ដោយ ថាច់ ប្រីជា គឿន l សារព័ត៌មាន ព្រៃនគរ
កាសែតវៀតណាមក្នុងស្រុកប៉ុន្មានថ្ងៃនេះ មានសេចក្ដីរាយការណ៍ ជាបន្តបន្ទាប់ជុំវិញរឿងក្រុមហ៊ុនឯកជនមួយបានមកសង់ភោជនីយដ្ឋាន, Karaoke ដ៏ធំមួយនៅលើដីវត្តសិរីតេជោមហាទុប ធ្វើឲ្យ មានក្ដីបារម្ភយ៉ាងខ្លាំងពីពលរដ្ឋ និងក្រសួងវប្បធម៌នៃរដ្ឋាភិបាល វៀតណាមថា អាចធ្វើឲ្យប៉ះពាល់ដល់វត្តអារាមមួយនេះ ។
ព្រះវិហារវត្តសិរីតេជោមហាទុប។
វត្តសីរីតេជោមហាទុប ឋិតនៅក្នុងទីរួមខេត្តឃ្លាំង ជាវត្តខ្មែរដ៏មាន ចំណាស់មួយនៅដែនដីកម្ពុជាក្រោម ជាកន្លែងដែលពុទ្ធបរិស័ទ ខ្មែរក្រោមនៅទីនេះចួលមកធ្វើបុណ្យសុន្ទរ៍ទានតាមគន្លងព្រះពុទ្ធ សាសនា ។ ក្រៅពីនេះ វត្តនេះ ត្រូវបានរដ្ឋាភិបាលវៀតណាមចាត់ ទុកជាតំបន់ទេសចរណ៍មួយក្នុងចំណោមតំបន់ទេសចរណ៍ទាំង ៧ នៅតំបន់វាលទំនាបនៃដងទន្លេមេគង្គ និងរដ្ឋាភិបាលវៀតណាម បានចេញសេចក្ដីសម្រេចមួយ កាលពីឆ្នាំ ១៩៩៩ ទទួលស្គាល់វត្ត នេះថា ជាតំបន់បេតិភណ្ឌសិល្បៈថ្នាក់ ជាតិ ( di tích nghệ thuật cấp quốc gia ) ។
ភោជនីយដ្ឋានដែលកំពុងសាងសង់នៅក្បែរវត្តសិរីតេជោមហាទុបប្រមាណ ២០ ម៉ែត្រ ។
យោងតាមសេចក្ដីរាយការណ៍របស់កាសែត ទូយត្រែ (Tuoi Tre) ស្រង់ប្រភពព័ត៌មានពីមន្ទីរសន្តិសុខសង្គមនៃនគរបាលខេត្តឃ្លាំង បានឲ្យដឹងថា បច្ចុប្បន្ន ភោជនីយដ្ឋានដែលកំពុងដំណើរការសាង សង់នេះ មានកន្លែងច្រៀង Karaoke ៥ បន្ទប់ធ្វើសកម្មភាពមិន អាជ្ញាបណ្ណអាជីវកម្មពីក្រសួងពាក់ព័ន្ធ ។ បន្ទប់ Karaoke នេះនៅ ជិតផ្ទៃដីវត្តប្រមាណ ១០ ម៉ែត្រ ខណៈដែលច្បាប់ត្រូវកសាងឲ្យ ឆ្ងាយពីវត្តជាង ២០០ ម៉ែត្រ ។
ប្រភពព័ត៌មានរាយការណ៍ថា អ្នកដែលផ្ដល់អាជ្ញាបណ្ណសាងសង់ ភោជនីយដ្ឋាននេះ គឺក្រុមហ៊ុនភាគហ៊ុនអន្តរជាតិ សាត្រាកូ (Công ty cổ phần quốc tế Satraco) ដែលក្រុមហ៊ុនមួយនេះ មានការទទួលស្គាល់ពីគណៈ កម្មាធិការប្រជាជនខេត្តឃ្លាំងរបស់រដ្ឋាភិបាល ចុះថ្ងៃទី ២៨ ខែធ្នូ ឆ្នាំ ២០១១ ។ គម្រោងសាងសង់ភោជនីយដ្ឋាននេះ នៅលើផ្ទៃដី ប្រមាណ ២០.០០០ ម៉េត្រក្រឡា ក្នុងនោះ ជាង ១២.០០០ ម៉េត្រ ក្រឡា ជាដីរបស់រដ្ឋ និងក្រៅពីនេះជាដីរបស់វត្តសិរីតេជោមហាទុប ។
វត្តប្រគល់ដីឲ្យសាងសង៖
ព្រះតេជព្រះគុណ គឹម រ៉េន ព្រះចៅអធិការវត្តមហាទុប បានប្រាប់ កាសែត ទូយត្រែ ថា ផ្ទៃដីដែលក្រុមហ៊ុនសាត្រាកូ កំពុងដំណើរ ការសាងសង់ ត្រូវបានយល់ព្រម និងចុះកិច្ចសន្យាជាមួយនឹងវត្ត ។
បារម្ភសត្វប្រចៀវហើរចេញពីវត្ត៖
លោក សឺន ង៉ុក វ៉ាង នាយករងសាលាវប្បធម៌ និងវិចិត្រសិល្បៈ ខេត្តឃ្លាំង បានថ្លែងថា សកម្មភាពនេះ អាចធ្វើឲ្យសត្វប្រចៀវហើរ ចេញពីវត្តព្រោះសំឡេងរំពង ។
ប៉ះពាល់វប្បធម៌ខ្មែរ៖
អ្នកស្រាវជ្រាវវប្បធម៌នៅកម្ពុជាក្រោមម្នាក់បានប្រាប់ កាសែត ទូយ ត្រែ ដោយសុំមិនបញ្ចេញឈ្មោះ ថា លោកមានការឈឺចាប់យ៉ាង ខ្លាំង ព្រោះបានឃើញសកម្មភាពផ្ទុយនឹងស្មារតីអភិរក្សវប្បធម៌ជនជាតិ ។
រំខានដល់ការប្រតិបត្តិធម៌៖
ពលរដ្ឋខ្មែរក្រោមជាពុទ្ធបរិស័ទម្នាក់នៅក្នុងចំណុះជើងវត្តសិរី តេជោមហាទុប បានប្រាប់ សារព័ត៌មាន ព្រៃនគរ នៅថ្ងៃទី ១៣ ខែមករា នេះថា សកម្មភាពសាងសង់ភោជនីយដ្ឋាននេះ វាធ្វើឲ្យ រំខានដល់ការប្រតិបត្តិធម៌ និងការធ្វើបុណ្យសុន្ទរ៍ទានរបស់ព្រះ សង្ឃនៅក្នុងវត្ត និងពុទ្ធបរិស័ទដែលមកវត្តធ្វើបុណ្យ ។
សូមបញ្ជាក់ថា កាលពីថ្ងៃទី ១៥ ខែសីហា ឆ្នាំ ២០០៧ ព្រះវិហារ វត្តសេរីតេជោមហាទុប ត្រូវបានឆេះដោយភ្លើងទៀនវស្សា ហើយ បានកសាងឡើងវិញតាមលំនាំដើម ។ វត្តនេះ បានកកើតឡើង ក្នុង ព.ស. ២១១២ គ.ស. ១៥៦៩ បើគិតមកទល់ឆ្នាំ ២០១៣ នេះ មានអាយុកាល ៤៤៤ ឆ្នាំហើយ ៕
