យុវជន​​​ពាក់អាវ​​យឺត​ខ្មែរ​ក្រោម​​ ត្រូវ​អាជ្ញាធរ​យួន​កោះហៅ​ទៅ​សួរចម្លើយ​

ដោយ ស៊ឺន ចែងចើន

អាជ្ញាធរ​យួន​ នៅ​ថ្ងៃទី​ ១៥​ និង​ ១៦​ ខែឧសភា​ ឆ្នាំ​ ២០១៩​ នេះ​ បាន​ចេញ​លិខិត​កោះហៅ​យុវជន​ខ្មែរក្រោម​ ១ រូប​ ទៅ​សួរចម្លើយ​ បន្ទាប់ពី​យុវជន​រូប​នេះ​ ពាក់អាវ​យឺត​ខ្មែរក្រោម​ ដែល​មាន​ដាក់​អក្សរ​ «៧០​ ឆ្នាំ​ កម្ពុជាក្រោម​ នៅ​ក្រោម​នឹម​អាណានិគម​យួន​» ។ អាវយឺត​នេះ​ បោះពុម្ព​សម្រាប់​ផ្សព្វផ្សាយ​ នៅក្នុង​ពិធី​រំឭក​ដល់​ខួប​ ៧០​ ឆ្នាំ​ ថ្ងៃ​កម្ពុជាក្រោម​ នៅ​ក្រោម​នឹម​អាណានិគម​យួន​ និង​សន្និសីទ​អន្តរជាតិ​ ក្រោម​ប្រធានបទ​ «សិទ្ធិ​របស់​ខ្មែរក្រោម​ ក្នុង​ការ​ទទួល​បាន​នូវ​សិទ្ធិ​សម្រេចវាសនា​ខ្លួន​ដោយខ្លួនឯង​» ដែល​ នឹង​ធ្វើ​នៅក្នុង​វិមាន​សន្តិភាព​ (Peace​ Palace​) នាទី​ក្រុង​ឡា​អេ​ នៃ​ប្រទេស​ហូ​ឡង់​ នៅ​ថ្ងៃទី​ ១ ខែមិថុនា​ ឆ្នាំ​ ២០១៩​ ខាងមុខនេះ​ ។

លិខិត​កោះហៅ​របស់អាជ្ញាធរឃុំ​មេ​រង​ថ្មី​ ។ រូបថតផ្តល់ឲ្យ
លិខិត​កោះហៅ​របស់អាជ្ញាធរឃុំ​មេ​រង​ថ្មី​ ។ រូបថតផ្តល់ឲ្យ

លោក​ តោ​ ហ្វាង​ ចឿង​ (To​ Hoang​ Chuong​) នៅ​ភូមិ​មេ​រង​ថ្មី​ ឃុំ​មេ​រង​ថ្មី​ ស្រុក​ផ្នោ​ដាច់​ ខេត្ត​ព្រះត្រពាំង​ នៃ​ដែនដី​កម្ពុជាក្រោម​ បាន​បង្ហោះ​សារ​ និង​វីដេអូ​ឃ្លិប​ នៅ​ថ្ងៃទី​ ១៥​ ខែឧសភា​ ថា​ អាជ្ញាធរ​មូលដ្ឋាន​ក្នុង​ភូមិ​របស់​លោក​ បាន​យក​លិខិត​កោះហៅ​មួយ​ច្បាប់​ បង្គាប់​ឲ្យ​លោក​ទៅ​ជួប​ប្រធាន​ការិយាល័យ​នគរបាល​សន្តិសុខ​ឃុំ​មេ​រង​ថ្មី​ ដើម្បី​សួរនាំ​នូវ​រឿងរ៉ាវ​មួយចំនួន​ ដែល​ទាក់​ទាង​ នឹង​សាមីខ្លួន​ ។ ប៉ុន្តែ​ លោក​ តោ​ ហ្វាង​ ចឿង​ បាន​បដិសេធ​មិន​ទទួលយក​លិខិត​កោះហៅ​នោះ​ទេ​ ដោយ​លោក​អះអាង​ថា​ ខ្លឹមសារ​ក្នុង​លិខិត​កោះហៅ​នោះ​ មិនបាន​បញ្ជាក់​ពី​មូលហេតុ​ច្បាស់លាស់​ ។

