(សឺង វិចិត្រ l VOKK)–កម្លាំងសមត្ថកិច្ចជាង ១០០ នាក់ ត្រូវបានដាក់ពង្រាយនៅខាងមុខសាលារាជធានីភ្នំពេញ ខណៈ ប្រជាសហគមន៍បឹងកក់ នៅព្រឹកថ្ងៃព្រហស្បតិ៍នេះ កំពុងតែបន្តការតវ៉ារបស់ខ្លួន ។
អ្នកភូមិបឹងកក់ នៅព្រឹកថ្ងៃព្រហស្បតិ៍នេះ នៅតែប្រមូលគ្នានៅខាងមុខសាលារាជធានីភ្នំពេញ ដើម្បីទាមទារឲ្យសាលារាជ ធានី ភ្នំពេញ ដោះស្រាយបញ្ហាដីធ្លី ដែលអូសបន្លាយយូរមកហើយ។
កាលពីថ្ងៃពុធ ទី ២៥ ខែធ្នូ ម្សិលមិញនេះ មនុស្សប្រមាណ ១០០ អ្នកជាអតីតអ្នកភូមិបូរីបឹងកក់ និងបូរីកីឡា បន្តធ្វើបាតុកម្ម ខាង មុខសាលាក្រុងភ្នំពេញ ទាមទារឲ្យអាជ្ញាធរក្រុងភ្នំពេញដោះស្រាយបញ្ហាដីធ្លី ក៏ដូចជាបញ្ហាមួយចំនួន ដែលសាលា ក្រុងភ្នំពេញមានសន្យាជាមួយនឹងពួកអ្នកភូមិពេលឲ្យគេរុះចេញ ។
បាតុករប្រមាណ ១០០ រូបបានប្រើអូប៉ាល័រធំ ២ គ្រឿងឈខាងមុខសាលាក្រុងស្រែក ទាមទារឲ្យអាជ្ញាធរដោះ ស្រាយបញ្ហា ដីធ្លី និងនិយាយអំពីទុក្ខលំបាករបស់ខ្លួនពេលដែលត្រូវចាក់ចេញពីកន្លែងរបស់ខ្លួន ។
ក្រុមអ្នកតវ៉ាទាមទារឲ្យអាជ្ញាធរចុះជួបប្រជាពលរដ្ឋព្រោះមានសន្យានឹងជួបជុំដោះស្រាយបញ្ហាលំនៅឋាន របស់ពួកគេ ។ ប៉ុន្តែ ខាងសាលាក្រុងមិនមានសកម្មភាពអ្វីឡើយ ។ ដល់ម៉ោង ១៤ ក្រុមបាតុករក៏បន្តបាតុកម្មដោយដុតកង់ឡាន ប៉ុន្តែ តំណាងសាលាក្រុងភ្នំពេញ ក៏មិនឃើញមានវត្តមានឡើយ ។
និយាយជាមួយអ្នកកាសែតក្នុងស្រុកមួយចំនួនថ្ងៃ ២៤ ខែធ្នូ លោក ប៉ា សុជាតាវង្ស អភិបាលក្រុងភ្នំពេញ បានចោទប្រកាន់ ថា ក្រមអ្នកតវ៉ានេះជាអំពើនយោបាយមួយ ដែលមានគណបក្សមួយឈខាងក្រោយដឹកនាំ ។ ប៉ុន្តែពាក្យចោទ ប្រកាន់នោះ ត្រូវបានក្រុមអ្នកបាតុករបដិសេធន៍ចោល ។
ថ្ងៃ ២៤ ខែធ្នូក្រុមបាតុករនេះ ត្រូវសមត្ថកិច្ចបង្ក្រាបបណ្ដាលឲ្យព្រះសង្ឃ និង អ្នកភូមិ បីរូបត្រូវរបួស ក្នុងនោះមានមួយ នាក់ត្រូវរបួសធ្ងន់ ។
ប្រជាពលរដ្ឋអះអាងថា ពួកគេជាង ៣០០០ គ្រួសារ ត្រូវបានអាជ្ញាធរមូលដ្ឋាន បានបណ្តេញចេញ ពីតំបន់បឹងកក់ឲ្យ ទៅនៅ រាយប៉ាយក្នុងខណ្ឌទាំង ៩ ក្នុងរាជធានី ចាប់តាំងពីឆ្នាំ ២០០៨ មក ដោយសាលារាជធានីភ្នំពេញ យកដីនៅតំបន់នោះឲ្យទៅ ក្រុមហ៊ុនស៊ូកាគូអ៊ីន របស់លោក ឡៅ ម៉េងឃិន សមាជិកព្រឹទ្ធសភាមកពីគណបក្សប្រជាជនកម្ពុជា ក្រោមគម្រោង អភិវឌ្ឍន៍ ៩៩ ឆ្នាំ ដែលធ្វើឲ្យប៉ះពាល់ពលរដ្ឋនៅតំបន់នោះជាង ៤០០០ គ្រួសារ ៕
