ដោយ ស៊ឺន ចែងចើន
សមណសិស្សខ្មែរក្រោម នៃសាលាពុទ្ធិកមធ្យមសិក្សា ឬសាលាភាសាបាលី កម្រិតបឋមភូមិ និងទុតិយភូមិ នៅតាមវត្តអារាមនានា ទាំង ១៤៣ វត្ត ក្នុងខេត្តព្រះត្រពាំង បានចាប់ផ្ដើមបើកបវេសនកាល ឆ្នាំសិក្សា ព.ស ២៥៦៤ នៅថ្ងៃ ១៥ ឧសភា ២០២០ នេះ ក្រោមការចាត់ តាំងរបស់សមាគមព្រះសង្ឃសាមគ្គីស្នេហាជាតិស្រុក និងខេត្ត នៃខេត្តព្រះត្រពាំង ។
នៅព្រឹកថ្ងៃសុក្រ ៩ រោច ខែពិសាខ ឆ្នាំជូត ទោស័ក ព្រះពុទ្ធសករាជបានឈានចូល ២៥៦៤ ត្រូវ នឹងថ្ងៃទី ១៥ ខែឧសភា ២០២០ នេះ គណ:កម្មាធិការពុទ្ធិកសិក្សាតាមវត្តអារាមនានា នៅក្នុងខេត្តព្រះត្រពាំង បានបើកកម្មវិធីជួប ជុំរវាងសមណសិស្ស និងគ្រូបង្រៀន ដើម្បីចាប់ផ្ដើមបើកវគ្គសិក្សាថ្មី ប្រចាំ ព. ស. ២៥៦៤ ដូច រៀងរាល់ឆ្នាំដែរ ។
រៀងរាល់ឆ្នាំ ឲ្យតែដល់ថ្ងៃ ១៤ កើត ខែវិសាខ សមណសិស្ស ដែលបានចុះឈ្មោះចូលរៀន និងមានលិខិតឧទ្ទេសនាមទៅរៀនរបស់សាលាគណខេត្ត និងស្រុក ដើម្បីបន្តការសិក្សាភាសាបាលីនោះ តែងតែនិមន្តចេញពីវត្តមួយទៅវត្តមួយ ដើម្បីទៅកាន់បន្ទប់រៀននៅតាមវត្ត ដែលបានបើកថ្នាក់ពុទ្ធិកមធ្យមសិក្សាបឋមភូមិ និងទុតិយភូមិ នៅថ្ងៃ ១ រោច ខែវិសាខ តាមការបញ្ជូនរបស់សមាគមសង្ឃ ។ ប៉ុន្តែ សម្រាប់កម្មវិធីសិក្សាថ្នាក់ពុទ្ធិកសិក្សា នៅឆ្នាំនេះ មានការយឺតជាងឆ្នាំកន្លងទៅ ដោយសារស្ថានភាពពិភពលោករងឥទ្ធិពលនៃការរីករាលដាលជំងឺកូវីដ-១៩ (Covid-19) ។
កម្មវិធីសិក្សានេះ ពុទ្ធិកមធ្យមសិក្សាបឋមភូមិ (ថ្នាក់ពុទ្ធិកអនុវិទ្យាល័យ) សមណសិស្សត្រូវរៀនរយៈពេល ៤ ឆ្នាំ និងពុទ្ធិកមធ្យមសិក្សាទុតិយភូមិ (ថ្នាក់ពុទ្ធកវិទ្យាល័យ) សមណសិស្សត្រូវរៀនរយៈពេល ៣ ឆ្នាំ ថែមទៀត ដែលសរុបទាំងអស់រយៈពេល ៧ ឆ្នាំទើបចប់កម្មវិធីសិក្សាភាសាបាលី នៅក្នុងខេត្តមួយនេះ ។ វិញ្ញាសាដែលត្រូវលើកយកមកសិក្សាក្នុងថ្នាក់ទាំង ២ កម្រិតនេះ មានដូចជា វិញ្ញាសា ព្រះវិន័យ តែងសេចក្ដី សរសេរតាមអាន ធម្មបទ វេយ្យាករណ៍បាលី ភាសាខ្មែរ ព្រះគាថា ព្រះអភិធម្ម ទស្សនៈពុទ្ធសាសនា អង់គ្លេស ទូរេនិទាន គណិតវិទ្យា ព្រះបាតិមោក្ខ បរមាធិប្បាយ សាសនាសកលលោក កំណាព្យខ្មែរ សម្ព័ន្ធ មង្គលត្ថទីបនី ជាដើម ។