លោក​ តោ​ ហ្វាង​ ចឿង​ (To​ Hoang​ Chuong​) ត្រូវ​បានអាជ្ញាធរ​យួន​កោះហៅ​ទៅ​សួរចម្លើយ​ ។ រូបថតផ្តល់ឲ្យ
លោក​ តោ​ ហ្វាង​ ចឿង​ (To​ Hoang​ Chuong​) ត្រូវ​បានអាជ្ញាធរ​យួន​កោះហៅ​ទៅ​សួរចម្លើយ​ ។ រូបថតផ្តល់ឲ្យ

យ៉ាងនេះ​ក្តី​ នៅ​ព្រឹក​ថ្ងៃ​ ទី​ ១៦​ ខែឧសភា​ លោក​ តោ​ ហ្វាង​ ចឿង​ បាន​បង្ហោះ​វីដេអូ​ផ្សាយ​ផ្ទាល់​ (LIVE​) បង្ហាញ​ពី​សកម្មភាព​ក្រុម​អាជ្ញាធរ​យួន​មាន​គ្នា​ ២ នាក់​ ក្នុង​នោះ​មាន​ខ្មែរ​ម្នាក់​ផង​ បាន​មកដល់​ផ្ទះ​របស់​លោក​ម្តង​ទៀត​ ដើម្បី​បង្ខំឲ្យ​លោក​ ចុះហត្ថលេខា​លើ​លិខិត​កោះហៅ​ដដែល​នោះ​ និង​ជំរុញ​ឲ្យ​លោក​ទៅតាម​ការ​កោះហៅ​របស់​អាជ្ញាធរ​ តាមកាល​កំណត់​ ។ ទោះជាយ៉ាងណា​ក៏ដោយ​ លោក​ តោ​ ហ្វាង​ ចឿង​ នៅតែ​បដិសេធ​ដាច់អហង្ការ​ ដោយ​មិន​អញ្ជើញ​ទៅតាម​ការ​កោះហៅ​របស់​អាជ្ញាធរ​ឡើយ​ ដែល​បញ្ហា​នេះ​ បាន​ឈាន​ដល់​ការ​ប៉ះទង្គិច​គ្នា​ដោយ​ពាក្យ​សម្តី​មួយ​ប្រាវ​ ។

តាម​ខ្លឹមសារ​សំឡេង​នៃ​ការ​សួរដេញដោល​ខាងលើ​នេះ​ លោក​ តោ​ ហ្វាង​ ចឿង​ ទាមទារ​ឲ្យ​អាជ្ញាធរ​យួន​ ដាក់​មូលហេតុ​ឲ្យបាន​ច្បាស់លាស់​ថា​ ការ​កោះហៅ​នេះ​ គឺ​ពាក់ព័ន្ធ​ នឹង​ករណី​លោក​ «ពាក់អាវ​យឺត​ខ្មែរក្រោម​» ។ ដោយ​លោក​សំអាង​ហេតុផល​ថា​ អាជ្ញាធរ​កោះហៅ​រូបលោក​ គ្មានអ្វី​ផ្សេង​ក្រៅពី​រឿង​លោក​ពាក់អាវ​យឺត​ខ្មែរក្រោម​នោះ​ទេ​ ។

សូម​បញ្ជាក់​ថា​ អំឡុង​ពេល​ចូលឆ្នាំ​ ប្រពៃណី​ខ្មែរ​ ៣ ថ្ងៃ​ យុវជន​ខ្មែរក្រោម​មួយ​ក្រុម​ នៅ​ដែនដី​កម្ពុជាក្រោម​ បាន​នាំគ្នា​ពាក់អាវ​យឺត​ខ្មែរក្រោម​ ដែល​មាន​រូបសញ្ញា​ (Logo​) និង​អក្សរ​ថា​ «៧០​ ឆ្នាំ​ កម្ពុជាក្រោម​ នៅ​ក្រោម​នឹម​អាណានិគម​យួន​» ដើរលេង​កម្សាន្ត​នៅ​តាម​វត្តអារាម​មួយចំនួន​ និង​បង្ហោះ​នៅ​លើ​បណ្ដាញ​សង្គម​ហ្វេ​សប៊ុ​ក (Facebook​) របស់​ខ្លួន​ ។ ប៉ុន្តែ​ នៅ​បន្ទាប់ពី​បុណ្យចូលឆ្នាំ​រួច​ ពួកគេ​រង​ការព្រមាន​ និង​កោះហៅ​ទៅ​សួរនាំ​ នៅ​ការិយាល័យ​នគរបាល​ជាបន្តបន្ទាប់​ រហូត​មកទល់​ នឹង​ពេលនេះ​ ។

