៀតណាមវិញ មានម៉ូតូ រថយន្ត ឱសថ សារធាតុគីមី ស្រា សាច់មាន់ និងសាច់ជ្រូក ជាដើម ។
កិច្ចព្រមព្រៀងពាណិជ្ជកម្មសេរីអឺរ៉ុប-វៀតណាម ត្រូវបានក្រសួងផែនការ និងវិនិយោគវៀតណាម រំពឹងថា នឹងជួយជំរុញទំហំនៃការនាំទំនិញចេញរបស់វៀតណាមទៅសហគមអឺរ៉ុប កើនឡើង ២០ ភាគរយ នៅឆ្នាំ ២០២០ – ៤២.៧៥ ភាគរយ នៅឆ្នាំ ២០២៥ និង ៤៤.៣៧ភាគរយ នៅឆ្នាំ ២០៣០ ។ នេះបើយោងតាមសេចក្តីប្រកាសព័ត៌មានលើទំព័រព័ត៌មានអនឡាញរបស់រដ្ឋាភិបាលវៀតណាម ។
ប្រភពខាងលើក៏បានបញ្ជាក់ថា វៀតណាម គឺជាដៃគូពាណិជ្ជកម្មធំបំផុតលំដាប់ទី ២ ក្នុងចំណោមប្រទេសសមាជិកអាស៊ាន តាមពីក្រោយប្រទេសសិង្ហបុរី ដោយទំហំពាណិជ្ជកម្មនាំចេញទំនិញ និងសេវាកម្មរបស់ប្រទេសនេះទៅកាន់តំបន់អឺរ៉ុប សរុបមានតម្លៃ ៥១ ពាន់ ២រយលានអឺរ៉ូក្នុងមួយឆ្នាំ ៕