យោងតាមរបាយការណ៍របស់គណ:កម្មាធិការពុទ្ធិកសិក្សាខេត្តព្រះត្រពាំង ថា ឆ្នាំសិក្សាថ្មី ព.ស ២៥៦៤ នេះ នៅតាមបណ្ដាវត្ត ដែលបើកថ្នាក់ពុទ្ធិកកម្រិតមធ្យមសិក្សាបឋមភូមិ និងទុតិយភូមិ (ថ្នាក់ខេត្ត) ទូទាំងខេត្តមានចំនួន ៣៤ បន្ទប់ ក្នុងនោះ ថ្នាក់ពុទ្ធិកមធ្យមសិក្សាបឋមភូមិ ឆ្នាំទី ៤ (បាលីរង) មាន ១៧ បន្ទប់ ចំនួនសិស្ស ៣៦៩ អង្គ និងរូប ។ ថ្នាក់ពុទ្ធិកមធ្យមសិក្សាទុតិយភូមិ ឆ្នាំទី ១ (ថ្នាក់គរុកោសល្យទី ១) មាន ៨ បន្ទប់ ចំនួនសិស្ស ២២៣ អង្គ និងរូប ។ ថ្នាក់ពុទ្ធិកមធ្យមសិក្សាទុតិយភូមិ ឆ្នាំទី ២ (ថ្នាក់គរុកោសល្យទី ៣) មាន ៥ បន្ទប់ ចំនួនសិស្ស ១៥០ អង្គ និងរូប ។ ថ្នាក់ពុទ្ធិកមធ្យមសិក្សាទុតិយភូមិ ឆ្នាំទី ៣ (ថ្នាក់គរុកោសល្យទី ៣) មាន ៤ បន្ទប់ ចំនួនសិស្ស ១២៩ អង្គ និងរូប ។ សរុបទាំងអស់មានចំនួន ៨៧១ អង្គ និងរូប ។ ចំណែកសាលាពុទ្ធិកមធ្យមសិក្សាបឋមភូមិ ចាប់ពីថ្នាក់ទី ១ ដល់ទី ៣ ឬថ្នាក់បាលីទី ១ ដល់បាលីទី ៣ នៅមិនទាន់មានតួលេខចេញពីរបាយការណ៍របស់គណ:កម្មាធិការពុទ្ធិកសិក្សាថ្នាក់ស្រុក បង្ហាញថា មានសមណសិស្ស និងសិស្សានុសិស្សចំនួនប៉ុន្មានអង្គ និងរូប នៅឡើយទេ ។ ប៉ុន្តែ បើតាមការប៉ាន់ប្រមាណថា ចំនួនសិស្សទាំង ៣ ថ្នាក់នៃសាលាពុទ្ធិកមធ្យមសិក្សាបឋមភូមិ អាច នឹងមានចំនួនសមណសិស្ស និងសិស្សានុសិស្សច្រើនជាងថ្នាក់ពុទ្ធិកកម្រិតមធ្យមសិក្សាបឋមភូមិ និងទុតិយភូមិ ។
កម្មវិធីសិក្សាថ្នាក់ពុទ្ធិកសិក្សា នៅខេត្តព្រះត្រពាំង ជាកម្មវិធីសិក្សាមួយ ផ្ដោតលើការរៀនអក្សរសាស្ត្រខ្មែរ និងភាសាបាលី ក្រោមការចាត់តាំងរបស់គណៈមន្ត្រីសង្ឃខ្មែរ នៅដែនដីកម្ពុជាក្រោម ដែលមានឈ្មោះថា «សមាគមព្រះសង្ឃសាមគ្គីស្នេហាជាតិ» ។ សមាគមព្រះសង្ឃសាមគ្គីស្នេហាជាតិ បានបង្កើតឡើង នៅក្នុងឆ្នាំ ១៩៦៥ ដោយព្រះតេជព្រះគុណ សឺង វង់ (Son Vong) អតីតព្រះបាឡាតគណខេត្តព្រះត្រពាំង ។ សមាគមមួយនេះ ដើរតួនាទីបណ្ដុះបណ្ដាលវិស័យអប់រំដល់ពលរដ្ឋ និងព្រះសង្ឃខ្មែរក្រោម បានសិក្សារៀនសូត្រទាំងផ្នែកពុទ្ធចក្រ និងអាណាចក្រ ។
ខាងក្រោមជារូបភាពខ្លះៗ នៃសិស្សានុសិស្ស សមណសិស្ស គណៈកម្មការវត្ត និងគ្រូបង្រៀន នៅតាមវត្ត ដែលបានបើកថ្នាក់ពុទ្ធិកសិក្សា ។ រូបពីបណ្តាញសង្គមហ្វេសប៊ុក