 

ក្រុមយុវជនខ្មែរក្រោមពាក់អាវ​យឺត​ខ្មែរក្រោម​ ដែល​មាន​ដាក់​អក្សរ​ «៧០​ ឆ្នាំ​ កម្ពុជាក្រោម​ នៅ​ក្រោម​នឹម​អាណានិគម​យួន​» ក្នុងឱកាសបុណ្យចូលឆ្នាំថ្មី ។ រូបថតផ្តល់ឲ្យ
ក្រុមយុវជនខ្មែរក្រោមពាក់អាវ​យឺត​ខ្មែរក្រោម​ ដែល​មាន​ដាក់​អក្សរ​ «៧០​ ឆ្នាំ​ កម្ពុជាក្រោម​ នៅ​ក្រោម​នឹម​អាណានិគម​យួន​» ក្នុងឱកាសបុណ្យចូលឆ្នាំថ្មី ។ រូបថតផ្តល់ឲ្យ

គួរ​ជម្រាប​ជូន​ផង​ដែរ​ថា​ កាលពី​ឆ្នាំ​ ២០១៧​ យុវជន​ខ្មែរក្រោម​មួយ​ក្រុម​ មាន​គ្នា​ ៤ ទៅ​ ៥ នាក់​ក៏​ត្រូវ​បាន​អាជ្ញាធរ​យួន​ ឃុំ​មេ​រង​ថ្មី​ ស្រុក​ផ្នោ​ដាច់​ ខេត្ត​ព្រះត្រពាំង​ កោះហៅ​ទៅ​សួរចម្លើយ​ម្តង​ជា​ ២ ដង​ រួចមក​ហើយ​ដែរ​ ដោយ​កាលណោះ​ក៏​ពាក់ព័ន្ធ​ នឹង​ករណី​ពាក់អាវ​យឺត​របស់​សហព័ន្ធ​ខ្មែរ​កម្ពុជាក្រោម​ ដែល​មាន​រូបសញ្ញា​ដៃ​ទ្រ​ព្រះវិហារ​ រូប​រាហូ​ចាប់​ចន្ទ​ ជា​សញ្ញា​របស់​សហព័ន្ធ​ខ្មែរ​កម្ពុជាក្រោម​ មាន​អក្សរ​ «ខ្មែរក្រោម​» ទាំង​ភាសាអង់គ្លេស​ និង​ខ្មែរ​ មាន​អាយ​ដ្ឋាន​គេហទំព័រ​របស់​គណៈកម្មាធិការ​យុវជន​នៃ​សហព័ន្ធ​ខ្មែរ​កម្ពុជាក្រោម​ (kkfyc.org​) និង​មាន​អក្សរ​អង់គ្លេស​មួយ​ឃ្លា​ថា​ “Revitalization​ of​ our​ Khmer​ -Krom​ identity​ through​ the​ implementation​ of​ UNDRIP​” មាន​ន័យ​ជា​ភសា​ខ្មែរ​ថា​ «ការ​ធ្វើឲ្យ​រស់​ឡើងវិញ​នូវ​អត្តសញ្ញាណ​ខ្មែរក្រោម​តាម​ រយៈ​ការអនុវត្ត​សេចក្ដីប្រកាស​ជាស​កល​របស់​អង្គការសហប្រជាជាតិ​ស្ដីពី​សិទ្ធិ​ជនជាតិ​ដើម​» ។

