ឥស្សរជនប្រឆាំងការរើសអើងពូជសាសន៍ អាហ្រ្វិកខាងត្បូងទទួលមរណភាព

លោក Nelson Mandela និមិត្តរូបនៃការតស៊ូប្រឆាំងនឹងការរើសអើងពូជសាសន៍ និងជាឥស្សរជននយោបាយនៃសតវត្សរ៍ទី ២០ ដែលត្រូវបានគេគោរពគ្រប់គ្នា បានស្លាប់នៅអាយុ ៩៥ ឆ្នាំ កាលពី ថ្ងៃទី ០៥ ខែធ្នូ ម្សិលមិញ។

លោក Nelson Mandela និមិត្តរូបនៃការតស៊ូប្រឆាំងនឹងការរើសអើងពូជសាសន៍នៅអាហ្រ្វិកខាងត្បូង។ រូបថត AFP

ម្ចាស់ពានរង្វាន់ Nobel សន្តិភាព ដែលត្រូវបានជាប់ឆ្នោតជាប្រធានាធិបតីទី ១ ស្បែកខ្មៅនៅអាហ្វ្រិកខាងត្បូង បន្ទាប់ពីចំណាយពេលជិត ៣ ទសវត្សរ៍ជាអ្នកទោសនយោបាយ បានទទួលមរណភាពនៅផ្ទះរបស់លោកនៅទីក្រុង Johannesburg បន្ទាប់ពីតស៊ូប្រយុទ្ធប្រឆាំងនឹងជំងឺសួត។

ព័ត៌មាននេះត្រូវបានផ្សព្វផ្សាយទៅទូទាំងប្រទេស និងពិភពលោកដោយ ប្រធានាធិបតីអាហ្វ្រិកខាងត្បូង Jacob Zuma ដែលបានផ្សាយសម្តែងនូវទុក្ខក្រៀមក្រំនេះ ។

លោក Zuma ដែលត្រូវបានជាប់ឃុំនៅលើកោះ Robben ផងដែរនោះបាននិយាយថា « លោក Nelson Rolihlahla Mandela ជាទីស្រឡាញ់របស់ពួកយើង ជាប្រធានាធិបតីស្ថាបនិកនៃប្រទេសប្រជាធិបតេយ្យរបស់យើង បានចាកចេញហើយ»។

«ប្រទេសរបស់យើងបានបាត់បង់នូវ មនុស្សដ៏អស្ចារ្យ, ប្រជាជាតិយើងបានបាត់បង់នូវឪពុកដ៏អស្ចារ្យ»។

លោក Mandela ត្រូវបានបញ្ជូនចេញពីមន្ទីរពេទ្យកាលពីខែកញ្ញា ប៉ុន្តែត្រូវបានបន្តទទួលការព្យាបាលនៅឯផ្ទះរបស់លោក ។ រូបលោកមានបញ្ហាសួតនេះយូរមកហើយ បន្ទាប់ពីបានឆ្លងជំងឺ របេងកាលពីនៅក្នុងគុក ៕ ភ្នំពេញប៉ុស្តិ៍