ក្រុមយុវជនខ្មែរក្រោម នៅភូមិមេរងថ្មី ពាក់អាវយឺតខ្មែរក្រោម ថ្ងៃទី ២២ ខែឧសភា ឆ្នាំ ២០១៧ ។ រូបថតផ្តល់ឲ្យ
ក្រុមយុវជនខ្មែរក្រោម នៅភូមិមេរងថ្មី ពាក់អាវយឺតខ្មែរក្រោម ថ្ងៃទី ២២ ខែឧសភា ឆ្នាំ ២០១៧ ។ រូបថតផ្តល់ឲ្យ

ភ្លាម​ៗ បន្ទាប់ពី​រដ្ឋាភិបាល​វៀតណាម​ បាន​កោះហៅ​ក្រុម​យុវជន​ជនជាតិ​ដើម​ខ្មែរក្រោម​ នៅ​ភូមិ​មេ​រង​ថ្មី​ ស្រុក​ផ្នោ​ដាច់​ ខេត្ត​ព្រះត្រពាំង​ ទៅ​សួរចម្លើយ​ ជា​លើក​ទី​ ២ កាលពី​ឆ្នាំ​ ២០១៧​ នោះ​ គណៈកម្មាធិការ​យុវជន​នៃ​សហព័ន្ធ​ខ្មែរ​កម្ពុជាក្រោម​ (KKFYC​) មាន​មូលដ្ឋាន​នៅ​សហរដ្ឋអាមេរិក​ បាន​ចេញ​សេចក្ដីថ្លែង​ការណ៍​ឆ្លើយតប​ទៅ​ នឹង​ការ​បំភិតបំភ័យ​ និង​ថ្កោលទោស​ ចំពោះ​ការ​គំរាមកំហែង​ទៅលើ​សិទ្ធិ​ខ្មែរក្រោម​ ពីសំណាក់​រដ្ឋាភិបាល​វៀតណាម​ ។

ក្រុមយុវជនខ្មែរក្រោមពាក់អាវ​យឺត​ខ្មែរក្រោម​ ដែល​មាន​ដាក់​អក្សរ​ «៧០​ ឆ្នាំ​ កម្ពុជាក្រោម​ នៅ​ក្រោម​នឹម​អាណានិគម​យួន​» ។ រូបថតផ្តល់ឲ្យ
ក្រុមយុវជនខ្មែរក្រោមពាក់អាវ​យឺត​ខ្មែរក្រោម​ ដែល​មាន​ដាក់​អក្សរ​ «៧០​ ឆ្នាំ​ កម្ពុជាក្រោម​ នៅ​ក្រោម​នឹម​អាណានិគម​យួន​» ។ រូបថតផ្តល់ឲ្យ

នៅក្នុង​សេចក្ដីថ្លែង​ការណ៍​នោះ​ គណៈកម្មាធិការ​យុវជន​ នៃ​សហព័ន្ធ​ខ្មែរ​កម្ពុជាក្រោម​ ក៏បាន​ដកស្រង់​នូវ​មាត្រា​ទី​ ១១​ នៃ​សេចក្ដីប្រកាស​ជាស​កល​របស់​ អង្គការសហប្រជាជាតិ​ស្ដីពី​សិទ្ធិ​ជនជាតិ​ដើម​ (UNDRIP​) ដែល​មាន​សេចក្តី​ថា​ “ជនជាតិ​ដើម​គ្រប់រូប​មាន​សិទ្ធិ​ប្រតិបត្តិ​ និង​ធ្វើឲ្យ​រស់​ឡើងវិញ​នូវ​ប្រពៃណី​ និង​ទំនៀមទម្លាប់​ជាវ​ប្ប​ធម៌​របស់​ខ្លួន​ ។ សិទ្ធិ​នេះ​ រួមមាន​ទាំង​សិទ្ធិ​ក្នុង​ការ​ថែរក្សា​ ការពារ​ និង​អភិវឌ្ឍន៍​ អ្វី​ដែល​បង្ហាញ​អំពី​អត្តសញ្ញាណ​ វប្បធម៌​របស់​ខ្លួន​ ដែល​មាន​ពីអ​តី​តកាល​ បច្ចុប្បន្ន​ និង​អនាគត​ ដូចជា​ បុរាណវិទ្យា​ និង​ស្ថានីយ​ប្រវត្តិសាស្ត្រ​ បុរាណវត្ថុ​ រចនា​បទ្ម​ ពិធីបុណ្យ​ បច្ចេកវិទ្យា​ និង​សិល្បៈ​ ទស្សនីយភាព​ និង​ការសម្ដែង​សិល្បៈ​ និង​អក្សរសាស្ត្រ​ ។

គួរ​រំឭក​ផង​ដែរ​ថា​ វៀតណាម​មាន​កាតព្វកិច្ច​អនុវត្ត​តាម​សេចក្ដីប្រកាស​ ជាស​កល​របស់​អង្គការសហប្រជាជាតិ​ស្ដីពី​សិទ្ធិ​ជនជាតិ​ដើម​ (UNDRIP​) ដើម្បី​ជួយការ​ពារ​ជនជាតិ​ដើម​ វប្បធម៌​ និង​ អត្តសញ្ញាណ​របស់​ពួកគេ​ ។ ដោយ​មើលឃើញ​ ពីសា​រៈសំ​ខាន់​នៃ​សិទ្ធិ​ជនជាតិ​ដើម​នេះ​ ក្រុម​យុវជន​ខ្មែរក្រោម​នៅ​ដែនដី​កម្ពុជាក្រោម​ យល់ឃើញ​ថា​អាវយឺត​មាន​លក្ខណៈ​លើកកម្ពស់​ នូវ​អត្តសញ្ញាណ​ជនជាតិ​ដើម​របស់​ខ្លួន​ ក៏បាន​យក​បោះពុម្ព​ ដើម្បី​ចែក​គ្នា​ពាក់​ ។ ផ្ទុយទៅវិញ​ គំនិត​ផ្ដួចផ្ដើម​គួរឲ្យ​កោតសរសើរ​របស់​ក្រុម​យុវជន​ជនជាតិ​ដើម​ ក្នុង​ការ​លើកកម្ពស់​ និង​ផ្សព្វផ្សាយ​នូវ​ សេចក្ដីប្រកាស​ជាស​កល​របស់​អង្គការសហប្រជាជាតិ​ស្ដីពី​សិទ្ធិ​ជនជាតិ​ដើម​ (UNDRIP​) ដែល​រដ្ឋាភិបាល​វៀតណាម​ មាន​កាតព្វកិច្ច​ត្រូវ​ធ្វើ​ដោយខ្លួនឯង​នោះ​ បែរជា​រដ្ឋាភិបាល​វៀតណាម​ តប​មកវិញ​ ដោយ​ជ្រើសរើស​វិធី​ដាក់​ពិន័យ​ក្រុម​យុវជន​តាមរយៈ​កោះហៅ​ទៅ​សួរចម្លើយ​ នៅ​ការិយាល័យ​នគរបាល​ ដើម្បី​គំរាមកំហែង​ ។

 

លិខិត​កោះហៅ​របស់អាជ្ញាធរឃុំ​មេ​រង​ថ្មី​ ។ រូបថតផ្តល់ឲ្យ
លិខិត​កោះហៅ​របស់អាជ្ញាធរឃុំ​មេ​រង​ថ្មី​ ។ រូបថតផ្តល់ឲ្យ

បន្ទាប់ពី​បារាំង​បាន​ផ្ទេរ​ដែនដី​កម្ពុជាក្រោម​ ឬដែនដី​កូស័ងស៊ីន​ទៅ​ឲ្យ​វៀតណាម​បន្ត​ធ្វើអាណានិគម​លើ​ពលរដ្ឋខ្មែរ​ក្រោម​ កាលពី​ថ្ងៃទី​ ៤ ខែមិថុនា​ ឆ្នាំ​ ១៩៤៩​ មក​ សិទ្ធិ​សេរីភាព​របស់​ជនជាតិ​ដើម​ខ្មែរក្រោម​ ត្រូវ​រដ្ឋាភិបាល​យួន​រំលោភបំពាន​ជាបន្តបន្ទាប់​ ក្នុង​នោះ​ មានការ​ចាប់​ព្រះសង្ឃ​ និង​ពលរដ្ឋ​ដាក់​ពន្ធនាគារ​ ដោយ​ចោទ​ថា​ ធ្វើសកម្មភាព​ប្រឆាំង​រដ្ឋាភិបាល​ ជាដើម​ ៕